3 Weꞌepiño naka wani nuká pijwaꞌaté, iꞌimajeño kaja matajnako wajwaꞌaté jeꞌechú chu. Pikaja kalé inaꞌuké Chiꞌinárikana, pajluwaja. Piká wakáraꞌari nuꞌumaká majó.

4 “Nakaje nulaꞌakare marí ejaꞌawá chu aú naweꞌepí piyuke laꞌajerí piká. Kaja nuñapata piyuke nakaje, piwakáraꞌakare nulaꞌaká, laꞌakana.

5 Ñakele chuwa, Noraꞌapá, pilaꞌá nunaku palá, júpimi pilaꞌaká nunaku, unká chiyó ejaꞌawá iꞌimá wakajé, ke kaja.

6 “Piꞌiwapakárena marí ejaꞌawá chiyá, paꞌakáloje nojló neká penájejlo nuꞌumá piyukuna, naweꞌepíkaloje naka piká. Pileꞌejena neꞌemaká, eꞌiyonaja paꞌá nojló neꞌemaká. Meꞌetení kaja palá nemaꞌaká Pipurákaꞌalo jaꞌapiyá.

7 Kaja naweꞌepí piyuke nakaje paꞌakare nojló, piliyaje waja riká.

8 Kaja nuꞌumá najló nakaje, pimakare nakú nojló iꞌimaká, yukuna. Kaphí napechu richojé meꞌetení, naweꞌepí kaja piká wakáraꞌari nuꞌumaká majó.

9 “Nachaya nupuraꞌó pijwaꞌaté; unká nupuraꞌaló unká jemaꞌalaño paꞌapiyá chaya.

10 Piyukeja nuleꞌejena inaꞌukena, pileꞌejena kaja neká. Eyá pileꞌejena inaꞌukena, nuleꞌejena kaja. Waleꞌejena neká piyukeja. Palá wani napechu nunaku, nupalamane neꞌemakale.

11 “Unká nuꞌumalaje chuwa marí ejaꞌawá chu, eyá waleꞌejena inaꞌukena yuréjeño maare re joꞌó kaja. Nuká paꞌajero pichaje, nuꞌumakáloje pijwaꞌaté penaje. Paꞌayú, palá laꞌajerí piká, ñakele numá pijló: Pamá neká palá, piyukeja nakaje laꞌajerí piꞌimakale, neꞌemakáloje palá pajwaꞌatéchaka, nuꞌumaká pijwaꞌaté ke kaja.

12 Maare nuꞌumaká najwaꞌaté ketana, palá nomaka neꞌemaká. Pipalamane noꞌó nunakojó palá neꞌemaká. Numejñata kaja neꞌemaká, unká nanakiyana kapichálajo. Pajluwaja kalé kapichájero neꞌiyayá, Tupana purákaꞌalo lanaꞌakéjami kemaká rinaku iꞌimaká ke.

13 “Chuwa nuꞌujnajika piꞌimaká ejo. Maare nuꞌumaká ketánaja kalé nupuraꞌakó najwaꞌaté, napechu iꞌimakáloje puꞌují, nupechu iꞌimaká ke kaja.

14 Noꞌopata najló Pipurákaꞌalo, eꞌiyonaja chapú puꞌuwaré laꞌajeñó amaka neká, unkale nalaꞌalá puꞌuwaré, nalaꞌaká ke. Unká kaja nuká laꞌalá puꞌuwaré, nalaꞌaká ke.

15 Unká numalá pijló, piwáꞌakaloje neká marí ejaꞌawá nakiyá. Numá pijló, pamákaloje neká palá Jiñá Chiꞌinárikana liyá, nalaꞌaká piyá puꞌuwaré.

16 Nuká unká laꞌalá puꞌuwaré, ajopana laꞌaká ke, ñakele nalaꞌajé nulaꞌaká ke kaja.

17 Pilaꞌá ñakeja nanaku palá, kewákaje Pipurákaꞌalo iꞌimakale, nalaꞌakáloje piwátaka ke penaje.

18 Piwakáraꞌaka nuꞌujnaká, unká jemaꞌalaño paꞌapiyá iꞌimaká ejo, ke kaja nuwakáraꞌajika neká, unká joꞌó jemaꞌalaño noꞌopiyá ejo, wayukuna iꞌimajé najló.

19 Noꞌó nokó pijló, nulaꞌakáloje piwátaka ke penaje, ñaké kaja naꞌakáloje nekó pijló, nalaꞌakáloje piwátaka ke.

20 “Unká nacháyaja kalé nupuraꞌó pijwaꞌaté; nupuraꞌó kaja jemaꞌajeño pipurákaꞌalo, neꞌemajíkare najló yukuna jaꞌapiyá chaya.

21 Numá pijló, paꞌakáloje nañathé, neꞌemakáloje pajluwa japi keja pajwaꞌatéchaka wajwaꞌaté, nuká pijwaꞌaté ke, raú inaꞌuké weꞌepíkaloje piká wakáraꞌari nuꞌumaká majó.

22 Palá nulaꞌaká nanaku, pilaꞌaká nunaku ke kaja, neꞌemakáloje pajluwa japi keja, weká pijwaꞌaté ke.

23 Pajluwa japi keja weká pajwaꞌatéchaka najwaꞌaté, raú naweꞌepeje piká wakáraꞌari nuꞌumaká. Naweꞌepeje kaje íkiꞌija wani piwátaka pijwaꞌatéjena, piwátaka nuká ke kaja.

24 “Noraꞌapá, piká aꞌarí nojló neꞌemaká, ñakele nuwata neꞌemaká nujwaꞌaté nuꞌumajika e, namákaloje meke palá wani pilaꞌaká nuká penaje. Unká chiyó pikeñoꞌota ejaꞌawá, piyukeja nakaje waꞌató, piwata nuká íkiꞌija iꞌimaká.

25 Noraꞌapá, unká laꞌalá puꞌuwaré piká. Inaꞌuké unká jemaꞌalaño paꞌapiyá, unká weꞌepílaño naka piká; eyá nuká weꞌepiri naka piká. Noꞌopiyatéjena weꞌepiño kaja piká wakáraꞌari nuꞌumaká majó.

26 Kaja naweꞌepí palá naka piká, nuꞌumakale najló piyukuna. Ñakeja nulaꞌajika napechu palá, íkiꞌija nawátakaloje pekowáaka penaje, piwátaka nuká ke kaja”, ke rimaká najló.