2 Nenee oloroa arewaa Jesus na nodugaa Peter, James ma John. Ma uniaa roꞌou, rona faneaa hepalo tarea maugeni. Yei, i maꞌaa roꞌodu, na filogii fei maumauna. 3 Fei lawalawana namina poꞌi agime. Fei poꞌiana, lomi na fipupuduinaa eni fesuaa hemea yeni malagufu. 4 Laguna faꞌarewa pudaa roꞌodu Elijah ma Moses ma laguna fiwarewarei aꞌa Jesus.

5 Peter na warenaa aꞌa Jesus, “Rabbi, na rawani ba oꞌou yeni. Ina rawani ba haiꞌodu bigiꞌaa odumanu pale. Hepalo yoi, hepalo Moses ma hepalo Elijah.” 6 (Lomi ina aida ba i wareaa tamanu. Ronamina maꞌaufafelo).

7 Ma, hepalo papalei na sufudaimai ma hawaipaꞌainaa roꞌodu ma hepalo lao na warerai aꞌa fei papalei: “Simeni, meni Naꞌuu, meni yau na haguia. Guainia!”

8 Ana ei ua ma roꞌaa fifanunui, lomi hemeadiai ramaꞌa aꞌa roꞌou, uniaa Jesus.

9 Ei roi upugio aꞌa fei maugeni, Jesus na warefaweꞌi aꞌa roꞌodu ba roneiꞌaa warefanaa nemea ei rona fanunuia hawina na asiꞌadii aꞌa fei maꞌea mei Naꞌuu Ramaꞌa. 10 Ronaꞌo toꞌuaia aꞌa roꞌodu ma fiwarewarei ba tamanu hanuu fei asiꞌana aꞌa fei maꞌea.

11 Ma rona iꞌiginia ba, “Tani ei feroiaa Law, roꞌaa ware ba rawarawa nei nomai, Elijah?”

12 Jesus na ware, “Paꞌaa faꞌua ba neidoꞌo nomai Elijah ma pagihadiweꞌinaa minaa ei manumanu. Tani roꞌaa neꞌinia ba mei Naꞌuu Ramaꞌa neimina tonaa fiꞌina ma hararasia? 13 Maꞌuaa a warefanaa hamuꞌou ba na nodigimai Elijah ma rona bigiꞌia aꞌana minaa ei manumanu aleꞌei nunumiaa roꞌou, ana aleꞌei ro neꞌinia.”

14 Roꞌaa nomai, rona fanunupaꞌaa ei feroiaa Law, roi fiharenii aꞌa hefiꞌadiai otalai nenera ma hefa baua gupuu ramaꞌa. 15 Ana ei roꞌaa fanunupaꞌaa Jesus minaa ei ramaꞌa, rona baꞌarofofafelo ma ponisuafinia.

16 Ina iꞌigai, “Tamanu ei fihareniaa hamuꞌou aꞌa roꞌou?”

17 Na ware hemea dupuaa roꞌodu, “Mena feroia, una dugamii meni naꞌuu, baduu wawane, meni na waduꞌia pigea. Ma fei pigea, na fafanaonaa laona ma lomi na wareware. 18 Ena inafaneꞌo guafia, na bainafaꞌinia malagufu. Ina pugapugaa poana, fiꞌuꞌuinaa difona ma na waiwai ununa. Una iꞌigainaa ei otalai neneramu ba ronei fawalaꞌania maꞌuaa lomi rona hawia.”

19 Jesus na ware, “Hamuꞌou ena ramaꞌaa taweni, lomi na weꞌi naranaraa hamuꞌou. Ipoꞌo pedu nahaiga fena maumau hamuꞌou aleꞌena? Dugifanamiau mena baduu.”

20 Siꞌei, rona dugialao ma i fanunupaꞌaa Jesus fei pigea, maduare ua na faꞌaꞌerapurapuaa unuu mei baduu. Ina pasinaa malagufu, weloweloi ma na pugapugaa poana.

21 Jesus na iꞌigainaa mei amaa mei baduu, “Figa malaa gutanana aleꞌeni?”

Ina ware, “Ena ifi badui 22 nopaꞌamii wagieni, inaꞌo suminia hafi o ranu ba i foꞌafamaꞌeia. Maꞌuaa nabaa ona hawia ba o bigiꞌaa heꞌa manumanu, te, faloloaꞌinaa haiꞌou ma hadumaa haiꞌou.”

23 Jesus na ware, “Ei wareamu ba, ‘Nabaa una hawia’? Minaa ena manumanu na maꞌatalaa aꞌa hini na weꞌi naranarana.”

24 Ana ei ua, mei amaa mei baduu na haroharo ba, “Na weꞌi naranarau. Hadumau aꞌa feni naranarau, fena lomi na weꞌi!”

25 Ma i fanunuia Jesus ba roi ponimai fawelei aꞌana, ei watauda ramaꞌa, na warehotaꞌaa fei spiriti hafelo,^a “Mena pigea, mena lotoo adia ma umuloo, a warefanio, walaꞌamai aꞌana ma oneiꞌawe waduꞌaidinia.”

26 Fei pigea na aimemewai, na faꞌaꞌerapurapuaa ununa ma walaꞌaa. Mei baduu na fafanunu aleꞌena hemea maꞌea. Siꞌei, watauda, rona ware ba, “Ina maꞌe.” 27 Maꞌuaa Jesus na tauaa panina, faꞌufalaginia ma ina ufalarai.

28 I waduꞌaidiginaa fei humu Jesus, ei otalai nenerana, rona iꞌiginia ei uniaa roꞌodu, “Tani lomi haiꞌouna fawalaꞌapaꞌia?”

29 Ina ware, “Fena maumau aleꞌena, i noꞌuamai aꞌa fei lafulafua.”^b

30 Rona diꞌininaa fawelei ma talaifaloginaa Galilee. Jesus lomi na nunuminaa nemea ba nei aida ba roꞌou hitani, 31 uaa fi feroinaa ei otalai nenerana. Na warenaa aꞌa roꞌodu, “Mei Naꞌuu Ramaꞌa, rowe aloia aꞌa ramaꞌa. Rowe foꞌafamaꞌeia ma nenee oduai arewaa iwe asiꞌaa.” 32 Maꞌuaa lomi na arewa aꞌa roꞌodu ei hanuiana ma rona maꞌau ba roꞌaa iꞌiginia hefei.

33 Rona dinamii Capernaum ma laloo fei humu, ina iꞌiginaa roꞌodu, “Tamanu fei fihareniaa hamuꞌodu i maꞌaa tala?” 34 Maꞌuaa ronamina babanini. Uatani, yei maꞌaa tala rona fiharenii ba hini i bauanai.

35 Jesus na guta ma harofaa ei hefua ma helagui ma na ware ba, “Hini i nunuminia ba hia rawarawa, neipaꞌaa oanaa mugi ma nafii aꞌa minaa ei ramaꞌa.”

36 Ina dugaa hemea baduu pusuꞌo ma faꞌufalaginia dupuaa roꞌou. Ma aꞌa guapaloei panina na poroꞌaa mei baduu ma warenaa aꞌa roꞌou, 37 “Aꞌa fei harau, hini i taufagutanaa hemea baduu pusuꞌo aleꞌeni meni, ina taufagutanau. Ma hini i taufagutanau, abaa fi taufagutanau, maꞌuaa mei na aloagiau.”

38 Na ware John, “Feroia, haiꞌouna fanunupaꞌaa hemea na fawalaꞌanaa ei pigea wagii fei haramu ma haiꞌouna ware aꞌana ba nei pedu, uaa hia, abaa hemea oꞌodu.”

39 Na ware Jesus, “Apuna pauniana. Lomi hemea i bigiꞌaa hepalo foigia aꞌa fei harau ma hinene, i warefafeloau aꞌa hepalo manumanu. 40 Uaa hini loꞌe na fadugeaa oꞌodu, hia aꞌa oꞌou. 41 A warefaꞌuai aꞌa hamuꞌodu ba hini i fanio hepalo baraa ranu wagii fei harau, uaa yoi aꞌa Christ, paꞌaa lomi ba iwe paꞌai fei ponoꞌana.

42 “Hini i susuaninaa nemea eni baduu pusuꞌo, nemea na weꞌi naranarana aꞌau, na rawani ba roꞌaa habeꞌaa huaa mei ramaꞌa mei aꞌa hepalo baua mugoo ma famomoguia agi. 43 Naꞌaa fei panimu i fafeloio, lafigifamosuia. Na rawaninio ba onei paꞌi hepalo ua pani ma paꞌi harenuamu laraa fei ba o paꞌi guapalo pani ma dinaa aꞌa fei hafi lomi i peretoo. 44\f + \fr 9:44 \ft Hefiꞌa neꞌia ba peretoo, 44 yei / “‘waꞌawaꞌaa roꞌou, lomi na maꞌe, / ma fei hafi lomi i peretoo.’\f* 45 Ma naꞌaa fei pinemu na fafeloio, lafigifamosuia. Na rawaninio ba o waduꞌaitonaa fei harenua lomi i pedutoo fininaa afetoaa pinemu aꞌa fei gufu pafea laraa fei ba o paꞌi guapalo pinai ma i guꞌaio fei hafi lomi i peretoo. 46\f + \fr 9:46 \ft Hefiꞌa neꞌia ba peretoo, 46 yei / “‘waꞌawaꞌaa roꞌou, lomi na maꞌe, / ma fei hafi lomi i peretoo.’\f* 47 Ma naꞌaa fei pudamu na fafeloio, wenuꞌia. Na rawaninio ba o waduꞌainaa fei haparaiaa mei Haidaa aꞌa hepalo ua puda laraa fei ba ona paꞌi guapalo puda ma dinaa fei hafi lomi i peretoo. 48 Yei,

50 “Fei agi na rawani maꞌuaa, nabaa i paꞌai fei agiꞌagiana, o faꞌagiꞌagi batanaidinia? Nei paꞌi agi laloo iaa hamuꞌou ma hamonei gutafirawanii ua.”