Jesus na Faguaa Gunaroa Pufabaꞌa
8
Aꞌa ei arewaa ei, hepalodiai baua gupuu ramaꞌa, rona figupui. Siꞌei ba paꞌaa lomi hanaa roꞌou, Jesus na haronaa aꞌa ei otalai nenerana ma ware, 2 “Na paꞌi faloloaꞌiau aꞌa eni ramaꞌa rona oafipuidii aꞌau oduai arewaa ma lomi duꞌua ba roꞌaa hanana. 3 Nabaa a alonaa roꞌodu gufuu roꞌou ma roꞌaa notonaa baoaa roꞌodu, roꞌaa nomaralelelao tala, uaa gufuu hefiꞌa roꞌodu, rauaa.” 4 Rona ware ei otalai nenerana, “Feni rauaa gufu aleꞌeni, i to hitani faraa pidaua hemea ba i faguaa roꞌodu?”
5 Na iꞌigai Jesus, “Hamona paꞌi hefiga faraa pidaua?”
Rona ware, “Olorompalo.”
6 Ina ware aꞌa ei ramaꞌa ba ronei guta pafoo malagufu. I todigaa ei olorompalo faraa pidaua ma waredii ba ‘ta’, na bidigedigeia ma fanaa ei otalai nenerana ba ronei augia i maꞌaa ei ramaꞌa ma rona bigiꞌia aleꞌei. 7 Ana rona paꞌi maꞌida pusuꞌo nia; ma ana ina ware ba ‘ta’ ma warenaa aꞌa ei otalai nenerana ba ronei alaginia. 8 Ei ramaꞌa, rona hanana ma ronamina magu. Hinene, ei otalai nenerana, rona paiaa olorompalo pa, na pepesu ei dufuu duꞌua. 9 Ina paꞌi aleꞌei gunaroa pufabaꞌa wawane yei. I alodigaa roꞌou, 10 na hugi pafoo wa aꞌa ei otalai nenerana ma dinaa fawelei Dalmanutha.
Ei Pharisee, Rona Iꞌigainaa Hepalo Foigia
11 Ei Pharisee, rona nomai ma ronaꞌaa fiharei aꞌa Jesus. Siꞌei ba roꞌaa mania, rona iꞌigainia ba nei famaꞌaa roꞌodu hepalo foigia i norai pafea. 12 Inamina fawenaitemu ma ware, “Tani taweni ro iꞌigainaa hepalo hilalaa foigia ba unei famaꞌaa roꞌou? A warefaꞌuai aꞌa hamuꞌou, lomi ba awe famaꞌaa roꞌou.” 13 Na diꞌininaa roꞌou, na hugidiai pafoo wa ma aununaa pepei.
Fei Fafuafuaa ei Pharisee ma Herod
14 Ei otalai nenerana, rona madiꞌinia ba roꞌaa notoo faraa pidaua maꞌuaa, rona paꞌi hepalo faraa pidaua aꞌa roꞌou pafoo wa. 15 Jesus na aweinaa roꞌou, “Omaꞌamaꞌa. Hamonei omaꞌamaꞌaa hamuꞌou aꞌa fei fafuafuaa ei Pharisee ma Herod.”
16 Rona fiwareinaa fei ma ware, “Woro ei i ware aleꞌei uaa ba lomi ona paꞌi faraa pidaua.”
17 Na apaꞌidigaa ei fiwareiaa roꞌou, na iꞌigainaa roꞌou Jesus, “Tani hamuꞌou fiwarei ba lomi hamona paꞌi faraa pidaua? Ana hamotapoꞌo fanunuꞌapaꞌia? Na waiwai tabaa hamuꞌou? 18 Hamona paꞌi pudaa hamuꞌou ma ana lomi hamonaꞌu fanunupaꞌi ma na paꞌi adiaa hamuꞌou ma ana lomi hamonaꞌu guaipaꞌi? Ma ana lomi hamonaꞌu nonominia? 19 Ei a bidigedigeaa haipaniei faraa pidaua aꞌa ei haipani pufabaꞌa, hefiga pa na pepesu aꞌa ei masii faraa pidaua hamona tonia?”
Rona ware, “Hefua ma guapalo.”
20 “Ma ei a bidigedigeaa ei olorompalo faraa pidaua aꞌa ei gunaroa pufabaꞌa, hefiga pa na pepesu aꞌa ei masii faraa pidaua hamona tonia?”
Rona ware ba, “Olorompalo.”
21 Ina warenaa aꞌa roꞌodu ba, “Ana hamotapoꞌo apaꞌia?”
Hemea Pudawerai Yei Bethsaida nawe Fanunupaꞌi
22 Rona sufudai Bethsaida ma hefiꞌa ramaꞌa, rona dugamii hemea pudawerai aꞌa Jesus ma iꞌigifaweꞌi aꞌana ba inei idoia. 23 Na tauaa panii mei pudawerai ma noduginaa hia auguu fei gufu. I huwidigaa pudaa mei ramaꞌa ma audigaa panina pafona, Jesus na iꞌigai, “Ona fanunupaꞌi hepalo manumanu?”
24 Na aranaa paꞌudu ma ware, “Na fanunupaꞌi ramaꞌa; rona fafanunu aleꞌei haihai, rona tatalai.”
25 Jesus na augaa panina hepoadiai pudaa mei ramaꞌa. Siꞌei, fei pudana na wera ma na fanunupaꞌi ma fanunufarawanipaꞌaa minaa ei manumanu. 26 Ba i alohadiweꞌidinia humuna, Jesus na ware, “Apuna famaua gufu.”a
Peter na Ware ba Jesus, Hia Mei Christ
27 Jesus ma ei otalai nenerana, rona aununaa ei gufu papaa Caesarea Philippi. I maꞌaa tala, ina iꞌiginaa roꞌodu, “Ei ramaꞌa, rona ware ba yau hini?”
28 Rona ware, “Hefiꞌa, rona ware ba yoi John, mei Pudugufaia; hefiꞌa ba Elijah; ma hefiꞌadiai ba hemea ei mamamaꞌa.”
29 Ina iꞌigai, “Ma hamuꞌou? Hamona ware ba yau hini?”
Na ware Peter ba, “Yoi, mei Christ.”b
30 Jesus na aweinaa roꞌodu ba roneiꞌaa warefanaa nemea ba hia hini.
Jesus na Wareꞌaugaa fei Maꞌeana
31 I dii, na feroinaa roꞌodu ba mei Naꞌuu Ramaꞌa, neipaꞌaa tonaa fiꞌina aꞌa watauda manumanu ma roꞌaa ofadugia ei bauaniaa gufu, ei famamoaa humuu mei Haidaa mawe ei feroiaa law. Ma hefiꞌa, rowe foꞌafamaꞌeia ma nenee oduai arewaa, i asiꞌadiai. 32 Ina faꞌarewaiaa feni ma Peter na dugitataꞌainia ma warehotaꞌia.
33 Maꞌuaa i momoꞌai ma fanununaa ei otalai nenerana, na hotaꞌaa Peter, “Dinaa neneu, Satan! Lomi ona paꞌi naranaramu aꞌa ei manumanuu mei Haidaa, maꞌuaa ei manumanuu ramaꞌa.”
34 Ma ina haronaa aꞌana fei gupuu ramaꞌa mawe ei otalai nenerana ma ware ba, “Hini ba i nenerau, inei rawaꞌaꞌafai aꞌa ei nunumiana, tonaa fei hawafolona ma nenerau. 35 Uaa hini ba i panarofaa fei harenuana,c iwe paꞌai maꞌuaa, hini i fapaꞌainaa fei harenuana aꞌau ma aꞌa fei rawaniꞌa warea, i tela. 36 Tamanu rawaniꞌana nabaa hemea i tonaa minaa feni malagufu maꞌuaa na fapaꞌainaa fei harenuana? 37 O, tamanu i fania hemea ba i filoginia aꞌa fei harenuana? 38 Nabaa nemea na mamafa aꞌau ma ei wareau laloo feni au taweni, feni rona fiharoharoipaꞌai ma pepesu aꞌa ei maumau hafelo, te, ana iwe mamafa aꞌana mei Naꞌuu Ramaꞌa ena na nomai wagii fei haweraa mei Amana fipui aꞌa ei apunaia aloꞌalo.”