3
Nojena, nuꞌumaké wakajé ijwaꞌaté, unká nupuraꞌaló ijwaꞌaté iná puraꞌakó Tupana Pechu jaꞌapiyá iꞌimakaño waꞌaté ke. Napechu keja laꞌakaño nakaje waꞌaté iná puraꞌakó, ke nupuraꞌakó ijwaꞌaté iꞌimaká, yuwaná pechu ke péchuruna iꞌimakale Tupana purákaꞌalo weꞌepíkana nakojé.
2 Naló chuꞌuchúreja kerákoꞌopana iꞌirá, unkale naweꞌepila aꞌajnejí ajñakana. Ñaké kaja Tupana purákaꞌalo iꞌimaká ijló, raú nowíñaꞌata iꞌimaká puꞌuwakatani purákaꞌaloji aú. Unká méñoꞌojo nowíñaꞌatala iꞌimaká puwicha nojé kemachi nakú, unkale ipechu iphala rinakojé weꞌepíkana lokópaꞌala. Riwakajé ipechu iꞌimaká, ke kaja ipechu meꞌetení.
3 Ipechu keja laꞌakaño nakaje joꞌó iká, raú ilaꞌá nakaje ijluwa iwátaka ke. Chapú iwó ajopana inaꞌukena cha, nacháꞌatakale iká nakaje nalaꞌakare aú; akhaꞌákakajo nakuja kaja iká pajwaꞌatéchaka. Ilé kaje aú iná weꞌepí ipechu keja joꞌó laꞌakaño iká; unká jemaꞌalaño Tupana jaꞌapiyá iꞌimaká pajwaꞌatéchaka, ke kaja iká.
4 Inakiyana kemaño nanakuwá: “Pablo waꞌatéjena weká”, ke. Eyá ajopana kemaño nanakuwá: “Apolos waꞌatéjena weká”, ke. Ilé ke iphaka paꞌapíchaka pajlokaka, raú iná weꞌepí ipechu keja joꞌó laꞌakaño iká.
5 Unká na kalé nuká Pablo, unká kaja na kalé Apolos, Tupana waꞌaté jápajeñoja kaja weká iyamá. Weká jaꞌapátaño ijló Tupana purákaꞌalo yukuna iꞌimaká, ipechu iꞌimakáloje kaphí Jesucristo chojé raú. Weká iyamá laꞌañó wajápakaꞌala Tupana wakáraꞌaka weká keja.
6 Tupana mená ke iká wajló; reꞌiyá jápajeño ke weká. Nuká ejátari nakaje icha ijí reꞌiyowá; reꞌiyaja kaja Apolos lamáꞌata rina; eyá Tupana tawáꞌatari wajló riká nojátakare.
7 Rejenowaja Tupánajlo nakaje icha ijí ejátajeri, rina lamáꞌatajeri waꞌaté, rimena eꞌiyá jápajeñoja kalé weká. Piyuke laꞌaká Tupana, ritawáꞌatakale piyuke nakaje iná ejátakare.
8 Kajrú walaꞌaká Apolos waꞌaté nakaje ijló iꞌimaká. Nakaje, iná laꞌakare lokoꞌopáneje, Tupana aꞌajeri inajlo iná laꞌakare wemí.
9 Tupana waꞌaté jápajeño weká Apolos waꞌaté; iká iꞌimaño wajló Tupana mená ke; eꞌiyowá walaꞌá wajápakaꞌala, jemaꞌakáloje Tupana jaꞌapiyá penaje.
Iká iꞌimaño kaja pají ke Tupana laꞌakare.
10 Ripalamane aú nuꞌumá Jesucristo yukuna; palá nuꞌumaká riyukuna inaꞌukejlo. Nuꞌumá kaja ijló riyukuna, raú kalé iyurí ichó rijló, riꞌimatákaloje iká kapichákajo liyá. Ilé ke ikeñoꞌoká raꞌapiyá iꞌimakana, ilaꞌakáloje reyá aꞌajná ñoꞌojó palá raꞌapiyá jemaꞌakana aú. Iweꞌepí pajluwano, pajluwano ke raꞌapiyá jemaꞌakana palá, ilaꞌakáloje raú palá Tupana wátaka ke.
11 Riká aꞌarí Jesucristo inaꞌuké iꞌimatájeri penaje. Unká na apú iꞌimalá najló, neꞌemakáloje ripalamane aú penaje, riká, Tupana aꞌakare inaꞌukejlo neꞌematájeri penájeja kalé, ripenaje.
12 Palá wani neꞌiyajena jewíñaꞌataka inaꞌuké Jesucristo purákaꞌalo nakú. Nakaje iná laꞌakare, oro nakiyá kaꞌajná, sereni nakiyá kaꞌajná, kawemí nojé jipa nakiyá kaꞌajná laꞌakanami, kaje maká ñaꞌakajla panaku jupi wani. Ke kaja nakaje, newíñaꞌatakare nakú neká, iꞌimajika najló jupi, palani wani riꞌimakale. Eyá nakaje mirapewa nakiyá kaꞌajná, jimichi tami nakiyá kaꞌajná, ijijila nakiyá kaꞌajná laꞌakanami, kaje maká, unká ñaꞌalajla panaku júpija. Ke kaja nakaje neꞌiyajena jewíñaꞌatakare nakú, unká iꞌimalaje júpija.
13 Akijñojo Jesucristo kemaje piyukeja Ripurákaꞌalo jewíñaꞌatajeño nakú pajluwano, pajluwano ke nakú, mékeka rijló nakaje newíñaꞌatakare nakú iꞌimaká: palani kaꞌajná, unká paala kaꞌajná. Riwakajé raꞌajé puꞌuwaká nakaje walaꞌakare weꞌemaká marí ejaꞌawá chu ketana. Mékeka waꞌaká wanakojó Tupana purákaꞌalo nakú, rimaje kaja wajló. Mapeja nakaje walaꞌakare wapechu keja, unká na penaje iꞌimalaje rijló. Palá nakaje walaꞌakare raꞌapiyá ke, iꞌimajeri palani rijló.
14 Tupana kemájeri nakaje iná laꞌakare Ripechu jaꞌapiyá ke, iꞌimajeri palani rijló, raú raꞌajé inajlo palá iná laꞌakare wemí.
15 Iná pechu keja iná laꞌakare, unká wemí iꞌimalaje inajlo. Iná kaꞌaká nakaje keraꞌathani chojé, ke kaja nakaje iná laꞌakare wemí kapichájiko raú, eꞌiyonaja kalé iná ikoja unká kapichálajo. Iná iꞌimakó keraꞌathani chiyá, ke kaja iná iꞌimajiko kapichákajo liyá.
16 Apala unká iweꞌepila Tupana ñakaré ke iká, Tupana Pechu iꞌimakale eꞌiyá.
17 Apala apú kaꞌajná jewíñaꞌataje iká apoꞌojó, unká Tupana purákaꞌalo chuwá kalé, raú rapichátaje kaꞌajná ipechu Tupana liyá. Ilé ke rewíñaꞌatajika iká pachá, Tupana wajaje riká, riñakaré keja iꞌimakale rijló.
18 Ipechu iꞌimaniña inakuwá: “Kajrú nakaje, marí ejaꞌawá chu iꞌimakare, nakojé weꞌepéjeño weká”, ke. Tupana Pechu jaꞌapiyá iꞌimakana aú, iꞌimajé wani kajrú nakojé weꞌepéjeño.
19 Marí ejaꞌawá chu nemá neꞌiyajena nakú: “Kajrú weꞌepíkaño neká”, ke. Nakaje, nanakiyana weꞌepíkare nakojé, nakú Tupana kemari: “Mapechúruna leꞌejé weꞌepíkaje aú, unká neꞌemalaje palá”, ke.
20 Ripurákaꞌalo kemari kaja: “Neꞌiyajena kemaño nanakuwá: ‘Weꞌepiño wani weká’, ke. Tupánajlo unká na penaje kalé nakaje naweꞌepíkare nakojé”.
21-22 Ñakele iweꞌepíniña inakuwá: “Kajrú weꞌepíkaño weká”, ke. Eꞌiyajena kemaño nanakuwá: “Pablo waꞌatéjena weká”, ke; eyá ajopana inakiyana kemaño kaja nanakuwá: “Apolos waꞌatéjena weká”, ke; eyá ajopana kemaño kaja nanakuwá: “Pedro waꞌatéjena weká”, ke. Ilé kaje aú ilaꞌá ikó cháꞌatajeño ke pajlokaka. Nuká Pablo, eyá Apolos, eyá Pedro, kele laꞌañó nakaje ijlojé penaje. Tupana keñoꞌótari marí ejaꞌawá ijló penaje iꞌimaká; re kaja kajmuchaji ijló penaje; re kaja takaꞌakaje ijló penaje. Nakaje, ejaꞌawá chu iꞌimakare meꞌetení, aꞌajná ñoꞌojó chami iꞌimajíkare waꞌató, piyukeja iꞌimakáloje palá ijló penaje.
23 Walaꞌakáloje Jesucristo wátaka ke penaje weká, Jesucristo laꞌaká Tupana wátaka iꞌimaká ke kaja.