3 Herod na panarofaa John ma boboꞌinia, uaa ba ina ware watauda aꞌa fei bigiꞌaa lagua Herodias, mei haroo mei lofuna Philip. 4 Hamatee John naꞌaida warefanaa Herod ba, “Lomi na rawani aꞌa fei law ba yoi, o haroinia.” 5 Herod, ba i foꞌafamaꞌeaa John, maꞌuaa ina maꞌau aꞌa ei ramaꞌa, uaa rona nara ba hia hemea mamamaꞌa.

6 Aꞌa fei arewaa waniniaa Herod, mei naꞌuu Herodias na ufaꞌufa i pudaa roꞌou ma siꞌei ba namina faniꞌeniꞌeaa Herod, 7 Herod na faꞌunai aꞌana ba tamanu nunumiana, inei iꞌiginia ma i fania. 8 Siꞌei ba ina uꞌugainia mei inana, ina ware, “Fanau yeni i pafoo hefaa tabetabe fei tabaa John, mei Pudugufaia.” 9 Mei hapara na naranara watauda, maꞌuaa siꞌei ba na faꞌunai pudaa ei ramaꞌa, ei roꞌei guta hananafipui aꞌana, ina ware ba fei iꞌigiana, ronei bigiꞌia. 10 Ma rona moroꞌaa huaa John yei humuu boboꞌaia. 11 Rona tabeamii fei tabana pafoo fei tabetabe ma fanaa mei nanao ma ina notabenaa aꞌa mei inana. 12 Ei otalai neneraa John, rona nomai ma tonaa fei ununa ma agifinia ma ronaree warefanaa Jesus.

13 Iꞌa guainia Jesus, na hugi pafoo wa ma aununaa fawelei lomi ramaꞌa. Roꞌaa guainaa fei, ei gupuu ramaꞌa, noramiaa roꞌou aꞌa ei gufu, rona talaiꞌuanaa pinee roꞌou ma nenegia. 14 Iꞌa nofatetelao Jesus, na fanunuaa hepalo baua gupuu ramaꞌa ma na faloloaꞌinaa roꞌou ma na farawaninaa ei funuaa roꞌou.

15 I nofafilao, ei otalai nenerana, rona nomai aꞌana ma ware, “Ina raua faweleni ma na fafidii. Aloaa ei gupuu ramaꞌa ba ronei aununaa ei gufu ma pono hanaa roꞌou.”

16 Jesus na ware, “Lomi na rawani ba ronei aunu. Hamuꞌou fani hanaa roꞌou.”

17 Rona ware, “Haiꞌouna paꞌi haipani ua faraa pidaua ma guapalo nia.”

18 Ina ware, “Tonamai aꞌau.” 19 Ma ina warenaa aꞌa ei ramaꞌa ba ronei guta pafoo ei guana. Ina tonaa haipaniei faraa pidaua ma guapaloei nia, na aranaa pafea, na ware ‘ta’ ma na digeaa ei faraa pidaua. Na fanaa ei otalai nenerana ba ronei fanaa ei ramaꞌa. 20 Minaa roꞌou, ronamina hanana magu ma ei otalai nenerana, rona paiaa hefua ma guapalo pa masii duꞌua. 21 Puduu ei rona hanana, haipani pufabaꞌa wawane ma na paꞌidiai pifine ma baduu.

22 Ana ei ua, Jesus na fahuginaa ei otalai nenerana pafoo fei wa ma alonaa roꞌou maꞌana ba ronei dinaa pepei ma hia, i doꞌo aloaa fei gupuu ramaꞌa. 23 I alodigaa roꞌou, na faneaa hepalo maugeni, ana unaia ba i lafulafu. I nopoilao, ana unaia yei, 24 maꞌuaa fei wa na rauadii piye ma na hasuroforofo ua, uaa fei lalarena na agisuafia.

25 Mafufuo badu, Jesus na talainaa aꞌa roꞌou pafoo agi. 26 Roꞌaa fanunupaꞌia ei otalai nenerana fi talaimai pafoo agi, ronamina maꞌaufafelo. Rona ware ba, “Haniꞌu, mena!” ma rona maꞌauꞌiwaꞌiwa.

27 Maꞌuaa Jesus na warebatafalao aꞌa roꞌou, “Guta farawani! Yau meni. Apuna maꞌau.”

28 Peter na ware, “Mena Fasu, nabaa paꞌaa yoi, waremai aꞌau ba unei talaiwau aꞌamu pafoo agi.”

29 Ina ware, “Nomai.”

Siꞌei, Peter na upu pafoo fei wa ma talainaa aꞌa Jesus pafoo agi. 30 Maꞌuaa i fanunupaꞌaa fei lalarena, na maꞌaumomogu ma ina haroharo, “Mena Fasu, hadumau!”

31 Ana ei ua, Jesus na roainaa panina ma panarofia. Ina ware, “Yoi mena pusuꞌo weꞌiaa naranaramu, tani omina hamamagua?”

32 Ma laguꞌaa hugi pafoo fei wa, fei lalarena na rere. 33 Ma ei roꞌou laloo fei wa, rona losuinia ma ware ba, “Paꞌaa faꞌua ba yoi, Naꞌuu mei Haidaa.”

34 Roꞌaa dinaa pepei, rona fatetenaa Gennesaret. 35 Ma ei ramaꞌaa fei gufu fei, roꞌaa fanunuꞌapaꞌaa Jesus, rona alo warea aꞌa minaa ei gufu fawelei. Ma ei ramaꞌa, rona duginamii aꞌa Jesus minaa ei funuaa gufuu roꞌou. 36 Ma rona iꞌigifaweꞌi aꞌana ba nei ugainaa ei funua ba ronei idoaꞌuaiaa fei supuu hawaa uguna ma minaa ei rona idoia, ronawe rawani.