4 Nuká kemari nunakuwá: Jesucristo wakáraꞌakarena riyukuna iꞌimajé nakiyana nuká, ñakele nuwátakela nukejáꞌajla inaꞌuké liyá aꞌajnejí, nuꞌumakáloje raú penaje.

5 Nuwátakela, nuwáꞌakojla kaja inanaru, Jesucristo jaꞌapiyá jemaꞌajeyo waꞌaté, ruchiraꞌakóloje nujwaꞌaté. Piyukeja ajopana riwakáraꞌakarena chiraꞌakó naluna waꞌaté. Kayajáloruna waja kaja Jesucristo merénami, kayajálori kaja Pedro.

6 Eyá marí ke weká meꞌetení: Re wejápaja nakaje wajló, weꞌemakáloje raú penaje. Apala ipechu: “Unká méñoꞌojo Pablo, Bernabé waꞌaté, wakáraꞌala inaꞌuké, naꞌakáloje nakaje najló”, ke.

7 Palá nawakáraꞌajeri aꞌaká suráanajlo najápakaꞌala wemí. Unká suráana jápala, nawarúwaꞌakaloje najluwa aꞌajnejí, aꞌarumakaji, kaje maká. Piyukeja kamenáruna iꞌimakaño ajñaño namena eꞌiyayá nakaje; piyukeja kaja ovéjana lamáraꞌajeño ajñaka aꞌajnejí, nalaꞌakare nachuꞌuchure jalá nakiyá.

8 Unká ajopana kemaká rinaku ke kalé numaká. Ñaké kaja Tupana purákaꞌalo, Moisés michú lanaꞌakare iꞌimaká, kemaká rinaku.

9 Marí ke rimaká: “Nachiraꞌata jema pirakana trigo awakátakejami eꞌiyowá, ritojroꞌokáloje richa aꞌarú rinakojé. Unká nepoꞌotala ritakú, rajñaka piyá rinakiyana rijápakaꞌala wemí”, ke. Unká inaꞌuké weꞌepíkaloje jema pirakana muꞌují penaje kalé rimá ilé ke rinaku.

10 Rimá kaja weká Tupana purákaꞌalo yukuna iꞌimajeño nakú, inaꞌuké aꞌakáloje wajló nakaje wajápakaꞌala wemí, newíñaꞌatakana Ripurákaꞌalo nakú iꞌimakale wajápakaꞌala.

11 Weká jaꞌapátaño ijló Ripurákaꞌalo iꞌimaká, ñakele wawátakela, wemajla ijló iꞌimaká, aꞌakáloje wajló nakaje, aꞌajnejí kaje, weꞌemakáloje raú penaje.

12 Ajopánajlo aꞌaké nakaje iꞌimaká, neꞌemajíkale ijló Tupana purákaꞌalo yukuna. Newíñaꞌatajika iká, chaje wewíñaꞌatajika iꞌimaká, ñakele palani kaja wajló nakaje aꞌakana. Wawátakela, wemajla ijló, aꞌakáloje nakaje wajló, kajrú waꞌapátajikale ijló Tupana purákaꞌalo iꞌimaká.

13 Kaja iweꞌepí re nakaje Tupana ñakaré chu jápajeñojlo. Nenókelana ejo nenono napirana nakiyana, puꞌuwaré nalaꞌakare chaya. Rinaku jápajeño ajñaño riꞌimi nakiyana najápakaꞌala wemí.

14 Ilé ke kaja wawakáraꞌajeri Jesucristo wátaka nakaje iꞌimaká riyukuna iꞌimajéñojlo. Ajopana waꞌaté weꞌemá Tupana iꞌimataka inaꞌuké kapichákajo liyá yukuna ajopánajlo. Riwakáraꞌa naꞌaká wañathé weꞌemajowa penaje.

15 Nuwátakela, numajla najló, naꞌakáloje nojló nakaje weꞌemajowa penaje, eꞌiyonaja unká na nukejáꞌala nujluwa naliyá. Unká kaja numalá ijló meꞌetení, aꞌakáloje nojló nakaje. Apala nutakaꞌajé meꞌepijí nakú unká pachá nukejáꞌala, eꞌiyonaja unká na nukejáꞌalaje iliyá riwemí penaje. Kaja keja nuwátaka iꞌimakaje, palani nojló unká nakaje chaya kalé Jesucristo yukuna iꞌimakana inaꞌukénajlo.

16 Unká nuꞌumalá Tupana iꞌimataka inaꞌuké kapichákajo liyá yukuna, nulaꞌakáloje nunakuwá ajopana cháꞌatajeri ke raú. Tupana aꞌarí nuká, nuꞌumakáloje riyukuna penaje. Chapú wani riꞌimajika nojló unkaja ke nuꞌumá riyukuna najló.

17 Nupechu keja nuwátakela riyukuna iꞌimakana inaꞌukejlo, kajrú riwemí iꞌimakajla nojló, eꞌiyonaja marí ke riká nojló: Nuꞌumá riyukuna najló, Jesucristo wakáraꞌakale nuká, riká penaje raꞌá nuꞌumaká.

18 Palani nojló Tupana iꞌimataka iná kapichákajo liyá yukuna iꞌimakana najló, nujápakaꞌala riꞌimakale. Nemaꞌakachu raꞌapiyá, riꞌimatá neká kapichákajo liyá. Riwemí keja kaja nojló riká.

19 Unká na kalé wakáraꞌa nujápaka najló, eꞌiyonaja nulaꞌá nokó piyuke inaꞌuké waꞌaté jápajeri ke, nemaꞌakáloje Jesucristo jaꞌapiyá penaje.

20 Judíona nakiyana waꞌaté nuꞌumaká wakajé, napechu keja nuꞌumaká najwaꞌaté, nuꞌumakáloje Jesucristo yukuna najló, nemaꞌakáloje raꞌapiyá. Tupana purákaꞌalo, Moisés lanaꞌakare iꞌimaká, jaꞌapiyá judíona iꞌimaké. Nuká unká iꞌimalá raꞌapiyá, eꞌiyonaja nuꞌumaká re najwaꞌaté ketana, napechu keja kaja nupechu iꞌimaká raꞌapiyá jemaꞌakana nakú.

21 Nuꞌumaká wakajé, unká jemaꞌalaño Moisés purákaꞌalomi jaꞌapiyá waꞌaté ketana, unká kaja nuꞌumalá ripurákaꞌalomi jaꞌapiyá, nuꞌumakáloje najló Jesucristo yukuna, ripurákaꞌalo jaꞌapiyá jemaꞌajeri kaja nuꞌumakale.

22 Unká weꞌepílaño palá Tupana nakojé, keja kaja nuꞌumaká najwaꞌaté, nuꞌumakáloje riyukuna najló, nemaꞌakáloje raꞌapiyá. Neká keja nuꞌumaká piyukeja inaꞌukena waꞌaté, nemaꞌakáloje nupurákaꞌalo jaꞌapiyá penaje, neꞌemakóloje kapichákajo liyá raú.

23 Ilé ke nulaꞌaká inaꞌuké eꞌiyowá, Jesucristo jaꞌapiyá jemaꞌajeño iꞌimakáloje nachaje, nachaje ke, íkiꞌiruna penaje.

24 Kaja iweꞌepí marí: Nechoꞌó kaꞌajná, namákaloje naka cháꞌataka neká jechoꞌokajo aú, nacháꞌatajerijloja kalé naꞌá riwemí. Ñakele ijló numá: Ilaꞌá ipéchuwa ñaké kaja Tupana wátaka ke laꞌakana nakú, riwemí iꞌimakáloje ijló raú.

25 Piyuke jechoꞌojeño lamáꞌataka palá nanapona. Unká nalaꞌalá nawátaka ke wani, peyajwé nanapona iꞌimakáloje, nawó iꞌijnaká piyá. Ilé ke nalaꞌaká, nacháꞌatakaloje ajopana penaje. Cháꞌatajeño wílaꞌaru nakojé naꞌá nakaje ramájona penaje. Re rijimárecha, meketánaja penaje kalé riká, rejomi kaja inaꞌuké pechu kapicháñaa mékajenaka cháꞌataka neꞌemaká. Eyá weká laꞌañó piyuke nakaje Tupana wátaka ke, unká tajnákajo penaje kalé riwemí iꞌimajíkare wajló. Palá ripechu iꞌimajika wanaku ñakeja.

26 Unká nulaꞌalá nakaje mapeja; unká kaja nulaꞌalá nakaje menáwaka.

27 Unká ñaké kalé nulaꞌaká, unká nulaꞌalá nakaje nuwátaka ke nujluwa. Nomá nokó, nulaꞌakáloje palá penaje. Ilé ke nulaꞌaká, nuꞌumaká piyá maliyaru Tupánajlo. Riwátaka ke nulaꞌakáloje penaje, nomá nokó. Kaja nowíñaꞌata kajrú inaꞌukena Tupana nakú, ñakele nuwata piyukeja nakaje laꞌakana, riꞌimakáloje palá rinaku penaje. Unká nuwátala rimaká nunaku: “Unká paala pilaꞌaká pijápakaꞌala”, ke.