Jesús ja kalé wáꞌari iná Tupana iꞌimaká ejo. Riyukuna marí
14
Jesús kemari najló: “Ipechu iꞌimaniña kamuꞌují; ipechu iꞌimá Tupana chojé kaphí, ñaké kaja nochojé.
2 Kajrú pukunaji Noraꞌapá iꞌimaká e, inaꞌuké iꞌimakáloje re penaje. Unkákela riꞌimajla ñaké, unká numalajla ijló: Nuꞌujnajé pukunaji lamáꞌataje ipé rejo, ke.
El único camino a Dios (Juan 14.1-14)
3 Palá nulamáꞌatajika ijló pukunaji, rejomi nupaꞌajó piño majó iwáꞌaje, iꞌimakáloje re nujwaꞌaté.
4 Kaja iweꞌepí méñoꞌojoka nuꞌujnajika maáreya; iweꞌepí kaja mékeka iná laꞌaká, iná iꞌijnakáloje rejo penaje”.
5 Raú Tomás kemari rijló:
—Wawakáraꞌajeri, unká waweꞌepila méñoꞌojoka piꞌijnajika. Unká kaja waweꞌepila kele iñeꞌepú, piꞌijnajíkare chuwá, nakojé.
6 Jesús kemari rijló:
—Iñeꞌepú ke nuká inaꞌukejlo, nuwáꞌajikale neká Tupana ejo. Kewákaje nupurákaꞌalo. Kaphí nochojé péchurunaja kalé iꞌijnajeño Noraꞌapá iꞌimaká ejo, re neꞌemakáloje matajnako nujwaꞌaté.
7 Iweꞌepíkela palá nunakojé, iweꞌepijla kaja palá Noraꞌapá nakojé. Meꞌetení eyá kaja iweꞌepí rinakojé, amákale riká.
8 Raú Felipe kemari rijló:
—Wawakáraꞌajeri, piyurí wamaka Paraꞌapá, rikaja kalé wawata.
9 Jesús kemari rijló:
—Felipe, jupi cha wani nuká ijwaꞌaté maare, ¿eꞌiyonaja unká chi piweꞌepila naka nuká? Weꞌepiri naka nuká, weꞌepiri kaja naka Noraꞌapá. Eta, ¿naje pimá nojló: “Piyurí wamaka Paraꞌapá”, ke?
10 ¿Meke chi pipechu wanaku? ¿Unká pajluwaja keja kalé chi weká, Noraꞌapá waꞌaté? Nujwaꞌaté Noraꞌapá, eyá rijwaꞌaté kaja nuká. Unká nokó kalé nulaꞌaká nakaje; Noraꞌapá pechu nakú riꞌimaká ke nulaꞌaká riká.
11 Jemaꞌá noꞌopiyá numakare nakú ijló: Pajluwa keja weká Noraꞌapá waꞌaté. Unkájika ee ilaꞌá kewaka noꞌopiyá, numakare nakú ijló, jemaꞌá noꞌopiyá, amákale nulaꞌaká kajrú nakaje Tupánaja kalé weꞌepíkare laꞌakana.
12 Kaphí nochojé péchuri, laꞌajeri kajrú nakaje nulaꞌaká ke kaja. Nuchaje kaꞌajná ilaꞌajika nakaje, nuꞌujnajíkale Noraꞌapá ejo.
13 Piyuke nakaje ikejáꞌajikare Tupana liyá, noꞌopiyá jemaꞌajeño iꞌimakale, noꞌojé ijló riká, raú iweꞌepeje piyuke nakaje laꞌajérika Noraꞌapá.
14 Piyuke nakaje ikejáꞌajikare nuliyá, ipechu iꞌimakale kaphí nochojé, noꞌojé kaja ijló riká —ke Jesús kemaká najló.
Jesús iꞌimaká najló Tupana Pechu riwakáraꞌajikare najló yukuna marí
15 Jesús kemari piño najló: “Íkiꞌija iwátajika ee nuká, aꞌajeño inakojó nupurákaꞌalo.
Jesús habla del Espíritu Santo (Juan 14.15-31)
16 Numaje Noraꞌapajlo riwakáraꞌakaloje ijló apú, nuká ke kaja iꞌimakare, riꞌimakáloje ijwaꞌaté waꞌajini wani ipechu palaꞌatájeri penaje, iñathé aꞌajeri penaje. Riká iꞌimajeri ñakeja wani ijwaꞌaté.
17 Tupana Pechu jewíñaꞌataje iká kewákaje purákaꞌaloji nakú. Unká Tupana aꞌalaje Ripechu unká jemaꞌalaño raꞌapiyajlo, unkale naweꞌepila naka riká. Ikaja kalé weꞌepiño naka riká, riꞌimakale ijwaꞌaté. Riꞌimajé kaja eꞌiyá waꞌajini wani.
18 “Unká nuyurílaje kupákejanami ke iká, nupaꞌajó piño majó nuꞌumakáloje ijwaꞌaté penaje.
19 Meketana iꞌimajemi neká unká jemaꞌalaño noꞌopiyá, unká amálajeño piño nuká. Ikaja kalé amájeño nuká, iꞌimajíkale ñakeja wani nujwaꞌaté, unká tajnákajo penaje kalé nuꞌumakale.
20 Tupana Pechu iꞌimajika eꞌiyá wakajé, iweꞌepeje Tupana waꞌateje nuká. Iweꞌepeje kaja nujwaꞌaté iká, ijwaꞌaté nuꞌumaká ke kaja.
21 Jemaꞌarí nupurákaꞌalo jaꞌapiyá, laꞌarí rimaká ke, wátajeri nuká íkiꞌija. Wátari íkiꞌija nuká, Noraꞌapá wátajeri kaja íkiꞌija, raú iweꞌepeje ijwákeꞌewe nuká”, ke rimaká najló.
22 E Judas (unká Judas Iscariote kalé) kemari rijló:
—Wawakáraꞌajeri, ¿naje chi wajloja kalé piꞌimá palá mékajeka piká yukuna? ¿Naje unká piꞌimalá kaja palá riyukuna ajopana inaꞌukena, unká jemaꞌalaño paꞌapiyajlo?
23 Jesús kemari rijló:
—Íkiꞌija wátaka nuká, jemaꞌarí palá nupurákaꞌalo jaꞌapiyá. Noraꞌapá wátajeri kaja riká íkiꞌija, raú weꞌemajé pajñakani rijwaꞌaté.
24 Unká wátala nuká íkiꞌija, unká kaja aꞌalá rinakojó nupurákaꞌalo. Nupurákaꞌalo jemaꞌakare meꞌetení, unká nuleꞌejé kalé riká. Noraꞌapá, wakáraꞌari nuꞌumaká majó, purákaꞌalo riká.
25 “Ilé ke numaká ijló nakaje nakú, meꞌetení nuꞌumaká maare ijwaꞌaté ketana.
26 Eyá Noraꞌapá Pechu, iná pechu palaꞌatájeri iphájika majó wakajé, jewíñaꞌatajeri iká palá piyuke nakaje nakú, iweꞌepíkaloje raú piyukeja nakaje, numakare nakú ijló iꞌimaká, nakojé.
27 “Nulaꞌá ipechu palá, iwó kaꞌakó piyá nakaje waꞌaté, ipechu iꞌimakáloje nupechu ke kaja, penaje nulaꞌá ipechu palá. Unká nulaꞌalá ipechu, unká jemaꞌalaño Tupana jaꞌapiyá laꞌaká papechúkaka, ke. Ilaꞌaniña ipéchuwa ujwí nakaje nakú; ikeroꞌoniño kaja.
28 Kaja jemiꞌichá numíchaka ijló: Chuwa nóchoꞌojiko, rejomi nuká waícha piño, nuꞌumakáloje ijwaꞌaté penaje. Íkiꞌija iwátakela nuká, ipechu laꞌojla puꞌují, nuꞌujnajíkale Noraꞌapá ejo. Nuchaje wani wakáraꞌajeri riká.
29 Unká chiyó riꞌimá ñaké, nuꞌumá ijló riyukuna, ñaké riꞌimajika wakajé, iweꞌepeje rinakojé.
30 “Meꞌetení unká nupuraꞌalajo kajrú ijwaꞌaté, chuwa Jiñá Chiꞌinárikana iphájika majó. Unká jemaꞌalaño noꞌopiyá wakáraꞌajeri riká, unká richáꞌatalaje nuká.
31 Noraꞌapá wakáraꞌaka ke laꞌajerí nuká, inaꞌuké weꞌepíkaloje raú íkiꞌija nuwátaka riká. Chuwa jáchoꞌo, waꞌapachi maáreya —ke Jesús kemaká raꞌapiyatéjenajlo.