Ma rona iꞌigai “Poꞌo tonana hitani eni manumanu eni, meni ramaꞌa meni? Tamanu fei apaꞌa, ina tonia ba ana imina bigiꞌaa ei foigia! 3 Haa hemeni, fadufadua ua! Ana meni naꞌuu Mary ua, mei lofuu James, Joseph,^a Judas ma Simon! Ma eni agina ana aꞌa oꞌodu yeni!” Ma namina mamanunu unuu roꞌodu aꞌana.

4 Jesus na warenaa aꞌa roꞌodu, “Ana aꞌa fei gufuꞌuana, dupuaa ei gufuna ma laloo fei humuna, hemea mamamaꞌa, lomi roꞌaa maꞌauia.” 5 Loꞌe na hawia ba i bigiꞌaa neꞌaa foigia yei maꞌuaa na augaa panina pafoo hefiꞌa ei funua ma farawaninaa roꞌodu. 6 Ma na baꞌarofo aꞌa roꞌodu ba loꞌe na weꞌi naranaraa roꞌodu.

Jesus na tatalai ma feroinaa ei ramaꞌa aꞌa hepapalo gufu. 7 Na haronaa aꞌana ei Hefua ma Helagui ma alofahelalaguinaa roꞌodu ma fani forafora aꞌa roꞌou ba ronei muainaa ei spiriti hafelo.^b

8 Siꞌeni, eni wareana: “Apuna notonaa hefiꞌa manumanu aꞌa fena tatalaiaa hamuꞌodu—lomi duꞌua, raba o mugoo poꞌi laloo ena adii hamuꞌou—maꞌuaa, heina o ua. 9 Hamonei rafe supinai, maꞌuaa lomi pafuaa susu. 10 Ma ena hamona waduꞌainaa hepalo humu, hamonei guta yena, nopaꞌawii fena ba hamoꞌaa diꞌininaa fena gufu fena. 11 Ma naꞌaa hefiꞌa gufu, loꞌe roꞌaa fagutanaa hamuꞌou o guaipaꞌaa wareaa hamuꞌou, foifoiaa piyee pinee hamuꞌou, aleꞌena famaꞌamaꞌaa roꞌou ba rona tata.”

12 Rona aunu ma uꞌufanaa ei ramaꞌa ba ronei filoginaa naranaraa roꞌodu. 13 Rona fawalaꞌanaa watauda pigea, igi pao pafoo watauda ei rona funu ma farawaninaa roꞌodu.

14 Mei Hapara Herod na guainaa fei, uaa fei haraa Jesus, nawemina bauanai. Hefiꞌa, rona ware^c ba, “John, mei Pudugufaia na maꞌeleleꞌaa ma siꞌei na paꞌi faufauna ba i bigiꞌaa ei foigia.”

15 Hefiꞌa, rona ware ba, “Hia Elijah.”

Ma hefiꞌadiai, rona ware ba, “Hia hemea mamamaꞌa, aleꞌei hemea mina mina.”

16 Maꞌuaa mei Hapara Herod, i guainaa fei, na ware “John, mei una moroꞌaa huana, na maꞌeleleꞌaa!”

17 Uaa Herod na ware ba ronei panarofaa John ma roroꞌinia ma aunaa hia boboꞌaia. Ina bigiꞌaa fei, uaa mei haroo mei lofuna Philip, harana Herodias, na lalainia. 18 Hamatee John nafane wareware aꞌa Herod ba, “Lomi na wanewane ba o tonaa mei haroo mei lofumu.” 19 Siꞌei, namina bidi unuu Herodias aꞌa John ma ba i foꞌafamaꞌeia, maꞌuaa lomi na hawia, 20 uatani Herod na maꞌauaa John ma naꞌo lawagia, uaa ina aida ba John napaꞌaa wanewane ma na apunai. Herod, ei inaꞌaida guta aꞌa John ma guainaa ei uꞌugana, namina hamamagua,^d maꞌuaa na paꞌi nunumiana ba i guainaa ei uꞌugana.

21 Inawe paꞌaa fei rawaniꞌa au. Aꞌa fei arewaa waniniana, Herod na bigiꞌaa fei baua hananaa aꞌa ei bauaniaa gufu, ei bauaniaa ei foꞌaa mawe ei bauaniaa Galilee. 22 I waduꞌaimai mei baduu pifine naꞌuu Herodias, na ufaꞌufa. Namina faniꞌeniꞌeaa Herod mawe ei ro guta hananafipui aꞌana.

Mei hapara na warenaa aꞌa mei baduu pifine: “Iꞌiginau tamanu nunumiamu ma a fanio.” 23 Ma ina faꞌunai aꞌa mei baduu pifine ba “Tamanu o iꞌiginia, a paꞌaa fanio nopaꞌawii hesuwi feni haparaiau.”

24 Ina asiꞌaa ma warenaa aꞌa mei inana, “Yau a iꞌiginaa tamanu?”

Na ware mei inana, “Fena tabaa John, mei Pudugufaia.”

25 Ana ei, mei baduu pifine na waduꞌaifanaa fei iꞌigaia aꞌa Herod: “Na nunuminio ba onei fanau eꞌeni ua fena tabaa John, mei Pudugufaia pafoo hepalo tabetabe.”

26 Mei hapara, namina bauana fei faloloaꞌiana, maꞌuaa siꞌei ba inapoꞌo faꞌunaidii ma lomi na nunuminia ba i mamafa pudaa ei roifi guta hanana aꞌana, lomi ba i filoginaa wareana aꞌa mei baduu pifine. 27 Siꞌei, na alomaduareinaa hemea moroꞌaa hua ba neiree morotonamii fei tabaa John. Na aunu mei, dinaa humuu boboꞌaia ma lafigifamosuaa fei huaa John 28 ma na notabeamai fei tabana pafoo fei tabetabe. Ina fanaa mei baduu pifine ma hia, na fanaa mei inana. 29 Roꞌaa guainia ei otalai neneraa John, rona nomai, tonaa fei hudi ununa ma augia laloo huapu.

30 Ei apostle, rona figupuimai aꞌa Jesus ma warefania minaa ei bigiꞌa ma feroiaa roꞌodu. 31 Siꞌei ba abaa poꞌo maꞌida ei roꞌeiꞌu nomai ma nolao, paꞌaa lomi na paꞌi au roꞌodu ba roꞌaa hanana. Na warenaa aꞌa roꞌodu Jesus ba, “Uniaa hamuꞌodu, hamonei nomai aꞌau ma o dinaa hefawala lomi wawaigia ba hamoꞌaa gutafawenai.”

32 Siꞌei, rona aunu uniaa roꞌodu pafoo wa ma aununaa fawelei lomi ramaꞌa. 33 Maꞌuaa wataudaa, rona fanunuꞌapaꞌaa roꞌodu ma ei ramaꞌa gufu pedu, rona poniꞌuanaa pinee roꞌodu. Ronareꞌo susufudai ma nene, Jesus ma ei otalai nenerana. 34 I fatete Jesus, na fanunuia ba abaa poꞌo ramaꞌa rona omaꞌadii. Namina faloloaꞌinaa roꞌodu, uatani roꞌou aleꞌei ei sipsipi loꞌe omaꞌamaꞌaa roꞌodu. Siꞌei, na feroinaa roꞌodu watauda manumanu.

35 Ma eni, anaa i lolo fei halo. Siꞌei, rona dinaa aꞌana ei otalai nenerana ma ware ba “Namina raua faweleni ma namina fafidii. 36 Aloaa eni ramaꞌa ba ronei aunulalabarai hanaa roꞌou aꞌa hefiꞌa ena gufu ma pono hanaa roꞌodu.”

37 Maꞌuaa ina ware, “Hamonei fani hanaa roꞌodu.”

Rona warenaa aꞌana, “Nabaa aleꞌei, i tonaa ponoꞌaa hemea bigiꞌa aleꞌena fainaroa puda!^e Paꞌaa wareamu ba haiꞌouꞌaa suminaa mugoo poꞌi aleꞌei ma pono faraa pidaua ma fani hanaa roꞌou?”

38 Ina iꞌigai, “Hefiga faraa pidaua hamona paꞌi? Wi maꞌa.”

Roꞌaa apaꞌidigia, rona ware ba, “Haipani faraa pidaua ma guapalo nia.”

39 Siꞌei, Jesus na warenaa aꞌa roꞌou ba ronei fagutanaa ei ramaꞌa ma figupuinaa roꞌou pafoo ei guana mamarawii. 40 Siꞌei, rona guta. Hefiꞌa gupu, hefa puꞌu ma hefiꞌa gupu, haipani paꞌania. 41 Na tonaa haipaniei faraa pidaua ma guapaloei nia, aranaa pafea, ware ‘ta’, digedigeaa ei faraa pidaua ma fanaa ei otalai nenerana ba ronei fanaa ei ramaꞌa. Ana na alaginaa guapaloei nia aꞌa minaa ei ramaꞌa. 42 Minaa roꞌou, rona hananamagu 43 ma ei otalai nenerana, rona tonaa hefua ma guapalo pa. Ma ei pa, ronamina pepesu aꞌa ei masii faraa pidaua ma nia. 44 Puduu ei wawane rona hanana, haipani pufabaꞌa.

45 Ana ei, Jesus na ware aꞌa ei otalai nenerana ba ronei hugi aꞌa fei wa ma roneiꞌo aꞌaunudinaa Bethsaida. Ma hia, fidoꞌodii aloaa fei gupuu ramaꞌa. 46 I diꞌinidigaa roꞌou, na aununaa papaa hepalo maugeni ba i lafulafu.

47 I nofafilao, fei wa na paꞌidigaa memewaa fei agi ma unaiana piye. 48 Na fanunuaa ei otalai nenerana roꞌeimina poreifaweꞌi, uaa fei lalarena na agisuafaa roꞌodu. Aleꞌena watolaa oduai ma oloroa idoꞌo mafufuo, Jesus nawe aununaa aꞌa roꞌodu. Na tatalai ua pafoo agi ba i falogiaa roꞌou. 49 Maꞌuaa, ei roꞌaa fanunupaꞌia fi tatalai pafoo agi, ronamina aimemewai, uaa ei naraa roꞌodu ba hia, haniꞌu. 50 Siꞌei ba minaa roꞌou pedu na fanunupaꞌia ronamina maꞌau.

Ana ei ua, ina warenaa aꞌa roꞌodu ba, “Gutafarawani ua! Yau meni. Apuna maꞌau.” 51 Ma na hugilao aꞌa roꞌou pafoo wa ma fei lalarena na rere. Ronamina baꞌarofo, 52 uaa lomi ronaꞌu apaꞌimaꞌaiaa ei bigiꞌaa Jesus aꞌa fei faraa pidaua; namina waiwai tabaa roꞌodu.

53 Roꞌaa sualao, rona fatete yei Gennesaret ma peꞌi yei. 54 Ana ei roꞌaa rofoꞌupu pafoo fei wa, ei ramaꞌa, rona fanunuꞌapaꞌaa Jesus. 55 Ei ramaꞌa ei, ronamina poni ua yei tadiweꞌaia ma noporoporoꞌaa ei funua pafoo ei hafenaa unuu roꞌou aununaa hitani rona guainia ba Jesus yei. 56 Ma nabaa i aununaa hitani—aꞌa ei pusuꞌo gufu, baua gufu, o sugatataꞌaia, rona fahainopaa ei funua papaa ei humuu aloꞌalo. Ma ronamina iꞌigifaweꞌi aꞌana ba nei ugainaa roꞌodu ba roꞌaa idoaa fei supuu susuna. Ma minaa ei rona idoia, na pedu ei funuaa roꞌodu.