Jesus na Fatalainaa mei i Maꞌe Ununa
2
Nenee hefiꞌadiai arewaa, ei i hadiweꞌidinaa Capernaum Jesus, ei ramaꞌa, rona guainia ba Jesus na nodigimai gufu. 2 Watauda, rona papaꞌifigupuimai ma paꞌaa lomi na hawiaa roꞌodu fei laloo humu; namina pepesu. Auguu fei gigei, ana ronamina fihoroi. Ma ifi warefanaa roꞌodu fei rawaniꞌa warea. 3 Hefiꞌa, rona dugamii hemea ramaꞌa na maꞌe ununa. Gunaroa ramaꞌa, rona notabeiamai. 4 Siꞌei ba ronamina fihoroi, lomi rona noporopaꞌaloo mei ramaꞌa aꞌa Jesus. Roꞌadii, rona bigigiaa fei haꞌoo fei humu, fawelei nanaꞌaa Jesus. Mei ramaꞌa i maꞌe ununa, na haino pafoo fei hafenaa ununa ma rona fataularaiarai aꞌa Jesus. 5 I maꞌaia Jesus ba napaꞌaa weꞌi naranaraa roꞌodu, na warenaa aꞌa mei i maꞌe ununa, “Mena naꞌuu, ena hafeloꞌamu, una futoia.”6 Fei au fei, hefiꞌa ei feroiaa law, ana rona guta hugiaa roꞌodu. Ronamina naranara watauda. 7 “Tani i ware aleꞌei mei ramaꞌa mei? Ina warefafeloaa mei Haidaa. Lomi hemea i futoaa ei hafeloꞌa. Ana unaa mei Haidaa.”
8 Ana ei ua, Jesus na aidadii ei naranaraa roꞌodu. Ma ina warenaa aꞌa roꞌodu, “Tani hamomina naranara aleꞌei? 9 Afaia na maduta—fei una warenaa aꞌa mei i maꞌe ununa ba, ‘Ei hafeloꞌamu na futoia,’ o fei una ware ba, ‘Asiꞌaa, tonaa fei hafenaa unumu ma talai’? 10 Maꞌuaa siꞌei ba hamonei aida ba mei Naꞌuu Ramaꞌa, na paꞌi faufauna yeni malagufu ba i futoaa ena hafeloꞌa...” Ina warenaa aꞌa mei i maꞌe ununa, 11 “A ware aꞌamu, asiꞌaa, tonaa fei hafenaa unumu ma dinaa gufumu.” 12 Na asiꞌaa, tonaa fei hafenaa ununa ma talai i pudaa roꞌou ma diꞌininaa roꞌodu. Namina nanawala pudaa minaa ei ramaꞌa ma rona uduginaa mei Haidaa. Rona ware ba, “Lomi ona onaꞌu fanunupaꞌi heꞌa manumanu aleꞌeni feni!”
Na Dugaa Levi
13 Jesus na aunudinaa piye. Hefaa baua gupuu ramaꞌa, rona nomai aꞌana ma ina feroinaa roꞌodu. 14 Ei fi talailao, na fanunupaꞌaa Levi, mei naꞌuu Alphaeus na guta aꞌa fei palee ei otonaa mugoo poꞌii gavaman. Jesus na warenaa aꞌana, “Nenerau.” Levi na asiꞌaa ma nenegia.
15 Ifi hanana gufuu Levi Jesus, wataudadiai ei otonaa mugoo poꞌii gavaman ma ei hafeloꞌa ramaꞌa, rona hananafipui aꞌana mawe ei otalai nenerana, uaa watauda na nenegia. 16 Roꞌaa fanunuia aleꞌei ei feroiaa law, ei roꞌou Pharisee, rona iꞌigainaa ei otalai nenerana ba, “Tani i hananafipui aꞌa ei otonaa mugoo poꞌii gavaman ma ei ramaꞌa hafelo?”
17 Iꞌa guainaa fei, Jesus na warefanaa roꞌodu aleꞌei, “Abaa ena rona rawani ena ronei paꞌi hemea loꞌotaa, uaa ena rona paꞌi funua. Eni a norai, abaa ei re labaginaa ena wanewanea, uaa ena hafeloꞌa ramaꞌa.”
Rona Haninaa Jesus aꞌa fei Fabaoa
18 Ei otalai neneraa John ma ei Pharisee, rona fabao. Hefiꞌa ramaꞌa, rona nomai ma iꞌiginaa Jesus ba, “Tani ipoꞌo biyei ba, ei otalai neneraa John ma ei otalai neneraa ei Pharisee, rona fabao maꞌuaa ei otalai neneramu, lomi.”
19 Jesus na ware, “Nabaa hemea ba i lalai ma i bigiꞌaa hefaa hananaa, batanai ba roꞌaa fabao ei i guta aꞌa roꞌou? 20 Maꞌuaa iwe nomai fei au ba mei lalaia, lomi i guta aꞌa roꞌou, uaa hefiꞌadiai, rowe dugia. Ma aꞌa fena arewaa fena, rowe fabao.
21 “Loꞌe hemea ba i tawiꞌaa ei maninii ena manufau lawalawa ma waroꞌaa ei waraꞌaa watanai lawalawa. Nabaa i bigiꞌia aleꞌei, fei manufau maninii lawalawa, i rapudigeaa fei watanai lawalawa ma imina forafawaraꞌaꞌapoidinia. 22 Ana lomi hemea ramaꞌa i igiaa ei manufau wine aꞌa ei watanai peꞌii wine. Nabaa i bigiꞌia aleꞌei, fei manufau wine i fawaraꞌaa fei peꞌii wine ma fei wine ma fei peꞌina, laguꞌamina fai hafelo. Siꞌei ba fei manufau wine, ana ronei iginaa laloo ei manufau peꞌii wine.”
Mei Fasuu fei Sabbath
23 Jesus ma ei otalai nenerana, roꞌei tatalai dupuaa fei peꞌii corn hefaa Sabbath ma rona hufuꞌaa ei corn. 24 Rona warenaa aꞌa Jesus ei Pharisee, “Maꞌaia, ei otalai neneramu, rona barafeaa fei law laloo fei Sabbath.”
25 Ina warefanaa roꞌodu, “Haa, lomi hamona igoaa tamanu David na bigiꞌia ei hia ma ei maroana roꞌaa bao ma rona paꞌi nunumiaa roꞌou? 26 Aꞌa fei au Abiathar, mei paꞌaa bauaniaa humuu mei Haidaa, David na waduꞌainaa fei humuu mei Haidaa ma na hanaiaa ei faraa pidaua, ei rona apunainaa aꞌa mei Haidaa ma lomi na rawani aꞌa fei law ba nemeadiai i tonia. Ma ana ina fanaa ei faraa pidaua aꞌa ei maroana.