Nawáꞌaka Jesús Pilato ejo yukuna marí
15
E kaja najmeꞌetá. Sacerdótena wakáraꞌajeño, ajopana pheñawilana, eyá Tupana purákaꞌalo nakú jewíñaꞌatajeño, kele awakaño piño ajopana judíona wakáraꞌajeño waꞌaté. Napuraꞌó pajwaꞌatéchaka Jesús nakú. E nepoꞌotá raꞌanapitá panakojéchaka. Nawaꞌa riká nateꞌeré eyá wakáraꞌajeri Pilato ejo.
San Marcos 15.1-32
—¿Judíona iꞌimakana chi piká?
—Aꞌa, pimaká nunaku keja nuká.
3 E sacerdótena wakáraꞌajeño arukátaño Jesús Pilátojlo, eꞌiyonaja unká rapiyákala neká.
4 Raú Pilato kemari piño rijló:
—¿Unká chi papiyákalaje neká pinakojó? Kaja pemiꞌichá meke narukátaka kajrú piká nojló.
5 Unká raꞌajipalá rijló, raú Pilato pechu iꞌimari: “¿Na ta kaꞌajná kari nupuraꞌó waꞌaté?”
Nawakáraꞌaka Jesús nókana yukuna marí
6 Fiesta Pascua wakajé keja Pilato jáchoꞌotajikano inaꞌuké wajákelana chiyá pajluwaja inaꞌuké, judíona wátajikare ráchoꞌotake najló.
7 Riwakajé pajluwa inaꞌuké iꞌimari inaꞌuké wajákelana chu ajopana waꞌaté. Rií iꞌimari Barrabás. Júpimi ke riká, rijwákeꞌena waꞌaté, noka inaꞌuké nenókako neꞌemakana waꞌatéjena waꞌaté wakajé.
8 E kaja riphá rená chojé neꞌemakánajlo ráchoꞌotakaloje pajluwaja inaꞌuké wajákelana chiyá penaje. Raú ajopana iphaño Pilato nakú rijló kemaje.
9 E rimá najló:
—¿E iwátaka nóchoꞌotaka ijló ilé judíona iꞌimakana?
10 Rimá najló ñaké, riweꞌepíkale chapú sacerdótena wakáraꞌajeño wo iꞌimaká Jesús cha, richáꞌatakale neká ripechu aú. Ñaké iꞌimakale, nawaꞌa rejo riꞌimaká.
11 Kaja sacerdótena wakáraꞌajeño kaꞌátaño inaꞌuké eꞌiyajé paineko. Nemá Pilátojlo ráchoꞌotakaloje Barrabás najló penaje.
12 E rimá najló:
—¿Meke nulaꞌajika kele imakare nakú: “Judíona iꞌimakana riká”, ke?
13 Raú nawíyoꞌoko kajrú nemaká rijló:
—Piwakáraꞌa rinókana iphakeja aꞌawaná apiyákakanami nakojé.
14 Rimá najló:
—¿Naje iwata rinókana? ¿Na aú chi rilaꞌá puꞌuwaré?
Raú richaje nawíyoꞌoka:
—¡Piwakáraꞌa rinókana iphakeja aꞌawaná apiyákakanami nakojé!
15 Raú Pilato jáchoꞌotari najló Barrabás, riwátakale napechu iꞌimaká rinaku palá. E riwakáraꞌa Jesús ñaꞌatákana. Rejomi riyurí suráanajlo riká, nenókaloje riká aꞌawaná apiyákakanami nakojé iphakeja.
16 E nawaꞌa Jesús neꞌemakana ñakaré kópeje. Re nawakata piyuke wani suráana re iꞌimakaño.
17 Nalaꞌakáloje riká namákaja penaje naꞌá rinakojé ipiralukuni aꞌarumakaji, nawakáraꞌajeñoja kalé aꞌajíkare nanakuwá. Nachipúkaꞌata kaja riwílaꞌaru nakojé tujripi.
18 Rejomi nawíyoꞌoko nemaká rijló:
—Judíona iꞌimakana, ¿piká?
19 Neꞌeká riwilá ijijila ina aú pewílaꞌaruya. Nathupá kaja nawi rinakojé; natáraꞌo kaja neꞌerúpachi aú rijimaje; nakúwaꞌata kaja newílaꞌaru rijló.
20 Namákaja nalaꞌaká riká ejomi, nakaꞌá piño raꞌarumaká ipiralukuni rinakiyá. Rejomi naꞌá piño apú raꞌarumaká rinakojé. E nawaꞌa riká nenókaloje riká iphakeja aꞌawaná apiyákakanami nakojé penaje.
Nephátaka Jesús aꞌawaná apiyákakanami nakojé yukuna marí
21 Naꞌapá pajimila yámojo, re nephákaꞌako Simón waꞌaté. Cirene eyaje riꞌimaká. Alejandro, Rufo, kele jaraꞌapá riꞌimaká. Riká nawakáraꞌa wákoꞌoka aꞌawaná apiyákakanami Jesús chaya.
22 E nawaꞌa Jesús ají ke inaꞌuké nókelana, Gólgota ejo. “Inaꞌuké wílaꞌarumi aphinami”, ke naꞌajika rií napuraꞌakó chu.
23 Re naꞌá rijló iꞌirakaje kajmú kaje jalá amúraꞌatakanami kechípaꞌakeja pujana kaje waꞌaté. Mirra pujana ií. Naꞌá rijló riká, eꞌiyonaja unká riꞌiralá riká naꞌapiyá.
24-25 Peꞌiyochami kamú jáchoꞌoko ejéchami nephaka riká itapuwa aú aꞌawaná apiyákakanami nakojé. Rejomi suráana kátaño nakaje nakú, namákaloje mékeka natamákaꞌatajika najluwa raꞌarumakami.
26 Nephá kaja lanaꞌakéjami richá. Riká kemari na pachaka nenoka riká. Marí ke lanaꞌakéjami kemaká: “Marí Jesús, judíona iꞌimakana”.
27 Nephá kaja rejé Jesús awaꞌajé iyamá jataꞌakáchina. Pajluwa pumitanó pajluwa, eyá apú apoꞌojó pitá ke.
28 Ilé ke nephaka rawaꞌajé neká aú, nalaꞌá riká Tupana purákaꞌalo lanaꞌakéjami kemaká rinaku iꞌimaká ke. Rimá rinaku: “Unká inaꞌukélaruna nakiyana ke namájika riká”.
29 Rawaꞌayá jaꞌapájikaño laꞌakeño namákaja riká. Nañakaꞌaké newílaꞌaru rijló, nemá rijló:
—Piká kemakeri pinakuwá: “Nukajyaꞌatajla Tupana ñakaré, eyá weji ke kala iꞌimajémija nulaꞌajla piño riká rapumí chuwá”, ke.
30 Chuwa piꞌimatá pikó. Piwitúkaꞌa ilé aꞌawaná apiyákakanami nakiyá.
31 Ñaké kaja sacerdótena wakáraꞌajeño, Tupana purákaꞌalo nakú jewíñaꞌatajeño waꞌaté, laꞌaká namákaja riká. Nemá pajlokaka:
—¡Meke kalé ta riꞌimataka ajopana kapichákajo liyá iꞌimaká, eta rikó unká méñoꞌojo riꞌimatala!
32 Ajopana kemaño rinaku:
—Israel lakénami wakáraꞌajeri riꞌimajika ee, riwitúkaꞌaje aꞌawaná apiyákakanami nakiyá. Ilé ke wamájika ee rilaꞌaká, wemaꞌajé raꞌapiyá.
Jataꞌakáchina, nephákarena nakiyana rawaꞌajé, puraꞌañó kaja rinaku puꞌuwaré.
Jesús takaꞌaká yukuna marí
33 E kaja kalajeruni iꞌimari nachá piyuke ejaꞌawá chu. Kaápuꞌuku, eyá peꞌiyochami kamú toꞌokó ketana neꞌemaká kalajerúwaka.
San Marcos 15.33-47
—Eloi, Eloi ¿lamá sabactani?
Marí ke kemakánaka rimaká: “Tupana, nupechu iꞌimakare chojé kaphí, ¿na penaje piyurí nuká?”
35 Re iꞌimakaño nakiyana jemaꞌañó rawíyoꞌoka, raú nemá:
—Jemaꞌá ilé wáꞌaka Tupana purákaꞌalo jaꞌapátajeri Elías michujlo.
36 Raú pajluwaja nanakiyana jechoꞌótari iꞌirakaje rijló. Rejata nakaje jamáraꞌapani kajmú kaje jalá amúraꞌatakanami jakú. Kéchami repoꞌoká ijijila lupukuje riká. Riká aú raꞌá rijló riká, riꞌirakáloje reꞌiyayá penaje. Rimá najló:
—Reja riꞌimareja. Wamáijla, apala Elías michú iphájeri majó riwitúkaꞌataje.
37 Jesús awíyoꞌori piño kaphí wani kaja penaje, ejé ritakaꞌá.
38 Waꞌató ke yaꞌajná Tupana ñakaré chu aꞌarumakaji akúwaꞌakaro jiyoꞌokó peꞌiyowá paliyáaka. Apaꞌalá ukapú ke penaje rakúwaꞌako re. Rijiyoꞌó yenuya ají ke kawakaje. Kaja iyamata ke riyuriko.
39 Kaja Jesús takaꞌá. Rijimaje suráana wakáraꞌajeri táraꞌaro. Romano nakiyana riꞌimaká; cien rileꞌejena suráana iꞌimaká. Riká jemaꞌarí Jesús awíyoꞌoka; ramá kaja ritakaꞌaká, raú rimá:
—Tupana iꞌirí joꞌó riꞌimaká, kele takiꞌichari.
40 Kajrú inaana iꞌimaká aꞌajnare ke. Jukáyaja nayakaꞌo rejo. Nanakiyana iꞌimaño María Magdalena, Salomé, María, kele. Apaꞌawelo María ruꞌumaká, Santiago, José, kele jaló. José iꞌimari rijmeremi.
41 Neká inaana aꞌakeño Jesús ñathé Galilea teꞌeré e riꞌimaké wakajé. Neká penájemina iꞌijnaño kaja rijwaꞌaté Jerusalén ejo iꞌimaká. Neká iꞌimaño re, kajrú ajopana inaana waꞌaté.
Natoꞌotaka Jesús tami liri kaje chojé yukuna marí
42 E kaja najúwaꞌa. Aꞌajnejí lamáꞌatakana jená eꞌiyá neꞌemá riwakajé. Muní ke naleꞌejé watánaꞌakaje jená wakajé iꞌimaká.
43 José, Arimatea eyájeri, iꞌijnari Pilato chaje. Riweꞌepí Tupana iꞌimajika inaꞌuké nakiyana wakáraꞌajeri penaje, raú riꞌimá riwátakana nakú. Riká penaje iꞌijnari Pilato ejo Jesús tami kejáꞌaje riliyá, ritoꞌotákaloje ritami támijimi toꞌotákelana chojé penaje.
44 Raú Pilato pechu iꞌimá: “¿Kaja chi ritakiꞌichá?”, ke. Raú riwaꞌa suráana wakáraꞌajeri maná, rimá rijló:
—¿Kaja chi ritakiꞌichá?
45 Suráana wakáraꞌajeri kemari rijló:
—Aꞌa, kaja ritakiꞌichá.
Raú Pilato yuriri Josejlo ritami, rijñaꞌakáloje riká.
46 E José iꞌijnari palá nojé aꞌarumakaji warúwaꞌaje, rejomi ripaꞌó Jesús tami witúkaꞌataje. E riphilaꞌá aꞌarumakaji ritami nakuwá. Rejomi rijñaꞌá ritami támijimi toꞌotákelana ejo. Jipa ichákanami riꞌimaká, riká chojé ritoꞌotá ritami. Kaja penaje natatá kajruni jipa rinumanaje, raú netá rinumaná. a
47 Eyá aꞌajnare ke María Magdalena, eyá María, José jaló ruꞌumaká, waꞌaté wojítaño riká, namákaloje mérejeka natoꞌotaka ritami penaje.