Jesús iꞌimaká najló iyamá théꞌela kele ináyana yukuna
25
Jesús kemari piño najló: “Chuwa nuꞌumajika ijló yuku, raú iweꞌepíkaloje mékeka nakaje iꞌimajika Tupana jaꞌapiyá jemaꞌajéñojlo. Iyamá théꞌela kele ináyana iꞌijichaño lapí ajopana wáꞌakako amaje. Najiꞌichá nakamaré nakaje jilá aú lukúnaꞌako najwaꞌató. E neꞌejichá ruꞌuwapanipé wátaje, neꞌejnakáloje rijwaꞌaté penaje.
2 Pajluwa théꞌela kele nanakiyana iꞌimichaño kapechúruna. Eyá pajluwaja théꞌela kele kaja iꞌimichaño mapechúruna.
3 Mapechúruna iꞌimichákaño jiꞌichaño najwaꞌató nakamareja kalé. Unká najñaꞌalacha najwaꞌató rijilá nakhoꞌokáloje rapumí chojé ritajnájiko ee.
4 Eyá kapechúruna iꞌimichákaño jiꞌichaño nakamaré jilá najwaꞌató.
5 E kaja neꞌejichá ruꞌuwapanipé wátaje. Júpija rimaláraꞌatiyaka rikó. Kaja ewaja tapú nocha neká, raú nakamátiyo.
6 E lapí jenaji ke, nemiꞌichá nawíyoꞌoka: ‘Ilé ruꞌuwapanipé waícha, jáchoꞌo majó ramaje’.
7 Raú neká ináyana jáchoꞌochaño nakamaré lamáꞌataje.
8 Rejéchami mapechúruna iꞌimichákaño kemíchaka kapechúrunajlo: ‘Aꞌá wajló wejapa ikamaré jilá nakiyana, yewíchaja wakamaré yakaka’.
9 Eꞌiyonaja nemicha najló: ‘Unká waꞌalaje ijló rinakiyana. Waꞌakela ijló rinakiyana, unká riphálajla wajló. Iwarúwaꞌachi ijluwa riká riñakarelana chiyá’.
10 Raú neꞌejichá riwarúwaꞌaje. Nayámona ruꞌuwapanipé iphíchari. Jiꞌichaño nakamaré jilá najwaꞌatoja kalé mujlúkiꞌichaño rijwaꞌaté pají chojé nawáꞌakako amaje. Namujlúkiꞌichaka ejomi, paminá chawíꞌichari pají numaná.
11 Rejéchami ajopana ináyana iphíchaka rejé. Nemicha paminajlo: ‘Pijmeꞌetá wajló rinumaná’.
12 Eꞌiyonaja rimicha najló: ‘Unká wani nuweꞌepila mékajenaka iká’ ”, ke Jesús iꞌimaká najló riyukuna.
13 Rejomi rimá piño najló: “Kaja numá ijló iꞌimakáloje lamáꞌatakejami ke maare nupé, unkale iweꞌepílaje mékechamika nuphájika. Inaꞌuké iꞌimakáloje nupalamane penaje iꞌimaká nuká”, ke rimaká najló.
Pajluwa aꞌaká rijwaꞌaté jápajeñojlo liñeru yukuna marí
14 E Jesús kemari najló: “Chuwa nuꞌumajika piño yuku ijló raú iweꞌepíkaloje nupaꞌajiko majó nakojé: Pajluwaja inaꞌuké iꞌimichari. Riká wátiyari yaꞌajnaje ajopana teꞌeré ejo iꞌijnakana. Riꞌijichaka yámona, riwáꞌicha rijwaꞌaté jápajeño maná. Nephíchaka rinaku ee, raꞌachá najló riliñérute nakiyana nalaꞌakáloje raú nakaje nakánakaloje richaje liñeru riꞌimaká yaꞌajnó ketana.
15 Pajluwaja nanakiyánajlo raꞌachá cinco mil monedas oro nakiyá laꞌakanami. Apujlo raꞌachá dos mil. Apujlo raꞌachá mil. Palá naweꞌepika ramákana lokópaꞌala raꞌachá najló riká. E kaja ráchoꞌocho reyá yaꞌajnajo. a
16 Rijwaꞌaté jápajeri, raꞌakárejlo cinco mil monedas, warúwaꞌari nakaje raú. Raú rikánicha piño apú cinco mil richaje.
17 Ñaké kaja apú raꞌakárejlo dos mil monedas, warúwaꞌari kaja nakaje raú. Raú rikánicha piño apú dos mil richaje.
18 Eyá raꞌakárejlo mil monedas, lamáꞌatari riká teꞌerí eꞌiyajé.
19 “Júpichami nakariwate piꞌichako piño nachaje ramákaloje mékeka nalaꞌaká liñeru raꞌakare najló iꞌimaká.
20 Paineko raꞌakárejlo cinco mil, iphíchari rinaku. Richaje raꞌachá rijló apú cinco mil. Rimicha rijló: ‘Nukariwate, cinco mil monedas paꞌá nojló iꞌimaká, eyá maare re apú cinco mil richaje’.
21 Raú rikariwate kemíchari rijló. ‘Meke palá wani. Palá wani pilaꞌaká liñeru noꞌokare pijló aú. Chuwa noꞌojika pijló richaje wani. Majó pimujlúkaꞌa, weꞌemachi keyajupa pajwaꞌatéchaka’.
22 Rejomi apú rijwaꞌaté jápajeri, raꞌakárejlo dos mil monedas iꞌimaká, iphíchari rinaku. Rimicha rijló: ‘Nukariwate, nojló paꞌá dos mil iꞌimaká, eyá maare re apú dos mil richaje’.
23 Raú rikariwate kemíchari rijló. ‘Palá wani pilaꞌaká liñeru noꞌokare pijló aú, chuwa noꞌojika pijló richaje wani. Majó pimujlúkaꞌa, weꞌemachi keyajupa pajwaꞌatéchaka’.
24 “E kaja penaje apú rijwaꞌaté jápajeri, raꞌakárejlo mil monedas iꞌimaká, iphíchari kaja rinaku. Rimicha rijló: ‘Nukariwate, nuweꞌepí kaphí wani piwakáraꞌaka pijwaꞌatéjena. Piwakáraꞌa nejátaka pijló nakaje icha ijí, richa iꞌimakáloje pijló penaje. Unká pijápala pimena eꞌiyá, eꞌiyonaja re nakaje pijló.
25 Ilé ke piꞌimakale, nukeroꞌó pipiyá. Raú notaꞌá teꞌerí eꞌiyajé liñeru paꞌakare nojló iꞌimaká. Marí riká paꞌaká nojló riꞌimaká keja’.
26 Raú rikariwate kemíchari rijló: ‘¡Meke unká wani inaꞌukélari piká ta kele! Ijnuni wani piká. Piweꞌepí ajopana ejátaka nojló nakaje icha ijí, richa iꞌimakáloje nojló penaje. Piweꞌepí kaja unká nujápala numena eꞌiyá, eꞌiyonaja re nakaje nojló.
27 Palani pilamáꞌatakajla kele liñeru riñakarelana chojé rikánakaloje richaje liñeru penaje. Ilé ke pilaꞌakela, pipaꞌatákajla nojló nuliñérute meꞌetení richaje waꞌaté’.
28 “Raú rimicha re iꞌimichákañojlo: ‘Ijñaꞌá riliyá ilé mil rikapi iꞌimakare aꞌakáloje riká diez mil kapi iꞌimakárejlo.
29 Kajrú kapi iꞌimajíkajlo noꞌojé richaje. Eyá unká na kapi iꞌimalare liyá, nukaꞌajé wejapa nakaje iꞌimakare rikapi waꞌató.
30 Chuwa ikiꞌichá ilé nujwaꞌaté jápajeri maliyaru ta ají ke kalajeruni chojé. Re kajrú neyájika, kajrú kaja najmaꞌajika naiwá, namájikale chapú kaje wani yajwé re’, ke nawakáraꞌajeri kemíchaka najló”, ke Jesús iꞌimaká yuku najló.
Ejaꞌawá tajnájiko wakajé yukuna marí
31 Jesús kemari piño najló: “Inaꞌuké iꞌimakáloje nupalamane penaje iꞌimaká nuká. Nuphájika piño majó wakajé, kajrú mejámaꞌatani iꞌimajika nowaꞌó. Ñaké kaja nujwaꞌatéjena, jeꞌechú chiyájena, iꞌimajika nowaꞌó. Ajopana chaje wakáraꞌajeri nuká.
32 Piyukeja inaꞌukena, ejaꞌawá chu iꞌimakaño, awakájiko nujimaje. Rejomi nutamákaꞌataje neká paliyáaka. Ovéjana lamáraꞌajeri tamákaꞌataka ovéjana, kawayana pirakana liyá, ke kaja nutamákaꞌatajika neká paliyáaka.
33 Palá laꞌakaño nuwakáraꞌaje iꞌijnaká kaꞌañá chojó pitá, eyá puꞌuwaré laꞌakaño nuwakáraꞌaje iꞌijnaká pajrú chojó pitá.
34 Eyá nuká, inaꞌuké iꞌimakana wani, kemájeri kaꞌañá chojó pitá iꞌimajíkañojlo: ‘Majó iꞌijná. Palá wani Noraꞌapá laꞌajika inaku, ñakele chuwa iꞌimajika wajwaꞌaté matajnako. Ñaké Noraꞌapá pechu nakú ilaꞌakana iꞌimaká rikeñoꞌótaka ejaꞌawá iꞌimaká piyá’, ke.
35 “Kewí meꞌepijí iꞌimajika nojló wakajé, aꞌakeno nojló aꞌajnejí iꞌimajika. Eyá nunúrupi chu makáraꞌatajiko wakajé, aꞌakeno nojló iꞌirakaje iꞌimajika. Eyá iteꞌeré nakuwá noꞌopájikano wakajé, imakeno nojló nuyuríkoloje ijwaꞌaté penaje.
36 Kamuꞌují nulaꞌajíkano aꞌarumakaji nakú wakajé, aꞌakeno nojló riká. Nutami nuꞌumajika wakajé, iwojítakeno nuká. Inaꞌuké wajákelana chu nuꞌumaká wakajé, iꞌijnakeno kaja nomaje, ke numájika najló.
37 E palá nupechu iꞌimakárena nakú kemájeño nojló: ‘wawakáraꞌajeri, ¿Mere wakajé chi waꞌá pijló aꞌajnejí iꞌimaká, pijñaꞌakale meꞌepijí panaku? ¿Mere wakajé chi waꞌá kaja pijló iꞌirakaje iꞌimaká, pinúrupi chu makáraꞌatako aú?
38 ¿Mere wakajé chi wemá pijló iꞌimaká, piyuríkoloje wañakaré chu wajwaꞌaté? ¿Mere wakajé chi waꞌá pijló aꞌarumakaji, kamuꞌují pilaꞌakale rinaku iꞌimaká?
39 ¿Mere wakajé chi wawojita piꞌimaká, pitami piꞌimakale? ¿Mere wakajé chi weꞌemá pamaje, inaꞌuké wajákelana chojé?’, ke nemájika nojló.
40 “Raú neꞌemakana wani kemaje najló: ‘Ilé ke ilaꞌaká aú piyukeja nojena kamuꞌují laꞌakaño nakú palá, nunaku ilaꞌá kaja palá raú’.
41 Rejomi rimaje pajrú chojó pitá iꞌimajíkañojlo: ‘Iꞌijná nuliyá keraꞌathani unká yakálaje, Tupana lamáꞌatakare Jiñá Chiꞌinárikanajlo, rijwaꞌatéjenajlo waꞌaté, chojé.
42 Kewí meꞌepijí iꞌimaké wakajé nojló, unká aꞌalá nojló aꞌajnejí iꞌimaká. Nunúrupi chu makáraꞌatako iꞌimaké wakajé, unká aꞌalá nojló juni iꞌimaká.
43 Ajopana teꞌeré eyaje ke nuꞌumaké ijwaꞌaté wakajé, unká kaja imalá nojló iꞌimaká nuyuríkoloje ijwaꞌaté iñakaré chu. Kamuꞌují nulaꞌaké aꞌarumakaji nakú wakajé, unká aꞌalá nojló aꞌarumakaji. Nutami nuꞌumaké wakajé, unká iwojítala nuꞌumaká. Inaꞌuké wajákelana chu nuꞌumaké wakajé, unká iꞌimalá nomaje’, ke numájika unká jemaꞌalaño noꞌopiyajlo.
44 “Raú nemaje nojló: ‘¿Mere wakajé chi unká waꞌalá pijló aꞌajnejí, kewí meꞌepijí iꞌimaká pijló eꞌiyonaja? ¿Mere wakajé chi unká waꞌalá pijló iꞌirakaje, pinúrupi chu makáraꞌatako iꞌimaká eꞌiyonaja? ¿Mere wakajé unká wemalá pijló iꞌimaká piyuríkoloje wajwaꞌaté, paꞌapaka wateꞌeré nakuwá iꞌimaká eꞌiyonaja? ¿Mere wakajé unká waꞌalá pijló aꞌarumakaji, kamuꞌují pilaꞌaká rinaku iꞌimaká eꞌiyonaja? ¿Mere wakajé unká weꞌemalá piwojítaje, pitami piꞌimaká eꞌiyonaja? ¿Mere wakajé unká weꞌemalá pamaje, inaꞌuké wajákelana chu piꞌimaká eꞌiyonaja?’, ke nemájika nojló riwakajé.
45 “Raú neꞌemakana wani kemaje najló: ‘Unká ilaꞌalale ñaké palá noꞌopiyá jemaꞌajeño, kamuꞌují laꞌakaño nakú, unká kaja ilaꞌalá nuká palá raú’, ke numájika unká jemaꞌalaño noꞌopiyajlo.
46 Ñakele neká amájeño chapú kaje yajwé ñakeja wani, eyá palá laꞌakaño iꞌimajeño matajnako jeꞌechú chu”, ke Jesús kemaká najló.