2
Nojena, nuphaka wani inaku iꞌimaká wakajé, puꞌuwaká nuꞌumaká ijló Tupana yukuna iꞌimaká; unká nupuraꞌaló ijwaꞌaté kajrú weꞌepika purákaꞌalo ke. Puꞌuwakatani chuwaja nuꞌumaké riyukuna ijló.
2 Riwakajé unká nuwátala apú nakojé, apú nakojé ke, weꞌepíkana. Jesucristo yukuna iꞌimakánaja nuwátake weꞌepíkana nutukumó, nuwátakale iweꞌepika wani palá ritakaꞌaká inaꞌuké chaya aꞌawaná apiyákakanami nakojé iꞌimaká nakojé.
3 Nuphaka wani inaku iꞌimaká wakajé, unká kaphí kalé nupechu iꞌimaká nujluwa; keroꞌokajo nakuja nuꞌumaká.
4 Nuꞌumá Tupana purákaꞌalo yukuna ijló, riyukúnaja kalé nuꞌumá ijló iꞌimaká. Unká ipechu iꞌimalá nunaku iꞌimaká: “Kapechuni wani riká”, ke, unkale nuꞌumalá ijló riyukuna kapechúruna purákaꞌalo aú. Tupana weꞌepiri inaꞌuké eꞌiyajé kaꞌátakana Ripechu aú, nemaꞌakáloje raꞌapiyá penaje. Raú nuwata Ripéchuja kaꞌátaka eꞌiyajé iꞌimaká.
5 Ilé ke nuꞌumaká Ripurákaꞌalo yukuna ijló iꞌimaká, iꞌijnataka piyá ipéchuwa nunaku: “Kajrú péchuri riká”, ke. Nuwata ipechu iꞌimaká kaphí Tupana chojé, rikaja kalé weꞌepiri piyukeja nakaje laꞌakana.
Tupana Pechu aú iná weꞌepika Tupana nakojé yukuna marí
6 Re inaꞌukena, kaphí péchuruna Jesucristo chojé, ñakele nalaꞌá nakaje kewákaje purákaꞌaloji kemaká ke. Najloja kalé kaweꞌepíkanami wapurákaꞌalo. Unká nakaje ajopana inaꞌukena, marí ejaꞌawá chu iꞌimakaño, weꞌepika ke kalé riká. Unká kaja marí ejaꞌawá chu iꞌimakaño wakáraꞌajeño weꞌepika nakaje ke kalé riká. Kapichájero piyukeja nakaje naweꞌepíkare nakojé marí ejaꞌawá chu.
7 Eyá weká puraꞌañó nakaje Tupánaja kalé weꞌepíkare nakojé, unká kapichákajo penaje kalé riꞌimajika. Júpimi meꞌechuje riyukuna iꞌimaká inaꞌuké liyá iꞌimaká, ñakele unká naweꞌepila mékeka rilaꞌajika neká palá Jesucristo palamane aú. Raú riꞌimatá inaꞌuké kapichákajo liyá, neꞌemakáloje matajnako jeꞌechú chu. Unká chiyó rikeñoꞌota ejaꞌawá iꞌimaká, kaja re ripechu nakú ilé ke laꞌakana iꞌimá.
8 Unká kaja marí ejaꞌawá chu wakáraꞌajeño nakiyana weꞌepila na inaꞌukeka Jesucristo iꞌimaká. Naweꞌepíkela rinakojé iꞌimaká, unká nawakáraꞌalajla rinókana iphakeja aꞌawaná apiyákakanami nakojé iꞌimaká. Wawakáraꞌajeri wani riká; palájneꞌeke wani riká.
9 Tupana purákaꞌalo lanaꞌakéjami kemari:
“Tupana lamáꞌatari kajrú nakaje íkiꞌija riwátakarena pe.
Nakaje, unká joꞌó na amálare, rilamáꞌata napé.
Unká na kemalajla inajlo rinaku naka riká.
Unká kaja iná pechu iphálajla riweꞌepíkana lokópaꞌala”, ke rimaká.
10 Tupana Pechu aꞌarí wajló puꞌuwaká riyukuna, raú waweꞌepíkaloje rinakojé. Ripechu iꞌimari wajló nakaje meꞌechuje iꞌimakare wajló yukuna, raú raꞌá wapechu nakojé riká, riꞌimakáloje puꞌuwakaje wajló.
11 Iná pechu aú iná weꞌepí palá iná ikó nakojé. Ñaké kaja Tupana Pechu weꞌepika Tupana nakojé palá.
12 Unká wapechu iꞌimalá, unká jemaꞌalaño Tupana jaꞌapiyá pechu ke kaja. Riwakáraꞌa Ripechu wapechu eꞌiyajé, waweꞌepíkaloje rinakojé raú; raú kaja waweꞌepí rilaꞌaká weká palá wani ripalamane aú.
13 Unká inaꞌuké jewíñaꞌatala weká riyukuna iꞌimakana nakú; Tupana Pechu jewíñaꞌataka ke weká rinaku weꞌemaká riyukuna inaꞌukejlo.
14 Eyá unká Tupana Pechu iꞌimalárena eꞌiyá, unká kaja wátalaño rinakojé weꞌepíkana. Mapechúrujlo iná iꞌimaká yuku, keja kaja najló nakaje Ripechu kemakare nakú wajló. Unká méñoꞌojo riphala napechu nakojé, unkale napechu iꞌimalá ripechu jaꞌapiyá.
15 Weká, Tupana Pechu iꞌimakárena eꞌiyá, weꞌepiño nakaje Ripechu kemakare nakú wajló nakojé. Eyá unká jemaꞌalaño raꞌapiyá, unká kaja weꞌepila mékajenaka weká, nemá wanaku: “Mapechúruna ta neká”, ke.
16 Tupana purákaꞌalo lanaꞌakéjami kemari: “Unká na weꞌepílajla mékeka Tupana pechu nakú nakaje; unká kaja na kalé laꞌarijla renakú”, ke. Eyá wajló, unká ñaké kalé riká, Jesucristo pechu aú waweꞌepíkale mékeka Tupana pechu nakú nakaje nakojé.