MARK
John, mei Pudugufaia na Raꞌaꞌaugaa fei Tala
1
Feni, fafasuii feni rawaniꞌa wareaa Jesus Christ, mei Naꞌuu mei Haidaa.a2 Aleꞌei i neꞌinia mei mamamaꞌa Isaiah:
“A aloaa mena otalai tonaa wareau i maꞌamu
ma i raꞌaꞌaugaa fena talamu”—
3 “Na haroharo fei lao i podu.
‘Raꞌaꞌaugaa fena talaa mena Fasu,
ma fawanewaneꞌaugaa fena talana.’”
4 Siꞌei, John na nomai ma pudugufinaa ei ramaꞌa i podu. Ina warefanaa ei ramaꞌa ba ronei filoginaa naranaraa roꞌou ma pudugufai ma i futoaa ei hafeloꞌaa roꞌou, mei Fasu. 5 Minaa ei ramaꞌa tadiweꞌaiaa Judea ma Jerusalem, rona dinaa aꞌa John. Ei rona warefania ei hafeloꞌaa roꞌou, John na pudugufinaa roꞌou i laloo fei Ranu Jordan. 6 John na susuinaa fei susu, bigiꞌaa roꞌodu hugo camel ma fei adina, hudii manulelele. Ma hanana, ena teraupu ma musilao podu. 7 Ma sifeni, feni wareana: “I paꞌi hemea ramaꞌa i nomai neneu, na faufaudiai ma na muainau. Yau ana lomi na rawani ba a fabalou ma alaraa fei hafenaa pinena. 8 Yau na pudugufinaa hamuꞌou ranub ma hia, i pudugufinaa hamuꞌou fei Spiriti Apuna.”
Fei Pudugufaia ma Manimaniaa Jesus
9 Ma fei au fei, Jesus noranamai Nazareth, yei Galilee. Ma John na pudugufinia laloo fei Ranu Jordan. 10 Ei fi asiꞌaa laloo fei ranu Jesus, na fanunuaa fei gufu pafea na baꞌagigi ma fei Spiriti fi falorogio pafona maumauna aleꞌei pune. 11 Ma fei haroharofa norai yei gufu pafea, na ware aleꞌei: “Yoi, mena naꞌuu, mena una haguio ma namina niꞌeniꞌe aꞌamu.”
12 Siꞌei, fei Spiriti na alonaa Jesus i tau podu. 13 Jesus na guta laloo podu gunaroa paꞌania arewaa ma Satan ana fi manimania yei laloo podu. Jesus na guta hugiaa ei manulelele laloo podu ma ei aloꞌalo, rona omaꞌamaꞌaia yei.
Na Dugaa ei Rawarawa Otalai Nenera
14 Nenee fei ro aunaa John humuu boboꞌaia, Jesus na dinaa Galilee, wareaa fei rawaniꞌa warea noranarai aꞌa mei Haidaa. 15 Ina ware ba “Paꞌaa feni auna feni. Fei haparaiaa mei Haidaa na rafiꞌi. Filoginaa naranaraa hamuꞌodu ma neneraa eni rawaniꞌa warea!”
16 Ei fi tatalai adii fei Agii Galilee Jesus, ina fanunupaꞌaa Simon ma mei lofuna, Andrew. Laguꞌei sumai lepo agi, uaa lagua diaꞌagi. 17 Jesus na warenaa aꞌa lagua, “Nomai ma nenerau. Ma a feroinaa hamugua tonaa ramaꞌa aleꞌena hamunaꞌo to nia.” 18 Ana ei ua, laguna diꞌaugaa ei lepoo lagua ma neneraa Jesus.
19 Ei fi tatalaidilao maꞌidadiai adii fei Agii Galilee, na fanunupaꞌaa laguei filofui James ma John, laguei naꞌuu Zebedee. Laguꞌei hinuꞌaa ei lepoo lagua laloo fei wa. 20 Siꞌei, na haro fawanewaneinaa lagua. Ma laguna diꞌininaa mei amaa lagua, Zebedee mawe ei tameloi roꞌou laloo fei wa ma laguna nenegia.
Jesus na Fawalaꞌanaa Hepalo Spiriti Hafelo
21 Rona aununaa Capernaum ma i nomai fei Sabbath, Jesus na dinaa laloo fei synagogue ma feroinaa roꞌodu. 22 Ei ramaꞌa, ronamina baꞌarofo aꞌa ei feroiana, uaa na feroi aleꞌei hemea na paꞌi faufauna, abaa aleꞌei ei feroiaa Law. 23 Ana ei ua, hemea ramaꞌa laloo fei synagogue, mei na waduꞌia spiriti hafelo,c na mewaiware, 24 “Tamanu ei nunumiamu aꞌa haiꞌodu, Jesus, mena Nazareth? Ei o nomai ba o foꞌafamaꞌeaa haiꞌodu? Una apaꞌia ba yoi hini. Yoi, mena Apunaiaa mei Haidaa!”
25 Jesus na ware, “Babanini ma walaꞌamai aꞌana!” 26 Fei hafeloꞌa spiriti na nuenueinia ma memewai ma walaꞌaa aꞌana.
27 Ei ramaꞌa, ronamina naranara watauda ma fiꞌiꞌigai, “Tamanu feni? Hefeni manufau feroia na paꞌi faufauna ma ei hafeloꞌa spiriti ana ronamina guaipaꞌaa wareana!” 28 Fei uꞌugana namina talemaduarenaa ei gufu pedu yei Galilee.
Jesus na Farawaninaa Funuaa Watauda
29 Ei roꞌaa diꞌininaa fei synagogue, rona aunuhugiaa James ma John ma dinaa aꞌa fei gufuu Simon ma Andrew. 30 Mei inaa mei haroo Simon na funuhaino pafoo tawa. Ei ramaꞌa yei, rona warefanaa Jesus ba na babai unuu mei ramaꞌaa Simon. 31 Siꞌei, Jesus na dinaa aꞌana, tauaa panina ma faꞌasiꞌania. Fei funuana na pedu ma i dii, ina hasumaa ei hanaa roꞌodu.
32 Fei fafi fei, i lolo fei halo, ei ramaꞌa rona duginamii aꞌa Jesus ei ramaꞌa rona paꞌi funuaa roꞌou fipui aꞌa ei na waduꞌaa roꞌodu pigea. 33 Minaa ei ramaꞌa yei, ronamina omaꞌa ua papaa fei gigei. 34 Jesus na farawaninaa funuaa watauda ma alofatatalainaa watauda pigea, ei rona waduꞌaa ei ramaꞌa. Ma ina apunainaa ei pigea ba roneiꞌaa wareware; uatani, rona aida ba hia hini.
Jesus na Lafulafu Fawelei Lomi Ramaꞌa
35 Mafufuo badu, atawe arewafarawani, Jesus na asiꞌaꞌaununaa fawelei lomi ramaꞌa ba i lafulafu. 36 Simon ma ei roꞌei tatalaifipui aꞌana, rona aunu ma labaginia. 37 Ma roꞌaa nobapaꞌalao, rona ware aꞌana ba, “Minaa ei ramaꞌa, roi lalabaginio!”
38 Jesus na ware aꞌa roꞌodu, “O dii. O aununaa ena gufu opaꞌanawau ma ana a uꞌu yena. Siꞌena, ena a nogio.” 39 Ma namina tatalai yei Galilee. Ina uꞌu laloo ei synagogue roꞌou ma alofatalainaa ei pigea.
Hemea Ramaꞌa na Watawatai Ununa
40 Hemea watawataid na nomai aꞌana, faꞌunaa duꞌuna ma iꞌiginia, “Naꞌaa inapoꞌo rawani aꞌamu, farawaninau.”
41 Namina bauanai fei faloloaꞌiaa Jesus. Siꞌei, na roainaa panina, idoaa ununa ma ware, “Na rawani aꞌau. Ena unumu, i fafaꞌarai.” 42 Ana ei ua, na pedu ei watawatana ma na fafaꞌarai ei ununa.
43 Jesus na alofawanewaneinia ma warefaweꞌi aꞌana, 44 “Maꞌaia. Apuna warefanaa nemea maꞌuaa onei dinaa aꞌa mena bauaniaa humuu mei Haidaa ma fanaa ena fanamu wagina aleꞌei i warefanio Moses, aleꞌei uniꞌunina aꞌa roꞌou ba ona fafaꞌaraidii.” 45 Agia, i nolao, fimina uꞌuꞌu ma fatalainaa fei rawaniꞌaa Jesus aꞌana. Siꞌei ba ina uꞌuꞌu, fai loꞌe ba Jesus i waduꞌaifalelefo aꞌa hepalo gufu ma na guta uꞌugai ua fawelei loꞌe ramaꞌa. Maꞌuaa ei ramaꞌaa ena tadiweꞌaiaa gufu, ana roiminaꞌu noꞌualao aꞌana.