3 Jesus na warenaa aꞌa roꞌou, “Ana hamonaꞌu igoia tamanu na bigiꞌia David ma ei tafina, ei roꞌaa bao? 4 Ina waduꞌainaa fei humuu mei Haidaa, tonaa fei faraa pidaua na apunai ma hanaia. Maꞌuaa fei law na ware ba unaiaa mei bauaniaa humuu mei Haidaa, i hanaia. Ma ana na fanaa hefiꞌa aꞌa ei tafina.” 5 Ma Jesus na warenaa aꞌa roꞌou, “Mei Naꞌuu Ramaꞌa, hia Fasuu fei Sabbath.”

6 Ma aꞌa hepalodiai Sabbath, ina waduꞌainaa fei synagogue ma fi feroi ma hemea yei, fei panina maꞌau na maꞌe. 7 Ei Pharisee mawe ei feroiaa law, roꞌei labarai tala ba ro ware ba Jesus na bigifatata. Siꞌei, rona pupudainia ba i farawaninia laloo fei Sabbath. 8 Maꞌuaa Jesus na apaꞌidigaa ei naranaraa roꞌou ma na warenaa aꞌa mei na maꞌe panina, “Asiꞌaa ma mi ufalarai i maꞌaa roꞌodu.” Siꞌei, ina asiꞌaa ma na ufalarai yei.

9 Ma Jesus na warenaa aꞌa roꞌou, “A iꞌiginaa hamuꞌou, afaia na neneraa fei law laloo fei Sabbath: fei ba onei bigifarawani, o ba onei bigifafelo, fei ba onei fani harenua, o ba onei foꞌafamaꞌe?”

10 Ina fanununaa aꞌa minaa roꞌodu ma warenaa aꞌa mei ramaꞌa mei, “Roainalao fei panimu.” Ina bigiꞌia ma fei panina namina rawani. 11 Maꞌuaa ronamina sibafafelo ma fiwarewarei ba roꞌaa bigiꞌaa tamanu aꞌa Jesus.

12 Wagii ei arewaa ei, Jesus na aununaa papaa hepalo maugeni ba i lafulafu ma na guta yei fei poi fi lafulafunaa aꞌa mei Haidaa. 13 I baꞌamai fei arewaa, na harofamii ei otalai nenerana ma rafeinaa hefua ma helagui ba apostle: 14 Simon (mei ina roronia ba Peter), mei lofuna Andrew, James, John, Philip, Bartholomew, 15 Matthew, Thomas, James mei naꞌuu Alphaeus, Simon mei rona roroinia ba mei Zealot (mei na haguaa gufuna), 16 Judas mei naꞌuu James mawe Judas Iscariot—mei na aloia.

17 Ina upunogiaa roꞌou ma ufalarai pafoo fei mareꞌaa malagufu. Hepalo baua gupuu otalai nenerana, roꞌou yei mawe watauda paꞌaniaa ramaꞌa, noramiaa roꞌou, Judea, Jerusalem ma ei gufu piye na rafiꞌinaa Tyre ma Sidon. 18 Rona nomai ba roꞌaa guainia ma ba inei fapedugaa funuaa roꞌou. Ma ina fawanewaneaa ei na waduꞌaa roꞌou ei spiriti hafelo^a 19 ma minaa ei ramaꞌa ba roꞌaa idoia, uaa na paꞌi faufau i aꞌana. Ma ina fapedugaa funuaa minaa roꞌou.

20 I fanununaa aꞌa ei otalai nenerana, na ware:

23 “Aꞌa fei arewaa fei, hamoneimina niꞌeniꞌe ma palapala uaa na bauana fei ponoꞌaa hamuꞌou yei gufu pafea. Hamatee ana aleꞌei bigiꞌaa ei amaa roꞌou aꞌa ei mamamaꞌa.

27 “Maꞌuaa a warefanaa hamuꞌou ena hamofi guainau: Haguaa ena na bidibidi unuu roꞌou aꞌa hamuꞌou, farawani aꞌa ena rona siba aꞌa hamuꞌou, 28 haweginaa ena rona umuaa hamuꞌou ma lafulafunaa ena rona fafeloaa hamuꞌou. 29 Nabaa nemea na laparaa afuu hamuꞌou, fania pepei anaa. Nabaa nemea na topaꞌainaa hawaa uguu hamuꞌou, fania fei susu anaa. 30 Fani aꞌa minaa ei rona iꞌiginaa hamuꞌou ma hini i tonaa manumanuu hamuꞌou, apuna iꞌigihadiweꞌinia. 31 Tamanu nunumiaa hamuꞌou ba ronei bigiꞌia aꞌa hamuꞌou, bigiꞌia ana aleꞌei aꞌa roꞌou.

32 “Nabaa hamoꞌaa haguaa ei rona haguaa hamuꞌou, tamanu rawaniꞌana fei aꞌa hamuꞌou? Ena hafeloꞌa ana rona haguaa ei rona haguaa roꞌou. 33 Ma nabaa hamoꞌaa farawani aꞌa ei rona farawani aꞌa hamuꞌou, tamanu rawaniꞌana fei aꞌa hamuꞌou? Ei hafeloꞌa ana rona bigiꞌia aleꞌei. 34 Ma nabaa hamoꞌaa fani aꞌa hefiꞌa, ei hamona nara ba ronei hodiꞌia, tamanu rawaniꞌana fei aꞌa hamuꞌou? Ei hafeloꞌa ana rona fani aꞌa hefiꞌadiai hafeloꞌa ma rona nara ba hefiꞌadiai, ronei hodipedugia. 35 Maꞌuaa hamonei haguaa ena na bidibidi unuu roꞌou aꞌa hamuꞌou, hamonei farawani ma fani aꞌa roꞌou ma roneiꞌaa hodiꞌia. Ma nabaa aleꞌei, fei ponoꞌaa hamuꞌou imina bauanai ma hamowe oanaa naꞌuu mei Pafeai, uaa ina farawani aꞌa ei rona hafelo mawe ei lomi na ware ‘ta’ wagii fei rawaniꞌana. 36 Hamonei faloloaꞌinaa roꞌou, ana aleꞌei na faloloaꞌinaa hamuꞌou mei Amaa hamuꞌou.

37 “Apuna nara ba na tata nemea. Ma nabaa hamona nara aleꞌei, roꞌaa nara ba hamona tata. Apuna ware ba nemeadiai na tata ma nei to fagianaa. Ma nabaa aleꞌei, ana hamoꞌaa to fagianaa wagii ei tataa hamuꞌou. Futoaa ei tataa nemeadiai; nabaa aleꞌei, ana i futoaa ei tataa hamuꞌou mei Haidaa. 38 Fani ma hamowe paꞌidiai. Hamoꞌaa todiai manumanu i pafoinaa fei fanaa hamuꞌou. Hamowe to ana aleꞌei puduu fanaa hamuꞌou.”

39 Ma ana ina uꞌufanaa roꞌou feni warea hanunu: “Hemei pudawerai, ana i taupaꞌaa hemeadiai pudawerai? Naraa hamuꞌou ba lomi laguꞌaa pasinaa laloo huapu? 40 Mei i to feferoiana, lomi i muainaa mei feroiana, maꞌuaa, nabaa i fapedugaa fei feferoiana, hia aleꞌei mei feroiana.

41 “Tani omina labaginaa memee pudaa mei lofumu ma lomi ona apaꞌia ba na paꞌi hewagu haihai pudamu? 42 Tani o ware aꞌa mei lofumu ba, ‘Olofu, ya a doꞌo siminaa fei memee pudamu,’ ma lomi ona fanunupaꞌaa fei hewagu haihai pudamu? Yoi paꞌaa wareꞌoni. Oneidoꞌo siminaa fei hewagu haihai pudamu. Ma opowe fanunufarawani ba oꞌaa siminaa fei memee pudaa mei lofumu.

43 “Lomi hepalo rawaniꞌa haihai ba i hafelo fuana ma ana lomi hepalo hafeloꞌa haihai ba i rawani fuana. 44 Hepapalo haihai, oꞌou apaꞌia aꞌa ei fuana. Ei ramaꞌa, lomi roꞌaa hufuꞌaa ei fuaa haꞌoloo aꞌa fei haihai na hogia, o ei fuaa nasi aꞌa fei haihai na hogia. 45 Mei rawaniꞌa i faleleꞌanamii ei rawaniꞌa bigiꞌana aꞌa fei rawaniꞌa naranarana. Ma mei hafeloꞌa i faleleꞌanamii ei hafeloꞌa bigiꞌana aꞌa fei hafeloꞌa naranarana. Uaa tamanu noranamai laloo iana, i leleꞌaa umuna.

46 “Tani o harofau ba ‘Mena Fasu, mena Fasu,’ ma lomi ona bigiꞌaa ei wareau? 47 A ware famaꞌaio batanai maumau mei na nomai aꞌau ma guainaa wareau ma bigiꞌia. 48 Hia aleꞌei hemea fadufaduaa humu, hemea na agifawalalonaa pu ei u pafoo naꞌa. Ma nawe nomai fei baua mamaua ma hapunaiꞌonaa fei humuna, maꞌuaa lomi na nueipaꞌia, uaa na fadufaweꞌia. 49 Maꞌuaa mei na guainaa wareau ma lomi na bigiꞌia, hia aleꞌei mei na faꞌugaa ei u humuna pafoo piye, lomi naꞌa harona. I nomai fei baua mamaua, na nueinaa fei humuna ma na pasi wataꞌoꞌo.”