Jesucristo wakáraꞌakarena jápakaꞌala yukuna marí
4
Tupana wakáraꞌari weꞌemaká, wewíñaꞌatakaloje inaꞌuké Ripurákaꞌalo nakú. Puꞌuwaká rilaꞌaká riyukuna wajló, meꞌechuje riꞌimaká ajopánajlo iꞌimaká. Jesucristo waꞌaté jápajeño keja iweꞌepí wanaku.
2 Iná wakáraꞌajeri wakáraꞌakachu iná laꞌaká nakaje, riwata iná laꞌaká riká rimaká ke.
3 Iká kaꞌajná aꞌañó inakojó nuká, imakáloje nunaku mékeka nowíñaꞌataka inaꞌuké. Jesucristo wakáraꞌakarena riyukuna iꞌimajé nakiyana nuká; riká kemájeri kaja nunaku mékeka rijló nakaje nowíñaꞌatakare ripurákaꞌalo nakú. Ñakele unká na penaje kalé nojló mékeka inaꞌuké kemaká nunaku, inaꞌukeja neꞌemakale, unká Tupana kalé neká. Unká kaja numalá nunakuwá mékajeka nuká.
4 Meꞌetení unká nuweꞌepila naka nulaꞌaká apoꞌojó. Nakaje numakare nakú aú, unká iná weꞌepila kewákaka riká. Rikaja kalé, wawakáraꞌajeri wani Jesucristo, weꞌepiri mékeka rijló nakaje nulaꞌakare; rikaja kalé kemárijla nunaku: “Marí ke laꞌajerí riká”.
5 Unká paala imaká inaꞌuké nakú mékajenaka neká Tupánajlo, unká joꞌó riphálale rená chojé ilé ke kemakana nakú. Wawakáraꞌajeri Jesucristo wátakana nakuja iꞌimá, riphájika majó ejená. Iná ñaꞌaká nakaje meꞌechú iꞌimaká mejámaꞌatani chojé, iná amákaloje riká palá, ke kaja wawakáraꞌajeri wani laꞌajika weká puꞌuwaká, iná weꞌepíkaloje mékeka rijló nakaje walaꞌakare penaje. Ke rilaꞌajika weká riphájika majó wakajé. Raꞌajé puꞌuwaká nakaje inaꞌuké pechu nakú iꞌimakare meꞌechú. Nakaje iná wátakare laꞌakaná nakojé, riweꞌepí kaja. Riphájika majó wakajé, Tupana kemaje wanaku pajluwano, pajluwano ke, mékeka rijló nakaje walaꞌakare iꞌimaká. Palá iná laꞌakare lokoꞌopáneje, rimaje iná nakú palá.
6 Nojena, numá ijló ilé ke, iweꞌepíkaloje raú Apolos, eyá nuká, kele nakojé, ipechu iꞌimaká piyá apoꞌojó wanaku, iꞌijnatákaloje ipéchuwa Tupana purákaꞌalo kemaká nakuja. Meꞌetení puꞌují ipechu inaꞌuké nakiyana nakú, nalanakiya ujwí ipechu ajopana nakú. Ilé ke ilaꞌaká ikó cháꞌatajeño ke pajwaꞌatéchaka, raú unká ilaꞌalá Ripurákaꞌalo kemaká ke.
7 Unká naje ilaꞌalá inakuwá ajopana inaꞌukena cháꞌatajeño ke; Tupana palamane aú iweꞌepí nakaje, iweꞌepíkare nakojé meꞌetení. Nakaje, Tupana aꞌakare ijló aú, ilaꞌá ikó cháꞌatajeño ke. Ikoja japi iweꞌepika riká, ke ilaꞌaká inakuwá raú. Unká wani paala ilaꞌaká raú.
8 Kaja ilaꞌá inakuwá, kajrú nakaje iꞌimakare kapi ke. Ipechu iꞌimá inakuwá meꞌetení: “Re wakapi nakaje wawátakare kaje”, ke. Iweꞌepí kaja inakuwá: “Ajopana wakáraꞌajeño weká”, ke. Nakojé unká iweꞌepila weká, wewíñaꞌatakaloje iká re joꞌó kaja Tupana purákaꞌalo nakú penaje. Palani riꞌimakajla ijló, kewaka iꞌimakela ajopana wakáraꞌajeño ke, wawakáraꞌakaloje kaja neká ijwaꞌaté penaje.
9 Jesucristo wakáraꞌakarena nakiyana weká. Tupana aꞌarí weꞌemaká, weꞌemakáloje kaꞌajná ajopánajlo nawejáputenami ke. Unká inaꞌukélaruna, nenókarenano ajopana jimaje, keja weká meꞌetení marí ejaꞌawá chu. Piyuke ajopana inaꞌukena jimaje ke weká, nayakáꞌakoloje wachaje. Nawejáputenami ke najló weká, ñaké kaja kaꞌajná Tupana waꞌatéjena, jeꞌechú chiyájenajlo weká.
10 Neꞌiyajena weꞌepiño wanaku: “Mapechúruna japi neká”, ke, walaꞌakale Jesucristo wátaka ke. Eyá iká weꞌepiño inakuwá: “Piyukeja nakaje nakojé weꞌepíkaño”, ke. “¡Unká weꞌepílaño na nakojé!”, ke iweꞌepika wanaku. Eyá inakuwá iweꞌepí kaphí péchuruna, ke. Palá ipechu inakuwá, eyá wanaku ujwí ipechu.
11 Meꞌetení weká meꞌepijí ñaꞌakana nakú panaku; unká kaja iꞌirakaje kaje iꞌimalá wajló; kamuꞌují walaꞌaká aꞌarumakaji nakú; kajrú ajopana ñaꞌataka weká; mapeja iꞌimakaño, unká ñakaré iꞌimalaño, ke weká marí ejaꞌawá nakú.
12 Kajrú wajápaka wayátheꞌela aú. Kajrú napuraꞌakó wanaku puꞌuwaré, eꞌiyonaja wapuraꞌó nanaku Tupana waꞌaté, rilaꞌakáloje neká palá penaje. Chapú nalaꞌaká weká, eꞌiyonaja unká wapiyákala neká ñaké kaja, wajñaꞌaja panaku riká.
13 Chapú napuraꞌakó wanaku, eꞌiyonaja wapuraꞌó najwaꞌaté palá, napechu palaꞌakóloje wajwaꞌaté raú. Nakaje kupákejami keja weká najló; inaꞌuké wejáputenami ke weká najló, ilé keja napechu wanaku maárejecha.
14 Unká nopáñaꞌatakaloje inaku penaje kalé nulanaꞌá ijló marí ke; nulaꞌakáloje jenakú nupurákaꞌalo aú penaje nulanaꞌá ijló. Íkiꞌija iná wátaka iná yaní, ke kaja nuwátaka iká.
15 Iná jaraꞌapá iꞌimaká iná waꞌaté, ke kaja nuká ijwaꞌaté. Tupana iꞌimataka iná kapichákajo liyá yukuna nuꞌumá ijló iꞌimaká, raú ipechu iꞌimá kaphí Jesucristo chojé iꞌimatájeri penaje.
16 Ñaké iꞌimakale, numá mawó ijló: Ilaꞌá nomátaka iꞌimaká ke.
17 Raú kaja nuwakáraꞌa Timoteo iꞌijnaká ichaje. Palá nupechu rinaku; pajluwaja chuwá péchuri riká. Rimaká nakaje nakú ke rilaꞌakano. Riká kemájeri ijló na nakuka nowíñaꞌataka Jesucristo jaꞌapiyá jemaꞌajeño noꞌopaka ewá.
18 Inakiyana laꞌañó ipéchuwa kaphí, ipechu iꞌimakale nunaku: “Unká japi riꞌijnalaje majó”, ke.
19 Tupana wátajika ee, meketana iꞌimajemi nuꞌujnajé ichaje kaꞌajnó. Rejéchami nomájika mékajenaka inakiyana laꞌaká nanakuwá nakaje nakojé, weꞌepéjeño ke wani. Kajrú napuraꞌakó nanuma chiyá, eꞌiyonaja nakaje nalaꞌakare aú nuweꞌepeje mékajenaka neká.
20 Tupana pechu jaꞌapiyá iꞌimakana palamane aú iná laꞌajla riwakáraꞌaka ke. Palá neꞌiyajena iꞌimaká riyukuna ajopánajlo, eꞌiyonaja unká nalaꞌalá rimaká ke.
21 ¿Meke iwátaka nupechu iꞌimaká inaku kaꞌajnó nuphájika wakajé? ¿E iwátaka nuwajaka iká kaꞌajná? ¿E iwátaka khaí nuweꞌepika inaku kaꞌajná?