Jesús iphaka iyamá kuwáꞌata kele raꞌapiyatéjena nakú yukuna marí
21
Apú wakajé Jesús iphari piño raꞌapiyatéjena nakiyana nakú, kaéja Tiberias e neꞌemaká wakajé.
2 Marí kele iꞌimaño re: Simón Pedro, Tomás, riká nemakare nakú: “Iyamá mothoꞌokaño nakiyana riká”, ke. Natanael iꞌimari re kaja najwaꞌaté, pajimila Caná eyaje riꞌimaká, Galilea teꞌeré pajimila nakú riká. Zebedeo yaní iꞌimaño re kaja. Iyamá ajopana Jesús jaꞌapiyatéjena nakiyana iꞌimaño kaja najwaꞌaté. Ilé kele neꞌemaká iꞌimaño re.
Jesús en el mar de Galilea (Juan 21.1-25)
—Nuwenare kaꞌajé junápeje nuꞌujichá.
Raú ajopana kemaño rijló:
—Weꞌejnajé kaja pijwaꞌaté. Raú neꞌejná, witúkaꞌaño wapuru chojé. Pajluwa lapí ketana neꞌemaká nawenare kaꞌakana nakú, unká na najñaꞌalá.
4 Nakeñoꞌoká meꞌetákaje ee, Jesús iphari juni turenaje, unká naweꞌepila na inaꞌukeka riꞌimaká.
5 E rimá najló:
—Nujwákeꞌena, ¿unká chi ijñaꞌalacha jiña?
—Unká wani na wajñaꞌalacha.
6 —Chuwa ikaꞌá iwenare kaꞌañá chojó pitá, raꞌaná chojé, reyá ijñaꞌajé jíñana.
Raú nakaꞌá riká kaꞌañá chojó pitá, rejéchami kajrú wani jíñana jaꞌakó richojé. Unká natejmú iphala nalokópaꞌala, nachíraꞌakaloje neká nawapúrune chojé penaje.
7 E Jesús jaꞌapiyateje, íkiꞌija riwátakare, kemari Pédrojlo:
—¡Wawakáraꞌajeri riká!
Ilé ke rimaká aú, Pedro aꞌarí raꞌarumaká rinakuwá richaje, maapami ke rikaꞌakare rinakiyó, rejomi reñoꞌó wapuru chiyá junápeje, iꞌiwapari juni turenajo.
8 Ajopana Jesús jaꞌapiyatéjena arúkaꞌaño juni turenaje. Nachíraꞌa nawenare ají ke juni turenajo wapuru waꞌató, puꞌuthé jíñana aú manoꞌotaka riká. Unká juká kalé neꞌemá riturenaya, apala cien metros ketana kaꞌajná neꞌemaká reyá.
9 Narúkaꞌako ejomi, náchoꞌo wapuru chiyá peꞌiyojó, e namá jiyá lukúnaꞌako. Re pajluwaja jiña toꞌoró richá aꞌamitakajo nakú, pan waꞌaté.
10 E kaja Jesús kemari najló:
—Ijiꞌichá majó jíñana, wajé ijiꞌichájena nakiyana.
11 Raú Simón Pedro witúkaꞌari wapuru chojé. Richíraꞌa nawenare ají ke keꞌepé nakojé. Kajrú nojena jíñana iꞌimaño nawenare chu, ciento cincuenta y tres jíñana neꞌemaká. Kajrú wani neꞌemaká richu, eꞌiyonaja unká nakachicha jiyoꞌolá nawenare.
12 E Jesús kemari najló:
—Iꞌijná wajñachi waꞌajnewá.
Raꞌapiyatéjena wo laꞌaró raꞌapejé, raú kalé unká na kemalá rijló: “¿Na chi piká?” Kaja naweꞌepí nawakáraꞌajeri riꞌimaká.
13 Kéchami Jesús iꞌijnaká jiyá awaꞌajé. Rijñaꞌá rikápojo pan, ritamákaꞌatakaloje najló riká; kéchami rijñaꞌaká piño jiña, ritamákaꞌatakaloje najló riká.
14 Kaja weji ke pecha Jesús yaꞌatakó raꞌapiyatéjenajlo, rimakápoꞌoko iꞌimaká ejomi.
Jesús puraꞌakó Simón Pedro waꞌaté yukuna marí
15 Nañapátaka naꞌajnewá ajñakana ejomi, Jesús kemari Pédrojlo:
—Simón, Jonás iꞌirí, ¿e piwátaka nuká íkiꞌija, mariruna piwátaka chaje íkiꞌika?
—Aꞌa, nuwakáraꞌajeri, piká weꞌepiri nuwátaka piká.
Jesús kemari piño rijló:
—Eko pewíñaꞌata inaꞌuké, wajé jemaꞌakaño noꞌopiyá, nupurákaꞌalo nakú.
16 Iyaampe laꞌaká Jesús kemari piño rijló:
—Simón, Jonás iꞌirí, ¿e piwátaka nuká íkiꞌija?
Pedro kemari rijló:
—Aꞌa, nuwakáraꞌajeri, kaja piweꞌepí nuwátaka piká.
Rimá piño rijló:
—Eko pewíñaꞌata noꞌopiyá jemaꞌajeño nupurákaꞌalo nakú.
17 Weji ke pe laꞌaká nakú, rimá piño rijló ñakeja kaja:
—Simón, Jonás iꞌirí, ¿e piwátaka nuká íkiꞌija?
Rejéchami Pedro pechu laꞌakó kamuꞌují, methú ke wani rimakale rijló: “E piwátaka nuká íkiꞌija?”, ke.
Rimá rijló:
—Nuwakáraꞌajeri, piyukeja weꞌepika piká nakaje nakojé, ñakele palá piweꞌepika íkiꞌija nuwátaka piká.
Jesús kemari piño rijló:
—Eko pewíñaꞌata noꞌopiyá jemaꞌajeño nupurákaꞌalo nakú.
18 Pemaꞌá marí: Walijímaka piꞌimaká wakajé, pikó paꞌajíkano pinakuwá paꞌarumaká; piꞌijnaké piwátaka ejo. Kaja phíyuꞌuke wani piꞌimajika wakajé, ajopana ñaꞌajeño paꞌanapitá taꞌarare. Nepoꞌotaje piká; nawáꞌaje piká unká piwátalare iꞌijnakana ejo.
19 Ilé ke kemakana aú, rimá Pedro nakú mékeka ritakaꞌajika akijñojo. Ñaké nalaꞌaká riꞌimaká phíyuꞌuke riꞌimaká wakajé. Tupana palamane aú Pedro laꞌarí nakaje Tupana wátaka ke. Remaꞌakale raꞌapiyá, chapú rinaku péchuruna noño riꞌimaká.
Raú Jesús kemari Pédrojlo mékeka nenójika riká, rejomi rimá kaja rijló:
—Páchoꞌoniño noꞌopiyá jemaꞌakana chiyá.
Jesús jaꞌapiyateje, íkiꞌija riwátakare yukuna marí
20 E kaja naꞌapá ají ke aꞌajná ñoꞌojó. E Pedro pajnoꞌoró ají ke riyámojo yakáꞌajo, amari raꞌapiyateje, íkiꞌija Jesús wátakare, jaꞌapaka nápumichu. Riká penájemi iꞌimari Jesús awaꞌá najñaka Pascua aꞌajnená pajwaꞌatéchaka iꞌimaká. Riwakajé riká kemari Jesusjlo: “Nuwakáraꞌajeri, ¿na chi aꞌajeri piká pipinánajlo?”, ke.
21 Pedro amaka aú richiraꞌakó nápumichu, rimá Jesusjlo:
—Nuwakáraꞌajeri, ¿ilé ta, meke ritakaꞌajika?
22 E Jesús kemari rijló:
—Apala nuwata riꞌimaká marí ejaꞌawá chu, majó nupaꞌajiko piño ejená, unká naje kalé nuꞌumá pijló riyukuna. Rikaja kalé numá nakú pijló: páchoꞌoniño noꞌopiyá jemaꞌakana chiyá —ke rimaká Pédrojlo.
23 Júpichami riyukuna mothoꞌoká Jesucristo waꞌatéjena eꞌiyowá: “Unká ritakaꞌalaje”, ke. Eꞌiyonaja unká ñaké kalé Jesús kemaká iꞌimaká. Rimá: “Apala nuwata riꞌimaká marí ejaꞌawá chu, majó nupaꞌajiko ejená, unká naje kalé nuꞌumá pijló riyukuna”, ke rimaká Pédrojlo iꞌimaká.
24 Nomákare numá nakú ijló; palá nulanaꞌaká riyukuna ijló. Nuká, ajopana waꞌaté, weꞌepiño marí numakare nakú, kewaka riká.
25 Re kajrú apú nakaje, apú nakaje ke, Jesús laꞌakare iꞌimaká. Iná wátakela piyukeja riyukuna lanaꞌakana, unká pukunaji iꞌimalajla papérajlo marí ejaꞌawá chu, kajrú wani riyukuna iꞌimakale. Ilé ke kaꞌajná riꞌimakajla nuweꞌepika.
Maárejeja riyukuna Juan lanaꞌakare iꞌimaká.