Pajluwájaru akhoꞌoká nakaje jilá Jesús nakojé yukuna marí
12
Pajluwa kuwáꞌata ke kala (6) yuriro napé, naleꞌejé fiesta Pascua iphákaloje rená chojé. Ripiyá Jesús iꞌijnari pajimila Betania ejo Lázaro, rimakápoꞌotakare iꞌimaká, ñakajela ejo.
2 Re nalaꞌá aꞌajnejí Jesús piyana, raú neꞌejná rejo naꞌajnewá ajñaje. Marta tamákaꞌatayo najló aꞌajnejí. Ajopana iꞌimaño kaja re naꞌajnewá ajñakana nakú. Re kaja Lázaro iꞌimari najwaꞌaté.
María unge a Jesús (Juan 12.1-11)
3 Najñaka naꞌajnewá eꞌiyowá ke, María iꞌijnayo Jesús jimaje. Nakaje jilami iꞌimari rukapi wíluru chu. Richu puꞌumé amarí, kawemini wani riꞌimaká. Riká rokhoꞌó Jesús jiꞌimá nakojé, rejomi rumakáraꞌa riká ruwilá aú. Puꞌumeja nañakaré chuwá rama iꞌimaká.
4 Judas Iscariote iꞌimari kaja re najwaꞌaté. Jesús jaꞌapiyatéjena nakiyana riꞌimaká. Riká aꞌajeri Jesús ripinánajlo nenókaloje riká penaje. Ramaka aú rulaꞌaká ilé ke, rimá ajopánajlo:
5 —Kawemini wani kele puꞌumé amarí. Pajluwa jarechí ketana kaꞌajná iná jápakajla riwemí. ¿Naje unká roꞌolá ajopánajlo riká rujñaꞌakáloje liñeru riwemí, raú roꞌokáloje kamuꞌují laꞌakaño ñathé?
6 Mapeja rimaká ilé ke runaku, jataꞌakachi riꞌimakale, unká riweꞌepike kamuꞌují laꞌakaño muꞌují. Jesús jaꞌapiyatéjena liñérute lamáꞌatajeri riꞌimaká, eꞌiyonaja unká rilamáꞌatake palá najló riká, rataꞌakeno rijluwa rinakiyana.
7 Ilé ke rimaká aú, Jesús kemari rijló:
—Reja ruꞌumare. Nojló rulamáꞌata kele nakaje jilá najaꞌajika nutami wakajéjloje penaje.
8 Ñakeja kamuꞌují laꞌakaño iꞌimajika ijwaꞌaté, eyá nuká unká ñakeja kalé nuꞌumajika ijwaꞌaté maare —ke rimaká najló.
Nawátaka Lázaro nókana yukuna marí
9 Judíona nakiyana weꞌepiño Jesús iphaka Betania ejo, raú neꞌejná rejo ramaje. Nawata kaja Lázaro amákana, riká Jesús makápoꞌotakare iꞌimaká penájemi.
10 Sacerdótena wakáraꞌajeño wátaño Lázaro nókana.
11 Jesús makápoꞌotaka riꞌimaká ejomi, kajrú judíona pechu iꞌimaká kaphí Jesús chojé. Rilanakiya nayurí sacerdótena wakáraꞌajeño jaꞌapiyá jemaꞌakana. Ilé kajé pachá nawata Lázaro nókana.
Jesús iphaka Jerusalén eꞌiyajé yukuna marí
12 Kaja kajrú inaꞌukena iꞌijnaká Jerusalén ejo fiesta Pascua jaꞌapátaje. Naweꞌepí muní ke Jesús iphájika pajimila eꞌiyajé,
Entrada triunfal a Jerusalén (Juan 12.12-19)
13 raú neꞌejná nakaje wirulá mataꞌajé. Rejomi náchoꞌo pajimila eyá, iꞌijnaño ají ke rijimajo, iphákaño rijwaꞌaté iñeꞌepú chu. E nawíyoꞌoko nemaká rinaku:
—¡Wephákare wani jaꞌapí, Tupana! ¡Wapuraꞌachó palá riká, Tupana wakáraꞌakare majó weꞌematájeri penaje nakú! ¡Wapuraꞌachó palá riká, Israel lakénami wakáraꞌajeri nakú!
14 E kaja Jesús iphátari burro iꞌirí. Riká janapeje ráchoꞌo yáꞌajo raꞌapákaloje rinaku pajimila eꞌiyowá. Ilé ke rilaꞌaká aú, rilaꞌá júpimi Tupana purákaꞌalo lanaꞌakéjami kemaká rinaku iꞌimaká ke:
15 “Jerusalén eyájena, ikeroꞌoniño.
Amá iwakáraꞌajeri iphaka majó burrito nakú”,
ke rimaká rinaku iꞌimaká.
16 Paineko chiyó unká Jesús jaꞌapiyatéjena weꞌepike meke kemakánaka nakaje rimájikare rinakuwá iꞌimajika. Ripinana noka riká aꞌawaná apiyákakanami nakojé iꞌimaká ejomi, naweꞌepí piyuke nakaje iꞌimaká rijló, júpimi nalanaꞌaká rinakojé iꞌimaká, ke.
17 Jesús makápoꞌotaka Lázaro iꞌimaká wakajé, kajrú inaꞌukena iꞌimaká rijwaꞌaté re. Neká jemaꞌañó rawíyoꞌoka rijló ráchoꞌokoloje majó liri chiyá penaje. Rimakápoꞌotaka riꞌimaká amájeño iꞌimaño riyukuna ajopánajlo, ajopánajlo ke.
18 Raú neꞌejná Jesús ejo, naweꞌepíkale rilaꞌaká kajrú nakaje Tupánaja kalé weꞌepíkare laꞌakana.
19 E fariséona amaño riphaka pajimila eꞌiyajé kajrú inaꞌukena waꞌaté, raú napuraꞌó pajwaꞌatéchaka nekámika ke. Nemá pajlokaka:
—¡Chuwa unká meke walaꞌalá! ¡Iyakaꞌo, rijwaꞌaté waja chuwa inaꞌuké!
Griégona nakiyana kulaka Jesús yukuna marí
20 Kajrú inaꞌukena iꞌijnaká Jerusalén ejo, napechu iꞌimakáloje puꞌují Tupana nakú fiesta iꞌimaká ketana. Re kaja griégona nakiyana iꞌimaño.
Jesús predice su muerte (Juan 12.20-36)
21 Neká iꞌijnaño Jesús jaꞌapiyateje Felipe awaꞌajé. Pajimila Betsaida eyaje riꞌimaká, Galilea teꞌeré nakú riká pajimila. Nephaka rinaku ee, nemá rijló:
—Pilaꞌá wajló nakaje. Eko piwaꞌa weká Jesús ejo, wawata ramákana.
22 Raú Felipe iꞌijnari nayukuna iꞌimajé Andresjlo. Rejomi neꞌejná riyukuna iꞌimajé Jesusjlo.
23 Neꞌemaká rijló riyukuna aú, rimá najló:
—Kaja riphicha rená chojé chuwa nojló Tupana, laꞌakáloje nuká ajopana chaje wani penaje. Inaꞌuké iꞌimakáloje nupalamane penaje iꞌimaká nuká.
24 Unkachu iná ejátala nakaje icha ijí, pajluwánaja riyuriko rikoja. Eyá iná ejátakachu riká teꞌerí eꞌiyajé, rikapichako ke rilaꞌakó meketánaja, rejomi reñoꞌó. Pajluwaja nakaje ijí nakiyana iphari, riká aꞌarí kajrú richawá. Ñaké kaja nukapichájiko, kajrú nujwaꞌatéjena iꞌimakáloje raú penaje.
25 Re inaꞌuké nakiyana weꞌepiño khaí nanakuwá. Nawata rejenowaja inaꞌuké pechu iꞌimaká palá nanaku, raú unká nawátala nujwaꞌatéjena iꞌimakana. Ilé ke naweꞌepíkale khaí nanakuwá, nakapichajo Tupana liyá. Eyá unká weꞌepílaño khaí nanakuwá, iꞌimajeño matajnako jeꞌechú chu nujwaꞌaté.
26 Nojló nakaje laꞌajeñó, jemaꞌañó palá noꞌopiyá, ñakele neká iꞌimajeño nujwaꞌaté nuꞌumajika e. Palá wani Noraꞌapá laꞌajika nanaku, nalaꞌakale nojló nakaje palá.
Jesús iꞌimaká ritakaꞌajika yukuna najló yukuna marí
27 Rimá piño najló: “Nuweꞌepí nomájika chuwa chapú kaje yajwé. ¿Meke chi numájika Noraꞌapajlo rinaku? ¿Numaje chi rijló: ‘Piꞌimatá nuká ilé chapú kaje nojló iꞌimajíkare liyá’? Unká numalaje ilé ke rijló. Riká penaje nuphá majó iꞌimaká”, ke rimaká najló.
28 E ripuraꞌó Tupana waꞌaté, rimá rijló: “Paꞌayú, pilaꞌá nakaje, raú inaꞌuké pechu iꞌimakáloje palá pinaku penaje”.
Rejéchami re iꞌimakaño jemaꞌaká Tupana puraꞌakó rijwaꞌaté jeꞌechú chiyá majó. Rimá Jesusjlo: “Kaja nulaꞌá kajrú nakaje palá, raú inaꞌuké pechu iꞌimakáloje palá nunaku penaje. Eyá chuwa nulaꞌajika piño richaje nakaje, raú napechu iꞌimakáloje puꞌují nunaku penaje”.
29 Inaꞌukena re iꞌimakaño nakiyana jemaꞌañó meke Tupana puraꞌakó rijwaꞌaté, eꞌiyonaja napechu iꞌimá: “Apala pichaní mejé kaꞌajná riꞌimichaka”, ke. Eyá ajopana kemaño:
—Tupana waꞌatéjeri, jeꞌechú chiyaje, puriꞌicharo rijwaꞌaté jeꞌechú chiyá.
30 E kaja Jesús kemari najló:
—Unká nomaꞌakáloje riká penaje kalé rimicha nojló ilé ke. Iká jemaꞌakáloje penaje riká, rimicha ñaké.
31 Chuwa Tupana wajájika nuká inaꞌukena chaya. Puꞌuwaré nalaꞌakare pachá, namanáicho nalaꞌakare kaje pachá riwajaje nuká. Reyá aꞌajná ñoꞌojó unká Jiñá Chiꞌinárikana iꞌimalaje nawakáraꞌajeri.
32 Nephájika nuká aꞌawaná apiyákakanami nakojé ejomi, numakápoꞌojo piño. Rejéchami nulamáꞌatajika kajrú inaꞌukena pechu neꞌemakáloje nujwaꞌatéjena penaje.
—Waweꞌepí Tupana purákaꞌalo, júpimi Moisés lanaꞌakare iꞌimaká, chu kemaká inaꞌuké iꞌimatájeri nakú: “Unká tajnákajo penaje kalé riꞌimajika”, ke. Eꞌiyonaja pimá pinakuwá: “Nephaje nuká aꞌawaná apiyákakanami nakojé. Inaꞌuké iꞌimakáloje nupalamane penaje iꞌimaká nuká”, ke pimaká. Apala unká kaꞌajná riká kalé piká, kele Tupana purákaꞌalo lanaꞌakéjami kemá nakú iꞌimaká.
35 Jesús kemari najló:
—Re joꞌó kaja nuꞌumajika ijwaꞌaté maare meketánaja. Kamareji ke nuká maare ijló, nowíñaꞌatakale iká palá Tupana nakú. Ñakele jemaꞌá noꞌopiyá maare nuꞌumaká ijwaꞌaté ketana. Laꞌañó nakaje kalajerúwaka, unká weꞌepila mékeka nalaꞌaká riká, kalajeruni chu iꞌimakaño keja neꞌemakale.
36 Kamareji ke nuꞌumakale ijló, iweꞌepeje palá Tupana nakojé. Nochojé ipechu iꞌimajé kaphí maare nuꞌumajika ijwaꞌaté ketana, raú iꞌimajé nujwaꞌatéjena.
Ilé ke rimaká najló ejomi, raꞌapáñaa neká, e rataꞌañáa neká.
Judíona kemaño nájeka unká napechu iꞌimalá kaphí Jesús chojé. Riyukuna marí
37 Kajrú wani Jesús laꞌajika nakaje neꞌiyowá Tupánaja kalé weꞌepíkare laꞌakana, eꞌiyonaja unká napechu iꞌimaké kaphí richojé.
Creyentes y no creyentes (Juan 12.37-50)
38 Kaja júpimi ke, ñaké Isaías michú lanaꞌaká nayukuna ripiyá iꞌimaká, raú rimaká nanaku chuwá riꞌimá. Rilanaꞌá nanakojé iꞌimaká:
“Wawakáraꞌajeri, unká naꞌalaje nanakojó wapurákaꞌalo.
Namájejla Tupana laꞌaká piyuke wani nakaje,
39 eꞌiyonaja unká naꞌalaje nanakojó wapurákaꞌalo”,
ke rilanaꞌaká iꞌimaká. Isaías kaja lanaꞌarí piño marí ke iꞌimaká:
40 “Tupana laꞌarí neká mejluruna ke.
Rilaꞌá kaja neká mapechúruna ke,
naweꞌepika piyá meke kemakánaka nakaje rilaꞌakare nakojé.
Ilé ke rilaꞌaká neká, nayurika piyá nekó Tupánajlo, rilamáꞌatakaloje napechu”, ke rilanaꞌaká júpimi ke iꞌimaká.
41 Ilé ke Isaías kemaká iꞌimaká, riweꞌepíkale mékeka kajrú wánika Jesús laꞌajika nakaje, raú riꞌimá riyukuna najló ripiyá iꞌimaká.
42 Eꞌiyonaja kajrú judíona nakiyana pechu iꞌimajika kaphí Jesucristo chojé, ñaké kaja nawakáraꞌajeño nakiyana pechu iꞌimajika kaphí richojé. Eꞌiyonaja unká neꞌemaké riyukuna ajopánajlo, nakeroꞌojíkole fariséona piyá. Naweꞌepíkela raꞌapiyá jemaꞌajeño neꞌemaká, unká nayurílajla nawakako najwaꞌaté nawakákaꞌalo ñakarelana chu.
43 Nawata Tupana pechu iꞌimaká palá nanaku, eꞌiyonaja richaje íkiꞌika nawátaka inaꞌuké pechu iꞌimaká palá nanaku.
Tupana wajájika neká unká aꞌalaño nanakojó Jesús purákaꞌalo yukuna marí
44 Rejéchami Jesús kemaká najló kaphí marí ke: “Kaphí péchuruna nochojé, pechu kaphí kaja Noraꞌapá wakáraꞌari nuꞌumaká majó iꞌimaká chojé.
45 Nomájeño amánaꞌapa nuká; namánaꞌapa kaja wakáraꞌari nuꞌumaká majó.
46 Majó nuphá marí ejaꞌawá nakojé iꞌimaká kamareji ke, nuꞌumakáloje inaꞌukejlo, piyukeja kaphí nochojé péchuruna iꞌimakáloje mejámaꞌatani chu, neꞌemaká piyá kalajerúwaka.
47 Eyá unká jemaꞌalaño nupurákaꞌalo jaꞌapiyá, unká nuká kalé wajájeri neká. Unká nuwajákaloje inaꞌuké penaje kalé nuphá majó, nuꞌumatákaloje neká penaje nuphá.
48 Piyukeja unká wátalaño nuká, unká kaja wátalaño nupurákaꞌalo jaꞌapiyá jemaꞌakana. Unká nuká kalé wajájeri neká, kaja re nawajájeri. Nupurákaꞌalo, ijnú nemaꞌakare jaꞌapiyá, rikaja wajájeri neká kaja penaje ejaꞌawá iphájika rená chojé wakajé.
49 Unká nupechu keja kalé nupuraꞌakó. Noraꞌapá wakáraꞌari nuꞌumaká majó wakáraꞌaka nupuraꞌakó, keja nupuraꞌakó nakaje nakú. Riwakáraꞌa kaja nowíñaꞌataka inaꞌuké rinaku.
50 Iná weꞌepíkachu piyukeja Noraꞌapá purákaꞌalo nakojé, iná weꞌepeje kaja meke laꞌakana, iná iꞌimakáloje matajnako jeꞌechú chu. Ñakele numá ijló nakaje nakú Noraꞌapá wakáraꞌaka ke”, ke Jesús kemaká najló.