Ei Feroia Noranamai aꞌa ei Upu Mina
7
Ei Pharisee mawe hefiꞌa feroiaa law, ei noramiaa roꞌodu Jerusalem, rona figupui aꞌa Jesus ma 2 fanunupaꞌaa hefiꞌa ei otalai nenerana, roꞌei hanana ma na loloa panii roꞌodu. Lomi ronadoꞌo huwe panii roꞌodu. 3 (Ei Pharisee ma minaa ei Jew, lomi roꞌaa hanana naꞌaa lomi ronadoꞌo huwe panii roꞌodu aleꞌei maumau ei upuu roꞌodu. 4 Ma ena rona hadiweꞌimai aꞌa ena humuu aloꞌalo, lomi roꞌaa hanana nabaa rotawe huwe. Ronamina neneraa watauda maumau ei upuu roꞌodu. Aleꞌena fesuaa ena bara, ena peꞌi ranu ma ena babagii.)a5 Siꞌei, ei Pharisee ma ei feroiaa law, rona iꞌigainaa Jesus ba, “Tani ei otalai neneramu, lomi rona neneraa maumau ei upuu oꞌodu ma rona hanafininaa lolo panii roꞌodu?”
6 Ina ware ba, “Naminapaꞌaa balawia ei wareaa mamamaꞌa Isaiah ei idii wareaa hamuꞌou ena wareꞌoni, aleꞌei fei neꞌia ba:
“‘Eni ramaꞌa eni, paꞌaa ware ua umuu roꞌodu ba rona maꞌauau,
maꞌuaa ei naranaraa roꞌodu namina raua aꞌau.
7 Lomi hanuu losuiaa roꞌou yau;
ena mau feroiaa roꞌodu, rona feroinaa ena law ena pagipagiaa ramaꞌa.’
8 Hamonadii rawaꞌaꞌafinaa ei wareaa mei Haidaa ma panaroꞌuaiaa maumau ei upuu hamuꞌodu.”
9 Ma na warenaa aꞌa roꞌou: “Rafee hamuꞌou autadidiaa ei wareaa mei Haidaa ba hamoꞌaa neneraab maumau ei upuu hamuꞌodu! 10 Moses na ware ba, ‘Maꞌauaa amamu ma inamu,’ ma ‘Hini i warefafeloaa amana o inana, ronei foꞌafamaꞌeia.’c 11 Maꞌuaa hamona ware ba nabaa hemea na warenaa aꞌa mei amana o inana: ‘Tamanu ei manumanu ba o tonia aꞌau, Corban’, (hanuna ba lomi i fani aꞌa amana ma inana, uaa manumanuu mei Haidaa) 12 ma hamona apunainia ba ineiꞌaa fai bigiꞌaa neꞌa manumanuu amana o inana. 13 Siꞌei, hamona suminaa ei wareaa mei Haidaa aꞌa ena maumau ena upuu hamuꞌou, ena hamonaminaꞌo totonamai. Hamonamina bigiꞌaa watauda manumanu aleꞌena.”
Ei Manumanu i Faloloaa Ramaꞌa
14 Jesus na harodinaa aꞌana fei gupuu ramaꞌa ma ware, “Guainau minaa hamuꞌodu. Hamonei apaꞌaa feni. 15 Lomi hepalo manumanu i aunaa poana hemea ba i faloloaia maꞌuaa, fei i norai laloo iana i ‘faloloaia.’” 16 d
17 I diꞌinidigaa fei gupuu ramaꞌa ma i waduꞌainaa fei humu, rona iꞌiginia ei otalai nenerana fei warea hanunu. 18 Na iꞌigai, “Haa, namina loto adiaa hamuꞌou? Lomi hamona aida ba naꞌaa hepalo manumanu na waduꞌainaa laloo hemea, noranalao augu, lomi i faloloaia? 19 Uaa lomi na dinaa laloo fei naranarana maꞌuaa, na dinaa laloo fei pahanana ma hinene, na leleꞌaa.” (Ei i wareaa fei, Jesus na ufugia ba minaa ei duꞌua, na rawani.)
20 Ma ina warelao ba, “Ena na leleꞌamai laloo iaa hemea, siꞌena, ena na faloloaia, 21 uaa, i lalona, na leleꞌamai ena hafeloꞌa naranara, ena fitatafipaꞌaia, fafanaoa, foꞌafamaꞌe, fiharoharoipaꞌaia, 22 wawaꞌai poa, fafeloaa ramaꞌa, sifisifiꞌa, unaraꞌuaiaa ei hafeloꞌa, nanamaia, ena sifisifi warea ba i fafeloaa nemea, mamagugua ma ena bigiꞌaa aꞌafoloia. 23 Minaa eni hafeloꞌa eni, noranamai laloo iaa hemea ma na faloloaia.”
Fei Narafaweꞌiaa mei Pifinee Syrophoenicia
24 Jesus na diꞌininaa fei gufu fei ma aununaa fawelei na rafiꞌinaa Tyre.e Na waduꞌainaa hepalo humu. Lomi na nunuminia ba nemea i aida maꞌuaa, paꞌaa lomi na opaꞌaipaꞌia ba hia yei. 25 Ina paꞌi hemea pifine yei ma mei pifine mei, na paꞌi naꞌuna, pusuꞌo baduu pifine, mei na waduꞌia hefaa spiriti hafelo.f Mei pifine mei, ana ei i guainia ba Jesus yei, ina nomai ma fapasi fasuu hunaa Jesus. 26 Mei pifine, hia Greece. Waniniana Syrian Phoenicia. Namina iꞌigifaweꞌi aꞌa Jesus ba neipoꞌo fawalaꞌanaa fei pigea aꞌa mei naꞌuna.
27 Na warefania, “Ei paꞌaa baduu (aleꞌei, ei naꞌuu Israel), roneidoꞌomina hanaiaa ei rona nunuminia, uaa lomi na wanewane ba oꞌaa tonaa ei hanaa ei paꞌaa baduu ma fanaa ei hapee roꞌodu ponoto.”
28 Ina ware ba, “Paꞌaa faꞌua, mena Fasu maꞌuaa ei ponoto haroo tawa, rona hanaiaa ei masii duꞌua, ei lomi rona hanaia ei baduu.”
29 Ma ina warenaa aꞌana ba, “Hamatee ona ware aleꞌena, te, onei nowau. Fena pigea na diꞌinidigaa mena naꞌumu.”
30 Ina aununaa gufuna ma fanunupaꞌaa mei naꞌuna na haino pafoo tawa ma fei pigea na diꞌinidigia.
Na Pedu Lotoaa Adia ma na Baꞌatawara Umuu mei Ramaꞌa
31 Jesus na diꞌininaa malalaa Tyre, aunuꞌailao Sidon, upuꞌailao aꞌa fei Agii Galilee ma aununaa fawelei Decapolis.g 32 Yei, hefiꞌa rona duginamii aꞌa Jesus hemea na loto adiana ma paꞌaa lomi na warewarepaꞌi. Ma ronamina warefaweꞌi aꞌana ba ineipoꞌo augaa fei panina pafoo mei.
33 Nenee fei, ina dugiꞌuꞌuginia ma laguna raua aꞌa fei gupuu ramaꞌa, Jesus na augaa ei anaꞌanana laloo adiaa mei ramaꞌa. Ma ina huwi ma idoaa fei rawerawee mei ramaꞌa. 34 Na aranaa pafea, fawenaifatemu ma warenaa aꞌana, “Ephphatha!” (hanuna ba “Maꞌawawa”). 35 Aꞌa fei, guapaloei adiana nawe maꞌawawa ma fei rawerawena nawe tatawei ma warewarepaꞌi.