Jesus na Aloaa Hefua ma Helagui
9
I harofamiaa ei Hefua ma helagui Jesus, na fani faufau aꞌa roꞌou ma forafora ba ronei fawalaꞌanaa ei pigea ma fapedugaa ei funua 2 ma na aloaa roꞌou ba ronei uꞌugaa fei haparaiaa mei Haidaa ma fapedugaa funuaa ei ramaꞌa. 3 Ina warenaa aꞌa roꞌou: “Hamoneiꞌaa notoo manumanuu fei tatalaia—loꞌe o, raba, duꞌua, mugoo poꞌi, o pafua susu. 4 Tamanu humu hamona waduꞌia, hamonei guta yena nopaꞌaloo fei ba hamona diꞌininaa fei gufu. 5 Nabaa lomi rona taufaꞌugaa hamuꞌou, hamonei foifoiaa piyee pinee hamuꞌou ena hamona diꞌininaa fena gufu fena, aleꞌena hepalo manumanu i famaꞌaa roꞌou ba rowe tonaa aree roꞌou wagii fei dududua.” 6 Siꞌei, rona aunu ma dinaa hepapalo gufu ma uꞌugaa fei rawaniꞌa warea ma fapedugaa funuaa ei ramaꞌa aꞌa ei gufu tadiweꞌaia.Herod na Hununumasuna
7 Herod, mei haparaa obao gufu na guainaa minaa ei manumanu rona bigiꞌia. Ma namina naranara watauda uaa hefiꞌa na ware ba John na asiꞌaa aꞌa fei maꞌea 8 ma hefiꞌa na ware ba Elijah na faꞌarewamai ma hefiꞌadiai na ware ba hemea ei mamamaꞌa mina mina na asiꞌadiai. 9 Maꞌuaa Herod na ware, “Una morodigaa huaa John. Siꞌei, paꞌaa hini mei a guguainaa uꞌugana?” Ma ba iree maꞌaia.
Jesus na Faguaa Haipani Pufabaꞌa
10 Roꞌaa hadiweꞌimai ei apostle, rona warefanaa Jesus tamanu rona bigiꞌia. Siꞌei na nodugaa roꞌou ma uniaa roꞌou, rona dinaa aꞌa fei gufu, harana Bethsaida. 11 Maꞌuaa roꞌaa noꞌapaꞌalao fei gupuu ramaꞌa, rona nenegia. Ina taufaꞌugaa roꞌou ma uꞌufanaa roꞌou fei haparaiaa mei Haidaa ma fawanewaneaa ei funua.
12 I nofafilao, ei hefua ma helagui rona nomai ma ware aꞌana, “Aloaa fei gupuu ramaꞌa ba ronei aununaa aꞌa ei gufu rafiꞌii ma labarai hana ma nopaa roꞌou, uaa faweleni ona guta, namina raua.”
13 Ina ware, “Hamonei fani hanaa roꞌou.”
Rona ware, “Ona paꞌi haipani ua faraa pidaua ma guapalo nia—nabaa lomi, ona aunuponofani duꞌua aꞌa fei gupuu ramaꞌa.” 14 (Puduu ei wawane yei, aleꞌei haipani pufabaꞌa.)
Maꞌuaa ina warenaa aꞌa ei otalai nenerana, “Fafigupuinaa roꞌodu aleꞌei haipani paꞌania laloo hepapalo gupu.” 15 Ei otalai nenera, rona bigiꞌia ma minaa ei ramaꞌa na guta. 16 Ina tonaa haipaniei faraa pidaua ma guapaloei nia, aranaa pafea, ware ‘ta’ ma itafia. Ma na fanaa ei otalai nenera ba ronei alaginia aꞌa ei ramaꞌa. 17 Minaa roꞌou, rona hananamagu ma ei otalai nenera, rona paiaa ei masii duꞌua ma na pepesu hefua ma guapalo pa.
Peter na Ware ba Jesus, Hia Christ
18 Hefarani, fi lafulafu Jesus, uniaa ei otalai nenera i aꞌana ma na iꞌiginaa roꞌou, “Ei gupuu ramaꞌa, rona ware ba yau hini?”
19 Rona ware, “Hefiꞌa na ware ba John mei pudugufaia; hefiꞌa ba Elijah ma; hefiꞌadiai ba hemea mamamaꞌa mina mina na asiꞌamai aꞌa fei maꞌea.”
20 Ina iꞌigai, “Maꞌuaa hamuꞌou? Hamona ware ba yau hini?”
Peter na ware, “Mei Christ,a mei aloagiaa mei Haidaa.”
Jesus na Warewareaa fei Fiꞌina ma Maꞌeana
21 Jesus na apunainaa roꞌou ba roneiꞌaa warefanaa nemeadiai. 22 Ma na ware, “Mei Naꞌuu Ramaꞌa nei to fiꞌina aꞌa watauda manumanu ma ei bauaniaa gufu, ei famamoaa humuu mei Haidaa ma ei feroiaa law, roꞌaa ofadugia, foꞌafamaꞌeia ma aꞌa fei faꞌoduaiaa arewaa iwe asiꞌaa aꞌa fei maꞌea.”
23 Ma ina warenaa aꞌa minaa roꞌou, “Hini i nenerau nei madiꞌinaa ei nunumiana ma aꞌa hepapalo arewaa nei poroꞌaa fei hawafolona ma nenerau. 24 Uaa hini ba i fatelaiaa fei fawewenina i paꞌai aꞌana, maꞌuaa hini ba i fapaꞌainaa fei fawewenina aꞌau, i tohadiweꞌidinia. 25 Tamanu rawaniꞌana nabaa nemea na tonaa minaa ei manumanuu feni ano ma fapaꞌainaa fei fawewenina? 26 Ma hini i mamafa aꞌau ma ei wareau, mei Naꞌuu Ramaꞌa ana i mamafa aꞌana ena na nomai fininaa fei hawerana ma fei haweraa mei Ama mawe ei apunai aloꞌalo. 27 A paꞌaa warefaꞌuai aꞌa hamuꞌou ba hamuꞌou hefiꞌa na ufalarai yeni, hamodoꞌo fanunuaa fei haparaiaa mei Haidaa ma nene hamowe maꞌe.”
Fei Hudi Unuu Jesus na Filogii
28 Aleꞌei fainaroa arewaa nenee i wareaa fei Jesus, ina dugaa Peter, John mawe James ma rona tafanenaa pafoo maugeni ba roꞌaa lafulafu. 29 Ifi lafulafulao, fei maumauna na filogii ma fei susuna namina weꞌa aleꞌei weꞌaa usida. 30 Helagui ramaꞌa, Moses ma Elijah, laguna fiwarewarei aꞌana. 31 Laguna faꞌarewamai aꞌa ei mau rawaniꞌa haweraa lagua ma fiwarewareinaa fei aunuana, fei lomi i madii ba i bigiꞌia yei Jerusalem. 32 Namina mamaꞌigu pudaa Peter ma ei tafina, maꞌuaa roꞌawe werafarawani, rona fanunupaꞌaa fei hawerana ma helagui ramaꞌa na ufipui aꞌana. 33 Ba laguꞌaa aunudiꞌininaa Jesus, na warenaa aꞌana Peter, “Mena fasu, na rawani ba oꞌou yeni. Oꞌounei faduaa odumanu pale—hepalo yoi, hepalo Moses ma hepalo Elijah.” (Lomi ina aida ba i wareaa tamanu.)
34 Ifi warewarelao, hepalo papalei na nomai mi hawaipaꞌainaa roꞌodu ma rona maꞌau ei roꞌaa waduꞌainaa tapuu fei papalei. 35 Hepalo lao na waregio aꞌa fei papalei, “Hemeni, meni Naꞌuu, meni una rafeinia; guainaa wareana.” 36 I waredii fei lao, rona fanunuia ba uniaa Jesus. Ei otalai nenera, rona auꞌuaia aꞌa roꞌou. Lomi rona warefanaa hemea tamanu rona fanunuia aꞌa fei au fei.
Fei Walaꞌanaa fei Spiriti Hafelo aꞌa Hemea Baduu Wawane
37 Iree arewadiai, ei roꞌaa upudiꞌininaa fei maugeni, hepalo gupuu ramaꞌa na nomai aꞌana. 38 Hemea roꞌou na harofia, “Mena feroia, ba a iꞌiginio ba onei maꞌa mei naꞌuu baduu wawane, uaa hia ua naꞌuu. 39 Hepalo spiriti naꞌaida panarofia ma mei baduu na iwaꞌiwa; inaꞌaida famemeroinia, naꞌaida nomai pugapugaa poana. Lomi na u fafaa aꞌana ma nawemina fafeloia. 40 Una iꞌigifaweꞌi aꞌa ei otalai neneramu ba ronei fawalaꞌania, maꞌuaa, lomi rona fawalaꞌapaꞌia.”
41 Jesus na ware, “Haa, hamuꞌou eni ramaꞌa wagii feni au feni, eni lomi na narafaweꞌi ma suauga aꞌa ei hafeloꞌa. Amina gutabatanaidilao aꞌa hamuꞌou? Yau na tamafoidii. Dugamai mei naꞌumu.”
42 Ei fi nomai mei baduu, fei pigeab na fapasimemeroinia. Maꞌuaa Jesus na warefaweꞌi aꞌa fei hafeloꞌa spiriti, na farawaninaa mei baduu ma dugifanaa mei amana. 43 Ma namina nanawala pudaa roꞌodu aꞌa fei baua faufau mei Haidaa.
Roꞌei malefalao aꞌa ei bigiꞌaa Jesus, ina warenaa aꞌa ei otalai nenerana,
Jesus na Waredinaa fei Maꞌeana
44 “Guaifarawaninaa tamanu a warefanaa hamuꞌou: Mei Naꞌuu Ramaꞌa, rowe aloia i panii ramaꞌa.” 45 Maꞌuaa lomi rona aida hanuna. Ina udeꞌopaꞌai aꞌa roꞌou, siꞌei, lomi rona apaꞌaa hanuna ma rona maꞌau iꞌigiana wagina.
Hini i Pafeai?
46 Rona fiharei ei otalai nenera ba hini roꞌou i pafeai hinene. 47 Jesus na apaꞌidigaa ei naranaraa roꞌou ma na dugaa hemea baduu ma faꞌugia papana. 48 I dii, na warenaa aꞌa roꞌou, “Hini i taufaꞌugaa meni baduu meni aꞌa fei harau, na taufaꞌugau; ma hini i taufaꞌugau, ana na taufaꞌugaa mei i aloagiau. Uaa hini lomi na awata dupuaa hamuꞌou na pafeai.”
Mei Lomi na Ofadugaa Hamuꞌou, Maroaa Hamuꞌou
49 Na ware John, “Mena Fasu, haiꞌouna fanunupaꞌaa hemea fi fawalaꞌanaa ei pigea aꞌa fei haramu ma haiꞌouna apunainia ba ineiꞌaa bigiꞌia uaa hia abaa hemea haiꞌou.”
50 Jesus na ware, “Hamoneiꞌaa apunainia aꞌa fei, uaa hini lomi na ofadugaa hamuꞌou, hia hemea hamuꞌodu.”
Ei Samaria, Rona Ofadugia
51 I rarafiꞌimai fei auna ba i dinaa gufu pafea, Jesus namina nara ba i paꞌaa dinaa Jerusalem. 52 Ma na aloaa hefiꞌa talaitonaa wareana ba roneidoꞌo nonoo ma waduꞌainaa hepalo gufu i Samaria ma pagiꞌaufania ei manumanu; 53 maꞌuaa ei ramaꞌa yei, lomi rona taufaꞌugia, uaa ifi aununaa Jerusalem. 54 Laguꞌaa fanununaa fei laguei otalai nenerana, James ma John, laguna iꞌigai, “Mena fasu, ona nunuminia ba haigunei ware ba fei hafi nei pasigio pafea ma guꞌaiaa roꞌodu”?c 55 Maꞌuaa Jesus na momoꞌilao ma hotaꞌaa lagua 56 mad rona dinaa aꞌa hepalodiai gufu.
Fei Ponoꞌaa fei Neneramu Jesus
57 Ei roi tatalailao tala, hemea na warenaa aꞌana, “Omina dinaa hitani, yau a nenegio.”
58 Jesus na ware, “Ei manulelele na paꞌi waduu roꞌou ma ei manufidufiduu pafea na paꞌi hofaa roꞌou, maꞌuaa, mei Naꞌuu Ramaꞌa, lomi hefawala ba i haino wagina.”
59 Ina warenaa aꞌa hemeadiai, “Nenerau.”
Maꞌuaa na ware mei ramaꞌa, “Mena Fasu, adoꞌo iꞌifinaa amau.”
60 Jesus na warenaa aꞌana, “Ei maꞌea, ana ronei fiꞌiꞌifii ana roꞌou, maꞌuaa, yoi nei aunu ma warefanaa roꞌou fei uꞌugaa fei haparaiaa mei Haidaa.”
61 Ma hemeadiai na ware, “A nenegio mena Fasu; maꞌuaa, adoꞌo dinaa gufuu ma rapu paniu aꞌa ei maroau.”
62 Jesus na ware, “Lomi nemea i panarofaa fei agiꞌagii peꞌihape ma diarainaa nene ba iwe bigipaꞌi wagii fei bigiꞌaa fei haparaiaa mei Haidaa.”