Nawakáraꞌajeño puraꞌakó pajwaꞌatéchaka Jesús nókana nakú yukuna marí
26
Jesús ñapátaka newíñaꞌatakana ejomi, rimá raꞌapiyatéjenajlo:
2 —Kaja iweꞌepí iyamá kala iꞌimajemi naleꞌejé fiesta Pascua iphájika rená chojé. Riwakajé naꞌajé nuká ajopánajlo nenókaloje nuká aꞌawaná apiyákanami nakojé. Inaꞌuké iꞌimakáloje nupalamane penaje iꞌimaká nuká —ke rimaká najló. a
3 Riwakajé sacerdótena wakáraꞌajeño, eyá Tupana purákaꞌalo nakú jewíñaꞌatajeño, judíona nakiyana, kele awakaño Caifás ñakaré kópeje. Sacerdótena wakáraꞌajeri Caifás iꞌimaká riwakajé.
4 Re napuraꞌó pajwaꞌatéchaka Jesús nakú, namákaloje mékeka napatakajla riká, unká ajopana weꞌepílaja nenókaloje riká penaje.
5 Eꞌiyonaja nemá pajlokaka:
—Unká wapatalaje riká fiesta eꞌiyá. Walaꞌakela riká ñaké reꞌiyá, kajrú wani inaꞌuké yúchaꞌakojla wachá raú.
Pajluwájaru akhoꞌoká nakaje jilá Jesús nakojé yukuna marí
6 Jesús iꞌimari Betania e Simón napona patákaꞌatakarojlo ñakaré chu.
7 Re riꞌimaká ee, pajluwájaru iphayo rawaꞌajé. Nakaje jilami iꞌimari rukapi wíluru chu. Jipa alabastro nakiyá laꞌakanami wíluru iꞌimaká. Richu puꞌumé amarí, kawemini wani iꞌimá. Jesús yáꞌako mesa nakú ejé rokhoꞌó riwilá eꞌiyajé riká.
8 Raꞌapiyatéjena amaka aú rulaꞌaká ilé ke, nayúchaꞌo ruchá, nemá pajlokaka:
—¡Naje rukupá mapeja wani kele puꞌumé amarí!
9 Kawemini wani kele puꞌumé amarí. Roꞌokela ajopánajlo riká, rujñaꞌajla liñeru riwemí kajrú, raú roꞌojla kamuꞌují laꞌakaño ñathé.
10 Jesús jemaꞌarí mékeka napuraꞌakó pajwaꞌatéchaka, raú rimá najló:
—¿Naje chi iyúchaꞌo kelerú inanaru cha? Palá ruliꞌichaka nuká nakaje ruliꞌichaje nojló aú.
11 Ñakeja kamuꞌují laꞌakaño iꞌimajika ijwaꞌaté, eyá nuká unká ñakeja kalé nuꞌumajika ijwaꞌaté maare.
12 Palá marirú liꞌichaka nuká, rokhoꞌochákale puꞌumé amarí nunakojé, raú rulamáꞌatiya nunapona. Natoꞌotájika nutami támijimina toꞌotákelana chojé wakajejlo penaje riꞌimajé.
13 Nujwaꞌatéjena iꞌijnajeño Tupana iꞌimataka inaꞌuké kapichákajo liyá yukuna iꞌimajé ajopánajlo, ajopánajlo ke. Riwakajé neꞌemajé kaja wajé ruliꞌichaje nuká yukuna najló, napechu kapicháñaaka piyá ruká —ke Jesús kemaká najló.
Judas aꞌaká ripinánajlo Jesús yukuna marí
14 Iyamá iphata jiꞌimaje nakojé (12) kele Jesús jaꞌapiyatéjena iꞌimaká, nanakiyana Judas iꞌimaká. Riká iꞌijnari sacerdótena wakáraꞌajeño waꞌaté puraꞌajó.
15 Rimá rijló:
—¿Méreje aꞌajé nojló liñeru, noꞌokáloje ijló Jesús?
Raú naꞌá rijló treinta monedas riwemí. b
16 Reyá aꞌajná ñoꞌojó Judas aꞌakeri rinakojó Jesús, ramákaloje mékechamika palani raꞌakana najló.
Jesús ajñaka fiesta aꞌajnená raꞌapiyatéjena waꞌaté yukuna marí
17 E kaja naleꞌejé fiesta Pascua iphari rená chojé. Riwakajé najñake pan mamúraꞌatakanaru. E raꞌapiyatéjena iphaño Jesús awaꞌajé, nemá rijló:
—¿Mere chi piwata walaꞌaká fiesta Pascua aꞌajnená?
18 Rimá najló:
—Iꞌijná pajimila ejo. Re iphátaje pajluwaja inaꞌuké. Rijló imaje: “Wewíñaꞌatajeri kemíchari rinakuwá: ‘Yewicha riphaka rená chojé nojló, raú nuwata riñakaré chu fiesta Pascua aꞌajnená ajñakana noꞌopiyatéjena waꞌaté’ ”, ke imájika rijló nunaku.
19 Raú raꞌapiyatéjena laꞌañó Jesús wakáraꞌaka nalaꞌaká ke. Nalaꞌá re fiesta Pascua aꞌajnená.
20 Lapichami Jesús yáꞌako iyamá iphata jiꞌimaji nakojé (12) kele raꞌapiyatéjena waꞌaté mesa nakú.
21 Najñaka naꞌajnewá ee, rimá najló:
—Meꞌetení numá ijló: Pajluwaja inakiyana maare aꞌajeri nupinánajlo nuká.
22 Raú kamuꞌují napechu laꞌakó. E pajewémichaka ke nemaká rijló:
—Wawakáraꞌajeri, ¿nuká chi kele pimá nakú?
23 Jesús kemari najló:
—Ilé ejátari pan nuparatune chojé nujwaꞌaté, aꞌajeri nupinánajlo nuká.
24 Inaꞌuké iꞌimakáloje nupalamane penaje iꞌimaká nuká. Piyuke Tupana purákaꞌalo lanaꞌakéjami kemaká nunaku iꞌimaká, ke nalaꞌajika nuká, eꞌiyonaja kalé chapú wani nakaje iꞌimajika ilé aꞌajeri nuká nupinánajlo. Unkákela rimothoꞌojla iꞌimaká, palani riꞌimakajla rijló.
25 Raú Judas, ripinánajlo raꞌajeri, kemari rijló:
—Wewíñaꞌatejeri, ¿nuká chi kele pimá nakú?
—Aꞌa —ke rimaká rijló.
26 Najñaka naꞌajnewá ee, Jesús ñaꞌarí rikápojo pan, rimá Tupánajlo:
—Palá pilaꞌaká weká marí pan aú.
Rejomi ritupaꞌá rinakiyana, e ritamákaꞌata raꞌapiyatéjenajlo riká. Rimá najló:
—Ajñá riká. Marí nunapona.
27 Rejomi rijñaꞌá rikápojo tiyela, kajmú jalá amúraꞌatakanami iꞌimari chu. Rimá Tupánajlo:
—Palá pilaꞌaká weká marí aú.
Rejomi raꞌapata raꞌapiyatéjenajlo riká, rimá najló:
—Iꞌirá riká. Piyukeja iká iꞌirajeño marí tiyela chu iꞌimakare.
28 Nutakaꞌajika ichaya wakajé, kajrú nura akhoꞌojiko nophú chiyá. Ripalamane aú Tupana amajo kajrú inaꞌukena chaje, puꞌuwaré nalaꞌakare liyá. Ilé ke rilaꞌajika ichaya, iyuríkoloje ripalamane.
29 Unká nuꞌuralaje piño ijwaꞌaté marí ejaꞌawá chu marí kaje jalá. Noraꞌapá waꞌaté weꞌemajika jeꞌechú chu wakajé, nuꞌurajé piño wajé kaje jalá ijwaꞌaté re —ke Jesús kemaká najló.
Unká chiyó Pedro michoꞌotá Jesús chaya, Jesús iꞌimari rijló riyukuna. Marí riyukuna
—Ñaano pani lapí piyuke ipechu laꞌajiko ujwí nuliyá. Nokoja iyuríjika nuká. Tupana purákaꞌalo lanaꞌakéjami kemari: “Nenoje ovéjana liyá nalamáraꞌajeri, raú makajmala neñáajika riká”, ke rimaká.
32 Nenoje nuká, eꞌiyonaja kalé numakápoꞌojo piño nopumí chuwá. Rejomi nuꞌujnajé Galilea ejo itukumá.
33 E Pedro kemari rijló:
—Apala ajopana kaꞌajná pechu laꞌajero ujwí piliyá, nuká kalé unká wani nupechu laꞌalajo ujwí piliyá.
34 Jesús kemari rijló:
—Pemaꞌá numaká pijló: Unká chiyó kapere yakaꞌá chuwajá lapí, kaja weji ke pecha pimichoꞌotájika nuchaya.
35 Pedro kemari piño rijló:
—Ewá kalé nenójika nuká pijwaꞌaté, eꞌiyonaja unká wani numichoꞌotálaje pichaya.
Ajopana raꞌapiyatéjena kemaño ñaké kaja.
Jesús puraꞌakó Tupana waꞌaté Getsemaní e yukuna marí
36 E kaja Jesús jáchoꞌoro raꞌapiyatéjena waꞌaté ají ke Getsemaní ejo. Re rimá najló:
—Maare iyaꞌo, nupuraꞌajiko Noraꞌapá waꞌaté ketana.
37 Riwaꞌa aꞌajná ñoꞌojó kemachi rijwaꞌató Pedro, Juan, Santiago, keleja. Rejéchami ripechu laꞌakó kamuꞌují wani.
38 E rimá najló:
—Kamuꞌují wani nupechu meꞌetení nujluwa. Iyuró maare, ikamátaniño kalé.
39 E raꞌapáñaa neká aꞌajná ñoꞌojó pani. Rejé rijlámaꞌo teꞌerí jimaje. Ripuraꞌó Tupana waꞌaté, rimá rijló:
—Noraꞌapá, piwátajika ee, piꞌimatá nuká marí chapú kaje yajwé amákana liyá. Riꞌimaniña kalé nuwátaka ke; nuwata riꞌimaká piwátaka ke —ke rimaká rijló.
40 E ripaꞌó raꞌapiyatéjena chaje, amari manaꞌija neꞌemaká kamátakajo nakú. Rimá Pédrojlo:
—¿Unká chi méñoꞌojo iꞌimalajla kajmuruna nujwaꞌaté pajluwa kamú jená ketana?
41 Ikamátaniño, ipuraꞌó Tupana waꞌaté puꞌuwaré laꞌakaná aꞌaká piyá imeꞌé rijluwa. Re ipechu nakú ilaꞌakáloje palá penaje, eꞌiyonaja kalé unká méñoꞌojo ilaꞌalajla palá ikoja —ke rimaká najló.
42 E riꞌijná piño Tupana waꞌaté puraꞌajó, rimá rijló:
—Noraꞌapá, piwátajika ee, piꞌimatá nuká marí chapú kaje yajwé amákana liyá. Pilaꞌá piwátaka ke nuká.
43 E ripaꞌó piño raꞌapiyatéjena chaje, amari neꞌemaká piño kamátakajo nakú, tapú cháꞌatakale neká.
44 Riyurí nakamátako. E ripaꞌó piño weji ke pe laꞌaká nakú Raraꞌapá waꞌaté puraꞌajó. Ñakeja kaja rimaká rijló.
45 Rejomi ripaꞌó piño raꞌapiyatéjena iꞌimaká ejo, rimá najló:
—¿Re joꞌó kaja chi ikamátako iwatánaꞌakaloje penaje? Chuwa, kaja riphicha rená chojé nojló, naꞌakáloje nuká chapú laꞌajéñojlo. Inaꞌuké iꞌimakáloje nupalamane penaje iꞌimaká nuká.
46 Jáchoꞌo, chuwa iꞌijná weꞌejnachi. Kaja ilé aꞌajeri nuká puꞌuwaré laꞌajéñojlo waícha —ke rimaká najló.
Napataká Jesús yukuna marí
47 Re joꞌó kaja Jesús puraꞌakó raꞌapiyatéjena waꞌaté ee, Judas iphari nanaku. Iyamá iphata jiꞌimaje nakojé (12) kele raꞌapiyatéjena nakiyana riꞌimaká. Kajrú ajopana inaꞌukena waꞌaté riphá rejé. Jajalu, kujyúwaꞌala, kaje iꞌimari nakapi. Sacerdótena wakáraꞌajeño, eyá pheñawilana, kele purákaꞌalo aú neꞌejná rejo ripataje.
48 Maapami ke Judas aꞌaká rijwaꞌaté iꞌijnakáñojlo jenaji, naweꞌepíkaloje mékajeka napatájika penaje. Rimá najló:
—Puꞌuwaká nuchiñoꞌojika rijimá chiyá, riká ipataje.
49 Rejéchami riꞌijnaká Jesús awaꞌajé rajalákakaloje riká, rimá rijló:
—Wewíñaꞌatajeri.
—Nujwákeꞌewe, pilaꞌá nakaje pipechu nakú riꞌimaká ke.
Reja netá Jesús cha, patañó riká.
51 Rejéchami pajluwaja Jesús jaꞌapiyatéjena nakiyana jeroꞌoká rijajálune raꞌaruná chiyá. Riká aú rimataꞌá pajluwa sacerdótena wakáraꞌajeri waꞌaté jápajeri iꞌijwí.
52 Raú Jesús kemari rijló:
—Pilamáꞌata pijajálune raꞌaruná chojé. Piyukeja jajalu aú nókajeño, kapichaño jajalu aú ja kaja.
53 ¿Unká chi piweꞌepila, nuwátakela numajla Noraꞌapajlo riwakáraꞌakaloje setenta mil rijwaꞌatéjena, jeꞌechú chiyájena, majó? Neká mejñátañojla nuká naliyá.
54 Ilé ke riꞌimakela, unká riꞌimalajla Tupana purákaꞌalo lanaꞌakéjami kemaká riꞌimajika nakú ke.
55 Rejomi rimá najló:
—¿Naje chi iꞌijichá majó jajalu, kujyúwaꞌala, kaje waꞌaté nupataje? ¿Jataꞌakachi ke wani ilaꞌaká nuká ijluwa? Weꞌechú kaꞌalá keja nowíñaꞌatajika inaꞌuké Tupana ñakaré chu, eꞌiyonaja unká ipataké re nuꞌumajika.
56 Eꞌiyonaja kalé ilaꞌajé nuká ilé ke meꞌetení, júpimi Tupana purákaꞌalo jaꞌapátajeño michuna kemaká nunaku iꞌimaká ke riꞌimakáloje.
Rejéchami piyukeja raꞌapiyatéjena jaꞌapáñaaka Jesús. Kaja neñaó reyá.
Nakulákatako Jesús nakú yukuna marí
57 E kaja nawaꞌa Jesús ají ke Caifás ñakaré ejo. Sacerdótena wakáraꞌajeri wani Caifás iꞌimaká. Tupana purákaꞌalo nakú jewíñaꞌatajeño, pheñawilana waꞌaté, awakaño rejé.
58 Eyá Pedro iꞌijnari rápumichu juká kemachi, iphari riñakaré kópeje. Rejé riyaꞌo Tupana ñakaré waꞌaphé iꞌimakaño waꞌaté, ramákaloje reyá mékeka nalaꞌaká Jesús.
59 Kaja nawaꞌa Jesús rejo. Re sacerdótena wakáraꞌajeño, pheñawilana, kele iꞌimaño ajopana waꞌaté. Neká kulaño ajopana pajlákachina nemakáloje Jesús nakú: “Puꞌuwaré laꞌajeri riká”, ke, nenókaloje riká richona penaje.
60 Eꞌiyonaja unká nephátala na puraꞌakajo rinakojé. Kajrú ajopana inaꞌukena iphaka rejé rinaku pajlaje mapeja. Kaja ewaja iyamá nanakiyana kemaño rinaku:
61 —Marí inaꞌuké kemari: “Nukajyaꞌatajla Tupana ñakaré, rejomi weji ke kala iꞌimajemi nulaꞌajla piño riká rapumí chuwá”, ke —ke nemaká najló.
62 Ilé kaje aú sacerdótena wakáraꞌajeri táraꞌaro, rimá Jesusjlo:
—¿Unká chi papiyákalaje pinakojó neká? ¿Meke chi kele nemá pinaku?
63 Unká Jesús aꞌajipalá sacerdótena wakáraꞌajerijlo, raú rimá piño rijló:
—Tupana, ñakeja wani iꞌimajika purákaꞌalo aú numá pijló, pimakáloje nojló kewaka. Pimá wajló: ¿Piká chi kele Tupana wakáraꞌakare majó inaꞌuké iꞌimatájeri penaje? ¿Tupana iꞌirí chi piká?
64 Raú Jesús kemari rijló:
—Ilé pimíchaka nunaku, keja nuká. Iká amájeño nuká Tupana awaꞌá. Piyuke laꞌaká Tupana. Rijwaꞌaté nuwakáraꞌaje inaꞌuké. Iká amájeño nupaꞌakó piño majó jeꞌechú chiyá juni juwákaꞌala eꞌiyowá. Inaꞌuké iꞌimakáloje nupalamane penaje iꞌimaká nuká.
65 Ilé ke rimaká aú, richaje wani sacerdótena wakáraꞌajeri yúchaꞌako kajrú. Akuwaná rijiyoꞌotá raꞌarumaká, rimá najló:
—Puꞌuwaré wani ilé ta puraꞌakó Tupana nakú. Unká na penaje kalé wakulá ajopana, nemakáloje wajló mékeka rilaꞌaká puꞌuwaré. ¡Kaja wemiꞌichá mékeka rimíchaka ta puꞌuwaré wani Tupana nakú!
66 ¿Meke ijló riká?
Nemá rijló:
—Piwakáraꞌa rinókana ilé kaje pachá.
—Riká Tupana wakáraꞌakare majó inaꞌuké iꞌimatájeri penaje piꞌimajika ee, pimá wajló na iꞌichari piká pajimaya —ke nalaꞌaká namákaja riká.
Pedro michoꞌotaka Jesús chaya yukuna marí
69 Ilé ke nalaꞌaká Jesús ketana, Pedro iꞌimaká wakaꞌapé yáꞌakajo nakú. E apaꞌawelo iꞌijnayo rawaꞌajé. Pají chiyá jápajeyo ruꞌumaká, rumá rijló:
—Nuweꞌepí ilé Jesús, Galilea eyaje, waꞌateje piká.
70 Eꞌiyonaja Pedro michoꞌotari richayo, rimá rojló ajopana eꞌiyá:
—Unká wani ta nuweꞌepila na nakuka pipuraꞌó nujwaꞌaté.
71 E raꞌapá ají ke rinumaná ejo. Re apaꞌawelo amayo piño riká, raú rumá najló.
—Ilé chiraꞌakero kaja Jesús, Nazaret eyaje waꞌaté.
72 Ñaké kaja Pedro michoꞌotaka piño richayo.
—Tupana weꞌepiri kewaka numaká. ¡Unká wani ta nománaꞌapa kalé kele imá nakú nojló!
73 Meketánaja iꞌimajemi ajopana iphaño rawaꞌajé, nemá rijló:
—Rijwaꞌatéjena nakiyana piká. ¡Pa! Napuraꞌakó riteꞌeré ewá, ke kaja pipuraꞌakó.
74 Ilé kaje aú rimá najló:
—Nuwata Tupana wajaka nuká, unkájika ee numá kewaka ijló. ¡Unká wani nománaꞌapa kalé riká ta!