Ei Feroia Noranamai aꞌa ei Upu Mina
15
I dii, hefiꞌa ei Pharisee mawe ei feroiaa law rona dinaa aꞌa Jesus, noramiaa roꞌou, Jerusalem ma rona iꞌigai, 2 “Tani roꞌaa barafeaa ei maumau ei upuu oꞌou ei otalai neneramu? Lomi ronadoꞌo huwe panii roꞌou nabaa roꞌaa hanana!”3 Jesus na ware, “Hamatani hamuꞌou barafeaa ei wareaa mei Haidaa uaa ei maumau ei upuu hamuꞌou? 4 Uaa mei Haidaa na ware, ‘Maꞌauaa mei amamu ma inamu’ ma ‘Hini i umuaa mei amana o inana, ronei foꞌafamaꞌeia.’a 5 Maꞌuaa hamona ware ba nabaa nemea na warenaa aꞌa mei amana o inana ba, ‘Fei ba a fanio, a fanaa mei Haidaa.’ 6 Siꞌei, lomi ina maꞌauaa amanab aꞌa fei fanana. Siꞌei, hamuꞌou barafeaa fei wareaa mei Haidaa uaa fei maumau hamuꞌou. 7 Hamuꞌou ena wareꞌoni! Paꞌaa faꞌua ei wareaa Isaiah:
8 “‘Eni ramaꞌa eni, rona maꞌauau aꞌa ei habaꞌumuu roꞌou,
maꞌuaa ei naranaraa roꞌou, na raua aꞌau.
9 Lomi hanuu ei losuiaa roꞌou yau;
ei feroiaa roꞌou, naranaraa ramaꞌa ua.’”
Ei Fafaꞌaraia ma Loloaa Manumanu
10 Jesus na haronamii aꞌana fei gupuu ramaꞌa ma na ware, “Guainia ma apaꞌia. 11 Tamanu ina waduꞌaa poaa hemea ramaꞌa, lomi i ‘faloloaia’, maꞌuaa tamanu na leleꞌaa i poana, sifei, fei na ‘faloloaia’ pudaa mei Haidaa.”
12 I dii, ei otalai nenerana rona nomai aꞌana ma iꞌigainia, “Ona aida ba ei Pharisee, rona ra ei roꞌaa guainaa fei?”
13 Ina ware, “Minaa ei fudaa, ei abaa faroaa mei Amau pafea, iwe fufufininaa ei waraa roꞌou. 14 Diꞌininaa roꞌou, uaa rona pudawerai ma ronaꞌaida talaidugaa ei ramaꞌa.c Nabaa hemea pudawerai na talaidugaa hemeadiai pudawerai, laguꞌamina pasifipuinaa laloo fei huapu.”
15 Peter na ware, “Italalafuifanaa haiꞌou fei warea hanunu.”
16 Jesus na iꞌiginaa roꞌou, “Haa, ana fi waiwai tabaa hamuꞌou? 17 Lomi hamona aida ba tamanu na waduꞌainaa fei habaꞌumu, i dinaa pahanana ma i leleꞌalao? 18 Maꞌuaa tamanu na leleꞌaa aꞌa fei habaꞌumu, norai aꞌa ei naranara ma na ‘faloloaa’ mei ramaꞌa. 19 Uaa laloo fei naranara, ina nomai ei hafeloꞌa naranara, foꞌafamaꞌea, fiharoharoipaꞌaia, fitatafipaꞌaia, fafanaoa, warefasifi ma ei wiwitoia. 20 Siꞌei, ei na ‘faloloaa’ hemea ramaꞌa; maꞌuaa, nabaa nemea lomi na huwenaa panina ma hanana, abaa na ‘faloloaia’.”
Fei Narafaweꞌiaa mei Pifinee Canaan
21 Iꞌa diꞌininaa fei gufu fei, Jesus na dinaa fawelei Tyre ma Sidon. 22 Hemea pifinee Canaan, humuna na rafiꞌinaa Tyre ma Sidon, ina nomai aꞌana ma na haroharonaa aꞌana, “Mena Fasu, mena Naꞌuu David, faloloaꞌinau! Mei naꞌuu, baduu pifine namina nanamuinia uaa na waduꞌia pigea.”
23 Lomi na wareaa hepalo warea Jesus. Siꞌei, ei otalai nenerana rona nomai aꞌana ma na iꞌigifaweꞌi aꞌana, “Aloia, uaa ifimina aiharoharomai aꞌa oꞌou.”
24 Ina ware, “Ina aloamiau aꞌa ei paꞌaiaa sipsipi Israel ua.”
25 Mei pifine na nomai ma faꞌunaa duꞌuna i maꞌana ma ware, “Mena Fasu, hadumau!”
26 Ina ware, “Lomi na wanewane ba a tonaa ei faraa pidaua, ei hanaa ei baduu ma faguaa ei hapee roꞌou, ponoto.”
27 Ina ware ba, “Faꞌua, mena Fasu, maꞌuaa ei ponoto ana rona hanaiaa ei memee faraa pidaua, ei na pasinaa haroo tawaa ei fasuu roꞌou.”
28 Siꞌei, na ware Jesus, “Mena pifine, namina weꞌi naranaramu! Una bigidigia fei iꞌigiamu.” Ma mei naꞌuna na rawani ana aꞌa fei au fei.
Jesus na Fawanewaneaa Watauda
29 Jesus na diꞌininaa fei gufu fei ma tatalai i papaa fei Agii Galilee. I dii, ina fanenaa fei maugeni ma na guta. 30 Hefiꞌa baua gupuu ramaꞌa, rona nomai aꞌana, nodugamii ei afetoo, ei pudawerai, ei ibaꞌiba, ei umuloo mawe wataudadiai ma rona fahainopaa roꞌou i pinena; ma ina fawanewaneaa roꞌou. 31 Ei ramaꞌa, ronamina baꞌarofo ei roꞌaa fanunuia ba ei umuloo, rona warepaꞌi, ei ibaꞌiba, rona rawani, ei afetoo, rona talaipaꞌi ma ei pudawerai, rona fanunupaꞌi. Ma rona uduginaa mei Haidaniaa ei Israel.
Jesus na Faguaa Gunaroa Pufubaꞌa
32 Jesus na harofamai ei otalai nenerana ma na ware, “Una faloloaꞌinaa eni ramaꞌa eni, uaa rona gutafipui aꞌau aleꞌei oduai arewaa ma lomi rona paꞌi hanaa roꞌou. Lomi na rawani aꞌau ba rona bao ma uꞌa aloaa roꞌou, uaa roꞌaa pasi maꞌaa tala.”
33 Ei otalai nenerana, rona ware, “O to hitani faraa pidaua aꞌa feni raua gufu aleꞌeni ba na hawia ba oꞌaa faguaa feni baua gupuu ramaꞌa aleꞌeni?”
34 Jesus na iꞌigai, “Hamona paꞌi figa faraa pidaua?”
Rona ware ba, “Olorompalo ma hefiꞌa pusuꞌo nia.”
35 Ina warenaa aꞌa fei gupuu ramaꞌa ba ronei guta malagufu. 36 Ma ina tonaa olorompaloei faraa pidaua ma ei nia ma iꞌa waredii ba ‘ta’, na digedigeaa roꞌou ma fanaa ei otalai nenerana ma rona fanaa ei ramaꞌa. 37 Minaa roꞌou, rona hanana ma ronamina magu. Nenee fei, ei otalai nenerana, rona paifapepesuaa olorompalo pa masii duꞌua. 38 Puduu ei rona hanana, gunaroa pufabaꞌa wawane ma na paꞌidiai pifine ma baduu. 39 Iꞌa alodigaa fei gupuu ramaꞌa Jesus, na hugi pafoo wa ma aununaa malalaa Magadan.