Fei Manimaniaa Jesus
4
Fei Spiriti Apuna na didifaa Jesus ma ina hadiweꞌimai yei Jordan. Ma fei Spiriti na noduginaa hia fawelei lomi haihai o guana 2 ma laloo gunaroa paꞌania arewaa mei haniꞌu na manimania. Aꞌa ei arewaa ei, lomi na hanana ma i nopaꞌaloo aꞌapoo ei, ina bao. 3 Mei haniꞌu na warenaa aꞌana, “Nabaa yoi Naꞌuu mei Haidaa, warenaa aꞌa feni mugoo feni ba nei filoginaa faraa pidaua.”
4 Jesus na ware, “Na udedii fei neꞌia ba: ‘Ei ramaꞌa lomi ba roꞌaa gutalao aꞌa fei faraa pidaua ua.’”
5 Mei haniꞌu na noduginaa hia fawelei na tare ma ana ei ua, na famaꞌaia minaa ei gufuu ei haparaa feni ano. 6 Ma ina warenaa aꞌana, “A fanio minaa ei forafora ma ei hawera wagina, uaa una tonia ba manumanuu ma a fanaa hini a nunuminia. 7 Siꞌei, nabaa o losuinau, a fanio ba manumanumu.”
8 Jesus na ware, “Na udedii fei neꞌia ba: ‘Losuinaa mei Fasu, mei Haidaniaa hamuꞌou ma hia ua hamonei nenegia.’”
9 Mei haniꞌu na noduginaa hia Jerusalem ma faꞌufalarainia pafoo fei sidesidee fei humuu mei Haidaa. Ma na ware, “Nabaa yoi Naꞌuu mei Haidaa, fapasilao yeni, 10 uaa na udedii fei neꞌia:
“‘Iwe warenaa aꞌa ei aloꞌalona ba yoi,
roneimina omaꞌafarawaninio;
11 ma rowe usumaio,
ba lomi oꞌaa biꞌaꞌainaa pinemu aꞌa ei mugoo.’”
12 Jesus na ware, “Na neꞌidii: ‘Apuna maniaa mei Fasu, mei Haidaniaa hamuꞌodu.’”
13 Mei haniꞌu, i pedudigaa ei maniana, na diꞌininia ba i opanidinaa nefarani.
Jesus na Faꞌasiꞌanaa fei Bigiꞌana Yei Galilee
14 Jesus na hadiweꞌinaa Galilee aꞌa fei faufau fei Spiriti ma fei uꞌugana namina talaipedunaa minaa fei gufu. 15 Ina feferoi i laloo ei synagogue roꞌou ma minaa roꞌou, rona uduginia.
Rona Ofadugaa Jesus Yei Nazareth
16 Ina dinaa Nazareth, fawelei i giperai wagina ma laloo fei Sabbath na waduꞌainaa fei synagogue, aleꞌei maumauna ma na ufalarai ba i igoꞌigo. 17 Hemea na fania fei neꞌiaa mei mamamaꞌa Isaiah aleꞌei maumau fei holobenaa ma na famaꞌalaia ma labagipaꞌaa feni neꞌia feni:
18 “Fei Spiritii mei Fasu na oa pafou,
uaa ina ipia i pafoo tabau
ba unei uꞌugaa fei rawaniꞌa warea aꞌa ei lomi rona paꞌi.
Ina aloamiau ba nei wareia ba ei boboꞌaia, ronei ala,
ei pudawerai, ronei fanunupaꞌi,
ei rona gutafafelo, ronei asiꞌaa
19 ma unei wareia ba fei au ba mei Fasu i farawaninaa ei ramaꞌa.”
20 I weloidinaa fei aleꞌei holobenaa, na fanihadiweꞌinia aꞌa mei bigibigiꞌa ma guta. Minaa ei ramaꞌa laloo fei synagogue, rona fanunufaꞌuꞌuia 21 ma inaꞌaa warenaa aꞌa roꞌodu, “Wagieni fei neꞌia na paꞌaa nomai eni hamoꞌei guainau fi igoia.”
22 Minaa roꞌou, rona uꞌufarawaninia ma hawainaa poaa roꞌou aꞌa ei rawaniꞌa wareana. Rona iꞌigai, “Anaa simeni, meni naꞌuu Joseph?”
23 Jesus na warefanaa roꞌou, “Una aidadii ba hamowe wareaa feni proverb aꞌau: ‘Mena loꞌotaa, farawaninaa ana yoi! Bigiꞌia yeni gufumu ei guaiaa haiꞌou ba ona bigiꞌia yei Capernaum.’”
24 Ina warelao, “A warefaꞌuai aꞌa hamuꞌou ba lomi roꞌaa taufaꞌugaa hemea mamamaꞌa ana aꞌa fei gufuna. 25 Apaꞌaa warefanaa hamuꞌou ba na paꞌi watauda pifine maꞌesuabea yeni Israel aꞌa fei au Elijah, fei lomi na paꞌi maunu laloo oduai ma hesuwi igisimasi ma namina moubiabia laloo minaa ei gufu. 26 Ma lomi na alonaa Elijah aꞌa roꞌou, maꞌuaa hemea pifine maꞌesuabea yei Zarephath fawelei Sidon. 27 Ma na paꞌi watauda na watawatai unuu roꞌodua yei Israel aꞌa fei au Elisha mei mamamaꞌa, maꞌuaa lomi hemea roꞌou na fafaꞌarai ununa—unaiaa Naaman mei Syria.”
28 Minaa ei ramaꞌa laloo fei synagogue, ronamina siba ei roꞌaa guainaa fei. 29 Rona asiꞌaa ma tetefaꞌasiꞌania aꞌa fei gufu fei ba roꞌaa siminia pu, rona nodugia dinaa pafoo fei maugeni, fei na paꞌidii humu pafona. 30 Maꞌuaa ina talaiꞌualao tapuu roꞌou ma aunu.
Jesus na Fawalaꞌanaa fei Spiriti Hafelo
31 Ina upuꞌaunulao yei Capernaum, hepalo gufu yei Galilee ma laloo fei Sabbath fipowe feroinaa ei ramaꞌa. 32 Ma rona hawainaa poaa roꞌou aꞌa fei feferoiana, uaa fei uꞌugana na paꞌi faufauna.
33 Laloo fei synagogue na paꞌi hemea na waduꞌia pigea, hepalo spiriti hafelo.b Namina aimemewai, 34 “Haa! Tamanu nunumiamu aꞌa haiꞌou, Jesus, mena Nazareth? Eni o nomai ba o foꞌafamaꞌeaa haiꞌodu? Una aida ba yoi mei Apunaiaa mei Haidaa!”
35 Jesus na warefaweꞌi, “Babanini! Walaꞌamai aꞌana!” Ma fei pigea na hubifapasia i maꞌaa minaa roꞌou ma walaꞌamai aꞌana ma lomi na fafeloaa ununa.
36 Minaa ei ramaꞌa, ronamina hawainaa poaa roꞌou ma fiwarewarei, “Tamanu eni feferoi eni? Fininaa forafora ma faufau ina warenaa aꞌa ei spiriti hafelo ma rona walaꞌamai!” 37 Ma fei uꞌugana namina talaipedunaa ei gufu yei.
Jesus na Farawaninaa Watauda
38 Jesus na diꞌininaa fei synagogue ma dinaa humuu Simon. Ma mei inaa haroo Simon namina babaifafelo ununa ma rona iꞌiginaa Jesus ba nei hadumia. 39 Siꞌei, ina fabalonaa aꞌana ma warefaweꞌi aꞌa fei funua ma na pedu funuana. Ina asiꞌaa ma hasufani hanaa roꞌou.
40 Fi lolo fei halo, minaa ei na paꞌi watauda mau funua, hefiꞌa rona dugamiaa roꞌou aꞌa Jesus ma ina augaa panina pafoo hememea roꞌou ma fapedugaa funuaa roꞌodu. 41 Ma ei pigea, rona walaꞌaa aꞌa watauda ma memewai ba, “Yoi, Naꞌuu mei Haidaa!” Maꞌuaa ina hotaꞌaa roꞌou ma apunainaa roꞌou ba roneiꞌaa wareware, uaa rona aida ba hia, mei Christ.c
Jesus na Uꞌu Laloo ei Synagogue
42 I baꞌa fei panii fei arewaa Jesus na dinaa fawelei abaa wawawau ramaꞌa. Ei ramaꞌa roimina lalabaginia ma roꞌaa bapaꞌia, rona ware ba ineiꞌaa diꞌininaa roꞌou. 43 Maꞌuaa ina ware, “Aꞌa hefiꞌadiai gufu unei uꞌugaa fei rawaniꞌa wareaa fei haparaiaa mei Haidaa, uaa sifeni feni paꞌafina i aloagiau.” 44 Ma ina uꞌuꞌu laloo ei synagogue Judea.d