2 Siꞌeni, eni haraa ei hefua ma helagui apostle: rawarawa, Simon (rona roroinia Peter) ma mei lofuna, Andrew; James, mei naꞌuu Zebedee ma mei lofuna John; 3 Philip ma Bartholomew; Thomas ma Matthew, mei otonaa mugoo poꞌii gavaman; James, mei naꞌuu Alphaeus ma Thaddaeus; 4 Simon mei Zealot ma Judas Iscariot, mei ba i aloia.

5 Eni hefua ma helagui eni, Jesus na aloaa roꞌou ma fanaa eni warea eni: “Apuna aununaa aꞌa ei Gentile, o dinaa hepalo gufu yei Samaria. 6 Maꞌuaa hamonei dinaa aꞌa ei madidiaa sipsipii Israel. 7 Ena hamona nowau, uꞌugaa feni uꞌuga feni: ‘Fei haparaia pafea na rafiꞌi.’ 8 Farawaninaa ei funua, faꞌasiꞌanaa ei maꞌea, farawaninaa ei watawatai,^+\fr fawalaꞌanaa ei pigea. Hamona to ua, te, hamonei fani ua. 9 Apuna notoo gold, o silver, o copper i aꞌa ena adii hamuꞌou. 10 Hamoneiꞌaa notoo raba aꞌa fei tatalaia fei, o pafuaa lawalawa, o hafenaa pinai, o hepalo o, uaa ei ramaꞌa, ronei fani gutanaa mei bigiꞌa.

11 “Tamanu ena bauana o pusuꞌo gufu hamona dinaa lalona, labaginaa nemea ramaꞌa na honua yena ma guta i humuna hawina hamona aunu. 12 Ena hamona waduꞌinaa fei humuna, hamonei haweginia. 13 Nabaa na rawani ua fei humuna, fei rawaniꞌaa hamuꞌou nei ude lalona ma nabaa lomi, hamonei tohadiweꞌinia. 14 Nabaa nemea, lomi i taufagutanaa hamuꞌou, o guainaa ei wareaa hamuꞌou, difoifoinaa ei piyee pinee hamuꞌou ena hamona diꞌininaa fena gufu fena. 15 A warefaꞌuai aꞌa hamuꞌou ba aꞌa fei arewaa dududua, na bauanaidiai fagianaa fena gufu fena laraa Sodom ma Gomorrah.

16 “A aloaa hamuꞌou aleꞌei sipsipi dupuaa ei ponotoo podu. Siꞌei, hamonei anoꞌanoi aleꞌei waꞌa ma inei rawani maumau hamuꞌou aleꞌei ei padu.

17 “Omaꞌamaꞌaa hamuꞌou aꞌa ena ramaꞌa; roꞌaa aunaa hamuꞌou panii ei bauaniaa gufu ma hafugaa hamuꞌou laloo ei synagogue roꞌou. 18 I aꞌau, rowe faꞌufalarainaa hamuꞌou i maꞌaa ei bauaniaa gavaman mawe ei hapara ba aleꞌei umuu aꞌa roꞌou mawe ei Gentile. 19 Maꞌuaa ena rona panaroroꞌinaa hamuꞌou, apuna naranara watauda ba hamuꞌou wareaa tamanu, o batanai hamona ware. Aꞌa fena au fena, hamowe narapaꞌaa tamanu ba hamoꞌaa wareia 20 uaa abaa hamuꞌou ena hamuꞌou fi wareware, maꞌuaa hamuꞌou fi umuinaa fei Spiritii mei Amaa hamuꞌou.

21 “Ei filofui, ana roꞌaa aloaa ei lofuu roꞌou maꞌea ma nemea ama, ana i aloaa mei naꞌuna; ei baduu, roꞌaa barafeaa wareaa ei ama ma inaa roꞌou ma alonaa roꞌou maꞌea. 22 Minaa ei ramaꞌa roꞌaa fabidibidinaa unuu roꞌou hamuꞌou uaa yau maꞌuaa, hini i ofafaufau nopaꞌaloo fei pedupeduna, i tela. 23 Ena rona haperararaiaa hamuꞌou i aꞌa hepalo gufu, poninaa aꞌa hepalodiai. A warefaꞌuai aꞌa hamuꞌou, atawe pedu fei tatalaiaa hamuꞌou aꞌa ei baua gufuu Israel ma i nomai mei Naꞌuu Ramaꞌa.

24 “Hemei baduu feferoi, lomi i muainaa mei feroiana ma hemei nafi lomi i muainaa mei fasuna. 25 Na rawanidii nabaa mei baduu aleꞌei mei feroiana ma mei nafi aleꞌei mei fasuna. Nabaa hefiꞌa, rona ware ba mei bauaniaa fei humu, hia, Beelzebub,^b ei maroaa humuna anaa!

26 “Siꞌei, apuna maꞌauaa roꞌou. Tamanu na udeꞌopaꞌai, rowe uꞌugia nefarani ma tamanu na opaꞌai iwe udeꞌareꞌare ua. 27 Tamanu una wareia aꞌa hamuꞌou poi, hamonei wareia na asiꞌaa fei halo; tamanu roꞌaa warefagigii adiaa hamuꞌou, hamonei warefagipeia i pupuaa ei humu. 28 Apuna maꞌau aꞌa ei rona foꞌafamaꞌeaa fei unu ma lomi ba roꞌaa foꞌafamaꞌepaꞌaa ei na ude laloo ei naranara. Maꞌuaa hamonei maꞌauaa Mei ba i foꞌafamaꞌepaꞌaa minaa lagua yei wagii fei gufu hafelo. 29 Haa, abaa ponoꞌaa guapaloei pusuꞌo manufifidau aleꞌei hepalo pusuꞌo mugoo poꞌi?^c Maꞌuaa lomi hepalo i pasinaa pu nabaa lomi i ugainia mei Amaa hamuꞌou. 30 Ma ana, hepapalo hugoo tabaa hamuꞌou, ina wareidigia. 31 Siꞌei, apuna maꞌau, uaa na awatana hamuꞌou laraa watauda pusuꞌo manufifidau.

32 “Hini i ware ba ina apaꞌau i pudaa ramaꞌa, ana a ware ba una apaꞌia i pudaa mei Amau i pafea. 33 Maꞌuaa hini i ofadugau i pudaa ramaꞌa, ana a ofadugia i pudaa mei Amau i pafea.

34 “Hamoneiꞌaa nara ba ena a nomai ba a fagutafarawaninaa ei ramaꞌa yeni malagufu. Ena a nomai, aꞌa ba a fagutafarawaninaa ei ramaꞌa, uaa una notomai fei wadu. 35 Uaa ei a nomai ba uꞌa fafisibainaa

37 “Hini na mua fei haguana amana ma inana laraa fei haguana yau, lomi i raraba aꞌau; hini na mua fei haguana mei naꞌuna baduu wawane o pifine laraa fei haguana yau, lomi i raraba aꞌau; 38 ma hini lomi na harenaa fei hawafolona ma nenerau, lomi i raraba aꞌau. 39 Hini ba i urofaa fei harenuana, iwe paꞌai aꞌana ma hini ba i fapaꞌainaa fei harenuana aꞌau, iwe tohadiweꞌidinia.

40 “Hini i fagutanaa hamuꞌou, ina fagutanau ma hini i fagutanau, na fagutanaa mei i aloamiau. 41 Hini i fagutanaa nemea mamamaꞌa uaa hia mamamaꞌa, iwe tonaa fei ponoꞌaa mei mamamaꞌa ma hini i fagutanaa nemea wanewanea uaa ina wanewane, iwe tonaa fei ponoꞌaa mei wanewanea. 42 Ma nabaa nemea i fani hefaa baraa ranu aꞌa nemea eni pusuꞌo otalai nenerau, uꞌei warefaꞌuai aꞌa hamuꞌou ba lomi i paꞌai ei ponoꞌana.”