2 E nephá rejo, amaño jipa iꞌimaká jatatákejami rinumaná eyá. 3 Raú namujlúkaꞌa ulawí, natoꞌotákare chojé ritami iꞌimaká, amaño unká nawakáraꞌajeri Jesús tami iꞌimalá richu, 4 raú kajrú nakeroꞌokó. Napechu iꞌimá: “¿Meke chi kari?” Rejéchami namaka iyamá achiñana, jeꞌechú chiyájena, táraꞌako nawaꞌá. Sereni, jareni wani naꞌarumaká iꞌimaká. 5 Marí kaje keroꞌótari wani najló, raú najlámaꞌo neꞌemá nakojé. E neká achiñana kemaño najló:

—¿Naje ikulá kele kajmuni támijimina eꞌiyowá? 6 Unká Jesús iꞌimalá maare, kaja rimakápoꞌocho. Galilea e riꞌimaká wakajé, riꞌimá ijló riyukuna iꞌimaká. Kaja iweꞌepí mékeka rimaká rinakuwá ijló iꞌimaká. 7 Rimá ijló iꞌimaká: “Inaꞌuké iꞌimakáloje nupalamane penaje iꞌimaká nuká. Naꞌajé nuká puꞌuwaré laꞌajéñojlo. Neká nójeño nuká aꞌawaná apiyákakanami nakojé iphakeja, eyá weji ke kala iꞌimajemi numakápoꞌojo piño nopumí chuwá”.

8 Ilé ke nemaká najló aú, riphá napechu nakojé. Rejéchami naweꞌepika ñaké rimaká najló iꞌimaká. 9 Raú napaꞌó napumí chuwá, iphaño Jesús jaꞌapiyatéjena nakú. Pajluwaja iphata jiꞌimaji nakojé kele (11) neꞌemaká. E neꞌemá rimakápoꞌoko yukuna najló, ajopana inaꞌukénajlo waꞌató. 10 Mariruna inaana iꞌimaño Jesús makápoꞌoko yukuna raꞌapiyatéjenajlo: María Magdalena, Juana, María, Santiago jaló, eyá ajopana inaana, kele. 11 Eꞌiyonaja unká raꞌapiyatéjena jemaꞌalá naꞌapiyá. “Mapeja pi napuraꞌakó wajwaꞌaté”, keja napechu iꞌimaká.

12 Eyá Pedro, unká pechu iꞌimalá napechu ke kaja, raú rechoꞌó ají ke támijimi toꞌotákelana ejo. E riyakaꞌo ulawí chojé, amari meñaru ritami iꞌimaká. Aꞌarumakaji, José philaꞌakare rinakojé iꞌimaká, rikaja kalé yáꞌaro rapukúnami chu. Ilé ke ramaka aú, jaujú ke ripechu laꞌakó. Kajrú riꞌijnataka ripéchuwa rinaku, ripaꞌakó rapumí chuwá nakuwá.

13 Riwakajeja iyamá Jesús waꞌatéjena nakiyana iꞌijnaño ají ke pajimila Emaús ejo. Pajluwaja iphata jiꞌimaji nakojé kele (11) kilómetros ketana jukaka Jerusalén eyá riꞌimaká. 14 Naꞌapaka nakú, napuraꞌó pajwaꞌatéchaka mékeka nalaꞌaká Jesús iꞌimaká nakú. 15 Eꞌiyowá ke Jesús iphákaꞌako najwaꞌaté. Reyá raꞌapá najwaꞌaté. 16 Namá riká, apoꞌojó riꞌimaká nejlú chu, naweꞌepika piyá riká wánika riꞌimaká. 17 E rimá najló:

—¿Na nakú chi ipuriꞌichó wajé jaꞌapíchaka nakú iꞌimichaka? ¿Naje iꞌijnatá kamuꞌují ipéchuwa?

Marí ke rimaká najló aú, natajnó iñeꞌepú chu, 18 rejéchami pajluwa, Cleofás rií iꞌimaká, kemaká rijló:

—Piyukeja inaꞌukena maárowa iꞌimakaño weꞌepika mékeka nakaje iꞌimaká Jerusalén e; kaja kajrú riyukuna jemaꞌakó piyuke Jerusalén ewá. ¿Pikaja kalé chi unká jemaꞌalá riyukuna?

19 Jesús kemari najló:

—¿Meke chi rewá iꞌimaká?

Nemá rijló:

—Nazaret eyaje, Jesús michú, Tupana purákaꞌalo jaꞌapátajeri riꞌimaká. Palá wani rilaꞌajika inaꞌuké; palá wani kaja rewíñaꞌatajika neká Tupana nakú, raú piyuke inaꞌuké pechu iꞌimajika palá rinaku. Ñaké kaja Tupana pechu iꞌimajika rinaku palá. 20 Eꞌiyonaja sacerdótena wakáraꞌajeño, eyá ajopana inaꞌukena wakáraꞌajeño, kele aꞌañó riꞌimaká ajopánajlo, nenókaloje riká penaje. Raú nephá riꞌimaká aꞌawaná apiyákakanami nakojé itapuwa aú riyátheꞌela eꞌiyayá. Rejomi natáraꞌata riꞌimaká. 21 Kaphí wapechu iꞌimaká richojé, riꞌimatákaloje weká Israel lakénami, ajopana teꞌeré eyájena liyá. Kaja weji ke kala cha weká, nenoka riꞌimaká ejomi. 22 Wanakiyana inaana iꞌimichaño riyukuna wajló. Meñaru namíchaka ulawí, natoꞌotákare chojé ritami iꞌimaká, raú wapechu iꞌimichá: “¡Meke piyuke wani rilaꞌalaka!” Lapiyami neꞌejichá támijimi toꞌotákelana ejo, kamú jeñoꞌochaka ee, 23 iphíchaño rejo, amíchaño unká riꞌimalacha richu. Raú napiꞌichó riyukuna iꞌimajé wajló. Nemicha wajló: “Tupana waꞌatéjena, jeꞌechú chiyájena, yaꞌatíyaño wajló. Neká kemíchaño wajló: ‘Kajmuni Jesús’ ”. 24 Rejomi wajwákeꞌena nakiyana iꞌimichaño piño támijimi toꞌotákelana ejo. Inaana kemíchaka keja namíchaka riká. Unká kaja namálacha ritami.

25 E Jesús kemari najló:

—Ñaké kaja Tupana purákaꞌalo jaꞌapátajeño michuna lanaꞌaká riyukuna iꞌimaká. ¡Meke ijnú wani jemaꞌaká napurákaꞌalomi jaꞌapiyá! ¡Meke unká wani ipechu iꞌimalá ijló! 26 Riká, Tupana wakáraꞌakare majó inaꞌuké iꞌimatájeri penaje, amari chapú kaje yajwé. Kaja keja riꞌimakale Tupana pechu nakú, nalaꞌakáloje ñaké riká, riꞌijnajika jeꞌechú chojé yámona, rejomi ráchoꞌokoloje jeꞌechú chojé, riꞌimakáloje Tupana waꞌaté inaꞌuké wakáraꞌajeri penaje. Ilé kaje penaje ramá chapú kaje yajwé iꞌimaká —ke rimaká najló.

27 Rimá kaja najló mékeka Tupana purákaꞌalo lanaꞌakéjami kemaká rinaku iꞌimaká. Ripurákaꞌalo, Moisés michú lanaꞌakare, eyá rikeñoꞌó riyukuna iꞌimakana najló paineko. Rejomi raꞌapata piño najló Ripurákaꞌalo jaꞌapátajeño michuna lanaꞌakare iꞌimaká yukuna. Ilé ke riꞌimaká najló riyukuna. 28 E kaja nephá pajimila nakojé. Rejeja rijwaꞌaté jaꞌapákaño wátaño iꞌijnakana, eyá Jesús kemari mapeja najló:

—Noꞌopíchaka.

29 Nemá rijló:

—Maare piyuró wajwaꞌaté. Kaja wani wajúwiꞌicha, kalajeruni majó.

Raú rimujlúkaꞌa pají chojé najwaꞌaté.

30 E kaja nayaꞌo pajwaꞌatéchaka, najñákaloje naꞌajnewá, rejéchami Jesús ñaꞌaká pan rikápojo, rimá Tupánajlo:

—Palá pilaꞌaká weká marí pan aú.

Ritupaꞌá najló rinakiyana, e raꞌá najló riká.

31 Rejéchami nejlú meꞌetako rinakojé, amaño Jesús riꞌimaká. Rejeja rimichoꞌó naliyá. 32 Raú nemá pajlokaka:

—Chuwa waweꞌepí naka liꞌichari puꞌují wani wapechu raꞌapíchaka wajwaꞌaté iñeꞌepú chuwá ketana. Palá raꞌapátiyaka wajló Tupana purákaꞌalo. Kewaka, Jesús riꞌimichaka, puriꞌicharo wajwaꞌaté, ñakele puꞌují wapechu liꞌichako raú.

33 Rejéchami napaꞌakó piño Jerusalén ejo, iphaño ajopana nakú. Jesús jaꞌapiyatéjena, pajluwaja iphata jiꞌimaji nakojé kele (11), iꞌimaño re ajopana najwákeꞌena waꞌaté. 34 E kaja re iꞌimakaño kemaño najló:

—Kewaka joꞌó Jesús makápoꞌochako piño. Simón Pedro amíchari riká —ke nemaká.

35 —Ke joꞌó riká. Ñaké kaja wamíchaka riká iꞌimichaka —ke wajé iphákaño nanaku kemaká najló.

Raú neꞌemá najló mékeka ripuriꞌichako najwaꞌaté iñeꞌepú chuwá iꞌimichaka yukuna. Nemá kaja najló mékeka nejlú meꞌetíyako rinakojé, ritamákaꞌatiyaka najló pan ee.

36 Ilé ke neꞌemaká riyukuna najló ejéchami, Jesús yaꞌatakó najló manaꞌí chiyó rejé. Rajalaka neká, rimá najló:

—Iꞌimá palá pajwaꞌatéchaka.

37 Kajrú rikeroꞌótaka najló raú. Kaja napechu iꞌimá rinaku: “Inaꞌuké ñakami japi riká”, ke. 38 E Jesús kemari najló:

—¿Naje chi ikeroꞌó? ¿Unká chi iweꞌepila Jesús ka nuká? 39 Amá nuyátheꞌela, nuꞌumá waꞌaté, nakú itapuwa aphumi. Jesús nuká. Ijápicha majó nunaku, amachi palá nuká: unká inaꞌuké ñakami napona iꞌimalá nunapona ke; unká kaja raphina iꞌimalá. Re nunapona, amá riká meꞌetení.

40 Rejomi riyaꞌatá najló riyátheꞌela, riꞌimá waꞌaté. 41 Puꞌují wani napechu laꞌakó raú. Kajrú neꞌejnataka napéchuwa rinaku, eꞌiyonaja napechu iꞌimá: “Apala ta unká riká wani kalé riká”, ke, raú rimá najló:

—¿E chi maare aꞌajnejí, nojñachi?

42 E naꞌá rijló jiña aꞌamitakeja jepoꞌoná, munumunú jalá waꞌaté. 43 E rijñaꞌá naliyá riká, rajñá riká najimaje. 44 Rejomi rimá najló:

—Palá iweꞌepika mékeka nalaꞌaká nuꞌumaká. Riyukuna nuꞌumá ijló iꞌimaká, nuꞌumaká ijwaꞌaté wakajé. Riwakajé numá ijló mékeka Tupana purákaꞌalo lanaꞌakéjami kemaká nunaku iꞌimaká, riká Moisés michú lanaꞌakare iꞌimaká, ñaké kaja Tupana purákaꞌalo jaꞌapátajeño michuna lanaꞌaká nuyukuna iꞌimaká. Riká numá nakú ijló iꞌimaká. Ripurákaꞌalo lanaꞌakéjami, iná iphátakare Salmos chu, numá kaja nakú ijló iꞌimaká. Richu kemaká nunaku, keja nalaꞌaká numaꞌaká, Tupana wakáraꞌari riꞌimakáloje ñaké penaje.

45 Rejomi rilaꞌá napechu palá, naweꞌepíkaloje Tupana purákaꞌalo lanaꞌakéjami nakojé raú. 46 Rimá piño najló:

—Marí ke Tupana purákaꞌalo lanaꞌakéjami kemaká nunaku iꞌimaká, unká chiyó nuphá ejaꞌawá nakojé: “Riká Tupana wakáraꞌajikare majó inaꞌuké iꞌimatájeri penaje, takaꞌajeri. Eyá weji ke kala iꞌimajemi rimakápoꞌojo piño”, ke rimaká nunaku iꞌimaká. 47 Eyá inaku rimá kaja marí ke iꞌimaká: “Ripurákaꞌalo aú neꞌemajé riyukuna piyuke ajopana teꞌeré ewá iꞌimakáñojlo. Neꞌemajé riyukuna najló, napajnoꞌotákaloje napéchuwa Tupana ejo puꞌuwaré nalaꞌakare liyá, raú ramajo nachaje puꞌuwaré nalaꞌakare liyá. Penaje neꞌemajé riyukuna najló. Jerusalén e iꞌimakáñojlo neꞌemajé riyukuna paineko. Rejomi ajopánajlo, ajopánajlo, ke neꞌemajika riyukuna piyuke inaꞌukénajlo”, ke Tupana purákaꞌalo lanaꞌakéjami kemaká inaku —ke Jesús kemaká najló.

48 Eyá rimá piño najló:

—Iká iꞌimajeño riyukuna ajopana inaꞌukénajlo. 49 Nuká wakáraꞌajeri eꞌiyajé Tupana Pechu, Noraꞌapá kemakare nakú iꞌimaká. Jerusalén e iyurejo, Ripechu iphájika inaku ejená. Reyá aꞌajná ñoꞌojó kaja kaphí ipechu iꞌimajika riyukuna iꞌimakana nakú ajopánajlo —ke rimaká najló.

50 Rejomi riwaꞌa neká pajimila eyá ají ke Betania ejo. Re ráchoꞌota raꞌanapitá. Rimá Tupánajlo rilaꞌakáloje neká palá penaje. 51 Eꞌiyowá ke ráchoꞌoñaaka neká ají ke jeꞌechú chojé. 52 Ajopana táraꞌaño meketánaja re manaꞌija, puꞌují napechu iꞌimakale rinaku. E napaꞌó piño Jerusalén ejo, puꞌují wani napechu iꞌimaká. 53 Weꞌechú kaꞌalá keja nawakájiko Tupana ñakaré chojé, neꞌemakáloje Tupánajlo palá rilaꞌakare neká yukuna.

Maárejeja riyukuna San Lucas lanaꞌakare iꞌimaká.