16
E Jesús kemari piño najló: “Ipechu yurika piyá nochojé kaphí iꞌimakana, marí numá ijló meꞌetení:
2 Apala unká nayurílaje awakako najwaꞌaté pajñakani awakákaꞌalo ñakarelana chu. Nenoje kaꞌajná iká, napechu iꞌimajíkale inaku: ‘Nenókana aú kaꞌajná walaꞌajé Tupana wátaka ke’.
3 Ilé ke nalaꞌajika iká chapú, unkale naweꞌepila wanakojé, Noraꞌapá waꞌaté.
4 Unká chiyó riꞌimá ñaké, nuꞌumá ijló riyukuna. Ñaké riꞌimajika ijló wakajé, iweꞌepeje marí numakare nakú ijló”, ke rimaká najló.
Nakaje Tupana Pechu laꞌakare yukuna marí
E Jesús kemari najló: “Paineko unká nuꞌumalá ijló riyukuna iꞌimaká, ijwaꞌaté nuꞌumakale.
5 Chuwa nuꞌujnañáajika iká, nuꞌumakáloje Noraꞌapá, wakáraꞌari nuꞌumaká majó iꞌimaká, waꞌaté. Unká na inakiyana kemalajla nojló: ‘¿Méñoꞌojo chi piꞌijná?’, ke.
Más enseñanza sobre el Espíritu Santo (Juan 16.5-33)
6 Nuweꞌepí kamuꞌují wani ipechu liꞌichako, numíchakale ijló ilé ke.
7 Jemaꞌá: palani ijló nuꞌujnañáajika iká iꞌimajika. Unkákela nuꞌujnalá, unká Tupana Pechu iphálajla majó iñathé aꞌajeri penaje. Ñakele rejo nuꞌujnajika ee, nuwakáraꞌaje riká majó ijló.
8 Ripechu iphájika wakajé, riꞌimakáloje ijwaꞌaté, rikaꞌátaje inaꞌuké eꞌiyajé, raú naweꞌepíkaloje puꞌuwaré laꞌajeñoka neká. Rewíñaꞌataje kaja neká, naweꞌepíkaloje Tupana aꞌaká nañathé, nalaꞌakáloje palá ripalamane aú nakú. Naweꞌepeje kaja Tupana wajájika puꞌuwaré laꞌajeñó.
9 Rimaje kaja najló, naweꞌepíkaloje raú puꞌuwaré laꞌajeñoka neká, unkale napechu iꞌimalá kaphí nochojé.
10 Rimaje kaja najló, naweꞌepíkaloje palá laꞌakaná nakojé. Ilé ke riꞌimajika ijló, nuꞌujnajíkale Noraꞌapá ejo, unká amálaje piño nuká maárowa.
11 Kaja Tupana kemá Jiñá Chiꞌinárikana wajákana, puꞌuwaré laꞌajeñó waꞌaté nakú. Unká jemaꞌalaño Tupana jaꞌapiyá wakáraꞌajeri riká”, ke rimaká najló.
12 E Jesús kemari piño najló: “Re kajrú nakaje numakáloje ijló rinaku penaje, eꞌiyonaja unká meke laꞌajé iweꞌepílajla rinakojé piyuke meꞌetení.
13 Tupana Pechu iphájika, riꞌimakáloje ijwaꞌaté wakajé, rewíñaꞌataje iká kewákaje purákaꞌaloji nakú. Piyuke nakaje, remaꞌakare Noraꞌapá liyá nakú, rimaje ijló. Riꞌimajé kaja ijló nakaje, aꞌajná ñoꞌojó chami iꞌimajíkare yukuna.
14 Tupana Pechu laꞌajeri ipechu palá, ipechu iꞌimakáloje palá wani nunaku penaje. Ilé ke rilaꞌajika ipechu, raꞌapátajikale ijló nupurákaꞌalo.
15 Noraꞌapá kemaká nakaje nakú, ke kaja numaká rinaku, raú numá ijló: Nuwakáraꞌaje ijló Ripechu, riká jaꞌapátajeri ijló wapurákaꞌalo”, ke Jesús kemaká najló.
Kamuꞌují pechu iꞌimaká meꞌetení, pechu iꞌimajé puꞌují aꞌajná ñoꞌojó chami, yukuna marí
16 E Jesús kemari piño najló:
—Meketana iꞌimajemi unká amálaje nuká ijwaꞌaté maare, nuꞌujnajíkale Noraꞌapá iꞌimaká ejo, rejomi kalé amaje piño nuká.
17 Raú raꞌapiyatéjena nakiyana kemaño pajlokaka:
—¿Meke kaꞌajná kari rimá nakú wajló?: “Meketana iꞌimajemi unká amálaje nuká ijwaꞌaté maare, nuꞌujnajíkale Noraꞌapá iꞌimaká ejo”, ke.
18 ¿Meke kemakánaka kaꞌajná kele rimá nakú: “Meketánaja iꞌimajemi”?, ke. Unká waweꞌepila meke kemakánaka riká.
19 Jesús weꞌepiri nawátaka riyukuna kejáꞌakana riliyá, raú rimá najló:
—Kaja numicha ijló: “Meketana iꞌimajemi unká amálaje nuká, rejomi kalé meketana iꞌimajemi amaje piño nuká”, ke. ¿Riyukuna chi ikejaꞌa paliyáaka?
20 Jemaꞌá: Kajrú wani iyájika, kamuꞌují ipechu iꞌimajíkale; eyá puꞌují unká jemaꞌalaño noꞌopiyá pechu iꞌimajika. Ipéchuja kalé iꞌimajé kamuꞌují riwakajé, rejomi puꞌují wani ipechu iꞌimajika.
21 Inanaru wáꞌaka ruꞌurí ketana, kamuꞌují rupechu, romákale kewini yajwé. Rimothoꞌoká ejomi, kaja rupechu kapicháñaa piyuke kewini yajwé romákare, puꞌují rupechu laꞌakole ruꞌurí mothoꞌoká aú.
22 Ñaké kaja ipechu iꞌimajika meꞌetení kamuꞌují. Nupaꞌajiko piño majó ichaje wakajé, puꞌují wani ipechu iꞌimajika, unká na kalé kaꞌajeri ipechu nakiyá puꞌují kaje riwakajé.
23 Riwakajé unká na yukuna kalé ikejáꞌaje nuliyá. Jemaꞌá marí: Piyukeja nakaje ikejáꞌajikare Noraꞌapá liyá, raꞌajé ijló.
24 Maárejecha, unká joꞌó na kalé ikejaꞌa nupurákaꞌalo aú riliyá. Ikejaꞌa nakaje riliyá, e raꞌajé ijló riká, ipechu iꞌimakáloje puꞌujija raú —ke Jesús kemaká najló.
Jesucristo cháꞌataka Jiñá Chiꞌinárikana yukuna marí
25 E Jesús kemari piño najló: “Yuku kaje nuꞌumaké ijló, nowíñaꞌatakaloje iká raú nakaje nakú. Akijñojo unká nowíñaꞌatalaje iká yuku kaje aú; puꞌukuja nuꞌumajika ijló Noraꞌapá yukuna.
26 Riwakajé ikejáꞌaje nakaje Noraꞌapá liyá nupurákaꞌalo aú, eꞌiyonaja unká nuká kalé kemájeri rijló raꞌakáloje ijló riká penaje.
27 Kaja ikoja ikejáꞌajika nakaje riliyá puꞌukuja, riwátakale iká íkiꞌija. Kajrú iwátaka nuká, raú riwata kaja iká kajrú. Kaja iweꞌepí nuphaka majó Tupana iꞌimaká eyá.
28 Noraꞌapá awaꞌayá nóchoꞌo iꞌimaká, nuꞌujnakáloje majó marí ejaꞌawá nakojé. Chuwa nóchoꞌojiko marí ejaꞌawá nakiyá, nupaꞌakóloje piño Noraꞌapá ejo”, ke rimaká najló.
29 Raú raꞌapiyatéjena kemaño rijló:
—Chuwa waweꞌepí puꞌukuja piꞌimaká wajló riyukuna, unká yuku aú kalé.
30 Kaja waweꞌepí piweꞌepika piyukeja nakaje nakojé. Ñakele unká na penaje kalé wakejaꞌa piliyá nakaje yukuna, puꞌukuja piꞌimajíkale wajló rinaku, raú waweꞌepí Tupana eyaje piká.
31 Jesús kemari piño najló:
—¿Chuwa chi aꞌaká inakojó nupurákaꞌalo?
32 Kaja cha nupatakana iphaka rená chojé, rejéchami makajmálano iñáajika nuká. Eꞌiyonaja unká nuyurílajo nokoja, Noraꞌapá iꞌimajíkale nujwaꞌaté.
33 Numá ijló ilé ke, ipechu watánaꞌakaloje nunakojé palá. Maare ejaꞌawá chu ijñaꞌajé chapú kaje yajwé panaku. Riwakajé ilaꞌajé ipéchuwa kaphí nochojé, raú ipechu watánaꞌaje palá. Palá ipechu iꞌimajika, nucháꞌatajikale ijló Jiñá Chiꞌinárikana, puꞌuwaré laꞌajeñó wakáraꞌajeri.