Pajluwaja nanakiyana laꞌaká rimanáicho yukuna marí
5
Marí ke yuku iphaka majó: “Re pajluwaja nanakiyana jewíñaꞌata rijlápuwa penaje ritoꞌojneru”, ke. Unká paala wani ilé ke laꞌakana. Unká jemaꞌalaño Tupana jaꞌapiyá waꞌató, unká laꞌalá ilé ke puꞌuwaré wani.
2 Ilé ke rilaꞌaká iꞌimaká, eꞌiyonaja ilaꞌá inakuwá, nakaje nakojé weꞌepéjeño ke wani. Palani ipechu iꞌimakajla kamuꞌují, inakiyana laꞌakale rimanáicho. Rikeñoꞌoká rimanáicho laꞌakana rujwaꞌaté iꞌimaká wakajé, palani ikaꞌakajla eꞌiyayó riꞌimaká.
3 Unká nuꞌumalá ijwaꞌaté meꞌetení, eꞌiyonaja nupechu aú nuká ijwaꞌaté, raú ijwaꞌaté pi nuká keja numaká ijló rinaku meꞌetení.
4 Awakájiko ee pajwaꞌatéchaka ilé kaje lamáꞌataje, wawakáraꞌajeri Jesucristo aꞌajeri ijló weꞌepíkaje, iweꞌepíkaloje mékeka ilaꞌajika riká. Nuká iꞌijnatájeri kaja nupéchuwa meke rilaꞌakana nakú ijwaꞌaté.
5 Jiñá Chiꞌinárikanajlo iyureje kele inaꞌuké, rikapichátakaloje rinapona, raú ripechu iꞌimajó kapichákajo liyá Jesucristo iphájika majó wakajé.
6 Ñakele unká naje kalé ilaꞌá inakuwá cháꞌatajeño ke, inakiyana laꞌakale ilé ke. Kaja iweꞌepí mékeka nemaká pan amúraꞌatajona (levadura) nakú: “Wejápaja nakaꞌaká rinakiyana, eꞌiyonaja ramúraꞌata piyukeja pan”. Ñaké kaja inaꞌukejlo riká. Mekeleja puꞌuwaré laꞌajeñó, eꞌiyonaja namata ajopana ñaké laꞌakana aú.
7 Ñaké riꞌimakale, ikaꞌá eꞌiyayó kele rimanáicho laꞌajerí, laꞌarí puꞌuwaré eꞌiyowá. Ilé ke ilaꞌajika ee riká, iká iꞌimajeño pajluwaja chuwá keja, palá laꞌajeñó. Jesucristo takaꞌarí wachaya iꞌimaká; raꞌá rikó inaꞌukejlo, nenókaloje riꞌimaká puꞌuwaré laꞌajeñó chaya.
8 Ñakele chuwa Jesucristo jaꞌapiyá iꞌimakana nakuja weꞌemajé; kewákaje purákaꞌaloji chuwaja weꞌejnataje wekó; weꞌemaniña puꞌuwaré laꞌakaná nakú.
9 Apú purákaꞌaloji, nuwakáraꞌakare ijló iꞌimaká, chu numá ijló, aꞌaká piyá inakojó namanáicho laꞌajeñó.
10 Unká numalá ijló, ilaꞌakáloje ñaké ajopana inaꞌukena, unká jemaꞌalaño Tupana jaꞌapiyá nakú. Neká laꞌañó namanáicho; kanakújeꞌekena kaja neká; piroꞌokéjina kaja neká. Puꞌují napechu nakaje jenami nakú, napechu iꞌimakale rinaku: “Wachiꞌinárikana jenami riká”, ke. Ilé ke iꞌimakaño neká. Unká numalá ijló ilé kajena nakú, ilaꞌakáloje natejena penaje. Unká méñoꞌojo iná laꞌalá natejena; iná jáchoꞌokelo ejaꞌawá nakiyá ee, kaꞌajná iná laꞌajla riká.
11 Apú kaꞌajná kemá rinakuwá: “Jesucristo jaꞌapiyá jemaꞌajeri nuká”, ke, eꞌiyonaja kaꞌajná rilaꞌá rimanáicho. Kanakújeꞌeke kaja riká; puꞌují kaja kaꞌajná ripechu nakaje jenami nakú, nemakare nakú: “Wachiꞌinárikana jenami riká”, ke. Richapújraꞌo kaꞌajná; riyuwéraꞌo kaꞌajná; jataꞌakachi kaꞌajná riká; kayukújneꞌeke kaꞌajná riká. Ilé ke iꞌimaká riká, eꞌiyonaja rimá rinakuwá: “Jesucristo jaꞌapiyá jemaꞌajeri nuká”, ke. Ilé ke iꞌimakaño numá nakú ijló: aꞌaká piyá inakojó neká; ajñániña kaja aꞌajnewá najwaꞌaté.
12-13 Unká numalaje inaꞌuké nakú mékeka nalaꞌakana iꞌimajika, puꞌuwaré nalaꞌakare pachá, unkachu Jesucristo jaꞌapiyá jemaꞌajeño kalé neꞌemaká. Tupana kemájeri nanaku mékeka nalaꞌakana. Eyá Jesucristo waꞌatéjena, ijwaꞌaté iꞌimakaño, nakuja kalé numaje mékeka nawajákana iꞌimajika, puꞌuwaré nalaꞌakare pachá. Ñakele ikaꞌá ilé puꞌuwaré laꞌajerí eꞌiyayó.