Aꞌajnejí, naꞌakare nachiꞌinárikana jenámijlo, yukuna marí
8
Chuwa nuꞌumajika ijló aꞌajnejí, naꞌakare nachiꞌinárikana jenámijlo, yukuna. Naꞌá aꞌajnejí renámijlo, napechu iꞌimakale rinaku: “Wachiꞌinárikana jenami riká”, ke. Apala ipechu inakuwá: “Weká, maárowa iꞌimakaño, weꞌepiño unká na penaje kalé ilé ke nalaꞌakare”, ke. Raú nakaje iweꞌepíkare nakojé aú kaꞌajná ilaꞌajé inakuwá nacháꞌatajeño ke. Ilé ke laꞌakana unká paala. Íkiꞌija pekowáaka wátakana aú waꞌá pañathéchaka, raú kaja wapechu richaje ke Tupana purákaꞌalo chojé kaphí.
2 Laꞌarí rinakuwá weꞌepiri ke pechu rinakuwá: “Nuká weꞌepiri palá piyukeja ilé kaje nakojé”, ke, eꞌiyonaja unká ripechu iꞌimalá rinaku, Tupana pechu nakú riꞌimaká ke.
3 Tupana weꞌepiri mékajenaka wátaka riká íkiꞌija.
4 Aꞌajnejí, nayáꞌatakareno nakaje jenami awaꞌajé, nakú numaje ijló meꞌetení. Renami nakú nemá: “Wachiꞌinárikana jenami riká”, ke, unká na penaje riꞌimalá. Waweꞌepí unká apú inaꞌuké chiꞌinárikana penaje iꞌimalá; rikaja kalé Tupana, pajluwaja, piyuke inaꞌuké Chiꞌinárikana penaje iꞌimakare.
5 Eꞌiyonaja neꞌiyajena kemaño: “Re kajrú waminana marí ejaꞌawá chu, ñaké kaja jeꞌechú chu. Neká wakáraꞌaño kaja weká”, ke nemaká.
6 Waweꞌepí Tupánaja kalé pajluwaja Wachiꞌinárikana, Jesucristo jaraꞌapá riká. Riká keñoꞌótari piyukeja wani nakaje iꞌimaká, inaꞌuké waꞌató. Weká, Jesucristo waꞌatéjena, iꞌimaño, walaꞌakáloje rijló nakaje riwátaka ke, ripalamane aú piyukeja nakaje iꞌimakale. Ripalamane aú kaja weká Tupana yaní.
7 Unká piyukeja kalé inaꞌukena weꞌepiño naka kewaka. Unká chiyó nemaꞌá Jesucristo jaꞌapiyá, napechu iꞌimaké nakaje jenami, nemájikare nakú: “Wachiꞌinárikana jenami riká”, ke, raú raꞌá renó napechu nakojé. Najñákachu meꞌetení aꞌajnejí, ajopana toꞌotákare nakaje jenami nakojé, napechu iꞌimakale: “Wachiꞌinárikanajlo aꞌakanami marí aꞌajnejí”, ke, raú unká najñala riká, unkale naweꞌepila palá kewákaje purákaꞌaloji nakojé. Ñakele rajñakana aú napechu iꞌimá: “Puꞌuwaré walaꞌaká raú”, ke.
8 Unká aꞌajnejí, wajñakare aú kalé, palá laꞌajeñó ke weká Tupánajlo; unká kaja walaꞌalá puꞌuwaré unkachu wajñala riká.
9 Inakiyana weꞌepiño unká iná laꞌalá puꞌuwaré ilé kaje aꞌajnejí ajñakana aú, eyá ajopana inakiyánajlo unká ñaké kalé riká. Unká joꞌó naweꞌepila palá kewákaje purákaꞌaloji nakojé. Iká kaja weꞌepíkaño rinakojejlo numá: Ajñániña ilé kaje aꞌajnejí, natoꞌotájikare renami jimaje. Apala peꞌewé kaꞌajná, unká weꞌepila palá rinakojé, ajñájeri riká pijwaꞌaté, eꞌiyonaja ripechu iꞌimajé: “Puꞌuwaré nulaꞌaká rajñakana aú”, ke. Raú rilaꞌá puꞌuwaré.
10 Apala piweꞌepí unká iná laꞌalá puꞌuwaré rajñakana aú. Apala piyaꞌo kaꞌajná aꞌajnejí, natoꞌotákare renami nakojé, riñakarelana chu kaꞌajná ajñakana nakú. Eꞌiyowá ke kaꞌajná apú Jesucristo jaꞌapiyá jemaꞌajeri jaꞌapaka rewá, unká weꞌepila palá rinakojé. Riká amari pajñaka riká, raú rajñá kaja riká pijwaꞌaté. Pipechu nakú riꞌimá kaꞌajná: “¿Chuwa kaꞌajná chi riweꞌepika, unká rilaꞌalá puꞌuwaré rajñakana aú?”, ke. Eꞌiyonaja rajñakana aú rikawílaꞌo rinakojé, ripechu iꞌimakale: “Puꞌuwaré kaꞌajná nulaꞌaká raú”, ke.
11 Piká weꞌepiri unká pilaꞌalá puꞌuwaré rajñakana aú, eꞌiyonaja kalé piweꞌepíkare aú pilaꞌá chapú pinakiyánajlo, ripechu iꞌimakale: “Rajñakana aú nulaꞌá puꞌuwaré”, ke. Pipachá rilaꞌá nakaje apoꞌojó riweꞌepíkare liyá; ilé kaje aú papichata ripechu. Richaya Jesucristo takaꞌarí kaja iꞌimaká, riꞌimakáloje Tupana leꞌejé penaje.
12 Papichátajika ee pejena pechu, unká weꞌepílaño palá na aú ka iná laꞌaká puꞌuwaré nakojé, Jesucrístojlo pilaꞌá kaja puꞌuwaré raú.
13 Riꞌimi nojñákare pachá kaꞌajná nojena nakiyana laꞌañó puꞌuwaré, nalaꞌakale nakaje napechu nakú iꞌimakare: “Puꞌuwaré iná laꞌaká raú”, ke. Ilé ke riꞌimajika ee najló, unká wani nojñálaje riꞌimi, natoꞌotákare nachiꞌinárikana jenami jimaje, najñaka piyá riká nomájemi.