Jesús makápoꞌoko piño yukuna marí
16
Kaja watánaꞌakaje iꞌimaká wakajé jaꞌapari. Muní ke najmeꞌetaka. E María Magdalena, Salomé, María, Santiago jaló, kele iꞌijnaño pujana warúwaꞌaje, nakaꞌakáloje riká Jesús tami nakojé. Puꞌumé amarí pujana iꞌimaká.
San Marcos 16.1-20
2 E kaja jápakaje keñoꞌokó wakajé lapiyami, wajé kamú jeñoꞌoká ee, inaana iꞌijnaño ritami iꞌimaká ejo.
3 Neꞌejnaká nakuwá, nemá pajlokaka:
—¿Na kaꞌajná jatatájeri wajló jipa támijimi toꞌotákelana numaná eyá?
4 E nayakaꞌo rejo jukaya, amaño kaja jipa iꞌimaká jatatákejami. Kajruni wani jipa riꞌimaká.
5 Nephá rejo. E namujlúkaꞌa ulawí chojé, amaño pajluwaja walijímaka, jeꞌechú chiyaje, yáꞌako ritami pukunami chu. Kaꞌañá ejo pitá riyaꞌo. Jaré nojé, waphereni raꞌarumaká iꞌimaká. Namaka riká aú nakeroꞌó.
6 E rimá najló:
—Ikeroꞌoniño. Nuweꞌepí iꞌijichaka majó Jesús, Nazaret eyaje tami amaje, riká nephákare aꞌawaná apiyákakanami nakojé iꞌimaká. Unká riꞌimalá maare, kaja rimakápoꞌocho piño. Iyakaꞌo, amicha rapukúnami.
7 E rimá piño najló:
—Chuwa ipaꞌó, iꞌimichá marí ke riyukuna raꞌapiyatéjenajlo, Pédrojlo waꞌaté: “Kaja riꞌijichá natukumá Galilea ejo. Re namaje riká, rimaká najló iꞌimaká ke”.
8 E náchoꞌo richiyá keroꞌokajo nakú. Kajrú nakurúkaka, ñakele neñaó reyá. Unká neꞌemalá riyukuna ajopánajlo naꞌapaka ewá, nakeroꞌokó akuwaná.
Jesús yaꞌatakó María Magdalénajlo yukuna marí
9 Jápakaje keñoꞌokó wakajé, jareni jáchoꞌoko ee, Jesús makápoꞌoro iꞌimaká. Paineko riyaꞌató María Magdalénajlo. Roꞌiyayá rikaꞌá iyamá kuwáꞌata kele jiñana pechu iꞌimaká.
10 Riyaꞌatako rojló ejomi, ruꞌujná riyukuna iꞌimajé raꞌapiyatéjenajlo. Chapú kaje yajwé amákana nakú neꞌemá, Jesús takaꞌañáakale neká. Kajrú neyaka riká, eꞌiyá ruphá nanaku riyukuna iꞌimajé najló.
11 Rumá najló:
—Kaja rimakápoꞌocho piño, nomicha riká.
Eꞌiyonaja unká nemaꞌalá roꞌopiyá.
Jesús yaꞌatakó iyamá ajopánajlo yukuna marí
12 Yaꞌajná Jesús yaꞌató kaja iyamá raꞌapiyatéjena pajimila yámajo chiraꞌakáñojlo.
13 Rejomi neká paꞌañó piño kaja napumí chuwá riyukuna iꞌimajé nanakiyánajlo, eꞌiyonaja unká kaja nemaꞌalá naꞌapiyá.
Jesús aꞌaká raꞌapiyatéjena Ripurákaꞌalo jaꞌapátajeño penaje yukuna marí
14 Rejomi riyaꞌató pajluwa iphata jiꞌimaji nakojé (11) kele raꞌapiyatéjenajlo. Re neꞌemá naꞌajnewá ajñakana nakú. Rakhaꞌá neká, unkale nemaꞌalá ajopana, amaño riꞌimaká rimakápoꞌoko piño ejomi, jaꞌapiyá.
15 E rimá najló: “Eko iꞌijná ajopana teꞌeré ejo, ajopana teꞌeré ejo, ke, Tupana iꞌimataka inaꞌuké kapichákajo liyá yukuna iꞌimakana nakú najló.
16 Jemaꞌajeri Tupana jaꞌapiyá, riꞌimataje kapichákajo liyá. Riká ilaꞌajé bautizar. Eyá, unká jemaꞌalaje Tupana jaꞌapiyá, riwajaje.
17 Marí ke noꞌopiyá jemaꞌajeño laꞌajika nakaje naweꞌepéjona penaje: Nupurákaꞌalo aú nawakáraꞌaje jiñana pechu jáchoꞌoko inaꞌuké eꞌiyayá; napuraꞌajó purákaꞌaloji unká nemaꞌaláreno napuraꞌakó chu;
18 napatájika wakajé jeína puwiruna iꞌimajíkaño, unká meke nalaꞌalajo raú; neꞌerajé kaꞌajná nakaje jalá puwini, unká kaja meke nalaꞌalajo raú; natoꞌotaje nayátheꞌela natámina nakojé, raú natejmoꞌotajo”, ke Jesús kemaká najló.
Jesús jáchoꞌoko jeꞌechú chojé yukuna marí
19 Ilé ke nawakáraꞌajeri Jesús kemaká najló ejomi, Tupana wáꞌari riká ají ke jeꞌechú chojé. Chuwa Tupana waꞌatéjena wakáraꞌajeri riká rijwaꞌaté re.
20 E kaja raꞌapiyatéjena iꞌijnakeño apú ewá, apú ewá ke riyukuna iꞌimakana nakú ajopánajlo. Tupana iꞌimataka inaꞌuké kapichákajo liyá Jesucristo palamane aú yukuna neꞌemaké najló. Nawakáraꞌajeri Jesucristo aꞌakeri nañathé nakaje laꞌakana aú, raú ripalamane nalaꞌaké nakaje Tupánaja kalé weꞌepíkare laꞌakana. Nená penaje riꞌimaké, raú ajopana weꞌepike kewákaka napurákaꞌalo iꞌimajika.
Maárejeja riyukuna San Marcos lanaꞌakare iꞌimaká.
San Marcos -créditos