Jesús iꞌimari najló yuku, naweꞌepíkaloje Tupana waꞌatéjena nakojé raú. Riyukuna marí
20
Jesús kemari najló: “Inaꞌuké nakiyana wakáraꞌajeri Tupana. Chuwa nuꞌumajika yuku ijló iweꞌepíkaloje rinakojé: Pajluwaja inaꞌuké iꞌimichari. Kajrú rimena iꞌimichaka. Riká iꞌijichari lapiwá inaꞌuké kulaje, najápakaloje rijló rimena eꞌiyá. 2 Riphátiyaka neká ee, rimicha najló: ‘Iká jápajeño numena eꞌiyá. Noꞌojé ijló pajluwata denario ijápakaꞌala wemí’. E riwakáriꞌicha neká rimena eꞌiyá jápaje. a 3 Rejomi peꞌiyochá kamú jáchoꞌochako ee, ramicha piño ajopana, leꞌejepelaji ñakarelana awaꞌá. Mapeja neꞌemichaka. 4 Nekajlo rimicha kaja: ‘Ijápicha numena eꞌiyá najwaꞌaté, palá noꞌojika ijló ijápakaꞌala wemí’. Raú neꞌejichá kaja jápaje. 5 Kaápuꞌuku riꞌijichá piño inaꞌuké kulaje, amíchari piño ajopana. Ñaké kaja rimíchaka najló. Peꞌiyochá kamú toꞌochako ee, riꞌijichá piño, amíchari piño ajopana. Ñaké kaja rimíchaka najló. 6 E laínchu, las cinco rijiꞌichá piño leꞌejepelaji ñakarelana ejo, amíchari piño ajopana. Mapeja neꞌemichaka. Najló rimicha: ‘¿Naje ikapichata mapeja weꞌechú kaꞌalá?’ Nemicha rijló: 7 ‘Unká na aꞌalá wajló jápakaje’. E rimicha najló: ‘Iꞌijná numena eꞌiyajé, ijápicha nujwaꞌaté’.8 “E kaja najúwiꞌicha, rejéchami paminá kemíchaka rijwaꞌaté jápajeño amájerijlo: ‘Chuwa piwáꞌicha neká majó, paꞌachí najló najápakaꞌala wemí. Kaja penaje iphíchakaño waꞌaté pilamáꞌataje paineko najápakaꞌala wemí. Eyá natukumá iphíchakañojlo paꞌajé kaja penaje najápakaꞌala wemí’, ke rimíchaka rijló. 9 E kaja nephicha jápajemi. Laínchu, las cinco iphíchakañojlo raꞌachá rejenowaja najápakaꞌala wemí: pajluwa kala iná kánaka rejenowaja. 10 Ñaké waja raꞌachaka ajopánajlo, ajopánajlo ke, najápakaꞌala wemí. Raú lapiyami keñoꞌochákaño ajopana tukumá jápakana pechu iꞌimichá: ‘Richaje japi raꞌajika wajló riwemí’, ke. Eꞌiyonaja rejenowaja raꞌachaka najló riwemí. 11 Raú nakhiꞌichá paminá maná. 12 Nemicha rinaku: ‘Kaja penaje iphíchakaño jápichaño pajluwaja kamú jená ketánaja, eꞌiyonaja raꞌachá najló riwemí, raꞌachaka wajló riwemí ejé ke kaja. Weká jápichaño imaꞌáwaka iꞌimichaka, imaꞌaní yajwé wamicha weꞌechú ketana iꞌimichaka’.
13 “Paminá jemiꞌichari mékeka nemíchaka pajlokaka rinaku, raú rimicha pajluwaja nanakiyánajlo: ‘Unká nulaꞌalacha iká chapú. Numicha ijló iꞌimichaka: Noꞌojé ijló pajluwa kala ijápichaje wemí, ke. Palani ijló ñaké iꞌimichaka, raú nujwaꞌaté jápajeño amájeri aꞌachá ijló riwemí ñaké. 14 Chuwa ipaꞌó, raꞌachaje ijló waꞌaté. Rejeja kaja nuwátiyaka riwemí aꞌakana kaja penaje iphíchakañojlo. 15 Nuwátaka ke nulaꞌaká nuliñérute waꞌaté. Unká na kalé awíyoꞌori nojló richá. ¿Chapú chi iwó nuchá, aꞌakachi nuꞌumakale?’, ke paminá kemíchaka”.
16 Ilé ke Jesús iꞌimaká yuku najló. Rejomi rimá najló: “Ñaké kaja Tupana laꞌaká riwátaka ke. Neꞌiyajena kaꞌajná pechu nanakuwá: ‘Ajopana jaꞌapejé Tupana laꞌajika weká palá’, ke. Ilé ke péchuruna nanakuwá rilaꞌajé ajopana chaje palá jeꞌechú chu. Eyá pechu iꞌimaño nanakuwá: ‘Ajopana chaje Tupana laꞌajika weká palá’, ke, nakú rilaꞌajé ajopana jaꞌapejé palá jeꞌechú chu.
Jesús iꞌimaká piño najló ritakaꞌajika yukuna marí
17 Jesús jaꞌapari ají ke Jerusalén ejo. Rapunana chu riwaꞌa raꞌapiyatéjena aꞌajná ñoꞌojó kemachi ajopana liyá. Iyamá iphata jiꞌimaji nakojé (12) kele neꞌemaká, rimá najló: 18-19 “Chuwa weꞌejichaka Jerusalén ejo. Rejo naꞌajé nuká nawakáraꞌajeñojlo. Sacerdótena wakáraꞌajeño, Tupana purákaꞌalo nakú jewíñaꞌatajeño, kélejlo naꞌajé nuká, nenókaloje nuká penaje. Naꞌajé nuká ajopana teꞌeré eyájenajlo; nalaꞌajé namákaja nuká; nañaꞌataje nuká, rejomi nenoje nuká. Eꞌiyonaja weji ke kala iꞌimajemi numakápoꞌojo piño nopumí chuwá. Inaꞌuké iꞌimakáloje nupalamane penaje iꞌimaká nuká”, ke rimaká najló.
Santiago, eyá Juan, kele jaló kejáꞌaka ruyánijlo nakaje Jesús liyá yukuna marí
20 Raꞌapiyatéjena nakiyana iꞌimaño Santiago, eyá Juan, kele. Zebedeo yaní neꞌemaká. Neká jaló iꞌijnayo Jesús awaꞌajé najwaꞌaté. Rutáraꞌo ruꞌurúpachi aú rijimaje rukejáꞌakaloje nakaje riliyá. 21 Rimá rojló:
—¿Na piwata?
Rumá rijló:
—Piꞌimajika inaꞌuké wakáraꞌajeri wakajé, nuwata paꞌaká nuyani pijwákeꞌena penaje, nayáꞌakoloje pawaꞌá. Pajluwaja piyureje yáꞌako pawaꞌá kaꞌañá chojó pitá, eyá apú pajrú chojó pitá.
22 Raú Jesús kemari ruyánijlo:
—Unká iweꞌepila naka kele ikejaꞌa nuliyá. Chapú wani nalaꞌajika nuká. ¿E chi ijñaꞌakajla panaku riká ñaké, nalaꞌakela iká chapú?
—Aꞌa, wajñaꞌakárejla riká panaku.
23 Rimá piño najló:
—Kewaka joꞌó, nalaꞌajé kaja iká chapú, nalaꞌajika nuká ke kaja. Eꞌiyonaja unká nuká kalé aꞌajeri inaꞌuké, nayáꞌakoloje nowaꞌá kaꞌañá ejo pitá kaꞌajná, eyá pajrú ejo pitá kaꞌajná. Tupana aꞌajeri neká, rikaja kalé weꞌepiri mékajenaka yáꞌajeño nowaꞌá.
24 Ajopana, iyamá théꞌela kele (10) raꞌapiyatéjena kaja iꞌimakaño, jemaꞌañó mékeka nemaká rijló. Raú nayúchaꞌo Juan, Santiago waꞌaté, cha. 25 E Jesús kemari najló nawakákoloje rawaꞌajé, rimá najló:
—Kaja iweꞌepí palá ajopana teꞌeré nakiyá wakáraꞌajeño nakojé. Najwaꞌatéjena minaná keja neká najwaꞌaté. Kaphí wani nachaje wakáraꞌajeño wakáraꞌaka najwaꞌatéjena. 26 Eyá ijló, unká ñaké kalé riꞌimajika. Iwata kaꞌajná inakiyana chaje iꞌimakana. Aꞌajeri inakiyana ñathé, cháꞌatajeri iká piyukeja. 27 Iwata kaꞌajná inakiyana chaje iꞌimakana. Laꞌajeri rinakuwá inakiyana waꞌaté jápajeri ke, iꞌimajeri ajopana chaje. 28 Inaꞌuké iꞌimakáloje nupalamane penaje iꞌimaká nuká. Unká nuphala majó inaꞌuké laꞌakáloje nojló nakaje penaje; nulaꞌakáloje najló nakaje penaje nuꞌujná majó. Noꞌojé nokó kajrú inaꞌukena chaya penaje neꞌemakóloje kapichákajo liyá raú —ke rimaká najló.
Jesús jaꞌapátaka mejlukaji iyamá mejluruna liyá yukuna marí
29 Jerusalén ejo Jesús iꞌijnaká wakajé, raꞌapá pajimila Jericó eꞌiyowá. Kajrú wani inaꞌukena iꞌijnaká rápumichu. 30 Aꞌajnare ke iñeꞌepú awaꞌá iyamá mejluruna wani yáꞌaño.
Nemaꞌaká aú nemaká: “Jesús jaꞌapari marí iñeꞌepú chuwá”, ke, nawíyoꞌoko nemaká:
—Wawakáraꞌajeri, David michú lakemi piká. Piweꞌepí wamuꞌují.
31 Raú chaꞌapá re iꞌimakaño nakiyana akhaꞌañó neká, nemá najló:
—Imanúmaꞌo ta.
Eꞌiyonaja richaje wani nawíyoꞌoka:
—Wawakáraꞌajeri, David michú lakemi piká. Piweꞌepí wamuꞌují.
32 Raú Jesús tajnaro rejé. Riwaꞌa najló neꞌejnakáloje rawaꞌajé. Nephaka rinaku ee, rimá najló:
—¿Meke iwátaka nulaꞌaká iká?
33 Nemá rijló:
—Wawakáraꞌajeri, paꞌapata waliyá mejlukaji, wamachi piño.
34 Jesús weꞌepiri namuꞌují, raú rijapa nejlú nakú. Richuwaja mejlukaji jaꞌapaka naliyá, rejéchami palá namaka. E neꞌejná Jesús waꞌaté rápumichu.