Jesús jipaká raꞌapiyatéjena jiꞌimá nakiyá yukuna marí
13
Pajluwa kálaja yuriro natukumá, nephákaloje naleꞌejé fiesta Pascua jená chojé. Jesús weꞌepiri yewicha riphaka rená chojé rijló, ráchoꞌokoloje marí ejaꞌawá nakiyá, riꞌijnakáloje Raraꞌapá iꞌimaká ejo. Íkiꞌija Jesús wátajika raꞌapiyatéjena marí ejaꞌawá chu riꞌimaká ketana.
2 Laínchu najñaka naꞌajnewá ee, Jiñá Chiꞌinárikana pechu jaꞌaró Judas Iscariote eꞌiyajé, raú riwata Jesús aꞌakana ripinánajlo. Simón iꞌirí riꞌimaká.
Jesús lava los pies de los discipulos (Juan 13.1-17)
3 Jesús weꞌepiri Raraꞌapá iꞌimaká eyá riphá majó iꞌimaká, raú riweꞌepí ripaꞌajiko piño rejo, riꞌimakáloje piyuke ajopana chaje wakáraꞌajeri penaje.
4 Rejéchami rikeñoꞌoká raꞌajnewá ajñakana raꞌapiyatéjena waꞌaté, eꞌiyowá ke ráchoꞌoko. Rikaꞌá richáyaje raꞌarumaká rinakiyó, rejomi repoꞌó riwachaphí toalla aú.
5 Rejomi rakhoꞌó juni pachiya chojé, rejéchami rikeñoꞌoká raꞌapiyatéjena jiꞌimá nakiyá jipakana pajluwano, pajluwano ke, juni aú. Eyá toalla, riwachaphí chu iꞌimakare, aú rimakáraꞌa juni neꞌemá nakojé.
6 Kaja ewaja riphá Pedro jiꞌilaje, ripakáloje riꞌimá nakiyá, raú Pedro kemari rijló:
—Nuwakáraꞌajeri, ¿piwata chi nuꞌumá nakiyá jipakana?
7 Jesús kemari rijló:
—Meꞌetení unká piweꞌepila nájeka nulaꞌaká iká marí ke, rejomi piweꞌepeje rinakojé.
8 Raú Pedro kemari rijló:
—Unká nuyurílaje pipaká nuꞌumá nakiyá.
Jesús kemari rijló:
—Unkájika ee piyurí nupaká piꞌimá nakiyá, unká nujwaꞌatéjena nakiyana kalé piꞌimajika.
9 Raú Simón Pedro kemari rijló:
—Nuwakáraꞌajeri, unká nuꞌumá nakiyaja kalé pipaje, nuwata kaja pipaká nuyátheꞌela chiyá, eyá nuwílaꞌaru nakiyá waꞌató.
10 Jesús kemari najló:
—Wajé aꞌapitaká penájemi unká wátala piño raꞌapitatákana, mapijaru rinapona iꞌimakale, riꞌimá nakiyaja kalé jipakana palani. Mapijáruna ke iká piyuke nojló, eꞌiyonaja re eꞌiyá pajluwaja, unká wani palá péchuri kalé.
11 Riweꞌepí mékajeka aꞌajika ripinánajlo riká, raú rimá: “Pajluwaja unká wani palá péchuri kalé”, ke.
12 Jesús ñapátaka neꞌemá nakiyá jipakana ejomi, raꞌá piño rinakuwá raꞌarumaká richari iꞌimakare. Rejomi riyaꞌo piño najwaꞌaté, e rimá najló:
—¿E iweꞌepika nájeka nupicha jiꞌimá nakiyá? ¿Na nakú chi nowíñaꞌatiya iká raú?
13 Iká kemaño nunaku: “Wewíñaꞌatajeri”, ke, “Wawakáraꞌajeri”, ke. Palani ilé ke nunaku kemakana, ñaké nuꞌumakale.
14 Jewíñaꞌatajeri nuká, iwakáraꞌajeri kaja nuká, eꞌiyonaja nupicha jiꞌimá nakiyá. Ijwaꞌaté jápajeri keja nuliꞌichaka nunakuwá raú. Ñakele ñaké kaja ilaꞌajika, marí nuliꞌichaka iꞌimichaka ke kaja.
15 Kaja amicha mékeka nuliꞌichaka ijwaꞌaté. Ilaꞌakáloje ñaké kaja ajopana waꞌaté penaje nuliꞌichá ñaké.
16 Unká meke laꞌajé apú waꞌaté jápajeri iꞌimalajla rikariwate chaje, rijwaꞌaté jápajeri riꞌimakale.
17 Iweꞌepíjika ee palá piyuke ilé nakaje numíchaje nakú ijló nakojé, eyá ilaꞌajika ee ñaké, iꞌimajé palá.
18 Unká piyukeja nakú kalé numá ñaké. Nuweꞌepí mékajenaka nuꞌuwapá nujluwa. Tupana purákaꞌalo lanaꞌakéjami kemaká nunaku, ke riꞌimajika. Rimá nunaku iꞌimaká: “Ajñájeri raꞌajnewá nujwaꞌaté, amari chapú nuká”.
Jesús predice la traición (Juan 13.18-38)
19 Ñaké riꞌimajika nojló piyá, nuꞌumá ijló riyukuna palá, iweꞌepíkaloje palá rinakojé. Riká, Tupana wakáraꞌakare majó inaꞌuké iꞌimatájeri penaje, nuká.
20 Jemaꞌá marí: wátaño nujwaꞌatéjena, wátaño kaja nuká. Eyá wátaño nuká, wátaño kaja Nuwakáraꞌajeri —ke Jesús kemaká najló.
Jesús kemari Judas nakú: “Riká aꞌajeri nupinánajlo nuká”, ke. Riyukuna marí
21 Ilé ke Jesús kemaká najló ejomi, kamuꞌují wani ripechu laꞌakó. Rejéchami rimaká najló puꞌukuja:
—Jemaꞌá numájikare nakú ijló chuwa: re pajluwaja inakiyana maare wajwaꞌaté, aꞌajeri nuká nupinánajlo.
22 Ilé ke rimaká najló aú, raꞌapiyatéjena yakáꞌaño pachájekaka, unká naweꞌepila mékajeka nanakiyana rimá nakú.
23 Jesús jaꞌapiyateje, íkiꞌija riwátakare, yáꞌaro rawaꞌá najñaka naꞌajnewá ketana.
24 Rijló Simón Pedro kemari riyátheꞌela aú, rikejáꞌakaloje riyukuna palá riliyá, naweꞌepíkaloje mékajeka riká rimá nakú, aꞌajeri riká ripinánajlo.
25 Raú ratató Jesús awaꞌajé, rimá rijló:
—¿Mékaje chi kele pimá nakú, aꞌajeri piká pipinánajlo?
26 Jesús kemari rijló:
—Nonóroꞌotajika marí pan ejomi, noꞌojé rinakiyana aꞌajeri nuká nupinánajlo, raú iweꞌepeje mékajeka riká.
E ranóroꞌota pan, rejomi raꞌá rinakiyana Judas Iscariote, Simón iꞌirímijlo.
27 Rijñaꞌaká riliyá pan anóroꞌotakejami ejéchami, Jiñá Chiꞌinárikana pechu jaꞌaró reꞌiyajé. E Jesús kemari rijló:
—Pilaꞌá meꞌetení nakaje piwátajikare laꞌakana.
28 Re iꞌimakaño rijwaꞌaté naꞌajnewá ajñakana nakú, unká weꞌepila nájeka rimaká rijló ñaké.
29 Naliñérute lamáꞌatajeri Judas iꞌimaká, raú neꞌiyajena pechu iꞌimá Jesús nakú: “Apala riwata kaꞌajná riwarúwaꞌaka wajló nakaje, waꞌapátakaloje fiesta raú penaje. Riwata kaꞌajná raꞌaká kamuꞌují laꞌakáñojlo liñeru”.
30 Rijñaꞌaká pan anóroꞌotakejami Jesús liyá ejomi, ráchoꞌo reyá. Kalajerú cha iꞌimaká.
Wajé nakaje, Jesús wakáraꞌakare nalaꞌaká, yukuna marí
31 Judas jáchoꞌoko reyá iꞌimaká ejomi, Jesús kemari najló:
—Inaꞌuké iꞌimakáloje nupalamane penaje iꞌimaká nuká. Chuwa kajrú inaꞌukena weꞌepíjika palá laꞌajérika nuká; ñaké kaja naweꞌepíjika meke palá wani Tupana laꞌaká inaꞌuké nupalamane.
32 Nakaje nulaꞌakare aú inaꞌuké pechu iꞌimajé palá Tupana nakú. Chuwa rilaꞌajika nakaje, napechu iꞌimakáloje palá kaja nunaku raú. Yewíchaja Tupana laꞌaká nuká, numaká nunakuwá ijló iꞌimaká ke.
33 Nujwákeꞌena, chuwa meketánaja nuꞌumajika re joꞌó kaja ijwaꞌaté maare ejaꞌawá chu, iká amájeño nopumí. Numaká judíonajlo iꞌimaká, ke kaja numaká ijló: Unká méñoꞌojo iꞌijnalaje nuꞌujnajika ejo meꞌetení.
34 Nuwakáraꞌa ilaꞌaká marí ke: Iwata íkiꞌija pekowáaka, íkiꞌija nuwátaka iká ke kaja.
35 Íkiꞌija iwátajika ee pekowáaka, piyukeja inaꞌukena weꞌepéjeño nujwaꞌatéjenaka iká —ke Jesús kemaká najló.
Pedro michoꞌotaka Jesús chaya yukuna marí
36 E Pedro kemari Jesusjlo:
—Wawakáraꞌajeri, ¿méñoꞌojo chi piꞌijnajé chuwa?
Jesús kemari rijló:
—Nuꞌujnajika ejo, unká méñoꞌojo piꞌijnalajla nujwaꞌaté meꞌetení, rejomi piꞌijnajé rejo.
37 Pedro kemari rijló:
—Nuwakáraꞌajeri, ¿naje chi unká méñoꞌojo nuꞌujnalajla pijwaꞌaté, meꞌetení piꞌijnajika ejo? Apala nenoje nuká, pijwaꞌateje nuꞌumakale, eꞌiyonaja nuꞌujnajé pijwaꞌaté rejo.
38 Raú Jesús kemari rijló:
—¿Kewaka chi pimaká nojló? Numá pijló, weji ke pe pimichoꞌotájika nuchaya, unká chiyó kapere yakaꞌá —ke rimaká rijló.