Nalamáꞌataka najló akhaꞌákakajo yukuna marí
6
Ilé iꞌimaká e, re purákaꞌaloji lamáꞌatajeño, unká Jesucristo jaꞌapiyá jemaꞌajeño kalé. Eta, ¿naje iꞌijnano nachaje, nalamáꞌatakaloje ijló purákaꞌaloji penaje? Ilé ke laꞌakana unká paala. Tupana leꞌejena inaꞌukena waꞌaté iná lamáꞌata riká.
2-3 Unká kaꞌajná iweꞌepila marí: Akijñojo iká, Jesucristo waꞌatéjena, kemájeño ajopana inaꞌukena nakú mékajenaka neká: puꞌuwaré laꞌajeñó kaꞌajná, palá laꞌajeñó kaꞌajná. Tupana waꞌatéjena, jeꞌechú chiyájena, nakú waꞌató wemaje mékeka nalaꞌakana iꞌimajika. Eta, ¿naje maliyáruna wani iká meꞌetení, ilamáꞌatakaloje pajwaꞌatéchaka purákaꞌaloji, unká puwichani kalé iꞌimakare?
4 Unká naje kalé iꞌijná ajopana inaꞌukena chaje, nalamáꞌatakaloje ijló purákaꞌaloji penaje. Unká Jesucristo jaꞌapiyá jemaꞌajeño kalé neká, ñakele unká naꞌalá nanakojó iká.
5 Ilé ke numaká ijló meꞌetení, nopáñaꞌatakaloje inaku raú penaje. ¿Unká wani chi pajluwaja inakiyana iꞌimalá, weꞌepiri purákaꞌaloji lamáꞌatakana ijló?
6 Chapú inakiyana laꞌaká pekowáaka, waꞌató unká kaja paala ilaꞌaká, iwátakale unká jemaꞌalaño Jesucristo jaꞌapiyá lamáꞌataka ijló purákaꞌaloji.
7 Unká wani paala chapú ilaꞌakare pekowáaka. Iyuríkela inakiyana laꞌaká chapú iká, ilaꞌaká meꞌetení ke, palani riꞌimakajla ijló. Iyuríkela nataꞌaká inane iliyá, ilaꞌaká meꞌetení ke, chaje palani kaja riꞌimakajla ijló.
8 Eyá iká laꞌañó chapú pekowáaka, ejena liyá waꞌató jataꞌakale nakaje.
9 Kaja iweꞌepí, unká laꞌalaño Tupana wátaka ke, unká iꞌimalájeño rijwaꞌaté jeꞌechú chu. Re iꞌimakaño wakáraꞌajeri Tupana. Marí ke laꞌakaño unká iꞌimalájeño rijwaꞌaté jeꞌechú chu, raú ipechu iꞌimaniña nanaku: “Neꞌemajé re rijwaꞌaté”, ke. Namanáicho laꞌajeñó; achiñana pajnoꞌoñó panakuwáaka; eyá inaana pajnoꞌoñó kaja panakuwáaka namanáicho laꞌajé pajwaꞌatéchaka; kajena unká iꞌimalájeño Tupana waꞌaté jeꞌechú chu. Puꞌují péchuruna nakaje jenami nemakare nakú: “Wachiꞌinárikana jenami riká”, ke, unká kaja iꞌimalájeño rijwaꞌaté jeꞌechú chu.
10 Unká kaja marí ke laꞌakaño iꞌimalájeño re: jataꞌakáchina, kanakújeꞌekena, yuwéraꞌajeño, kachapújreꞌekena, kayukújneꞌekena, tejmuji aú jataꞌakaño inaꞌuké liyá nanane; kajena unká kaja iꞌimalájeño Tupana iꞌimaká e. Re iꞌimakaño wakáraꞌajeri riká.
11 Ñaké laꞌajeñó inakiyana iꞌimajika, eyá chuwa Jesucristo palamane aú Tupana lamáꞌatari rijluwa iká, puꞌuwaré ilaꞌakare liyá. Ñakele chuwa unká japi puꞌuwaré laꞌajeñó ke kalé iká Tupánajlo.
12 Apala pajluwa kemá rinakuwá: “Nulaꞌajla nuwátaka ke, unkachu rinaku kemakana iꞌimalá, nulaꞌaká piyá ñaké”. Numá ijló: kewaka rilaꞌajla riwátaka ke, eꞌiyonaja unká paala rijló rilaꞌakana; unká kaja paala ajopánajlo riká. Rejomi unká méñoꞌojo kaꞌajná riyurílajla riliyó ñaké laꞌakana.
13 Marí ke neꞌiyajena kemaká: “Aꞌajnejijlo penaje iná napona; iná napónajlo penaje aꞌajnejí”, ke. Akijñojo unká ñaké kalé wanapona iꞌimajika. Unká walaꞌakáloje wamanáicho ajopana waꞌaté ke penaje kalé wanapona; walaꞌakáloje nakaje palá, Jesucristo wátakare kaje, penaje wanapona.
14 Tupana makápoꞌotaka piño wawakáraꞌajeri Jesucristo iꞌimaká, ke kaja rimakápoꞌotajika weká.
15 Iká pajluwano, pajluwano ke, iꞌimaño Jesucristo waꞌatéjena nakiyana; pajluwa japi keja iká rijwaꞌaté. Jesucristo waꞌatéjeri laꞌakachu rimanáicho inanaru ñujuꞌukeru waꞌaté, riꞌimá runakiyana keja kaja raú. Unká wani paala ilé ke laꞌakana.
16 Apala unká iweꞌepila marí: laꞌarí wapichá waꞌaté, iꞌimari pajluwa japi keja rujwaꞌaté. Marí ke Tupana purákaꞌalo lanaꞌakéjami kemaká pajwaꞌatéchaka wáꞌakajeñomi nakú: “Achiñá, inanaru waꞌaté, iyamá neká, iꞌimaño pajluwa japi keja neká”.
17 Eyá Jesucristo waꞌatéjena iꞌimaño kaja pajluwa japi keja rijwaꞌaté, ripechu chuwá iꞌimakana aú.
18 Ilaꞌaniña wani imanáicho ajopana waꞌaté. Iweꞌepínoja laꞌañó pajwaꞌatéchaka mapeja, unká pajwaꞌatéchaka wáꞌakajeñomi kalé neꞌemakachu, laꞌañó chapú nanapona raú. Apú puꞌuwaré iná laꞌakare chaje, iná laꞌaká chapú iná napona raú.
19 Apala unká wani iweꞌepila Tupana Pechu iꞌimaká eꞌiyá: Ripechu ñakaré keja iná napona rijló, unká ileꞌejé wani kalé inapona.
20 Tupana leꞌejena iká, riwarúwaꞌakale iká iꞌimaká, ñakele ilaꞌá palá Tupana inapona aú.