Na aú ka iná laꞌaká puꞌuwaré yukuna marí
7
E kaja fariséona nakiyana, eyá Tupana purákaꞌalo nakú jewíñaꞌatajeño, kele awakaño Jesús nakojé. Jerusalén eyájena neꞌemaká.
San Marcos 7.1-23
2 Neká amaño Jesús jaꞌapiyatéjena nakiyana ajñaka naꞌajnewá. Unká nepalá nayátheꞌela chiyá paineko, pheñawilá michuna kemájika ke, raú nakhaꞌá namaná.
3 Piyukeja fariséona, eyá judíona, kele laꞌajika nachiꞌiná michuna purákaꞌalo kemájika ke. Raú unká najñake naꞌajnewá, unká chiyó nepá nayátheꞌela chiyá paineko.
4 Leꞌejepelaji ñakarelana chiyá nephájikaja nañakaré chojé ee, nepake kaja nayátheꞌela chiyá. Rejomi najñake naꞌajnewá. Kajrú apú nakaje nalaꞌakeno nachiꞌiná michuna kemájika ke. Nepake kaja mapeja natiyélane, naperoꞌojlone, neꞌeté kaje maká chiyá. Ñaké kaja nepájika naperoꞌojlone palani, sereni nakiyá laꞌakanami, chiyá. Nacamané waꞌató nepake.
5 Ilé kaje aú fariséona, eyá Tupana purákaꞌalo nakú jewíñaꞌatajeño waꞌaté, kemaño Jesusjlo:
—¿Naje chi unká paꞌapiyatéjena jemaꞌalá pheñawilá michuna purákaꞌalo jaꞌapiyá? Unká nepalá nayátheꞌela chiyá najñaka naꞌajnewá piyá, wachiꞌiná michuna laꞌajika ke.
6 Raú rimá najló:
—Palá Tupana purákaꞌalo jaꞌapátajeri Isaías michú iꞌimaká ripiyá iyukuna iꞌimaká. Iká laꞌañó inakuwá mapeja palá laꞌajeñó ke ajopana ijlú chu, unká ñaké laꞌajeñó kalé iꞌimaká eꞌiyonaja. Marí ke rilanaꞌaká ipiyá iꞌimaká:
“Nanuma chiyaja kalé mariruna kemaje Tupana nakú: ‘Wephákare jaꞌapí riká’, ke, eyá napechu nakú unká wani nawátalaje riká.
7 Unká na penaje kalé nawakono pajwaꞌatéchaka nawakákaꞌalo ñakarelana chu, nalaꞌakáloje puꞌují napéchuwa Tupánajlo.
Kaja pheñawilá michuna purákaꞌalomi nakú newíñaꞌatakaloje inaꞌuké penájeja nawakono.
‘Tupana purákaꞌalo japi riká’, ke newíñaꞌataka neká rinaku”, ke Isaías lanaꞌakare iꞌimaká kemaká.
8 Jesús kemari piño najló:
—Kaja iyurí iliyó Tupana purákaꞌalo aꞌakana inakojó, ilaꞌakáloje rilanakiya pheñawilá michuna purákaꞌalo kemaká ke.
9 Riká aú, unká aꞌalá inakojó Tupana purákaꞌalo kemaká ke laꞌakana.
10 Moisés michú kemari iꞌimaká: “Iphá ichiꞌiná jaꞌapí. Puraꞌajero puꞌuwaré richiꞌiná nakú, nókana iꞌimajeri”, ke.
11 Eyá iká unká aꞌalaño inakojó ilé kaje meꞌetení. Lanakiya palani ijló nayani kemaká nachiꞌinajlo: “Unká méñoꞌojo waꞌalá iñathé liñeru kaje aú, waꞌakale Tupánajlo waliñérute”, ke.
12 Mapeja nemaká najló ñaké, unkale nephala nachiꞌiná jaꞌapí. Eꞌiyonaja unká imalá najló, nephaka piyá naꞌapiwá nachiꞌinajlo.
13 Ilé ke ilaꞌakale, unká aꞌalá inakojó Tupana purákaꞌalo. Kajrú nakaje ilaꞌaká ñaké waja. Pheñawilá michuna purákaꞌalomi jaꞌapátakanaja iweꞌepí itukumó. Apujlo, apujlo ke, iꞌimaká riyukuna yuwanajlo waꞌató. Unká wani paala ilaꞌaká —ke rimaká najló.
14 Rejomi Jesús kemari ajopánajlo nawakákoloje rawaꞌajé, rimá najló:
—Chuwa jemaꞌá, iweꞌepichi rinakojé:
15 Piyukeja nakaje iná ajñakare iná numá chiyá aú, unká iná laꞌalá puꞌuwaré. Rikaja kaja iná numá iná puraꞌó chiyá puꞌuwaré, riká laꞌarí iná puꞌuwaré laꞌajerí.
16 Keꞌejwiruna iꞌimajika ee, jemaꞌá meke kemakánaka kele numíchaje nakú ijló —ke rimaká najló.
17 Rejomi Jesús jaꞌapáñaari neká, mujlúkaꞌari pají chojé. Re raꞌapiyatéjena kemaño rijló:
—¿Meke kemakana chi kele pimíchaje nakú wajló?
18 Rimá najló:
—¿Unká kaja chi iweꞌepila meke kemakana kele numíchaje nakú? ¿Unká chi iweꞌepila aꞌajnejí iná ajñakare nakojé? Iná numá chiyá riwitúkaꞌa iná julá chojé.
19 Re riꞌimá meketánaja, rejomi raꞌapá iná eꞌiyayá. Ñakele unká aꞌajnejí iná ajñakare kalé laꞌarí puꞌuwaré iná pechu, iná laꞌakáloje puꞌuwaré raú.
Ilé ke rimaká najló aú, rimá piyukeja aꞌajnejí nakú: palani waja riká iná ajñákaloje penaje.
20 Rimá piño najló:
—Nakaje iná kemakare iná numá chiyá laꞌarí iná puꞌuwaré laꞌajerí.
21 Nakaje iná pechu nakú iꞌimakare, iná kemá nakú. Puꞌuwaré péchuri iná iꞌimakale, iná iꞌijnatá iná péchuwa puꞌuwaré laꞌakaná nakú: ajopana nane jataꞌakana nakú kaꞌajná, ajopana nókana nakú kaꞌajná,
22 iná manáicho laꞌakana nakú kaꞌajná, ajopana cha yerúkaꞌakana nakú kaꞌajná, apú waꞌaté pajlakana nakú kaꞌajná, eyá yuwéraꞌakajo kaje nakú kaꞌajná. Iná iꞌijnatá kaja iná péchuwa chapú ajopana nakú kaꞌajná, ajopana nakú chapújraꞌakano nakú kaꞌajná. Eyá iná iꞌijnatá kaja kaꞌajná iná péchuwa iná nakuwá, ajopana chaje iná, ke. Iná pechu aú kaja unká iná iꞌijnatala iná péchuwa rejenowaja inaꞌuké nakú palá.
23 Piyukeja ilé kaje jáchoꞌoro iná pechu nakiyá. Ilé ke laꞌakana laꞌarí iná puꞌuwaré laꞌajerí —ke Jesús jewíñaꞌataka neká.
Ajopana teꞌeré eyájeru pechu iꞌimaká kaphí Jesús chojé yukuna marí
24 Reyá Jesús jaꞌapari ají ke Tiro, eyá Sidón, kele teꞌeré ejo. Riphaka rejo ejomi, rimujlúkaꞌa pají chojé. Meꞌechú riwátakajla richojé mujlúkaꞌakana, eꞌiyonaja unká méñoꞌojo rimichoꞌoló naliyá.
San Marcos 7.24-37
25-26 Re pajluwájaru, ajopana teꞌeré eyájeru ruꞌumaká, jemaꞌayó riyukuna. Rutu eꞌiyá re jiñá pechu iꞌimá. Ruká iphayo Jesús nakú, e rujlámaꞌo riꞌimá nakojé, mawó rumaká rijló:
—Pilaꞌá nojló nakaje: piwakáraꞌa jiñá pechu jáchoꞌoko nutu eꞌiyayá.
27 Raú rimá rojló:
—Piyurí Israel lakénami ajñaka paineko pan. Unká paala pan kaꞌakana naliyá, iná aꞌakáloje riká yawi pirakánajlo penaje. a
28 —Ke joꞌó, wawakáraꞌajeri. Eꞌiyonaja kalé yáwina ajñaño kaja pan mujrumi teꞌerí eꞌiyajé jaꞌakaro.
29 Raú Jesús kemari rojló:
—Palá pimaká nojló; pipaꞌó chuwa piñakaré ejo. Kaja jiñá pechu jáchoꞌocho pitu eꞌiyayá.
30 Raú rupaꞌó ruñakaré ejo, iphayo, amayo rutu toꞌokó manaꞌija rucamané chu. Kaja jiñá pechu roꞌiyá iꞌimakare jáchoꞌo roꞌiyayá.
Jesús tejmoꞌótaka kajrú natámina yukuna marí
31 Jesús jáchoꞌoro pajimila Tiro eyá, jaꞌapari piño ají ke Sidón teꞌeré yámojo. Iyamá théꞌela kele pajimila iꞌimaká rewá. Rawaꞌayá raꞌapá, iphari kaéja Galilea turenaje.
32 Rejé ajopana iphátaño pajluwaja meꞌejwirú, eyá manumarú iꞌimaká, Jesús nakú. Nemá rijló rilamáꞌatakaloje riká penaje.
33 Raú Jesús wáꞌari riká aꞌajná ñoꞌojó kemachi inaꞌuké liyá. E rarúkaꞌa riyatewana meꞌejwirú iꞌijwí chojé, rejomi rathupá rawi riyatewana nakojé, raú rijapa kele lená nakú.
34 E riyakaꞌo yenoje jeꞌechú chojé, rejéchami rijñaꞌaká reꞌiyayó kaphí, rimá rijló:
—Efata.
“Pijmeꞌetó”, ke kemakana riꞌimaká napuraꞌakó chu.
35 Reyá aꞌajná ñoꞌojó palá remaꞌaká, palá kaja ripuraꞌakó.
36 E Jesús kemari najló, neꞌemaká piyá riyukuna ajopánajlo. Ilé ke rimájika najló, eꞌiyonaja richaje ke neꞌemajika nakaje rilaꞌajíkare yukuna ajopánajlo.
37 Raú piyuke riyukuna jemaꞌajeño kemakeño: “Palá wani rilaꞌalaka piyuke nakaje. Meꞌejwiruna rilamáꞌata nemaꞌakáloje palá, eyá manumaruna rilamáꞌata kaja napuraꞌakóloje palá penaje”.