Paijí ina iꞌimaká riꞌichejlo, ke kaja ijló nuká. Riyukuna marí
15
Jesús jewíñaꞌatari raꞌapiyatéjena, rimá najló: “Kajmú jepepí ke inarí iꞌimaká riꞌichejlo, ke kaja nuká noꞌopiyá jemaꞌajéñojlo. Eyá Noraꞌapá, ramájeri ke.
2 Riꞌiché nakiyana, teꞌerí eꞌiyá toꞌokaro, unká arúkaꞌala, raú ráchoꞌota riká rarúkaꞌakaloje penaje. Noraꞌapá wátaka ke laꞌajeñó, riꞌiché kechani ke kalé neká rijló. Noraꞌapá kaꞌarí puꞌuwaré nalaꞌakare naliyá, richaje nalaꞌakáloje palá raú.
La vid y las ramas (Juan 15.1-17)
3 Kaja Noraꞌapá kaꞌarí inakiyá puꞌuwaré ilaꞌakare, aꞌakale inakojó nupurákaꞌalo.
4 Iyuríniña nujwaꞌatéjena iꞌimakana, nuꞌumakáloje ijwaꞌaté iñathé aꞌajerí penaje. Unká méñoꞌojo kajmú arúkaꞌala riꞌiché nakiyá rikoja, unkachu riꞌiché iꞌimalá rina nakú. Ñaké kaja ijló riká: unká méñoꞌojo ilaꞌalá ikó Noraꞌapá wátaka ke. Nuká aꞌarí iñathé riwátaka ke laꞌakana aú, unkaja ke jáchoꞌo nujwaꞌatéjena iꞌimakana chiyá.
5 “Paijí ina iꞌimaká riꞌichejlo, ke kaja ijló nuká. Riꞌiché iꞌimaká rínajlo, ke kaja nojló iká. Pajwaꞌatéchaka ke walaꞌakachu nakaje, palá wani walaꞌaká riká, Noraꞌapá wátaka ke raú. Unká meke laꞌajé ilaꞌalajla nakaje riwátaka ke ikó.
6 Nujwaꞌatéjena nakiyana jáchoꞌojiko ee nujwaꞌatéjena iꞌimakana chiyá, neꞌemajé kupákejanami ke nuliyá. Aꞌawaná iꞌichemi, júpimi ke namataꞌakare rina nakiyá, ke kaja neꞌemajika. Riꞌichemi, makajreni najñaꞌakare, nakupákaloje riká jiyá chojé penaje ke neꞌemajika.
7 “Iyuríjiko ee pajluwa japi keja nujwaꞌaté, waꞌaté ilaꞌajika ee nowíñaꞌata iꞌimaká ke, ikejáꞌaje nuliyá nakaje iwátajikare kaja, e noꞌojé ijló riká.
8 Raú ajopana weꞌepéjeño Tupana weꞌepika piyukeja nakaje laꞌakana, ilaꞌakale palá wani raꞌapiyá ke, raú kaja noꞌopiyatéjena wani iꞌimaká.
9 Íkiꞌija Noraꞌapá wátaka nuká, ñaké kaja nuwátaka iká. Ñakeja iyuriko íkiꞌija nuwátakarena.
10 Jemaꞌajika ee nuwakáraꞌaka ilaꞌaká ke jaꞌapiyá, nomaꞌaká Noraꞌapá wakáraꞌaka nulaꞌaká ke jaꞌapiyá, ke kaja ñakeja iyuríjiko íkiꞌija riwátakarena. Ñakeja nuyuriko íkiꞌija riwátakare.
11 “Numá ijló ilé ke, iweꞌepíkaloje rinakojé penaje, ipechu iꞌimakáloje puꞌují raú. Nupechu iꞌimaká puꞌují, ke kaja ipechu iꞌimakáloje puꞌují raú.
12 Marí ke nuwakáraꞌaka iká meꞌetení: Iwata íkiꞌija pekowáaka. Nuwátaka iká, ke kaja iwátaka pekowáaka.
13 Pajluwa kaꞌajná takaꞌá rijwákeꞌena apumí chojé, riꞌimatákaloje neká kapichákajo liyá. Raú iná weꞌepí kewaka íkiꞌija riwátaka neꞌemaká. Unká apú iꞌimalá richaje palaka, iná laꞌakáloje íkiꞌija iná wátakarenajlo.
14 Nujwákeꞌena iká, ilaꞌaká aú nuwakáraꞌaka ke.
15 Unká apú waꞌaté jápajeño ke kalé iká nojló. Apú waꞌaté jápajeño unká weꞌepila mékeka nakariwate pechu nakú nakaje, ñakele unká numalá inaku: ‘Nujwaꞌaté jápajeño neká’, ke. Numá inaku: ‘Nujwákeꞌena, íkiꞌija nuwátakarena neká’, ke. Ñakele numá ijló piyuke nakaje Noraꞌapá kemakare nojló nakú.
16 Unká iká kalé iꞌiwapaño ijluwa nuꞌumaká, nuꞌumakáloje iwakáraꞌajeri penaje; nuká iꞌiwapari nujluwa iká ajopana eꞌiyayá, ilaꞌakáloje piyuke nakaje Noraꞌapá wátaka ke. Ilé kaje aú unká nakaje ilaꞌakare palá kapichálajo. Ñakele Noraꞌapá aꞌajeri ijló piyuke nakaje ikejáꞌajikare riliyá nupurákaꞌalo aú.
17 Marí nuwakáraꞌaka ilaꞌaká meꞌetení: Iwata íkiꞌija pekowáaka”, ke Jesús kemaká najló.
Unká jemaꞌalaño Tupana jaꞌapiyá, amaka Jesús chapú, rijwaꞌatéjena waꞌaté, yukuna marí
18 Jesús kemari piño najló: “Apala inaꞌuké, unká jemaꞌalaño Tupana jaꞌapiyá, amájeño iká chapú. Ñaké kaja napechu iꞌimaká nunaku chapú ipiyá.
Jesús advierte sobre la persecución (Juan 15.18-16.4)
19 Neká ke kaja iꞌimakela, napechu iꞌimajla palá inaku. Nawátajla kaja iká, nawátaka nanakiyana ke. Nuꞌuwapakárena nujluwa neꞌiyayá iꞌimakale, namá iká chapú, unkale iꞌimalá neká ke.
20 Iweꞌepí marí numakare nakú ijló: ‘Unká meke laꞌajé apú waꞌaté jápajeri iꞌimalajla rikariwate chaje’. Chapú nalaꞌaká nuká, ñaké kaja nalaꞌajika iká chapú. Nemaꞌajika ee nupurákaꞌalo jaꞌapiyá, nemaꞌajé kaja ipurákaꞌalo jaꞌapiyá.
21 Unká jemaꞌalaño Noraꞌapá jaꞌapiyá, laꞌajeño iká chapú, unkale naweꞌepila naka riká wakáraꞌakare nuká majó iꞌimaká.
22 “Unkákela nuꞌumalajla najló puꞌuwaré nalaꞌakare yukuna, unká naweꞌepílajla rinakojé. Kaja nuꞌumá najló riyukuna, raú chuwa unká méñoꞌojo nemalá nanakuwá: ‘Unká waweꞌepila rinakojé’, ke.
23 Amaño nuká chapú, amaño kaja Noraꞌapá chapú.
24 Nulaꞌá neꞌiyá nakaje unká ajopana weꞌepílare laꞌakana, raú naweꞌepijla naka nuká, eꞌiyonaja unká nawátala nuká. Unká kaja nawátala Noraꞌapá, ñakele puꞌuwaré laꞌakaná nakuja neká.
25 Ñaké Tupana purákaꞌalo, Moisés lanaꞌakare iꞌimaká, kemaká nanaku: ‘Unká na pachá kalé namá nuká chapú’, ke.
26 “Tupana Pechu, nuwakáraꞌajikare ijló Noraꞌapá liyá, iphájika majó wakajé, jewíñaꞌatajeri iká palá. Iñathé aꞌajeri penaje riꞌimajika; ipechu palaꞌatájeri penaje kaja riꞌimajika. Ripechu iꞌimajeri ijló na wánika nuká yukuna, riphájika majó kecha.
27 Iká kaja iꞌimajeño nuyukuna ajopánajlo. Nukeñoꞌoká inaꞌuké jewíñaꞌatakana wakajé, eyá maárejecha, iká iꞌimaño nujwaꞌaté. Ñakele iꞌimajé nuyukuna ajopánajlo, ajopánajlo ke”, ke Jesús kemaká raꞌapiyatéjenajlo.