1 CORINTIOS
Marí ke Pablo keñoꞌoká najló lanaꞌakana
1
1-2 Tupana iꞌiwapari nuꞌumaká, nuꞌumakáloje Jesucristo jaꞌapiyatéjena nakiyana penaje, rejomi nuꞌujnakáloje riyukuna iꞌimajé ajopánajlo, ajopánajlo ke.
Kaja keja Tupana wátaka nuꞌumaká. Wanakiyana Sóstenes waꞌaté wajalaka iká. Wawakáraꞌa iká piyukeja Jesucristo jaꞌapiyá jemaꞌajeño, pajimila Corinto e iꞌimakáñojlo, marí purákaꞌaloji. Jesucristo palamane aú Tupana leꞌejena waja weká, ajopana wapechu ke péchuruna waꞌaté.
3 Nuwata waraꞌapá Tupana, eyá wawakáraꞌajeri Jesucristo waꞌaté, laꞌaká ipechu palá; nuwata kaja nalaꞌaká ipechu palá, ikawílaꞌako piyá nakaje nakú.
Palá wani Jesucristo laꞌaká weká yukuna marí
4 Tupana waꞌaté nupuraꞌakó kewá, nuꞌumakano rijló palá rilaꞌakare iká yukuna. Jesucristo palamane iꞌimakale, Tupana laꞌarí inaku palá wani.
5 Rijwaꞌatéjena iꞌimakale, kaja iweꞌepí kewákaje purákaꞌaloji nakojé, raú ipuraꞌó kaja rinaku palá.
6 Kaja iweꞌepí Jesucristo purákaꞌalo nuꞌumakare ijló yukuna nakojé.
7 Ñakele chuwa unká na nakú kalé ilaꞌá kamuꞌují, iweꞌepíkale Tupana palamane iká. Ñakeja riꞌimajika ijló, aꞌajná Jesucristo paꞌajiko piño majó ejená, riká wátakana nakú iká.
8 Tupana laꞌajé ipechu kaphí, riphájika majó ejená, raú ripaꞌajiko majó wakajé, unká na kemalaje inaku: “Puꞌuwaré laꞌajeñó neká”, ke.
9 Pajluwaja chuwá péchuri Tupana; rimaká ke rilaꞌaká nakaje. Raꞌá iká, iꞌimakáloje Riꞌirí, wawakáraꞌajeri Jesucristo waꞌatéjena penaje.
Unká pajluwaja chuwá kalé Jesucristo waꞌatéjena pechu iꞌimaká rewá, yukuna marí
10 Nojena, wawakáraꞌajeri Jesucristo purákaꞌalo aú numá ijló, iꞌimakáloje pajluwa japi keja pajwaꞌatéchaka. Iweꞌepíniña ajopana ke panakuwáaka, raú nakaje iꞌijnatákare nakú ipéchuwa, iꞌimakáloje pajluwa japi keja ijló. Ilé keja iꞌimajika ee, nakaje iꞌijnatákare nakú ipéchuwa, iꞌimajé kaja pajluwaja chuwá ijló. Ñaké kaja nakaje, iꞌijnatájikare nakú ipéchuwa itukumó, iꞌimajika pajluwaja keja.
11 Nojena, numá ijló Cloé ejena kemaño nojló inaku: “Akhaꞌákakajo nakuja neká pajwaꞌatéchaka”, ke
12 Inakiyana kemaño nanakuwá: “Pablo waꞌatéjena weká”, ke. Eyá ajopana kemaño nanakuwá: “Apolos waꞌatéjena weká”, ke. Eyá ajopana kemaño kaja nanakuwá: “Pedro waꞌatéjena weká”, ke. Ajopana kemaño kaja nanakuwá: “Jesucristo waꞌatéjena weká”, ke.
13 Unká ajopana jaꞌapiyá, ajopana jaꞌapiyá ke, iꞌimakaño kalé weká, Jesucristo jaꞌapiyá jemaꞌajeño weꞌemakale. Unká nuká Pablo kalé takaꞌarí ichaya aꞌawaná apiyákakanami nakojé iꞌimaká; unká kaja nupurákaꞌalo aú kalé nalaꞌá bautizar iká;
14 unká kaja nulaꞌalá bautizar iꞌimaká. Palani nojló riꞌimaká, unkale nulaꞌalá bautizar iꞌimaká. Crispo, eyá Gayo, keleja kalé nulaꞌá bautizar iꞌimaká.
15 Ilé ke riꞌimakale, unká na kemalajla rinakuwá: “Pablo purákaꞌalo aú bautizado nuká”, ke.
16 Re mekeleja nulaꞌakárena bautizar iꞌimaká, marí kele neká: Estéfanas, riyajalo, riyani, keleja kaꞌajná. Unká nuweꞌepila palá e kaꞌajná nulaꞌaká bautizar ajopana, unká kaꞌajná.
17 Unká Jesucristo wakáraꞌala nulaꞌaká bautizar inaꞌuké; riwakáraꞌa nuꞌumaká najló Tupana iꞌimataka inaꞌuké kapichákajo liyá yukuna. Jesucristo takaꞌarí aꞌawaná apiyákakanami nakojé wachaya iꞌimaká aú, riꞌimatá raꞌapiyá jemaꞌajeño kapichákajo liyá. Riká yukuna nuꞌumaká ijló wakajé, nuwata ipechu iꞌimaká rinákuja. Ñakele unká nupuraꞌaló palá wani, ajopana kajrú weꞌepíkaño puraꞌakó ke.
Kapechuni wani Tupana. Riyukuna marí
18 Aꞌawaná apiyákakanami nakojé Jesucristo takaꞌarí inaꞌuké chaya iꞌimaká. Kapichájeño Tupana liyá penájena pechu rinaku: “Mapechúrunajloja kalé riyukuna”, ke. Eyá weká, Tupana iꞌimatákarena kapichákajo liyajlo, palani riyukuna, rimakale Jesucristo palamane aú riꞌimataka weká kapichákajo liyá, ke.
19 Tupana purákaꞌalo lanaꞌakéjami kemari:
“Nopichátaje weꞌepíkaño nanakuwajlo:
‘Kapechúruna wani weká’, kejlo pechu.
Kajrú nakaje naweꞌepíkare nakojé, nulaꞌajé najló mapéjari keja”, ke Tupana kemaká nanaku.
20 Chuwa unká na penaje najló nakaje, kajrú naweꞌepíkare nakojé, iꞌimalá. Unká kaja na penaje nakaje, kajrú newíñaꞌatakare ajopana inaꞌukena nakú, iꞌimalá. Kajrú nakaje napuraꞌakaro nakú, unká kaja na penaje riꞌimalá. Nakaje, ilé kajena weꞌepíkare nakojé marí ejaꞌawá chu, unká kaja na penaje riꞌimalá, Tupana laꞌakale riká mapéjari keja.
21 Weꞌepiri wani Tupana. Inaꞌuké pechu iꞌimakachu kaphí Jesucristo chojé, riꞌimatá neká kapichákajo liyá. Raú ja kalé riꞌimatá neká kapichákajo liyá. Ilé ke riꞌimakale, unká meke laꞌajé iná weꞌepílajla mékajeka Tupana nakaje nakojé iná weꞌepíkare aú. Ñakele riyukuna, weꞌemakare ajopánajlo, ajopánajlo ke, mapéjari keja riká kajrú inaꞌukénajlo.
22 Judíona wátaño Tupana laꞌaká najló nakaje rikaja kalé weꞌepíkare laꞌakana, rená keꞌená penaje, naweꞌepíkaloje riká raú. Eyá griégona wátaño kajrú weꞌepika nakaje nakojé iꞌimaká najló yuku, raú naweꞌepíkaloje kewaka wánika riká penaje.
23 Eyá weká iꞌimaño Jesucristo, nephákare itapuwa aú aꞌawaná apiyákakanami nakojé inaꞌuké chaya iꞌimaká, yukuna. Riyukuna jemaꞌakana aú neꞌiyajena judíona nakiyana kemaño: “Unká wajló penaje kalé riyuró, apáñaꞌakajo wajló riꞌimakale”, eyá ajopánajlo: “Mapechúruna purákaꞌalo”, keja riyukuna.
24 Eꞌiyonaja kajrú Tupana iꞌiwapaká inaꞌukena nakiyana, neꞌemakáloje raꞌapiyá jemaꞌajeño penaje. Napechu nakuja kalé kapechuni wani Tupana, rilaꞌakale palá nanaku Jesucristo palamane aú, ripalamane aú kaja riꞌimatákale neká kapichákajo liyá. Ñaké waja riká judíonajlo, eyá unká judíona kalé iꞌimakáñojlo waꞌató.
25 Ritakaꞌaká aꞌawaná apiyákakanami nakojé iꞌimaká wakajé, neꞌiyajena pechu iꞌimá rinaku: “Meke maliyaru wani riká”, ke, eꞌiyonaja raú kajrú wani Tupana laꞌaká iꞌimaká; unká na iꞌimalá inaꞌuké eꞌiyá laꞌarijla ñaké kaja palá.
26 Nojena, kaja iweꞌepí marí: Tupana iꞌiwapari rijluwa iká ajopana eꞌiyayá, iꞌimakáloje rijwaꞌatéjena penaje. Unká rimalá inaku: “Kajrú naweꞌepíkale nakaje nakojé aú, nuꞌuwapá neká nujluwa”, ke. Mekeleja inakiyana weꞌepiño kajrú nakaje nakojé; mekeleja kaja inakiyana iꞌimaño iwakáraꞌajeño nakiyana; mekeleja kaja inakiyana iꞌimaño iwakáraꞌajeño yaní nakiyana.
27 Inaꞌukena, neꞌiyajena pechu iꞌimakárena nakú: “Wawejáputenami neká”, unká pechu iꞌimalaño neká ke. Kajena Tupana iꞌiwapari rijluwa, rapáñaꞌatakaloje kemaño nanakuwá: “Kajrú weꞌepíkaño weká”, ke, nakú. Eyá nemakárena nakú: “Unká kajrú kalé péchuruna neká”, ke, kajena Tupana iꞌiwapari rijluwa, rapáñaꞌatakaloje kemaño nanakuwá: “Kajrú péchuruna weká”, ke, nakú.
28 Tupana iꞌiwapá rijluwa neká, neꞌiyajena kemakárena nakú: “Mapéjaruna neká”, ke. Unká inaꞌuké iphálarena jaꞌapí nakiyana, eyá napechu iꞌimakárena nakú: “Unká na penájena kalé iꞌimakaño”, kajena riꞌiwapá rijluwa.
29 Ilé ke riꞌimakale, unká na kalé laꞌarijla rikó weꞌepiri ke wani Tupánajlo.
30 Riká aꞌarí iká, iꞌimakáloje Jesucristo waꞌatéjena penaje. Rijwaꞌatéjena weꞌemakale, waweꞌepí ripalamane weꞌemaká. Jesucristo palamane rilamáꞌata rijluwa weká puꞌuwaré walaꞌakare liyá; ripalamane kaja rilaꞌá weká rileꞌejena inaꞌukena penaje, weꞌemakáloje palá laꞌakaná nakuja.
31 Tupana purákaꞌalo lanaꞌakéjami kemaká wanaku kéjaka wajló, riká kemari: “Ipuraꞌaniño inakuwá palá; wawakáraꞌajeri nakuja kalé iná puraꞌó palá, ripalamane weꞌemakale”.