Jesús aꞌaká cuatro mil inaꞌukénajlo aꞌajnejí yukuna marí
8
Apú wakajé kajrú wani inaꞌukena awakako piño Jesús nakojé. Eyá unká aꞌajnejí iꞌimalá najló najñákaloje penaje, raú riwaꞌa raꞌapiyatéjenajlo, najló rimá:
San Marcos 8.1-21
2 —Kajrú wani nuweꞌepika mariruna muꞌují. Kaja weji ke kala cha nujwaꞌaté neká, eyá kaja naꞌajné tajnó.
3 Nuwakáraꞌakela napaꞌakó nañakaré ejo meꞌepijí waꞌaté, unká natejmú iphálajla nephákaloje palá penaje. Re neꞌiyajena iꞌijnaño yaꞌajnaya wani majó.
4 Raú raꞌapiyatéjena kemaño rijló:
—Eta, ¿méreya chi wephátajla najló aꞌajnejí maárowa, unká na ñakaré iꞌimalá ewá?
5 Rimá najló:
—¿Mékaꞌala chi pan ikapi maare?
—Iyamá kuwáꞌata kaꞌalaja (7).
6 E riwakáraꞌa nayáꞌako teꞌerí eꞌiyajé. Rejomi rijñaꞌá rikápojo iyamá kuwáꞌata kaꞌalá pan. E ripuraꞌó Tupana waꞌaté rinaku, rimá rijló:
—Palá pilaꞌaká weká marí pan aú.
Rejomi ritupaꞌá rinakiyana, rejomi raꞌá riká raꞌapiyatéjenajlo, natamákaꞌatakaloje riká piyuke inaꞌukejlo penaje.
7 Re kaja naleꞌejé jíñana leꞌepé iꞌimaño mekeleja. Rinaku ripuraꞌó kaja Tupana waꞌaté, rejomi riwakáraꞌa kaja natamákaꞌataka riká najló.
8-9 Piyukeja re iꞌimakaño ajñaka naꞌajnewá palá namanoꞌoká ejená. Cuatro mil ewá kaꞌajná neꞌemaká ajñaño naꞌajnewá re. Rejomi nawakata rijlupemí yuríkaro, iyamá kuwáꞌata kaꞌalá kuwáꞌala chojé puꞌutheno waja.
10 Najñaka naꞌajnewá ejomi, Jesús iꞌimari riyukuno najló. Rejomi riwitúkaꞌa wapuru chojé raꞌapiyatéjena waꞌaté. Reyá neꞌejná ají ke Dalmanuta teꞌeré ejo.
Fariséona wátaka Jesús laꞌaká nakaje Tupánaja kalé laꞌakare yukuna marí
11 E kaja fariséona iphaño Jesús nakú. Nawata rinaku kulákatakano, raú nemá rijló mapeja, rilaꞌakáloje najló nakaje Tupánaja kalé weꞌepíkare laꞌakana rená penaje.
12 Raú rijñaꞌá reꞌiyayó júpija, rimá najló: “¿Naje chi iwata nulaꞌaká ijló nakaje Tupánaja kalé laꞌakare? Unká nulaꞌalaje na ijló noná ke penaje”, ke rimaká.
13 Raú raꞌapáñaa neká, witúkaꞌari piño wapuru chojé rikuwáꞌakaloje kaéja paꞌanajo pitá.
Naꞌaká piyá nanakojó fariséona purákaꞌalo yukuna marí
14 Riwakajé Jesús jaꞌapiyatéjena pechu kapicháñaari naꞌajnewá ñaꞌakana najwaꞌató, raú pajlúwaꞌala ñánija pan iꞌimari nawapúrune chu.
15 E Jesús kemari najló:
—Eko amá ikó palá fariséona leꞌejé pan amúraꞌatajona (levadura) liyá, ñaké kaja Herodes leꞌejé ramúraꞌatajona liyá.
16 Raú raꞌapiyatéjena kemaño pajlokaka nekámika ke:
—¿E jemiꞌichaka mékeka rimaká wajló, unká pachá wajñaꞌalacha wajwaꞌató pan?
17 Riweꞌepí mékeka napuraꞌakó pajwaꞌatéchaka, raú rimá najló:
—¿Naje chi imá: “Unká wajñaꞌalacha wajwaꞌató pan”, ke? ¿Unká joꞌó chi iweꞌepila na inaꞌukeka nuká ijwaꞌaté? ¿Unká joꞌó wani chi riphala ipechu nakojé? ¿Re joꞌó kaja chi ijnú ipechu iweꞌepíkaloje rinakojé?
18 Kejluruna iká, eꞌiyonaja mejluruna ke iká; keꞌejwiruna kaja iká, eꞌiyonaja meꞌejwiruna ke iká.
19 ¿Unká wani chi iweꞌepila nakaje nulaꞌakare iꞌimaká nakojé, nutupaꞌatake wakajé pajluwa théꞌela kaꞌalá pan riphákaloje piyuke cinco mil inaꞌukena nakojé? ¿Mékaꞌala kuwáꞌala imanoꞌotá rijlupemí aú iꞌimaká?
Nemá rijló:
—Iyamá iphata jiꞌimaji nakojé (12) kaꞌalá kuwáꞌala wamanoꞌotá phuꞌuteno waja raú iꞌimaká.
20 Rimá piño najló:
—Apú wakajé nulaꞌá kaja ñaké iꞌimaká. Nutupaꞌatá iyamá kuwáꞌata kaꞌalá pan riphákaloje cuatro mil inaꞌukénajlo iꞌimaká. ¿Mékaꞌala kuwáꞌala imanoꞌotá rijlupemí aú iꞌimaká?
Nemá rijló:
—Iyamá kuwáꞌata kaꞌalá kuwáꞌala wamanoꞌotá rijlupemí aú puꞌutheno waja iꞌimaká.
21 Rimá najló:
—¿Eꞌiyonaja chi unká joꞌó wani iweꞌepila na inaꞌukeka nuká, laꞌarí ilé ke?
Betsaida e Jesús jaꞌapátaka mejlukaji mejlurú liyá yukuna marí
22 E kaja nephá Betsaida ejo. E ajopana iphátaño Jesús ejé pajluwa mejlurú. Mawó nemaká Jesusjlo:
—Pilaꞌá wajló nakaje: paꞌapata marí inaꞌuké liyá mejlukaji.
San Marcos 8.22-38
23 Raú ripatá mejlurú riyátheꞌela nakiyá, rejomi riwaꞌa riká pajimila yámojo. Re raꞌá rawi mejlurú ijlú chojé. Rejomi ritoꞌotá riyátheꞌela rinakojé, rimá rijló:
—¿E pamaka nakaje chuwa?
24 E riyakáꞌojla ají ke, rimá Jesusjlo:
—Aꞌawaná jaꞌapákela keja nomaka inaꞌuké jaꞌapaka.
25 Jesús jápari piño rijlú chu riyátheꞌela aú. Rejomi riyakaꞌo piño, ejéchami ramaka palá piyuke nakaje.
26 Raú Jesús kemari rijló:
—Chuwa pipaꞌó piñakaré chojé. Apú ewá kalé pipaꞌó, paꞌapániña pajimila eꞌiyowá.
Pedro weꞌepika na inaꞌukeka Jesús iꞌimaká, yukuna marí
27 Ilé kaje ejomi Jesús jaꞌapari rijwaꞌatéjena waꞌaté Cesarea Filipo teꞌeré eꞌiyowá, apú pajimila ewá, apú pajimila ewá, ke. Nachiraꞌakó nakuwá rimá raꞌapiyatéjenajlo:
—¿Meke jemaꞌaká ajopana kemaká nunaku, na inaꞌukeka nuká nemaká?
28 Nemá rijló:
—Neꞌiyajena kemaño pinaku: “Juan el Bautista riká”, ke. Eyá ajopana kemaño: “Elías riká”, ke. Ajopana kemaño kaja pinaku: “Tupana purákaꞌalo jaꞌapátajeño, júpimi iꞌimakaño nakiyana kaꞌajná riká”, ke.
29 —Eta iká, ¿meke imaká nunaku?
Pedro kemari rijló:
—Tupana wakáraꞌakare majó weꞌematájeri penaje piká.
30 Raú Jesús kemari najló:
—¡Pa! Imaniña ajopánajlo nuyukuna, naka nuká, Tupana wakáraꞌakare majó iná iꞌimatájeri penaje.
Jesús kemaká najló mékeka ritakaꞌajika yukuna marí
31 Rejomi Jesús kemari raꞌapiyatéjenajlo mékeka nalaꞌajika riká chapú, rimá najló:
—Inaꞌuké iꞌimakáloje nupalamane penaje iꞌimaká nuká. Pheñawilana, eyá sacerdótena wakáraꞌajeño, Tupana purákaꞌalo nakú jewíñaꞌatajeño waꞌaté, unká wani wátalaño nuká. Ñakele napurákaꞌalo aú ajopana laꞌajé nuká chapú. Nujñaꞌajé kajrú chapú kaje yajwé panaku, jimaje nenoje nuká, eꞌiyonaja weji ke kala iꞌimajemi numakápoꞌojo piño nopumí chuwá.
32 Ilé ke Jesús iꞌimaká palá najló riyukuna naweꞌepíkaloje penaje. Rejomi Pedro wáꞌari riká aꞌajná ñoꞌojó kemachi. Re rikeñoꞌó rakhaꞌakana,
33 raú Jesús pajnoꞌoró raꞌapiyatéjena chaje yakáꞌajo. Rejéchami rakhaꞌakó rimaká Pédrojlo:
—¡Paꞌapá nuliyá, Jiñá Chiꞌinárikana pechu ke wani pipechu! Raú unká piwátala nulaꞌaká nakaje Tupana pechu nakú riꞌimaká ke. Piyukeja inaꞌukena iꞌijnataka napéchuwa ke wani pipechu.
34 Rejomi riwaꞌa raꞌapiyatéjena, ajopana waꞌaté, rawaꞌajó, rimá najló:
—Iwátajika ee nujwaꞌatéjena iꞌimakana, iyureje iliyó piyuke nakaje laꞌakana ipechu nakú riꞌimaká ke. Iweꞌepíniña khaí inakuwá, nenójika iká eꞌiyonaja, nupurákaꞌalo yukuna iꞌimakana jimaje.
35 Eyá unká yurílaje riliyó nakaje laꞌakana ripechu keja, kapichájero. Eyá nenójikare nuwátaka ke laꞌakana jimaje, nujwaꞌateje riꞌimakale, iꞌimajero.
36 Unká na penaje kajrú nakaje marí ejaꞌawá chu iꞌimakare ñaꞌakana iꞌimalá inajluwa, iná kapichájikole Tupana liyá rilanakiya.
37 Unká iná aꞌalajla nakaje Tupánajlo, riꞌimatákaloje iná riwemí aú kapichákajo liyá.
38 Neꞌiyajena apáñaꞌaño noꞌopí puꞌuwaré laꞌajeñó, meꞌetení iꞌimakaño, eꞌiyá. Ñaké kaja napáñaꞌako nupurákaꞌalo jaꞌapí neꞌiyá. Nupaꞌajiko jeꞌechú chiyá majó wakajé, nopáñaꞌajo kaja naꞌapí ñaké. Inaꞌuké iꞌimakáloje nupalamane penaje iꞌimaká nuká. Piyukeja inaꞌukena wakáraꞌajeri penaje nuphaje piño jeꞌechú chiyá majó. Noraꞌapá waꞌatéjena, jeꞌechú chiyájena, waꞌaté nuphaje. Kajrú mejámaꞌatani kaje eꞌiyowá wephaje majó —ke rimaká najló.