Nawáꞌaka Jesús Pilato ejo yukuna marí
27
E kaja najmeꞌetá. Sacerdótena wakáraꞌajeño, ajopana pheñawilana waꞌaté, pechu iꞌimari rejenowaja Jesús nókana nakú.
2 E nepoꞌotá raꞌanapitá panakojéchaka. Nawaꞌa riká nawakáraꞌajeri Poncio Pilato ejo.
Judas noka rikó yukuna marí
3 Maapami ke Judas aꞌaká ripinánajlo Jesús iꞌimaká. Ramaka aú nawátaka rinókana, chapú riwó iꞌimaká richó. E riꞌijná liñeru paꞌataje najló, maapami ke naꞌakare rijló riwáꞌakaloje neká Jesús iꞌimaká ejo wemí. Riphaka sacerdótena wakáraꞌajeño, pheñawilana, kele nakú ee,
4 rimá najló:
—Marí liñeru, unká wani paala nuliꞌichaka riká. Unká laꞌalá puꞌuwaré kele, eꞌiyonaja iwata rinókana. Chapú wani nuliꞌichaka riká ijló raꞌakana aú —ke Judas kemaká najló.
Raú nemá rijló:
—Pijloja kalé chapú riká. Wajló unká ñaké kalé.
5 Raú rikaꞌá liñeru Tupana ñakaré chojé. Rejomi raꞌapá reyá rinókaloje rikó penaje. Rakúwaꞌata rikó rinúrupi nakiyá. Ilé ke Judas michú noka rikó iꞌimaká.
6 Sacerdótena wakáraꞌajeño wayoꞌoñó riliñérutemi rikaꞌakare Tupana ñakaré chojé. E nemá:
—Inaꞌuké nókana wemí kari. Chapú walaꞌakajla, walamáꞌatakela raꞌakuná chojé riká marí Tupana ñakaré chu.
7 Raú napuraꞌó pajwaꞌatéchaka rinaku mékeka rilaꞌakana nakú. Ñaké iꞌimakale nawarúwaꞌa támijimina jaꞌakelana pukuna raú, najaꞌakáloje ajopana teꞌeré eyájena tami rejé. Pajluwaja pukapé ipújeri leꞌejé riꞌimaká. Riká liyá nawarúwaꞌa teꞌerí rapukuna penaje.
8 Maárejecha nemá rapukuna nakú: “Jirá Pukuna riká”, ke.
9 Tupana purákaꞌalo jaꞌapátajeri Jeremías michú kemaká júpimi ke nalaꞌaká. Marí ke rilanaꞌaká riyukuna iꞌimaká: “Israel lakénami nakiyana aꞌajeño apujlo treinta monedas, raꞌakáloje najló riká riwemí penaje.
10 Riwemí aú nawarúwaꞌaje pukunaji pajluwaja pukapé ipújeri liyá. Tupana Pechu kemaká nojló ke nalaꞌajika”, ke rilanaꞌaká riyukuna iꞌimaká.
Jesús táraꞌako Pilato jimaje yukuna marí
11 E kaja nawaꞌa Jesús nateꞌeré eyá wakáraꞌajeri ejo. Rimá Jesusjlo:
—¿Judíona iꞌimakana chi piká?
Jesús kemari rijló:
—Aꞌa, pimaká nunaku keja nuká.
12 E sacerdótena wakáraꞌajeño, pheñawilana waꞌaté kemaño Jesús nakú Pilátojlo na pachaka nawátaka rinókana, eꞌiyonaja unká Jesús apiyákala neká.
13 Raú rimá Jesusjlo:
—¿Unká chi pemaꞌalá mékeka nemaká pinaku: “Puꞌuwaré laꞌajerí riká”, ke?
14 Eꞌiyonaja unká raꞌajipalá rijló, raú nawakáraꞌajeri pechu iꞌimá: “¿Na ta chi kaji numajlo?” Raú unká méñoꞌojo riweꞌepila mékeka rilaꞌakana.
Nemá Jesús nakú nenókaloje riká penaje. Riyukuna marí
15 Fiesta Pascua wakajé keja Pilato jáchoꞌotajikano inaꞌuké wajákelana chiyá pajluwaja inaꞌuké. Riká, nawátajikare jáchoꞌotakana, ráchoꞌotake najló.
16 Riwakajé Barrabás iꞌimari inaꞌuké wajákelana chu. Piyuke inaꞌuké amánaꞌapa riꞌimaká.
17 Kaja nawakó iꞌimaká, raú Pilato kemari najló:
—¿Mékaje chi iwata nóchoꞌotaka ijló: Barrabás kaꞌajná, Jesús kaꞌajná? Riká nemakare nakú: “Tupana wakáraꞌakare majó”, ke, ¿riká chi nóchoꞌotaje ijló?
18 Ilé ke rimaká najló, riweꞌepíkale chapú nawó iꞌimaká Jesús cha. Kajrú inaꞌukena pechu iꞌimaká Jesús nakú palá. Riká jimaje chapú nawakáraꞌajeño wo iꞌimaká richá, richáꞌatakale neká ripechu aú. Ñaké iꞌimakale nawaꞌa riꞌimaká rejo riwakáraꞌakaloje rinókana penaje.
19 Re Pilato yáꞌaro rimakáloje najló mékeka rilaꞌakana. E purákaꞌaloji, riyajalo wakáraꞌakare rijló, kemari: “Páchoꞌota ilé Jesús, reja riꞌimareja, unká laꞌalá meke riká inaꞌuké. Lapí nutapúniꞌicha riká, kajrú wani nukawíliꞌichako raú”, ke purákaꞌaloji kemaká riyajalo wakáraꞌakare rijló.
20 Kaja Pilato kemá najló iꞌimaká: “¿Mékaje chi iwata nóchoꞌotaka ijló: Jesús kaꞌajná, Barrabás kaꞌajná?” Raú sacerdótena wakáraꞌajeño, pheñawilana waꞌaté, kaꞌátaño kajrú inaꞌukena eꞌiyajé nemakáloje rijló: “Páchoꞌota wajló Barrabás; piwakáraꞌa Jesús nókana”.
21 E neꞌemakana kemari piño najló:
—Chuwata, imá nojló mékajeka iwata nóchoꞌotaka ijló.
Nemá rijló:
—Páchoꞌota wajló Barrabás.
22 Rimá najló:
—¿Eta meke chi nulaꞌajika Jesús, riká nemakare nakú Tupana wakáraꞌakare majó?
Nemá rijló:
—Piwakáraꞌa riphakana aꞌawaná apiyákakanami nakojé.
23 Raú Pilato kemari najló:
—¿Naje chi iwata rinókana? ¿Na chi rilaꞌá puꞌuwaré?
Raú nawíyoꞌo piño rijló:
—¡Piwakáraꞌa rinókana!
24 Pilato weꞌepiri unká nawátala Jesús jáchoꞌotakana. Ramá kaja nayúchaꞌako wani rijimaje, raú riwakáraꞌa najñaꞌaká rijló juni pachiya chojé. Najimaje ripá riyátheꞌela chiyá, naweꞌepíkaloje raú unká riká kalé wakáraꞌaka rinókana. Rimá najló:
—Unká nuwakáraꞌalaje ilé unká laꞌalá puꞌuwaré nókana. Ilaꞌá riká ipechu nakú riꞌimajika ke.
25 Raú piyukeja nemaká rijló:
—Weká, wayani waꞌaté, aꞌajeño wanakajó rinókana.
26 Ilé kaje aú Pilato jáchoꞌotari najló Barrabás. Rejomi riwakáraꞌa nañaꞌataka Jesús. E riyurí najló riká nenókaloje riká penaje.
27 Rejomi suráana wáꞌaño Jesús nawakáraꞌajeri ñakaré ejo. Re nawakata suráana re iꞌimakaño piyuke Jesús awaꞌajé.
28 E nakaꞌá raꞌarumaká rinakiyá, nalaꞌakáloje riká namákaja penaje. Naꞌá rinaku ipiralukuni aꞌarumakaji, nawakáraꞌajeñoja kalé aꞌajíkare nakuwá.
29 Nachipúkaꞌata kaja riwílaꞌaru nakojé tujripi. Naꞌá kaja ijijila ina kaꞌañá riyátheꞌela chojó pitá rikutiware penaje. Rejomi natáraꞌo neꞌerúpachi aú rijimaje. Namákaja nalaꞌaká riká, nemá rijló:
—Judíona iꞌimakana, ¿piká?
30 Nathupá nawi rijimá chojé, e najñaꞌá ijijila ina rikápiya, nañaꞌakáloje riká phewílaꞌaruya raú.
31 Kaja ewaja nayurí rilaꞌakana namákaja. Nakaꞌá aꞌarumakaji ipiralukuni rinakiyá, naꞌá piño rinaku apú raꞌarumaká. Rejomi nawaꞌa riká nenókaloje riká.
Nephátaka Jesús aꞌawaná apiyákakanami nakojé yukuna marí
32 Aꞌawaná apiyákakanami riwakúlaꞌapa ke Jesús jaꞌapaka najwaꞌaté. Náchoꞌoko pajimila eꞌiyayá ee, nephata pajluwa inaꞌuké. Cirene eyaje riꞌimaká; Simón rií iꞌimaká. Riká nawakáraꞌa wákoꞌoka aꞌawaná apiyákakanami Jesús ápumichu.
33 Neꞌejná ají ke Gólgota ejo. “Inaꞌuké wílaꞌarumi aphinami”, ke naꞌajika rií napuraꞌakó chu, ñaké ramákana iꞌimakale. Rejé nephá.
34 Re naꞌá Jesusjlo iꞌirakaje, kajmú kaje jalá amúraꞌatakanami, kechípaꞌakeja nakaje jalá ipijini waꞌaté. Jesús atáꞌari riká, unká riꞌiralá riká.
35 E nephá riká itapuwa aú. Rejomi suráana kátaño nakaje nakú, namákaloje mékeka natamákaꞌatajika najluwa raꞌarumakami. Tupana purákaꞌalo jaꞌapátajeri michú kemaká rinaku, ke nalaꞌaká raú. Júpimi rimá iꞌimaká: “Natamákaꞌatakaloje najluwa noꞌorumakami penaje nakátajo nakaje nakú, raú naweꞌepíkaloje nájloka noꞌorumakami yuríjiko”, ke rimaká rinaku iꞌimaká.
36 Re natamákaꞌata najluwa raꞌarumakami rinaku iꞌimakare, rejomi nayaꞌo.
37 E nephá lanaꞌakéjami Jesús cha. Riká kemari na pachaka nenoka riká. Nalanaꞌakare kemari rinaku: “Marí Jesús, judíona iꞌimakana riká”.
38 Nephá kaja Jesús awaꞌajé iyamá jataꞌakáchina iyámaꞌajo pitá ke.
39 Rawaꞌayá jaꞌapájikaño laꞌakeño namákaja riká. Nañakaꞌaké newílaꞌaru rijló.
40 Nemá rijló:
—Piká kemakeri pinakuwá: “Nukajyaꞌatajla Tupana ñakaré, eyá weji ke kala iꞌimajémija nulaꞌajla piño rapumí chuwá riká”, ke. Chuwa piꞌimatá pikó. Tupana iꞌirí piꞌimajika ee, piwitúkaꞌa aꞌawaná apiyákakanami nakiyá.
41 Ñaké kaja ajopana laꞌaká namákaja riká. Sacerdótena wakáraꞌajeño, Tupana purákaꞌalo nakú jewíñaꞌatajeño, fariséona, pheñawilana, kele neꞌemaká, laꞌañó kaja namákaja riká. Nemá rinaku pajlokaka:
42 —¡Meke kalé ta riꞌimataka ajopana kapichákajo liyá iꞌimaká, eta, rikó unká méñoꞌojo riꞌimatala! Israel lakénami wakáraꞌajeri riꞌimajika ee, riwitúkaꞌaje aꞌawaná apiyákakanami nakiyá. Ilé ke wamájika ee rilaꞌaká, wemaꞌajé raꞌapiyá.
43 Kaphí Tupana chojé péchuri riká. Tupana wátakare riꞌimakela, Tupana iꞌimatajla riká, rimakale rinakuwá: “Tupana iꞌirí nuká”, ke.
44 Jataꞌakáchina, nephákarena Jesús awaꞌá, puraꞌañó kaja rinaku puꞌuwaré.
Jesús takaꞌaká yukuna marí
45 E kaja lapí ke iꞌimari nachá piyuke ejaꞌawá chu. Kaápuꞌuku eyá peꞌiyochami kamú toꞌokó ketana neꞌemaká kalajerúwaka.
46 Peꞌiyochami kamú toꞌokó ee, Jesús awíyoꞌori kaphí wani. Napuraꞌakó chu rimá:
—Elí, Elí, ¿lamá sabactani?
“Tupana, nupechu iꞌimakare chojé kaphí, ¿na penaje piyurí nuká?”, ke kemakana riꞌimaká napuraꞌakó chu.
47 Re iꞌimakaño nakiyana jemaꞌañó rawíyoꞌoka, raú nemá:
—Ilé, chuwa riwáꞌaka Tupana purákaꞌalo jaꞌapátajeri Elías michujlo.
48 Raú pajluwaja nanakiyana jechoꞌótari iꞌirakaje rijló. Rejata nakaje jamáraꞌapani kajmú kaje jalá amúraꞌatakanami jakú. Kéchami repoꞌoká ijijila lupukú nakojé riká. Riká aú raꞌá rijló riká riꞌirakáloje reꞌiyayá riká penaje.
49 Raú ajopana kemaño rijló:
—Reja riꞌimareja. Wamáijla, apala Elías michú iphaje majó riꞌimataje.
50 Jesús awíyoꞌori piño kaphí wani kaja penaje, ejé ritakaꞌá.
51 Waꞌató ke yaꞌajná Tupana ñakaré chu aꞌarumakaji akúwaꞌakaro jiyoꞌokó peꞌiyowá paliyáaka. Apaꞌalá ukapú ke penaje rakúwaꞌako re. Rijiyoꞌó yenuya ají ke kawakaje. Kaja iyamá ke riyuriko. Ritakaꞌaká ejéchami teꞌerí ñakaꞌakó, raú kaja jipa kajruni eꞌechataro paliyáaka.
52-53 Raú támijimina toꞌotákelana chiyá támijimina chaya meꞌetátaro. Riwakajé Tupana makápoꞌotari kajrú inaꞌukena júpimi ke takaꞌakaño. Kaphí péchuruna Tupana chojé neꞌemaká. Jesucristo makápoꞌoko piño ejomi, neꞌejná Jerusalén, Tupana leꞌejé pajimila ejo. Kaja puꞌuwaká nachiraꞌakó rewá. Kajrú inaꞌukena amaka nachiraꞌakó rewá iꞌimaká.
54 Ritakaꞌaká apukuna e suráana wakáraꞌajeri iꞌimari ajopana suráana waꞌaté. Jesús waꞌaphé iꞌimakaño neꞌemaká. Ritakaꞌaká ejéchami namaka teꞌerí ñakaꞌakó, jipa eꞌechataro kaja. Ilé kaje aú kajrú wani nakeroꞌokó, nemá pajlokaka:
—Tupana iꞌirí joꞌó kele takiꞌichari.
55 Kajrú inaana iꞌimaká aꞌajnare ke. Jukáyaja nayakaꞌo rejo. Neká iꞌijnakeño Galilea eyá ají ke Jerusalén ejo Jesús waꞌaté iꞌimajika. Riñathé aꞌajeño neꞌemaká riwakajé iꞌimaká.
56 Re María Magdalena iꞌimayo najwaꞌaté; apaꞌawelo María iꞌimayo kaja najwaꞌaté. Santiago, Juan, kele jaló, iꞌimayo kaja najwaꞌaté re.
57 E kaja najúwaꞌa. E José iꞌijnari Pilato amaje. Kajrú leꞌejepelari José iꞌimaká; Arimatea eyaje riꞌimaká; Jesús jaꞌapiyá jemaꞌajeri kaja riꞌimaká.
58 Riká iꞌijnari Pilato ejo rikejáꞌakaloje Jesús tami riliyá penaje. E Pilato yuriri rijló ritami.
59 Raú ripaꞌó ritami witúkaꞌataje. Riwitúkaꞌataka ritami ejomi, riphilaꞌá palá nojé aꞌarumakaji ritami nakojé.
60 Támijimi toꞌotákelana chojé riꞌijnatá ritami. Wajé ichákanami jipa pana riꞌimaká. Rijluwa riwakáraꞌa richákana iꞌimaká. Riká chojé ritoꞌotá Jesús tami. Kaja penaje netá kajruni jipa aú rinumaná. Rejomi ripaꞌó. a
61 Aꞌajnare ke rilokoꞌopani María Magdalena, apaꞌawelo María, kele yáꞌaño.
Jesús tami waꞌaphé iꞌimakaño yukuna marí
62 Kaja aꞌajnejí lamáꞌatakana wakajé jená jaꞌapari. Muní ke sacerdótena wakáraꞌajeño, fariséona, kele iꞌijnaká Pilato amaje.
63 Nemá rijló:
—Riphicha wapechu nakojé mékeka ilé pajlákachi ta kemaká rinakuwá. Kajmuni riꞌimaká wakajé rimá: “Nenoje nuká, eyá weji ke kala iꞌimajemi numakápoꞌojo piño nopumí chuwá”, ke.
64 Ñakele piwakáraꞌa suráana rejo, neꞌemakáloje ritami waꞌaphé weji ke kala ketana, raꞌapiyatéjenami iꞌijnaká piyá ritami jataꞌajé. Nataꞌakela ritami, kaja nemajla rinaku: “Kaja rimakápoꞌo piño”, ke. Ilé ke nalaꞌakela, napajlákare yukuna jemaꞌojla kajrú wani —ke nemaká Pilátojlo.
65 Raú rimá najló:
—Iꞌijná rejo. Ileruna suráana nakiyana iꞌijnajeño ijwaꞌaté, neꞌemakáloje riwaꞌaphena penaje, ajopana mujlúkaꞌaka piyá rejo.
66 Raú neꞌejná rejo. Nachútaꞌa inimú jipa netakare rinumaná nakojé, raú naweꞌepíkaloje apú kawitaka riká kaꞌajná, rimujlúkaꞌakaloje richojé rimichoꞌojnoja penaje. Kaja penaje nayurí kajrú suráana re riwaꞌaphé iꞌimakaño penaje.