Jesús makápoꞌoko piño yukuna marí
28
Kaja watánaꞌakaje iꞌimaká wakajé jaꞌapá. Muní ke najmeꞌetaka. Jápakaje keñoꞌokó wakajé riꞌimaká. E María Magdalena, apaꞌawelo María waꞌaté, iꞌijnaño piño támijimi toꞌotákelana ejo.
2 Manaꞌí chiyó kaphí wani teꞌerí ñakaꞌakó naꞌapiyá. Reꞌiyowá ke pajluwa Tupana waꞌatéjeri witúkaꞌaka jeꞌechú chiyá jipa jatataje rinumaná eyá. Ratatá jipa reyá, rejomi riyaꞌo rinaku.
3 Mejámaꞌatani ke ramako, pichaní kamaré ke. Jaré nojé wani raꞌarumaká iꞌimaká.
4 Ilé ke suráana, támijimi waꞌaphé iꞌimakaño, amaka aú kajrú wani nakeroꞌokó. Kajrú kaja nakurúkaka raú. Matámiru keja natoꞌokó teꞌerí eꞌiyá re.
5 E inaana iphaño rejo. E Tupana waꞌatéjeri, jeꞌechú chiyaje, kemari najló:
—Ikeroꞌoniño. Nuweꞌepí iꞌijichaka majó Jesús tami amaje, riká nephákare aꞌawaná apiyákakanami nakojé iꞌimaká.
6 Unká riꞌimalá maare, kaja rimakápoꞌocho. Rimaká rinakuwá iꞌimaká keja rimakápoꞌochako. Imujlúkaꞌa majó, amachi rapukúnami.
7 E rimá piño najló:
—Chuwa ipaꞌó kiñaja, iꞌimichá raꞌapiyatéjenajlo: “Kaja rimakápoꞌocho. Kaja riꞌijichá natukumá Galilea ejo rawakákoloje re najwaꞌaté penaje”.
8 Raú inaana jáchoꞌoño reyá keroꞌokajo nakú. Waꞌató ke puꞌují napechu iꞌimaká raú. Nechoꞌó ají ke riyukuna iꞌimajé raꞌapiyatéjenajlo.
9 E napunana chu Jesús yaꞌataro najló. Rajalaka neká, raú neꞌejná rawaꞌajé. Puꞌují napechu iꞌimaká rinaku aú, najlámaꞌo riꞌimá nakojé. Namawíloꞌo riká ritajné nakiyá.
10 Rimá najló:
—Ikeroꞌoniño. Iꞌijná, iꞌimichá nuyukuna nojénajlo. Imicha najló neꞌejnakáloje Galilea ejo. Re namaje nuká.
Mékeka suráana kemaká najló yukuna marí
11 Kaja inaana iꞌijná riyukuna iꞌimajé ajopánajlo. Aꞌapona ke suráana, riwaꞌaphé iꞌimakaño, iꞌijnaká pajimila ejo riyukuna iꞌimajé sacerdótena wakáraꞌajeñojlo.
12 Riyukuna jemaꞌakana aú sacerdótena wakáraꞌajeño iꞌijnaño pheñawilana waꞌaté rinaku puraꞌajó. Panakojéchaka ke napechu iꞌimaká mékeka nalaꞌajika nakú. Eyá naꞌá suráanajlo kajrú liñeru, neꞌemaká piyá riyukuna ajopánajlo.
13 E nemá suráanajlo:
—Marí ke imájika ajopánajlo: “Lapí wakamátako cháyomi, raꞌapiyatéjenami iphaño ritami jataꞌajé”.
14 Iwakáraꞌajeri jemaꞌajika ee riyukuna, weká puraꞌajeño ichaya, riwátajika ee iwajákana, unká pachá iꞌimalá riwaꞌaphé palá —ke sacerdótena wakáraꞌajeño kemaká najló.
15 E naꞌá najló liñeru. Rejomi nawakáraꞌaka neꞌemaká riyukuna, ke neꞌemaká riyukuna reyá aꞌajná ñoꞌojó. “Raꞌapiyatéjena jataꞌañó ritami”, ke nemájika rinaku. Eyá maárejecha ñakeja riyukuna. Re joꞌó kaja judíona nakiyana kemaño ñaké rinaku.
Jesús aꞌaká raꞌapiyatéjenajlo ripurákaꞌalo naꞌapátakaloje riyukuna penaje, yukuna marí
16 Kaja raꞌapiyatéjena jemaꞌá rimakápoꞌoko yukuna, raú neꞌejná Galilea ejo, yenuri Jesús kemakare nakú najló iꞌimaká, ejo. Pajluwaja iphata jiꞌimaji nakojé kele (11) neꞌemaká.
17 E nephá Jesús nakú. Puꞌují kaje aú neꞌejnataka napéchuwa rinaku ramákana aú. Neꞌiyajena pechu iꞌimari: “¿Riká wani chi riká, apú kaꞌajná?”
18 E Jesús iꞌijnari nawaꞌajé, rimá najló:
—Kaja Tupana aꞌá nuká piyuke marí ejaꞌawá chu iꞌimakaño wakáraꞌajeri penaje, eyá jeꞌechú chu iꞌimakaño wakáraꞌajeri waꞌaté, penaje raꞌá nuká.
19 Ñakele numá ijló: Eko iꞌijná ajopana teꞌeré ejo, ajopana teꞌeré ejo ke, nupurákaꞌalo jaꞌapátakana nakú piyukeja inaꞌukénajlo rewá. Raú neꞌiyajena jemaꞌajeño noꞌopiyá, neꞌemakáloje nujwaꞌatéjena penaje. Re Noraꞌapá Tupana, eyá nuká Riꞌirí, eyá Tupana Pechu, kele. Kele jaꞌapiyá neꞌemajika ee, ilaꞌajé bautizar neká.
20 Jewíñaꞌataje kaja neká naꞌakáloje nupurákaꞌalo nanakojó piyukeja penaje. Ñakeja nuꞌumajika ijwaꞌaté, unká nuyurílaje ikó iká —ke Jesús kemaká najló.
Maárejeja riyukuna San Mateo lanaꞌakare iꞌimaká.