Pablo laꞌaká nenakú, napechu iꞌimakáloje kaphí Tupana chojeja penaje yukuna marí
10
Nojena, nuwata iweꞌepika Tupana iꞌimaká waꞌajútayami chuna waꞌaté iꞌimaká. Juni juwákaꞌala ke riꞌijnajika nachó; ilé ke riwáꞌaka neꞌemaká Egipto teꞌeré eyá. Kaja ewaja nephá juni jalomi kerálani turenaje. Re rijmeꞌetá najló juni jalomi, teꞌerí amákoloje, richuwá nakuwáꞌakaloje paꞌanajo pitá penaje.
2 Ilé ke Tupana wáꞌaka neꞌemaká, raú piyukeja riwáꞌakarena iꞌimaká rijló bautizádona ke waja piyukeja.
3 Piyukeja najñaka riká waja aꞌajnejí riwakajé, Tupana aꞌakare najló jeꞌechú chiyá iꞌimaká.
4 Unká juni iꞌimalá najló wakajé, Cristo jeñoꞌótari najló juni jipa eꞌiyayá. Piyukeja neꞌeraká reyá waja juni nakiyana. Cristo iꞌimari najwákeꞌewe iꞌimaká,
5 eꞌiyonaja kajrú nanakiyana laꞌaká puꞌuwaré. Ilé ke nalaꞌaká pachá Tupana wajari neꞌemaká, raú kajrú nanakiyana takaꞌatako desierto eꞌiyá iꞌimaká.
6 Ilé ke riwajaka neꞌemaká, walaꞌakáloje wenakuwá raú penaje, weꞌemaká piyá wéchiruna puꞌuwaré laꞌakanajlo, neꞌemaká ke kaja.
7 Ipechu iꞌimaniña puꞌují nakaje jenami nakú Tupana apumí chojé, napechu iꞌimaká ke kaja. Tupana purákaꞌalo lanaꞌakéjami kemari nanaku: “Re nayaꞌo naꞌajnewá ajñakana nakú, iꞌirakaje kaje nakú, rejomi náchoꞌo arápaꞌaje”, ke. Ilé ke nalaꞌaká nakajmoꞌokó wakajé, napechu iꞌimakáloje puꞌují jema pirakana iꞌirí jenami nakú penaje.
8 Apú wakajé nalaꞌá namanáicho ajopana waꞌaté, ajopana waꞌaté ke iꞌimaká. Walaꞌaniña ñaké kaja. Ilé ke nalaꞌaká pachá Tupana kapichátari pajluwa kálaja veintitrés mil inaꞌukena iꞌimaká.
9 Nanakiyana laꞌañó najluwa Tupana mapechuru ke, unkale raꞌalá najló nakaje nawátakare. Walaꞌaniña nalaꞌaká iꞌimaká ke. Ilé ke nalaꞌaká pachá riwakáraꞌa jeína yuriná wani ajmaꞌaká neꞌemaká, raú natakaꞌatákaloje.
10 Nanakiyana akhaꞌañó Tupana maná, pachá riwakáraꞌa pajluwaja rijwaꞌateje, jeꞌechú chiyaje, iꞌijnaká nenótaje.
11 Moisés lanaꞌarí puꞌuwaré aꞌajútaya michuna laꞌakare yukuna. Tupana purákaꞌalo lanaꞌakéjami nakiyana riká, rilaꞌakáloje meꞌetení iꞌimakaño jenakú. Raú weká, kaja penaje rená chu iꞌmakaño, weꞌepiño rinakojé, walaꞌaká piyá puꞌuwaré nalaꞌaká iꞌimaká ke kaja.
12 Apala pipechu pinakuwá: “Kaja kaphí péchuri nuká Tupana chojé, unká wani nóchoꞌolajo richiyá”, ke. Piweꞌepino pikó, pilaꞌaká piyá puꞌuwaré.
13 Na kaꞌajná aꞌá iná meꞌé rijluwa, iná laꞌakáloje puꞌuwaré penaje. Ñaké waja piyukeja inaꞌukénajlo riká. Tupana aꞌarí rinakojó iná, iná laꞌaká piyá puꞌuwaré; unká riyurila puꞌuwaré laꞌakaná cháꞌataka iná. Puꞌuwaré laꞌakaná aꞌakachu iná meꞌé rijluwa, Tupana laꞌá iná pechu kaphí, iná laꞌaká piyá puꞌuwaré.
14 Nojena, íkiꞌija nuwátakarena, marí ke riꞌimakale, iꞌimá uꞌupejlú nakaje jenami nemakare nakú: “Wachiꞌinárikana jenami riká”, ke liyá.
15 Keꞌejwiruna iꞌimajika ee, jemaꞌá nupurákaꞌalo nulanaꞌakare ijló jaꞌapiyá.
16 Nenoka Jesucristo yámona, rajñá raꞌajnewá najwaꞌaté kaja penaje iꞌimaká. Rimá Tupánajlo iꞌirakaje, pan kaje nakú: “Palá pilaꞌaká weká raú”, ke. Ñaké kaja wemaká rijló, Jesucristo takaꞌakale wachaya iꞌimaká. Riwakajé rira iꞌijná itapuwa aphumi chiyá wachaya iꞌimaká. Rijwaꞌatéjena weꞌemakale, weꞌerá kajmú kaje jalá riweꞌepéjona penaje. “Wachaya waꞌató ritakaꞌakale iꞌimaká”, ke kemakana riká raꞌapiyá jemaꞌajéñojlo. Wajñá kaja pan riweꞌepéjona penaje. “Wachaya waꞌató raꞌá kaja rikó takaꞌakájejlo iꞌimaká”, ke kemakana riká rajñakana aú.
17 Jesucristo, pajluwaja riká, eyá weká rijwaꞌatéjena íkiꞌiruna, eꞌiyonaja kalé pajluwa japi keja weká pajwaꞌatéchaka ripalamane aú.
18 Kaja iweꞌepí meke Israel lakénami nójika napirana nakiyana napumí chojé, puꞌuwaré nalaꞌajíkare pachá. Rejomi najñake riꞌimi pajñakani. Raú pajluwa japi keja neꞌemajika pajwaꞌatéchaka.
19 Nakaje jenami nakú napechu iꞌimaké: “Wachiꞌinárikana jenami riká”, ke. Eꞌiyonaja unká ñaké kalé riꞌimajika, ñakele riꞌimi natoꞌotájikare rijimaje iꞌimakeri apú riꞌimi keja kaja,
20 jiñana péchujlo nenókeno napirana nakiyana, unká Tupánajlo kalé. Unká wani nuwátala iꞌimaká jiñana pechu wákeꞌewena.
21 Unká méñoꞌojo iꞌimalá Tupana waꞌatéjena, eyá jiñá pechu waꞌatéjena pajñakani. Re iꞌirakaje, wawakáraꞌajeri Jesucristo weꞌepéjona penaje; re kaja apú iꞌirakaje, jiñana péchujlo aꞌakéjami. Ñakele unká nuwátala iꞌimaká jiñana pechu wákeꞌena riꞌimi ajñakana aú, jiñana péchujlo aꞌakéjami riꞌimakale.
22 Unká wani paala ilé ke laꞌakana. Ilé kaje pachá Tupana yúchaꞌo wachá, rimejajnena weꞌemakale. Unká richaje kalé weká nakaje laꞌakana aú.
Meke iná iꞌimaká, iná wátakachu íkiꞌija ajopana inaꞌuké. Riyukuna marí
23 Neꞌiyajena kemaño inaku: “Unkachu rilaꞌakana nakú kemakana iꞌimalá Tupana purákaꞌalo lanaꞌakéjami eꞌiyá, iná laꞌajla iná wátaka ke”.
Kewaka, iná laꞌajla ñaké, eꞌiyonaja reꞌiyajé nakaje, iná wátakare laꞌakana aú, unká iná aꞌalá ajopana ñathé, nalaꞌakáloje palá richaje, richaje ke, Tupana wátaka ke.
24 Palani iná laꞌaká nakaje, riꞌimakáloje palá ajopana inaꞌukénajlo. Eyá unká paala iná nakuwaja kalé weꞌepíkana.
25 Riꞌimi, iwarúwaꞌajikare riꞌimi ñakarelana chiyá, ajñá riká, ipechu iꞌimaniña rinaku: “¿Mere eyá kaꞌajná najñaꞌá riꞌimaká? ¿Wajñájika riká aú chi kaꞌajná walaꞌajé puꞌuwaré?” Iꞌijnatániña ipéchuwa ilé ke.
26 Ajñá riká, Tupana palamane riká, piyukeja nakaje ejaꞌawá chu iꞌimakare minárikana riꞌimakale.
27 Pajluwaja kaꞌajná yukupéraꞌari piká, piꞌijnakáloje paꞌajnewá ajñaje rijwaꞌaté. Unká kaꞌajná Jesucristo waꞌateje kalé riká, eꞌiyonaja piꞌijná richaje. Apala raꞌá pijló riꞌimi, rajñakana nakú kaꞌajná pipechu iꞌimajé: “¿E kaꞌajná natoꞌotaka kaji riꞌimi nakaje jenami nakojé?” Eꞌiyonaja pikejáꞌaniña riyukuna, pikawílaꞌako piyá rinakojé.
28 Eꞌiyowá ke kaꞌajná apú iphaka pinaku, kemari pijló: “Marí riꞌimi nachiꞌinárikana jenámijlo aꞌakanami riká”, ke. Ilé ke rimaká aú kaꞌajná, unká pajñala riká, apú pechu iꞌimakale kaꞌajná rinaku: “Rajñakana aú iná laꞌá puꞌuwaré”, ke. Ñaké ripechu iꞌimakale, pajñániña riká
29 Pajñakela riká, apú kawílaꞌojla rinakojé, ripechu iꞌimakálejla pinaku: “Unká wani paala rilaꞌaká rajñakana aú”, ke. Ilé ke ripechu iꞌimakálejla pinaku, pajñániña riká.
30 Iná kemá Tupánajlo, iná ajñaka riká yámona: “Palá pilaꞌaká nuká marí aꞌajnejí aú”, ke. Unká naje kalé apú kemá wanaku: “Puꞌuwaré nalaꞌaká ilé kaje aꞌajnejí ajñakana aú”, ke.
31 Piyuke nakaje ilaꞌakare, aꞌajnewá ajñakana kaꞌajná, nakaje jalá iꞌirakana kaꞌajná, ilaꞌá piyukeja nakaje, riꞌimakáloje palá Tupana nakú penaje.
32 Amátaniña ajopana inaꞌukena puꞌuwaré laꞌakaná aú: Judíona kaꞌajná, unká judíona kalé iꞌimakaño kaꞌajná, eyá Jesucristo waꞌatéjena kaꞌajná, amátaniña neká puꞌuwaré laꞌakaná aú.
33 Eyá nuká laꞌarí piyukeja nakaje, riꞌimakáloje palá piyukeja inaꞌukena nakú penaje. Unká nujlúwaja kalé nulaꞌá riká; nuwata piyukeja nakaje nulaꞌakare iꞌimaká palá ajopánajlo, napechu iꞌimakáloje kaphí Jesucristo chojé, neꞌemakóloje kapichákajo liyá raú.