19
E Pilato wakáraꞌari suráana ñaꞌataka Jesús, raú nawaꞌa riká apoꞌojó, nañaꞌatákaloje riká penaje.
2 Rejomi suráana aꞌañó riwílaꞌaru nakojé tujripi chipúkaꞌatakanami; naꞌá kaja rinaku aꞌarumakaji ipiralukuni kemachi.
Jesús condenado a muerte (Juan 19.1-16)
—Judíona iꞌimakana, ¿piká? —ke nemájikano rijló.
E kaja nañaꞌaké riká pajimaya nayátheꞌela aú.
4 E Pilato jáchoꞌoro piño riñakaré chiyá, rimá najló:
—Nuwáꞌicha piño riká majó ijimaje. Nuwata iweꞌepika unká na rilaꞌalá puꞌuwaré, nuwajákaloje riká penaje.
5 E Jesús mujlúkaꞌari majó najimaje, tujripi chipúkaꞌatakanami riwílaꞌaru nakú ke. Aꞌarumakaji ipiralukuni neꞌemakánaja kalé aꞌakare rinakuwá iꞌimari rinaku. E Pilato kemari najló:
—Iyakaꞌo marí inaꞌuké chaje.
6 Namaka aú riká sacerdótena wakáraꞌajeño, policíana waꞌaté, jaꞌañó awíyoꞌoje, nemá rijló:
—¡Chuwa piwakáraꞌa rinókana ta iphakeja aꞌawaná apiyákakanami nakojé! ¡Piwakáraꞌa rinókana ta iphakeja aꞌawaná apiyákakanami nakojé!
Raú Pilato kemari najló:
—Unká nuweꞌepila na chónaka nuwakáraꞌakajla rinókana. Iká wáꞌajeño riká ikó, inókaloje riká aꞌawaná apiyákakanami nakojé.
7 Judíona wakáraꞌajeño kemaño rijló:
—Rilaꞌakale rinakuwá Tupana iꞌirí ke pachá wenoje riká. Wapurákaꞌalo lanaꞌakéjami kemari, wenókaloje inaꞌuké kemari rinakuwá: “Tupana iꞌirí nuká”, ke.
8 Rejéchami richaje íkiꞌika Pilato keroꞌokó.
9 Raú ripaꞌó piño riñakaré chojé Jesús waꞌaté puraꞌajó, rimá rijló:
—¿Mere eyaje chi piká?
Unká raꞌajipalá rijló.
10 Raú Pilato kemari piño rijló:
—¿Naje chi unká paꞌajipalá nojló? ¿Unká chi piweꞌepila nawakáraꞌajerika nuká? Nuwátakela, nuwakáraꞌakajla pinókana aꞌawaná apiyákakanami nakojé kaꞌajná, nóchoꞌotajla piká naliyá kaꞌajná.
11 E Jesús kemari rijló:
—Unkákela Tupana yurijla piwakáraꞌaka nulaꞌakana ñaké, unká méñoꞌojo nalaꞌalajla nuká chapú. Ñakele aꞌachari pijló nuká, liꞌichari chapú wani pichaje chapuka.
12 Raú Pilato iꞌijnatari ripéchuwa, riweꞌepíkaloje meke ráchoꞌotakajla riká naliyá, eꞌiyonaja kajrú wani judíona awíyoꞌoka rijló. Nalaꞌá mawó riká, nemá rijló:
—Páchoꞌotajika ee riká, chapú pipechu romano teꞌeré eyaje wakáraꞌajeri nakú. Wawakáraꞌajeri kaja riká. Jesús laꞌarí rinakuwá wawakáraꞌajeri ke, raú waweꞌepí chapú ripechu romano teꞌeré eyájena wakáraꞌajeri nakú.
13 Ilé ke nemaká aú, Pilato wakáraꞌari piño Jesús wáꞌakana wakaꞌapojo. E riyaꞌo ñákaꞌajori chu, re rimaké inaꞌuké nakú mékeka nawajájika neká. Rapukuna ií iꞌimari Gabatá hebréona puraꞌakó chu. Marí ke kemakánaka riká: “Jipa ayúraꞌatakanami”.
14 Pajluwa kala yuriro natukumá, naleꞌejé fiesta Pascua keñoꞌokóloje penaje. Yewíchami kaápuꞌuku chami, Pilato kemaká judíonajlo:
—Marí iꞌimakana.
15 Raú nawíyoꞌo rijló:
—¡Rinókana ta palani! ¡Rinókana ta palani! ¡Piwakáraꞌa rinókana iphakeja aꞌawaná apiyákakanami nakojé!
Pilato kemari najló:
—¿Iwata chi nuwakáraꞌaka iꞌimakana nókana aꞌawaná apiyákakanami nakojé?
E sacerdótena wakáraꞌajeño kemaño rijló:
—Romano nakiyana iꞌimakana, weꞌemakana kaja. Rikaja kalé pajluwaja weꞌemakana, unká na apú iꞌimalá.
16 Ilé kaje aú Pilato yurí najló Jesús. E nawaꞌa riká, nenókaloje riká aꞌawaná apiyákakanami nakojé penaje.
Nephátaka Jesús aꞌawaná apiyákakanami nakojé yukuna marí
17 Nawakáraꞌa Jesús wákoꞌoka aꞌawaná apiyákakanami. Neꞌejná ají ke yenuri Gólgota ejo. “Inaꞌuké wílaꞌarumi aphinami”, ke naꞌajika rií napuraꞌakó chu, ñaké ramákana iꞌimakale. Rejé nephá riká aꞌawaná apiyákakanami nakojé.
La crucifixión (Juan 19.17-37)
18 Rawaꞌá iyamaja pumitanó nephá kaja iyamá ajopana ñaké kaja.
19 Pilato lanaꞌarí marí ke: “Jesús, Nazaret eyaje, judíona iꞌimakana riká”. Rejomi napatoꞌotá riká lanaꞌakéjami Jesús cha.
20 Pajimila awaꞌajé nephá Jesús aꞌawaná apiyákakanami nakojé. Ñakele palá kajrú judíona rewá jaꞌapákaño amaka mékeka lanaꞌakéjami kemaká. Weji kele puraꞌakó chu rilanaꞌá riꞌimaká: hebreo, griego, latín, kele puraꞌakó chu.
21 E sacerdótena wakáraꞌajeño, judíona nakiyana neꞌemaká, kemaño Pilátojlo:
—Unká paala pilaniꞌichaje: “Judíona iꞌimakana riká”, ke. Marí ke rilanaꞌakana iꞌimichákajla palani: “Rimá rinakuwá: ‘Judíona iꞌimakana nuká’, ke”.
22 Raú Pilato kemari najló:
—Kaja keja nuwátiyaka rilanaꞌakana, ñakele kaja keja riyuríjiko.
23 Paꞌu kele suráana iphaño Jesús aꞌawaná apiyákakanami nakojé. Rejomi najñaꞌá raꞌarumakami, natamákaꞌatakaloje najluwa riká. Raꞌarumakami waphereni, richaje rikaꞌajíkareno rinakuwá, richuwá ñaꞌakanami riꞌimaká.
24 E suráana kemaño pajlokaka:
—Unká wajiyoꞌotálaje riká, watamáꞌatakaloje wachó riká penaje. Palani wakátajiko nakaje nakú, cháꞌatajeri ñaꞌajeri rijluwa riká.
Ilé ke nalaꞌaká aú, Tupana purákaꞌalo lanaꞌakéjami kemaká iꞌimaká ke iphari rená chojé. Rimá: “Natamákaꞌataje noꞌorumakami najluwa. Nakaje nakú kátakano aú naweꞌepeje ritamákaꞌatakana najluwa”. Rimaká nanaku júpimi iꞌimaká, ke suráana laꞌaká riwakajé.
25 Jesús jaló, roꞌoweló waꞌaté, iꞌimaño aꞌawaná apiyákakanami, nephákare nakojé Jesús iꞌimaká, awaꞌá. Re kaja María, Cleofás yajalo, iꞌimayo. María Magdalena iꞌimayo kaja najwaꞌaté.
26 Re Jesús jaló táraꞌayo raꞌapí, pajluwaja raꞌapiyateje waꞌaté, riká íkiꞌija riwátakare riꞌimaká. Jesús amaka aú rutáraꞌako raꞌapiyateje waꞌaté, rimá rojló rinaku:
—Riká iꞌimajeri piꞌirí ke pijló.
27 Rejomi rimá raꞌapiyatéjejlo:
—Ruká iꞌimajeyo paló ke pijló.
Reyá aꞌajná ñoꞌojó, ruyuró kele raꞌapiyateje ñakaré chu.
Jesús takaꞌaká yukuna marí
28 Ilé ke Jesús kemaká najló iꞌimaká. Kaja riweꞌepí riñapátaka rijápakaꞌala laꞌakana, e rimá:
—Nunúrupi chu makáraꞌataro.
Ilé ke rimaká aú, rimá Tupana purákaꞌalo lanaꞌakéjami kemaká rinaku ke.
29 Re iꞌichilá iꞌimari. Kajmú kaje jalá ñapátakanami kaꞌamani iꞌimá richu. “Nunúrupi chu makáraꞌataro”, ke rimaká aú, nejata nakaje jamáraꞌapani. Rejomi nepoꞌó riká ijijila wilaphe nakojé, naꞌapátakaloje riká Jesusjlo riꞌirakáloje reꞌiyayá.
30 Riꞌiraká reꞌiyayá riká ejomi, rimá:
—Kaja nuñapátiya nujápakaꞌala.
Rejéchami rakúwaꞌataka riwílaꞌaru, rejé kaja ritakaꞌá.
Pajluwaja suráa joꞌoká Jesús eꞌiyajé wejrukú aú yukuna marí
31 E kaja judíona nakiyana iꞌijnaño Pilato ejo rijló kemaje, riwakáraꞌakaloje suráana yupaꞌataka nephákarena aꞌawaná apiyákakanami nakojé tajné aphina, natakaꞌakáloje kiñaja raú, rejomi nawitúkaꞌatakaloje natami reyá. Unká nawátala natami iꞌimaká re muní ke ejená. Muní ke watánaꞌakaje wakajé iꞌimaká. Riwakajé eyá naleꞌejé fiesta keñoꞌó, apú wakajé chaje nephákare jaꞌapí.
32 Raú Pilato wakáraꞌari suráana rejo natajné aphina yupaꞌataje. E kaja nayuphaꞌatá pajluwa tajné aphina, rejomi apú piño. Nephákarena Jesús awaꞌajé neꞌemaká.
33 Rejomi neꞌejná Jesús awaꞌajé, amaño maapami ke ritakaꞌaká, raú unká nayuphaꞌatala ritajné aphina.
34 Eꞌiyonaja kalé pajluwaja suráa joꞌorí reꞌiyajé wejrukú aú riparaꞌalá jaꞌapiyá, raú rírami, juni waꞌaté, akhoꞌoró richiyá.
35 Nomákare yukuna nulanaꞌá ijló, nuweꞌepíkale ñaké riꞌimaká. Nulanaꞌá ijló riyukuna, iweꞌepíkaloje raú kewaka riyukuna.
36 Kaja júpimi Tupana purákaꞌalo lanaꞌakéjami kemá rinaku iꞌimaká: “Unká nayuphaꞌatálaje ritajné aphina”, ke. Ñakeja nalaꞌaká riká, unká nayuphaꞌatala ritajné aphina.
37 Apú Tupana purákaꞌalo lanaꞌakéjami eꞌiyá rimá kaja: “Namaje piño riká, najoꞌokare eꞌiyajé penájemi”.
Natoꞌotaka Jesús tami liri kaje chojé yukuna marí
38 Ilé ke nalaꞌaká iꞌimaká ejomi, José, pajimila Arimatea eyaje riꞌimaká, iꞌijnari Jesús tami kejáꞌaje Pilato liyá, ritoꞌotákaloje riká liri kaje chojé penaje. Jesús jaꞌapiyá jemaꞌajeri riꞌimaká, eꞌiyonaja unká riꞌimalá riyukuna ajopánajlo, rikeroꞌokole judíona nakiyana piyá. Riká penájemi iꞌijnari Pilato chaje Jesús tami kejáꞌaje riliyá. Pilato yurí rijló ritami, raú riꞌijná ritami ñaꞌajé.
La resurrección (Juan 19.38-20.18)
39 Nicodemo iꞌijnari kaja rijwaꞌaté. Júpimi ke riphaka Jesús nakú lapí iꞌimaká, ripuraꞌakóloje rijwaꞌaté penaje. Riká penájemi iꞌijnari José waꞌaté riñathé aꞌajeri penaje. Rijñaꞌá rijwaꞌató pujana kaje, puꞌumé amarí aloe. Mirra kechípaꞌakanami waꞌaté riꞌimaká. Treinta jená ñaꞌakó riꞌimaká.
40 E kaja José, Nicodemo waꞌaté, witúkaꞌataño Jesús tami. Naꞌá pujana, puꞌumé amarí, aꞌarumakaji jítami eꞌiyajé, kéchami naphilaꞌataka aꞌarumakaji jítami aú ritami. Ilé keja judíona laꞌajika támijimina nakú.
41 Nenoka Jesús apukuna awaꞌá aꞌawaná ejátakelana iꞌimaké. Re jipa ichákanami iꞌimari ukapú ke, natoꞌotákaloje támijimina richojé penaje. Wajé ichákanami riꞌimaká, unká joꞌó natoꞌotálare chojé támijimina.
42 Richojé natoꞌotá Jesús tami, rawaꞌá riꞌimakale. Yewicha judíona leꞌejé watánaꞌakaje wakajé iphaka rená chojé, ñakele réjoja najñaꞌá riꞌimaká.