Chapú wani riꞌimajika amátaño ajopana puꞌuwaré laꞌakanajlo yukuna marí
17
Jesús kemari raꞌapiyatéjenajlo: “Re marí ejaꞌawá chu nakaje unká paala inajlo rilaꞌakana, puꞌuwaré iná laꞌakale raú. Re kaꞌajná neꞌiyajena amátaño noꞌopiyá jemaꞌajeño puꞌuwaré laꞌakaná aú. Chapú wani nakaje iꞌimajika najló ilé ke laꞌakana pachá.
San Lucas 17.1-19
2 Palani nakaꞌakela namátajeño junápeje, kajruni jipa jepoꞌokeja nanúrupi nakú. Palani najló ilé ke nalaꞌakana iꞌimakajla, chapú kaje yajwé namájikare ijlunami chojé”.
Eyá Jesús kemari piño marí ke najló:
3 “Iweꞌepí marí palá: Pijwákeꞌewe laꞌakachu chapú piká, pakhaꞌá riká. Ripajnoꞌotákachu ripéchuwa puꞌuwaré rilaꞌakare liyá, pamó richaje.
4 Apala iyamá kuwáꞌata ke (7) pe kaꞌajná rilaꞌajika piká chapú pajluwa kala japi. Ñaké pe pamájiko richaje. Rilaꞌaká piká chapú kewá kaꞌajná rimájika pijló: ‘Unká nulaꞌalaje piño piká chapú’, ke. Rimájika pijló ke pe pamájiko richaje”, ke Jesús kemaká najló.
Tupana aꞌarí iná ñathé, iná pechu iꞌimakachu kaphí richojé. Riyukuna marí
5 Jesús jaꞌapiyatéjena kemaño rijló:
—Paꞌá wañathé wapechu iꞌimakáloje richaje kaphí Tupana chojé.
6 Raú Jesús kemari najló:
—Kamuꞌujini wani mostaza icha ijí ñani, eꞌiyonaja yenuna wani rina tawáꞌako. Ñaké kaja wejápaja ñani ipechu iꞌimakela kaphí Tupana chojé, imajla marí aꞌawanajlo: “Peroꞌó pikó teꞌerí eꞌiyayá, rejomi panúkaꞌo juni jalomi jakojé”. Raú remaꞌajla jaꞌapiyá —ke rimaká najló.
Pajluwa waꞌaté jápajeri yukuna marí
7 Jesús kemari piño najló: “Re kaꞌajná pajluwa waꞌaté jápajeri iphari rikariwate nakú laínchu. Teꞌerí mojyoꞌokana nakú rijapa, ripirana lamáraꞌakana nakú waꞌaté. Riká iphari laínchu rinaku.
“¿Meke kaꞌajná rikariwate kemájika rijló?: ‘Majó piꞌijná, piyáꞌicho maare, pajñachi paꞌajnewá’. ¿Ke chi rimájika rijló?
8 Unká rimalaje rijló ilé ke. Rimaje rijló: ‘Chuwa pimothoꞌó nojló aꞌajnejí, nojñachi noꞌojnewá. Pilamáꞌata kaja pikó palá. Nojñájika noꞌojnewá ketana, piꞌimajika nowaꞌá paꞌapátakaloje nojló nakaje nuwátajikare. Nujewémiko pajñá paꞌajnewá’, ke rimájika rijló.
9 Unká kaja rimalaje rijwaꞌaté jápajerijlo: ‘Palá piliꞌichaka nuká’, ke, rilaꞌajika kewá riwakáraꞌaka riká ke, rijwaꞌaté jápajeri riꞌimakale.
10 Ñaké kaja ijló riká, ilaꞌakachu Tupana wátaka ke. Imá inakuwá: ‘Mapeja rijwaꞌaté jápajeño weká; riwakáraꞌaka ke laꞌajeñó weká’ ”.
Jesús tejmoꞌótaka iyamá théꞌela kele natámina yukuna marí
11 E kaja Jesús jaꞌapari piño. Riwata Jerusalén ejo iꞌijnakana, raú raꞌapá ají ke iñeꞌepú Samaria teꞌeré eyá, Galilea teꞌeré jiwami chuwá,
12 iphari apú pajimila nakojé. Rejé riphá iyamá théꞌela kele (10) inaꞌukena awaꞌajé. Natámina neꞌemaká, nanapona patákaꞌataro najló. E juká riꞌimanoja nawáꞌaka rijló.
13 Nawíyoꞌoko nemaká rijló:
—Jesús, wewíñaꞌatajeri, piweꞌepí kamuꞌují wanaku.
14 Ramaka aú neká, rimá najló:
—Iꞌijná, iyaꞌatiya ikó sacerdótenajlo.
Raú neꞌejná ají ke rejo. Naꞌapaka rejo nakuja natejmoꞌotó.
15 Eja pajluwaja, Samaria eyaje, weꞌepiri kaja ritejmoꞌotako, raú ripaꞌó rapumí chuwá. Rawíyoꞌoko rimaká Tupana nakú:
—¡Meke palá wani Tupana liꞌichaka nuká!
16 E riphá Jesús nakú. Ritáraꞌo riꞌirúpachi aú rijimaje. Rakúwaꞌata riwílaꞌaru ají ke kawakaje, rimá rijló:
—Palá wani piliꞌichaka nuká.
—Iyamá théꞌela kele inaꞌukena tejmoꞌotíyaño iꞌimichaka. Eta, ¿mere chi ajopana? Paꞌu ke kuwáꞌata kele (9) unká paꞌaláchaño majó.
18 Rikaja kalé pajluwaja piꞌicharo Tupánajlo kemaje: “Palá piliꞌichaka nuká”, ke, ajopana teꞌeré eyaje riꞌimaká eꞌiyonaja.
19 E rimá ritejmoꞌótakarejlo:
—Páchoꞌo, pipaꞌó. Peyajweni piká chuwa, kaphí pipechu iꞌimichákale nochojé —ke rimaká rijló.
Mékechamika Tupana iꞌimajika inaꞌuké wakáraꞌajeri yukuna marí
(Mt 24.23-28, 36-41)
20 E fariséona nakiyana kemaño Jesusjlo:
—¿Mékechami chi Tupana iꞌimajika piyukeja inaꞌukena wakáraꞌajeri?
Jesús kemari najló:
—Inaꞌuké nakiyana wakáraꞌajeri Tupana meꞌetení. Unká puꞌuwaká kalé iná amaka riwakáraꞌaka rijwaꞌatéjena.
San Lucas 17.20-37
21 Unká na kemalajla: “Maare Tupana wakáraꞌa neká”, ke, eyá, “aꞌajnare riwakáraꞌa kaja neká”, ke. Numá ijló: re rijwaꞌatéjena maare eꞌiyowá meꞌetení.
22 E rimá raꞌapiyatéjenajlo:
—Inaꞌuké iꞌimakáloje nupalamane penaje iꞌimaká nuká. Maare nuká meꞌetení ijwaꞌaté. Akijñojo unká nuꞌumalaje ñaké ijwaꞌaté. Riwakajé iwátajejla nomákana, amaka nuká meꞌetení ke, eꞌiyonaja unká amálaje nuká maare ijwaꞌaté.
23 Apala riwakajé neꞌiyajena kemájeño kaꞌajná ijló nunaku: “Maare riká”, ke. Ajopana kaꞌajná kemájeño: “Aꞌajná ñoꞌojó riká”, ke. Iꞌijnaniña rejo ramaje; iꞌijnaniña kaja najwaꞌaté.
24 Pichaní kamaré pataká jeꞌechú chiyá majó, ke kaja amájika nuphaka majó, nuphájika noná chojé wakajé. Inaꞌuké iꞌimakáloje nupalamane penaje iꞌimaká nuká.
25 Paineko nujñaꞌajé chapú kaje yajwé panaku. Inaꞌukena, meꞌetení iꞌimakaño nakiyana, laꞌajeño nuká chapú.
26 Eyá akijñojo nuphájika majó wakajé, Noé michú iꞌimaká wakajé, ke kaja riꞌimajika nupaꞌajiko yámona.
27 “Noé iꞌimaké wakajé Tupana wakáraꞌari kajrú juni jaꞌakó puꞌuwaré laꞌajeñó kapichákoloje rakojé penaje. Unká chiyó kajrú juni jaꞌó, manaꞌija inaꞌuké iꞌimajika naꞌajnewá ajñakana nakú. Nakaje jalá iꞌirakana nakú neꞌemaké; wáꞌakakajo nakú neꞌemaké pajwaꞌatéchaka. Ilé kaje nakú neꞌemaké manaꞌija. E Noé mujlúkaꞌari riwapúrune chojé, ejéchami manaꞌí chiyó, unká iꞌimalaño wapuru chu, kapichako iꞌimaká.
28 Ñaké kaja inaꞌuké laꞌajika Lot michú iꞌimaké wakajé. Najñake naꞌajnewá; neꞌeraké nakaje jalá; nawarúwaꞌake nakaje paliyáaka; nejátake nakaje icha ijí neꞌekakapere eꞌiyá; nalaꞌaké nañakaró. Kaje nakú neꞌemaké. E manaꞌí chiyó nakapichako, unká naweꞌepila nakapichájiko jená iꞌimaká.
29 Lot jáchoꞌoko pajimila Sodoma eyá iꞌimaká wakajé, kajrú keraꞌathani kujrúkaꞌaka majó jeꞌechú chiyá azufre waꞌaté. Kajrú rikujrúkaꞌaka pajimila eyájena cha, raú piyukeja nakapichó iꞌimaká.
30 Ñaké kaja riꞌimajika piño inaꞌukejlo yewicha nuphájika piño majó wakajé. Unká kaja naweꞌepílaje nuphájika majó jená. Inaꞌuké iꞌimakáloje nupalamane penaje iꞌimaká nuká.
31 “Riwakajé kaꞌajná neꞌiyajena iꞌimajeño pají jiꞌiwata chu. Nanane kaꞌajná iꞌimajeri pají chu. Nawitúkaꞌaniña rijñaꞌajé richiyá. Riwakajé kaꞌajná neꞌiyajena iꞌimajeño namena eꞌiyá. Napaꞌaniño piño nañakaré chojé.
32 Iweꞌepí mékeka Lot yajalo micholo kapichako iꞌimaká, ruyakáꞌakole ruyámojo.
33 Ñaké kaja ijló riká meꞌetení. Wátajeri rikó mejñátakana kapichájero nuliyá. Unká weꞌepila khaí rinakuwá riꞌimakáloje nujwaꞌateje penaje iꞌimajeri nujwaꞌateje.
34 “Nuphájika wakajé apala iyamá kaꞌajná kamátajeño pajluwa cama chu. Nujwaꞌatéjena, jeꞌechú chiyájena, wáꞌajeño pajluwaja nanakiyana nujwaꞌateje riꞌimakale. Apú yuréjero, unkale remaꞌalá noꞌopiyá.
35 Riwakajé kaja iyamá inaana kaꞌajná tujlaꞌajeño nakaje pajñakani ritujlaꞌajona chu. Nawáꞌaje pajluwájaruja, nujwaꞌatéjeru ruꞌumakale. Apaꞌawelo yuréjeyo, unkale romaꞌalá noꞌopiyá.
36 Riwakajé kaja iyamá achiñana kaꞌajná iꞌimajeño namena eꞌiyá. Nawáꞌaje pajluwaja nanakiyana, nujwaꞌateje riꞌimakale. Apú yuréjero, unkale remaꞌalá noꞌopiyá —ke rimaká najló.
37 Raú nemá rijló:
—¿Méñoꞌojo chi riꞌimajé ilé pimá nakú?
Raú rimá najló:
—Mérowaka támijimi iꞌimaká ewá, re wayuna awakaño. Ñaké kaja inaꞌuké weꞌepíjika nuphájika piño majó nakojé.