2 Jesús kemari rijló:

3 E Jesús iꞌijnari yenuri Olivos ejo. Re riꞌiwata nakú riyaꞌo Tupana ñakaré ejo pitá nakojó. E Pedro, Santiago, Juan, Andrés, kele iꞌijnaño richaje. Nekámika ke neꞌemaká re, e nemá rijló:

4 —Pimá wajló mékechamika kele pimíchaje nakú wajló iꞌimajika, pimíchaka ke. ¿Na aú chi inaꞌuké weꞌepeje yewicha ejaꞌawá kapichako jená?

5 Rimá najló: “Amá ikó palá wani, ajopana pajlaka piyá ijwaꞌaté.

6 Kajrú wani inaꞌuké iphájika majó nanakuwá kemaje: ‘Tupana wakáraꞌari nuká majó inaꞌuké iꞌimatájeri penaje’, ke. Kajrú wani kaja napajlájika inaꞌuké waꞌaté.

7 Jemaꞌajé kaja kajrú ajopana nókakako pajwaꞌatéchaka yukuna yaꞌajnawa, ñaké kaja awaꞌawa. Ikeroꞌoniño ilé kaje yukuna jemaꞌakana aú. Kaja keja riꞌimajika, eꞌiyonaja unká joꞌó wani ejaꞌawá kapichájiko jená iphálaje riwakajé”.

8 Rimá piño najló: “Ajopana teꞌeré eyájena nókajeño ajopana teꞌeré eyájena waꞌaté; kajrú teꞌerí ñakaꞌajiko apú ewá, apú ewá ke; kajrú kaja inaꞌukena takaꞌajika meꞌepijí nakú. Ilé kaje aú nakeñoꞌojé chapú kaje yajwé ñaꞌakana panaku.

9 Aꞌá inakojó ikó. Nawáꞌaje kaꞌajná iká iwakáraꞌajeño ejo, noꞌopiyá jemaꞌajeño iꞌimakale. Rejo nañaꞌataje iká inaꞌukena awakákaꞌalo ñakarelana chu. Itáraꞌajo kaja iwakáraꞌajeño jimaje, ajopana, ajopana ke jimaje, nakulákatakoloje inaku penaje. Ilé ke nalaꞌajika iká, noꞌopiyá jemaꞌajeño iꞌimakale. Ilé kaje aú palá iꞌimajika nuyukuna najló.

10 Raú marí yuku, Tupana yukuna palani iꞌimakare, jemaꞌajero piyuke inaꞌuké teꞌeré nakuwá, raú naweꞌepíkaloje meke riwátaka inaꞌuké iꞌimatákana kapichákajo liyá nakojé. Ilé ke riꞌimajika wakajé, ejaꞌawá iphaje rená chojé kaja penaje.

11 Nawáꞌajika iká iwakáraꞌajeño ejo wakajé, iwó laꞌaniño mékeka imájika najló piyá, Tupana Pechu kemájikale ijló mékeka imájika najló, riphájikaja rená chojé ijló ee. Unká imalaje najló ipechu keja. Ripechu aú Tupana kemaje ijló mékeka imájika nakaje nakú najló”.

12 Rimá piño najló: “Neꞌiyajena aꞌajeño nejena nakiyana chapú nanaku péchurunajlo, nenókaloje neká penaje. Neꞌiyajena chiꞌiná aꞌajeño nayani nakiyana najló, nenókaloje kaja neká penaje; neꞌiyajena yaní aꞌajeño najló nachiꞌiná, nenókaloje neká penaje, ke neꞌiyajena laꞌajika riwakajé.

13 Kajrú inaꞌukena pechu iꞌimajika inaku chapú, jemaꞌakale noꞌopiyá. Unkájika ee jáchoꞌo noꞌopiyá jemaꞌakana chiyá itakaꞌajika ejená ee, Tupana iꞌimataje iká kapichákajo liyá”.

14 Rimá piño najló: “Tupana purákaꞌalo jaꞌapátajeri Daniel michú lanaꞌarí marí ke iꞌimaká: ‘Amájika ee nakaje kajrupi wani táraꞌako Tupana ñakaré chu wakajé, iká Judea teꞌeré nakú iꞌimakaño ñaajeño ipuré eꞌiyajé’, ke. Riwakajé iweꞌepeje meke kemakánaka riká.

15 Eyá iꞌimajeri kaꞌajná riwakajé riñakaré jiꞌiwata chu, palani riñaakó reyaja. Unká meke laꞌajé riwitúkaꞌalajla rinane ñaꞌajé riñakaré chiyá.

16 Apú kaꞌajná iꞌimajeri riwakajé rimena eꞌiyá. Palani riñaakó reyaja, unkale meke laꞌajé ripaꞌalojla riñakaré ejo raꞌarumaká ñaꞌajé.

17 “Riwakajé chapú wani riꞌimajika kanupana inaana iꞌimajíkañojlo. Ñaké kaja riꞌimajika chapú wani re joꞌó kaja yaní iꞌirakaño chuꞌuchujlo.

18 Ipuraꞌó Tupana waꞌaté, riꞌimaká piyá ñaké ijló yawijá iꞌimajika japi kaꞌajná.

19 Riwakajé kajrú inaꞌukena amájika chapú kaje yajwé. Tupana keñoꞌótaka ejaꞌawá iꞌimaká, eyá maárejecha, unká joꞌó wani namala ñaké chapú kaje yajwé. Unká kaja namálaje ñaké reyá aꞌajná ñoꞌojó.

20 “Meketánaja namájika chapú kaje yajwé. Unkákela Tupana laꞌalajla ñaké, piyukeja inaꞌuké kapichájikojla. Íkiꞌija wani Tupana wátakale inaꞌuké riꞌiwapakárena rijluwa iꞌimaká, raú meketánaja namájika chapú kaje yajwé.

21 Apala nemaje kaꞌajná ijló: ‘Iyakaꞌo aꞌajná ñoꞌojó ke kaꞌajná, ají ñoꞌojó ke kaꞌajná, kele Tupana wakáraꞌakare majó inaꞌuké iꞌimatájeri chaje’. Ilé ke nemájika ee ijló, jemaꞌaniña naꞌapiyá.

22 Kajrú wani nephájika mapeja nanakuwá kemaje: ‘Inaꞌuké iꞌimatájeri nuká’, ke. Apú kaꞌajná kemájeri rinakuwá: ‘Tupana purákaꞌalo jaꞌapátajeri nuká’, ke. Nalaꞌajé kaja kajrú nakaje unká méñoꞌojo ajopana laꞌalare kaje, raú napajlákaloje ijwaꞌaté. Tupana iꞌiwapakárena rijluwa iꞌimaká waꞌaté napajlaje kaja, eꞌiyonaja kalé unká nemaꞌalaje naꞌapiyá.

23 Iweꞌepí marí numakare nakú: Unká chiyó riꞌimá ñaké, numá ijló rinaku”, ke Jesús kemaká najló.

24 Rimá piño najló: “Ilé ke namájika chapú kaje yajwé jaꞌapájika ejomi, unká kamú, eyá keri waꞌaté kamaré amálajo.

25 Iwijrina jaꞌajeño kaja majó jeꞌechú chiyá. Piyukeja nakaje jeꞌechú chu iꞌimakare ñakaꞌajiko.

26 Rejéchami namájika nuphaka majó juni juwákaꞌala eꞌiyowá. Inaꞌuké iꞌimakáloje nupalamane penaje iꞌimaká nuká. Piyuke inaꞌukena wakáraꞌajeri penaje nuphaje majó riwakajé. Kajrú mejámaꞌatani ke iꞌimajika nowaꞌó.

27 Tupana wakáraꞌajeri kaja rijwaꞌatéjena, jeꞌechú chiyájena, majó nawakátakaloje piyukeja nujwaꞌatéjena, nuꞌuwapakárena nujluwa ajopana inaꞌukena eꞌiyayá iꞌimaká. Nawáꞌaje piyukeja neká neꞌemajika ewá”, ke Jesús kemaká najló.

28 Rejomi rewíñaꞌata piño neká marí ke: “Kaja iweꞌepí paijí higuera nakojé. Nemá rinaku: ‘Riꞌiché pitúkaꞌaka ripaná mothoꞌokáloje rinakiyá penaje aú iná weꞌepí yewíchaja jarechí iphaka rená chojé’.

29 Ñaké kaja iweꞌepíjika nupaꞌajiko majó nakojé. Amájika wakajé nakaje iꞌimaká ilé numíchaka ijló rinaku ke aú, iweꞌepeje yewíchaja riphaka rená chojé.

30 Jemaꞌá marí: Unká chiyó inaꞌuké marí ejaꞌawá chu iꞌimakaño tajnó, riꞌimajé ilé numíchaka ijló rinaku ke.

31 Jeꞌechú, ejaꞌawá waꞌaté tajnájero, eyá nupurákaꞌalo unká tajnálajo. Numaká rinaku keja nakaje iꞌimajika.

32 “Unká na weꞌepila na wakajeka riꞌimajika ñaké, na kamú jená jápika. Tupana waꞌatéjena, jeꞌechú chiyájena waꞌató, unká kaja weꞌepila mékechamika riꞌimajika. Nuká, Riꞌirí, unká kaja weꞌepila riká. Rikaja kalé, Noraꞌapá, weꞌepiri mékechamika riꞌimajika.

33 “Ilamáꞌata palá ipéchuwa nupé maare. Ipuraꞌó kaja Tupana waꞌaté, unkale iweꞌepílaje mékechamika nupaꞌajiko piño majó jená.

34 Marí ke riká: Pajluwa kaꞌajná iꞌijnari yaꞌajnaje. Ráchoꞌoko yámona, rimá rijwaꞌaté jápajeñojlo nalaꞌakáloje rijló nakaje yaꞌajná riꞌimaká ketana. Apujlo, apujlo ke rimaká najló, nalaꞌakáloje nakaje riwátakare kaje penaje. Pají waꞌaphejlo rimá, riwátakaloje riká penaje. Rejomi riꞌijná yaꞌajnaje”, ke Jesús kemaká najló.

35 E rimá piño najló: “Ilamáꞌata palá ipéchuwa nupé maare, unkale iweꞌepílaje mékechamika nupaꞌajiko piño majó. Apala nuphaje lapí kaꞌajná, lapí jenaji ke kaꞌajná; kapere apoka ee kaꞌajná; apala lapiyami kaꞌajná nuphaje. Unká na weꞌepila mékechamika nuphájika.

36 Apala manaꞌí chiyó nupaꞌajó piño majó. Unká paala nomaka iká mapeja, unká nuwátakana nakú kalé.

37 Numá ijló: Ilamáꞌata palá ipéchuwa nupé maare. Ñaké waja numaká piyukeja inaꞌukénajlo nalamáꞌatakaloje napéchuwa nupé, nuphájika majó ejená”, ke Jesús kemaká najló.