5 Wáꞌakajeñojlo numá: Imejñátaniña inapona paliyáaka. Apala ilaꞌá ilé ke, iyuríkaloje pajwaꞌatéchaka laꞌakana meketánaja, eyá iweꞌepíkaloje Tupana waꞌaté puraꞌakano itukumó. Rejomi kaja iꞌimajé piño pajwaꞌatéchaka. Ilé kaje aú unká Jiñá Chiꞌinárikana kaꞌátalaje eꞌiyajé, ilaꞌakáloje imanáicho ajopana waꞌaté penaje.

6 Ilé ke nuwátaka ilaꞌaká, eꞌiyonaja unká nuwakáraꞌala ilaꞌaká ñaké.

7 Nojló palani piyukeja inaꞌukena iꞌimakela nuká ke waja. Iwakajina ke iꞌimakaño nakiyana nuká, eꞌiyonaja kalé Tupana palamane aú walaꞌá keꞌiyapé nakaje paliyáaka.

8 Iwakajina eyá iwakajílomina, kélejlo numá: Unkákela iwáꞌakojla, nuká ke kaja iꞌimakajla, eꞌiyonaja ilé ke iꞌimakana kaꞌajná palani ijló.

9 Apala unká kaꞌajná ijñaꞌalajla panaku ikó iꞌimakana, ñakele palani ijló wáꞌakakajo, ilaꞌaká piyá imanáicho. Ilé ke ilaꞌaká piyá, palani ijló wáꞌakakajo.

10 Chuwa numájika naluna kupákana nakú. Unká nupechu keja kalé numaká ijló marí nakú: Unká apaꞌawelo inanaru kaꞌalaje apaꞌawelo liyá ruyajná. Ñaké kaja Jesucristo kemaká rinaku.

11 Apaꞌawelo inanaru kaꞌajika ee ruliyá ruyajná, unká meke laꞌajé ruwáꞌakalajo piño apú waꞌaté. Rupaꞌajó piño kaꞌajná ruyajnami chaje. Achiñánajlo ñaké kaja riká: unká kaja nakaꞌalaje apú liyá riyajalo.

12 Chuwa numájika piño ajopana nakú, unká Jesucristo liyá kalé nakaje numakare nakú: Re kaꞌajná pajluwaja Jesucristo jaꞌapiyá jemaꞌajeri, eyá riyajalo kaꞌajná unká jemaꞌalayo. Palani rijwaꞌaté iꞌimakana iꞌimakachu rojló, unká riyurílaje ruká.

13 Ñaké kaja inaánajlo riká: Rukaja kalé kaꞌajná jemaꞌayó Jesucristo jaꞌapiyá, eyá ruyajná unká jemaꞌalari. Palani rujwaꞌaté iꞌimakana iꞌimakachu rijló, unká ruyurílaje riká.

14 Palá Tupana laꞌaká ruyajná, unká remaꞌalá Jesucristo jaꞌapiyá eꞌiyonaja, riꞌimakale pajluwa japi keja rujwaꞌaté, Jesucristo jaꞌapiyá jemaꞌajeyo ruꞌumakale. Eyá apú, riyajalo kaꞌajná unká jemaꞌalá Jesucristo jaꞌapiyá. Eꞌiyonaja Tupana laꞌarí kaja ruká palá, pajluwa japi keja ruꞌumakale Jesucristo jaꞌapiyá jemaꞌajeri waꞌaté, ñakele nayani iꞌimaño palani kaja Tupánajlo. Unkákela riꞌimajla ñaké, unká jemaꞌalaño Jesucristo jaꞌapiyá yaní keja neꞌemakajla.

15 Pajluwa kaꞌajná iꞌimá riyajalo waꞌaté; rukaja kalé kaꞌajná jemaꞌayó Jesucristo jaꞌapiyá, eyá riká unká. Riwata kaꞌajná ruyuríkana, riꞌimakáloje juká ruliyá. Reja rilaꞌáreja riwátaka ke. Ñaké kaja inaánajlo: Apaꞌawelo kaꞌajná, unká Jesucristo jaꞌapiyá jemaꞌajeyo kalé ruká, ruyajnaja kalé jemaꞌarí raꞌapiyá. Ruwata kaꞌajná riyuríkana, ruꞌumakáloje juká riliyá. Reja rulaꞌáreja ruwátaka ke. Ilé ke nalaꞌajika ee, unká neꞌemalaje pajwaꞌatéchaka. Tupana aꞌarí weká, weꞌemakáloje palá pajwaꞌatéchaka penaje.

16 Inanaru, Tupana jaꞌapiyá jemaꞌajéyojlo, numá: Unká meke pilaꞌalajla piyajná, remaꞌakáloje Jesucristo jaꞌapiyá penaje. Ñaké kaja numaká achiñajlo: Unká kaja meke pilaꞌalajla piyajalo, romaꞌakáloje Jesucristo jaꞌapiyá.

17-20 Tupana iꞌiwapari iꞌimaká ajopana eꞌiyayá, iꞌimakáloje rileꞌejena inaꞌukena penaje. Pajluwa kaꞌajná riꞌiwapá rijluwa, riꞌimakáloje rijwaꞌateje penaje. Unká chiyó remaꞌá raꞌapiyá, mataꞌakeja kaꞌajná richinuma iꞌimaká riwakajé. Kaja keja riyuríjiko. Eyá Tupana iꞌiwapari kaja kaꞌajná mamataꞌakánaru joꞌó chinúmari rijluwa. Ilé yuréjero kaja keja. Unká na penaje kalé inajlo iná chinuma mataꞌakana; Tupana wakáraꞌaka ke laꞌakana aú iná laꞌá palá. Ilé ke nuwakáraꞌaka piyuke Jesucristo waꞌatéjena awakaño apú ewá, apú ewá ke. Numá najló, nayuríkoloje nakeñoꞌojika raꞌapiyá jemaꞌakana wakajé keja.

21 Ajopana waꞌaté jápajeri kaꞌajná piꞌimaká, Tupana aꞌaká piꞌimaká rijwaꞌatéjewa penaje wakajé. Piweꞌepíniña khaí pinakuwá raú. Nawátajika ee páchoꞌotakana richiyá, páchoꞌoja richiyá.

22 Tupana aꞌaká inakiyana rijwaꞌatéjenawa penaje wakajé, ajopana waꞌaté jápajeño kaja iꞌimaká. Eyá meꞌetení jáchoꞌotakejanami ke iká, ijápakaloje wawakáraꞌajeri wani waꞌaté penaje. Riwakajé neꞌiyajena jápakeño ijló. Eyá meꞌetení iká Jesucristo waꞌaté jápajeño keja.

23 Tupana palamane rileꞌejena weká, Jesucristo warúwaꞌakale weꞌemaká, ritakaꞌaká wachaya iꞌimaká wakajé. Ñakele ilaꞌaniña inakuwá ajopana leꞌejena ke.

24 Tupana aꞌarí iká rijwaꞌatéjenawa penaje, ajopana inaꞌukena eꞌiyayá iꞌimaká. Ñakele, nojena, ñakeja iyuró.

25 Chuwa numá piño iwakajina iꞌimakaño nakú. Unká Tupana wakáraꞌala meke nanaku kemakana. Jesucristo weꞌepíkale numuꞌují, ripechu watánaꞌari nunakojé meꞌetení.

26 Raú numá marí ke meꞌetení: Nuweꞌepí palani inajlo unkachu iná wáꞌakalo, chapú kaje eꞌiyowá weꞌemakale meꞌetení.

27 Kaluri piꞌimajika ee, kaja keja piyuró rujwaꞌaté; eyá iwakají piꞌimajika ee, kaja keja piꞌimá iwakají. Pikulániña inanaru piyajálowa penaje.

28 Piwáꞌakajiko ee, unká pilaꞌalaje puꞌuwaré raú. Eꞌiyonaja wáꞌakajeño amájeño chapú kaje yajwé, jápakaje yajwé waꞌató, chapú kaje eꞌiyowá weꞌemakale meꞌetení. Unká nuwátala amaka chapú kaje yajwé, ñakele numá ijló iwáꞌakako piyá.

29 Nojena, numá ijló ilé ke, wejápaja weꞌechú iꞌimakale watukumó wajló, walaꞌakáloje wajápakaꞌala Tupánajlo penaje. Raú numá wáꞌakajeñojlo, najápakaloje palá Tupánajlo, unká japi nayajalo iꞌimalá ke.

30 Iyakaje nakú iꞌimakaño meꞌetenijlo numá: Unká weꞌechú kaꞌalá iꞌimalá ijló, iyakáloje penaje. Eyá meꞌetení iꞌichakaje nakú iꞌimakáñojlo numá: Unká weꞌechú kaꞌalá iꞌimalá ijló, iꞌichakáloje penaje. Iꞌimá waꞌajrí péchuruna keja, aꞌakáloje inakojó Tupana wátaka ke laꞌakana. Nakaje warúwaꞌajeño najlúwajlo numá: Iꞌijnatániño ipéchuwa nakaje, iwarúwaꞌakaloje nakú. Aꞌá inakojó nakaje Tupana wátaka ke laꞌakana.

31 Piyuke marí ejaꞌawá weꞌemakare chu meꞌetení kapichájiko. Ñakele iꞌijnatániña kajrú ipéchuwa nakaje richu iꞌimakare nakú, iweꞌepíkaloje Tupana wátaka ke laꞌakana itukumó.

32 Unká nuwátala aꞌaká inakojó kajrú wani nakaje. Tupana jaꞌapiyá jemaꞌajeño, unká joꞌó luna iꞌimalárena, laꞌañó nakaje, riꞌimakáloje palá Tupana nakú, nawátakale riwátaka ke laꞌakana.

33 Eyá achiñá kaluri iꞌijnatari ripéchuwa marí ejaꞌawá chu iꞌimakana nakú, riwátakale nakaje laꞌakana, riꞌimakáloje palá riyajálojlo penaje.

34 Ñaké kaja inaánajlo riká. Iwakajilo iꞌimakayo aꞌayó runakojó palá wawakáraꞌajeri Jesucristo wátaka ke laꞌakana, ruꞌumakáloje Tupánajlo aꞌakéjami ke. Ruká iꞌimayo Tupánajlo aꞌakéjami keja. Eyá inanaru kayajnaru iꞌijnatayo rupéchuwa marí ejaꞌawá chu iꞌimakana nakú, ruwátakale nakaje laꞌakana, riꞌimakáloje palá ruyajná nakú.

35 Numá ijló ilé ke, palá nakaje iꞌimakáloje ijló penaje. Unká nuwátala iwakáraꞌakana mapeja, ilaꞌaká piyá nakaje iwátaka ke. Unká ilé kaje penaje kalé numá ijló; nuwata ilaꞌaká palá. Nuwata kaja aꞌaká ikó Tupánajlo, iweꞌepíkaloje riwátaka ke laꞌakana itukumó, ipechu iꞌimaká piyá apú nakaje nakojé ke, apú nakaje nakojé ke.

36 Unká kaꞌajná iweꞌepila naka palani iyani inaánajlo. Re kaꞌajná eꞌiyajena pechu nakú iyani inaana aꞌakana, nawáꞌakakoloje achiñana waꞌaté penaje. Kaja kaꞌajná naꞌapá inaya kaje chiyá. Ilaꞌá palá iyani waꞌaté. Unká naraꞌapá laꞌalá puꞌuwaré nayani aꞌakana aú, nawáꞌakakoloje penaje.

37 Re kaꞌajná pajluwa pechu: “Unká noꞌolaje nutu apujlo, riwáꞌakakoloje rujwaꞌaté penaje, unká na kalé wakáraꞌari noꞌoká ruká”, ke kaꞌajná ripechu. Ilé ke laꞌakana iꞌimajeri palani kaja rojló.

38 Aꞌarí ritu, apú wáꞌakakoloje rujwaꞌaté penaje, laꞌarí palá. Eyá unká wátala ritu wáꞌakako, laꞌarí kaja palá; ritu aꞌajeri laꞌaká palá, chaje rilaꞌaká palá raú.

39 Inanaru yajná iꞌimajika rujwaꞌaté ketana, unká wáꞌakalajo apú waꞌaté. Ruyajná takaꞌañáajika ruká ejomi, ruwátajika ee, ruwáꞌakojla piño apú Jesucristo jaꞌapiyá jemaꞌajeri waꞌaté.

40 Eꞌiyonaja puꞌují iwakajílomi pechu iꞌimajika, unkájika ee ruwáꞌako piño apú waꞌaté. Ruwáꞌakakelo apú waꞌaté, unká ñaké kalé rupechu iꞌimakajla puꞌují. Nupechu keja numaká ijló ilé ke rinaku, nuweꞌepí re Tupana Pechu noꞌiyá.