Jesús makápoꞌoko piño yukuna marí
20
Jápakaje keñoꞌokó wakajé, María Magdalena iꞌijnayo támijimi toꞌotákelana ejo. Wajé wani iná meꞌetaka ee, ruꞌujná rejo, iphayo rawaꞌajé. Re romá kaja jipa iꞌimaká jatatákeja liri numanaya.
2 Raú rupaꞌó jechoꞌokelo ropumí chuwá riyukuna iꞌimajé Pédrojlo, apú Jesús jaꞌapiyatéjejlo waꞌaté, íkiꞌija Jesús wátakare riꞌimaká. E ruphá nanaku, rumá najló:
—¡Méñoꞌojo paja najiꞌichá wawakáraꞌajeri michú tami! ¡Unká waweꞌepila méñoꞌojoka najiꞌichaka ritami!
3 Ilé kaje aú Pedro, rijwákeꞌewe waꞌaté, iꞌijnaño támijimina toꞌotákelana ejo.
4 Jechoꞌokelo neꞌejnaká rejo. Apú Jesús jaꞌapiyateje jaꞌapáñaari Pedro jechoꞌokajo aú.
5 Riphaka rejo ee, rikuwaꞌo riyakáꞌakoloje liri kaje chojé, amari aꞌarumakaji jítami, namapíraꞌakare aú ritami iꞌimaká, pitakó re rapukúnami chu. Rinumaná eyaja riyakaꞌo, unká rimujlúkaꞌala richojé.
6 Júpichami Pedro iphaka rápumichu, ilé mujlúkaꞌari puꞌukuja richojé, amari kaja aꞌarumakaji jítamija pitakó re.
7 Aꞌarumakaji, napáraꞌatakare aú Jesús jimami, yáꞌaro apoꞌojó pitá, unká apú aꞌarumakaji jítami awaꞌá kalé riꞌimá. Apoꞌojó riyaꞌo riliyá, palá nótakanami pacháaka.
8 E kaja Jesús jaꞌapiyateje, paineko iphaka, mujlúkaꞌari kaja richojé, amari unká riꞌimalá. Raú riweꞌepí kewaka Jesús makápoꞌoko piño rapumí chuwá iꞌimaká.
9 Tupana purákaꞌalo lanaꞌakéjami kemari rinaku iꞌimaká: “Ritakaꞌajika ejomi, weji ke kala iꞌimajemi, rimakápoꞌojo piño rapumí chuwá”. Riwakajé unká joꞌó naweꞌepila meke kemakánaka riꞌimaká.
10 Ilé ke namaka aú, napaꞌó nañakaré ejo.
María Magdalena amaka Jesús yukuna marí
11 María yuriyo támijimi toꞌotákelana awaꞌaja iyakaje nakú. E rukúwaꞌo ají ke ruyakáꞌakoloje liri kaje, natoꞌotákare ritami iꞌimaká, chojé.
12 E romá iyamá jeꞌechú chiyájena, Tupana waꞌatéjena, yáꞌako Jesús tami ápumi chu. Jaré nojé naꞌarumaká iꞌimaká. Pajluwa yáꞌaro Jesús wílaꞌarumi iꞌimaká e, eyá apú yáꞌaro riꞌimami iꞌimaká e.
13 E Tupana waꞌatéjena kemaño rojló:
—¿Naje piyá?
Rumá najló:
—Kaja najiꞌichá nuwakáraꞌajeri michú tami, unká nuweꞌepila méñoꞌojoka najiꞌichaka riká.
14 Ilé ke rumaká ejomi, rupajnoꞌó ruyámojo yakáꞌajo, amayo Jesús táraꞌako ruwajlé chu, eꞌiyonaja unká ruweꞌepila riká ka riꞌimaká.
15 Rimá rojló:
—¿Naje piyá? ¿Na chi pikulá?
Rupechu iꞌimá rinaku: “Aꞌawaná ejátakelana eꞌiyá jápajeri japi riká”, ke, ñakele rumá rijló:
—Piká kaꞌajná jiꞌichari ritami maáreya. Chuwa pimá nojló méñoꞌojo pijiꞌichá ritami, nupaꞌatachi riká majó.
16 Rejéchami Jesús ajalákaka ruká:
—¡María!
Raú rupajnoꞌó ruyámojo richaje yakáꞌajo, amayo Jesús riꞌimaká, raú rumá napuraꞌakó chu:
—¡Raboni! (“Wewíñaꞌatajeri”, ke kemakánaka riká.)
17 Jesús kemari rojló:
—Piyurí nuká, unká joꞌó nuꞌujnalá Noraꞌapá iꞌimaká ejo. Pipaꞌó chuwa, piꞌimichá nuyukuna noꞌopiyatéjenajlo. Nojena ke wani nojló neká. Chuwa nuꞌujnajika Noraꞌapá ejo; jaraꞌapá kaja riká. Nuphákare wani jaꞌapí riká; iphákare wani jaꞌapí kaja riká.
18 Rejomi María Magdalena iꞌijnayo riyukuna iꞌimajé raꞌapiyatéjenajlo. Ruꞌumá najló mékeka romaka nawakáraꞌajeri Jesús, eyá mékeka rimaká rojló yukuna ruꞌumá kaja najló.
Jesús iphaka raꞌapiyatéjena nakú yukuna marí
19 Riwakajé lapí jápakaje keñoꞌokó wakajé, Jesús jaꞌapiyatéjena awakaño nañakaré chu. Chawínaꞌakeja nachá iꞌimaká, nakeroꞌokole judíona nakiyana piyá. E mapeja reꞌiyayaja Jesús mujlúkaꞌaka nañakaré chojé nachaje. Riphá peꞌiyojé neꞌiyajé táraꞌajo. Rajalaka neká, rimá najló:
—Ipechu iꞌimá palá.
Jesús se aparece a los discípulos (Juan 20.19-31)
20 Ilé ke rimaká najló ejomi, riyaꞌatá najló itapuwa kupijneremi riyátheꞌela yáꞌaka eꞌiyá. Riyaꞌatá kaja najló riparaꞌalá jaꞌapiyá wejrukú kupijneremi. Puꞌují wani napechu laꞌakó, namákale piño nawakáraꞌajeri.
21 Rejomi Jesús kemari piño najló:
—¡Ipechu iꞌimá palá! Noraꞌapá wakáraꞌaka nulaꞌaká nakaje, ke kaja nuwakáraꞌajika ilaꞌaká nakaje.
22 Rejomi raphoꞌó nachaje, rimá najló:
—Iꞌimá Tupana Pechu jaꞌapiyá.
23 Inaꞌuké nakiyana pajnoꞌotájika ee napéchuwa puꞌuwaré nalaꞌakare liyá Tupana ejo, imaje najló: “Kaja Tupana amó ichaje”, ke. Eyá ajopana, unkájika ee napajnoꞌotala napéchuwa puꞌuwaré nalaꞌakare liyá Tupana ejo, imaje najló: “Unká Tupana amalo ichaje puꞌuwaré ilaꞌakare liyá”, ke rimaká najló.
Wajé Tomás amaka Jesús rimakápoꞌoko ejomi, yukuna marí
24 Pajluwaja Jesús jaꞌapiyateje ií iꞌimari Tomás. Iyamá mothoꞌokaño nakiyana riꞌimaká. Unká riꞌimalá najwaꞌaté Jesús iꞌimaká nachaje wakajé.
25 Riphaka nanaku ejomi, neꞌemá rijló riyukuna, nemá rijló:
—Wawakáraꞌajeri iꞌimichari majó wachaje.
Eꞌiyonaja Tomás kemari najló:
—Unká nomaꞌalaje jaꞌapiyá. Unkájika ee nomá itapuwa kupijneremi riyátheꞌela yáꞌaka nakú, eyá nokoja unká nujápajika ee rikupijnéremi, riparaꞌalá jaꞌapiyá iꞌimakare, nakú, unká nomaꞌalaje jaꞌapiyá.
26 Pajluwaja jápakaje iꞌimaká ejomi, Jesús jaꞌapiyatéjena awakaño piño pají chojé. Tomás iꞌimari kaja najwaꞌaté. Jesús mujlúkaꞌari piño neꞌiyajé. Chawínaꞌakeja pají numaná iꞌimaká, eꞌiyonaja rimujlúkaꞌa reꞌiyayá. E rajalaka neká, rimá najló:
—¡Ipechu iꞌimá palá!
27 E kaja rimá Tomasjlo:
—Pijapa piyatewana aú nukupijneremi chu, pamá nuyátheꞌela. Páchoꞌota kaja piyátheꞌela majó, pijápachi nuparaꞌalá jaꞌapiyá nukupijneremi nakú. Pipechu iꞌimaniña nunaku: “Unká riká kalé namákare iꞌimaká”, ke. Pemaꞌá naꞌapiyá.
28 Rejéchami Tomás kemaká rijló:
—¡Nuwakáraꞌajeri, nuchiꞌinárikana!
29 Jesús kemari rijló:
—Tomás, chuwa piweꞌepíchaka kewaka kajmuni nuká, pamíchakale nuká. Palani weꞌepiño reka nuká, unká namala nuká eꞌiyonaja —ke rimaká rijló.
Juan kemari na penájeka rilanaꞌaká marí yuku iꞌimaká
30 Jesús laꞌarí kajrú apú nakaje, apú nakaje ke, Tupánaja kalé weꞌepíkare laꞌakana. Rawaꞌá weꞌemanoja rilaꞌajíkano riká. Unká nulanaꞌalá piyuke wani riyukuna marí chojé, rinakiyánaja kalé nulanaꞌá.
31 Maárejeja nulanaꞌá riyukuna, iweꞌepíkaloje raú kewaka Jesús, Tupana wakáraꞌakare majó riꞌimaká. Iweꞌepíkaloje raú Tupana iꞌirika riká, penaje nulanaꞌá riyukuna. Kaphí ipechu iꞌimajika ee richojé, raꞌajé ijló kajmuchaji, iꞌimakáloje ripalamane matajnako jeꞌechú chu. Ilé kaje iweꞌepíkaloje penaje nulanaꞌá riyukuna.