Fei Warea Hanunuu mei Faroa
13
Ana fei arewaa fei, Jesus na asiꞌaa aꞌa fei humu ma naree guta yei piye. 2 Abaa poꞌo gupuu ramaꞌa rona hoaninia ma siꞌei, ina hugi pafoo hepalo wa ma guta lalona ma ei ramaꞌa, rona u yei piye. 3 Ma ina warehanunuinaa watauda manumanu aꞌa roꞌou, aleꞌeni, “Hemea faroa na dinaa peꞌihapena ba i faroaa ei lau. 4 Ei ifi larofinaa ei lau, hefiꞌa rona pasi i maꞌaa tala ma rona fidumai ei manufifidau ma rona hanaia. 5 Hefiꞌa, rona pasi pafoo ei naꞌanaꞌa, yei lomi na piꞌodua ei piye. Na nusu batafa aꞌa ei piye lomi na piꞌodua. 6 Maꞌuaa iꞌa asiꞌarai fei halo, na sidefaholeaa nusuu ei lau, uaa ataa gugu waraa roꞌou. 7 Hefiꞌadiai lau, rona pasi i dupuaa ei wowoꞌii na hogia ma ei wowoꞌii, rona fifigaa nusuu ei lau. 8 Ma hefiꞌadiai lau, rona pasi pafoo ei rawaniꞌa piye ma rona fuaa aleꞌei hefa puꞌu, o oloroa paꞌania, o odufua paꞌaniadiai aꞌa figa ei ina faroia. 9 Hini na paꞌi adiana nei guainia.” Tani i Warehanunui Jesus
10 Ei otalai nenerana, rona nomai aꞌana ma iꞌigai, “Tani o warehanunui aꞌa ei ramaꞌa?”
11 Ina ware, “Fei apaꞌa aꞌa ei maumau opaꞌaiaa fei haparaia pafea, hamona todigia, maꞌuaa aꞌa roꞌou, lomi. 12 Hini na paꞌi iwe todiai ma iwe paꞌi watauda. Hini lomi na paꞌi, tamanu maꞌida ina paꞌi, iwe paꞌai aꞌana. 13 Sifeni, feni paꞌafina a warehanunui aꞌa roꞌou:
“Rona fanunu, maꞌuaa lomi rona fanunupaꞌi;
rona guai, maꞌuaa lomi rona guaipaꞌi, o apaꞌia.
14 Tamanu nadii wareia mei mamamaꞌa Isaiah, inawe faꞌuai aꞌa roꞌou:
“‘Ranimai hamoꞌaa guai ua, maꞌuaa lomi hamoꞌaa apaꞌia;
hamoꞌaa fanunu ua, maꞌuaa lomi hamoꞌaa fanunupaꞌi.
15 Uaa ei naranaraa eni ramaꞌa eni, nawe waiwai;
lomi rona guaifarawani aꞌa ei adiaa roꞌou,
ma rona maꞌigunaa ei pudaa roꞌou.
Nabaa lomi, woro roꞌaa fanunupaꞌi aꞌa ei pudaa roꞌou,
guaipaꞌi aꞌa ei adiaa roꞌou,
ma i paꞌi apaꞌaa ei naranaraa roꞌou
ma roꞌawe filogii ma a farawaninaa roꞌou.’
16 Maꞌuaa na paꞌi hawegiana ei pudaa hamuꞌou, uaa rona fanunupaꞌi mawe ei adiaa hamuꞌou, uaa rona guaipaꞌi. 17 Uaa, a warefaꞌuai aꞌa hamuꞌou ba watauda mamamaꞌa ma wanewaneaa ramaꞌa, rona nunuminia ba roꞌaa fanunuaa tamanu hamona fanunuia, maꞌuaa lomi; ma rona nunuminia ba roꞌaa guainaa tamanu hamona guainia, maꞌuaa lomi.
Jesus na Piguaa Hanuu fei Warea Hanunuu mei Faroa
18 “Hamonei guainaa fei hanuu fei warea hanunuu mei faroa: 19 Nabaa nemea i guainaa fei uꞌugaa fei haparaia ma lomi na apaꞌia, mei hafeloꞌa, i nomai ma tarafaa tamanu mei faroa na faroia i naranarana. Ma fei, aleꞌei ei lau rona pasi i maꞌaa tala. 20 Ei lau rona pasi pafoo ei naꞌanaꞌa, tawiꞌana aleꞌei mei na guainaa fei warea ma nadoꞌo niꞌeniꞌe. 21 Maꞌuaa, siꞌei ba lomi na gugu warana, lomi na madii fei habeana. Iꞌa nomai ei hafeloꞌa o ei haperararaia uaa fei rawaniꞌa warea, ina pasi batafa ua. 22 Ei lau rona pasi dupuaa ei wowoꞌii na hogia, tawiꞌana aleꞌei mei na guainaa fei warea, maꞌuaa na fifigaa naranarana aꞌa watauda manumanuu feni ano ma ei sifisifii ei mugoo poꞌi ma lomi na paꞌi fuana. 23 Maꞌuaa ei lau rona pasi pafoo ei rawaniꞌa piye, tawiꞌana aleꞌei mei na guainaa fei warea ma na apaꞌia. Ina fuaa ma ei fuana aleꞌena hefa puꞌu, o oloroa paꞌania, o odufua paꞌaniadiai aꞌa figa ei ina faroia.”
Fei Warea Hanunuu ei Guana
24 Jesus na warefanaa roꞌou hepalodiai warea hanunu: “Fei haparaia pafea, tawiꞌana aleꞌei mei na faroaa ei rawaniꞌa lau i peꞌihapena. 25 Maꞌuaa roꞌaa maꞌigu minaa ei ramaꞌa, mei bidibidii unu na nomai ma faroaa ei guana maumauna ana i dinaa maumau fei wheat dupuaa ei wheat ma ina aunupaꞌai. 26 Laguna nusufipui fei wheat ma fei guana ma laguna paꞌi obaa lagua.
27 “Ei nafii mei amaa fei peꞌihape rona dinaa aꞌana ma ware, ‘Haguꞌu, aꞌa ba ona faroaa ei rawaniꞌa lau i peꞌihapemu? Ma noramiaa roꞌou hitani ei guana?’
28 “Ina ware, ‘Bigiꞌaa hemea na bidibidi ununa aꞌau.’
“Rona iꞌiginia ei nafina ba, ‘Ona nunuminia ba haiꞌouree fufusiminaa ei guana?’
29 “Ina ware ba, ‘Lomi, uaa ena hamona fufuꞌaa ei guana ana hamoꞌaa fufufininaa ei wheat. 30 Lagunei habefipui nopaꞌaloo fena au hufuꞌa. Aꞌa fena au fena, a ware aꞌa ei hufuꞌa: Hamoneidoꞌo hiteporaa ei guana ma faroroꞌinaa roꞌou ma faguꞌaia; nenee fei, hamonei hiteporaa ei wheat ma re augia i laloo fei paleu.’”
Fei Warea Hanunuu fei Lau Mustard
31 Ina warefanaa roꞌou hepalodiai warea hanunu: “Fei haparaia pafea, tawiꞌana aleꞌei fei lau mustard na tonia hemea ma faroia laloo peꞌihapena. 32 Faꞌua ba namina pusuꞌoroi aꞌa minaa ei lau, maꞌuaa ei i habe, namina bauanaidiꞌininaa minaa ei manumanu i peꞌihape ma na gipenaa haihai ma ei manufifidau i haroo pafea, ronamii guta aꞌa ei rarana.”
Fei Warea Hanunuu fei Fafuafua
(Luke 13:20, 21)
33 Ina warefanaa roꞌou hepalodiai warea hanunu: “Fei haparaia pafea, tawiꞌana aleꞌei ei fafuafua na tonia hemea pifine ma fihafuinia aꞌa wataudaa palaua hawina na fihafuipedugia ma na fua.”
Inaꞌaida Warehanunui aꞌa ei Ramaꞌa
34 Jesus na warehanunuinaa minaa ei manumanu ei aꞌa ei gupuu ramaꞌa; lomi na wareaa hepalo abaa warea hanunu. 35 Siꞌei, nawe faꞌuai tamanu nadii wareia mei mamamaꞌa:
“Uꞌa gigiaa fei umuu ma wareaa ei warea hanunu,
a wareaa ei manumanu na udeꞌopaꞌai ei i mamara feni ano nopaꞌamii wagieni.”
Ina Piguaa Hanuu fei Warea Hanunuu ei Guana
36 I dii, inawe diꞌininaa fei gupuu ramaꞌa ma waduꞌinaa fei humu. Ei otalai nenerana, rona nomai aꞌana ma ware, “Warefaꞌarewaia aꞌa haiꞌou fei hanuu fei warea hanunuu ei guana i peꞌihape.”
37 Ina ware, “Mei na larofinaa ei rawaniꞌa lau, hia mei Naꞌuu Ramaꞌa. 38 Fei peꞌihape, aleꞌeni feni ano ma ei rawaniꞌa lau, aleꞌei ei naꞌuu fei haparaia. Ei guana, aleꞌei ei naꞌuu mei hafeloꞌa 39 ma mei bidibidii unu, mei na faroaa roꞌou, hia, mei haniꞌu. Fei au hufuꞌa, fei au pedugaa feni ano ma ei hufuꞌa, ei aloꞌaloo mei Fasu.
40 “Hanuu fei fufuꞌaa roꞌou ei guana ma faguꞌaia aꞌa fei hafi, ana aleꞌei fei au pedugaa feni ano. 41 Mei Naꞌuu Ramaꞌa i aloaa ei aloꞌalona ma aleꞌei ei guana laloo fei haparaiana, rowe fufusiminaa minaa ei manumanu na fafeloaa ei ramaꞌa mawe ei rona bigiꞌaa ei hafeloꞌa. 42 Rowe siminaa roꞌou hafi, fei na paꞌi aiꞌaiga ma fiꞌuꞌuiaa difo. 43 Siꞌei, ei wanewanea, roꞌawe weꞌa aleꞌei fei halo i laloo fei haparaiaa mei Amaa roꞌou. Mei na paꞌi adiana nei guai.
Ei Warea Hanunuu ei Mugoo Poꞌi na Ude Opaꞌai ma fei Pearl
44 “Fei haparaia pafea, tawiꞌana aleꞌei ei gold rona opaꞌainia i podu. Iꞌa paꞌia hemea, ina opaꞌaidinia ma wagii fei niꞌeniꞌeana na aunu ma re aloaa minaa ei manumanuna ma na ponoꞌaa fei podu fei.
45 “Ma hepalodiai, fei haparaia pafea, tawiꞌana aleꞌei hemea aloꞌaloa fi labaginaa ei rawaniꞌa pearl. 46 Iꞌa labagipaꞌaa hepalo na bauanai ponoꞌana, ina aunu ma re aloaa minaa ei manumanuna ma na ponoꞌia.
Fei Warea Hanunuu fei Lepo
47 “Hepalodiai, fei haparaia pafea, tawiꞌana aleꞌei hepalo lepo rona pudinaa agi ma tonaa watauda mau nia. 48 Iꞌa pepesu ei udiaa roꞌou nia, rona forafaꞌaununaa piye. Ma rona guta ma toꞌaugaa ei rawaniꞌa nia laloo ei pa ma ei hafeloꞌa, rona siminia. 49 Ana aleꞌei aꞌa fei au pedugaa feni ano. Ei aloꞌaloo mei Fasu, rowe nomai ma fiꞌalaginaa ei hafeloꞌa aꞌa ei wanewanea 50 ma ei hafeloꞌa, ro siminaa hafi, fei na paꞌi aiꞌaiga ma fiꞌuꞌuiaa difo.”
51 Jesus na iꞌigai, “Hamona apaꞌaa minaa ei manumanu ei?”
Rona ware ba, “Hiꞌi.”
52 Ina warenaa aꞌa roꞌou, “Siꞌei, nabaa hemea na faꞌarewaiaa fei haparaia pafea aꞌa hemea feroiaa law, mei feroiaa law, hia aleꞌei mei amaa hepalo humu, mei na faꞌasiꞌanamai ei manufau mawe ei watanai rawaniꞌa manumanu aꞌa fei leana.”
Mei Mamamaꞌa Lomi Rona Maꞌauia
53 Iꞌa warepedugaa ei warea hanunu Jesus, ina diꞌininaa fei gufu fei. 54 Iꞌa dinamii aꞌa fei paꞌaa gufuna ma naꞌaa feroinaa ei ramaꞌa i laloo fei synagogue roꞌou ma ronamina malefa. Rona iꞌigai, “Tonana hitani meni ramaꞌa meni, fei apaꞌa ma fei faufau ba i bigiꞌaa ei foigia? 55 Haa, simeni, meni naꞌuu mei fadufadua? Haa, mei inana Mary ma ei lofuna James, Joseph, Simon ma Judas? 56 Aꞌa ba minaa ei agina aꞌa oꞌou yeni? Nabaa aleꞌei, tonana hitani minaa ei manumanu ei, meni ramaꞌa meni?” 57 Ma rona faraa aꞌana.
Maꞌuaa Jesus na warenaa aꞌa roꞌou, “Ana uniaa aꞌa fei paꞌaa gufuna ma fei paꞌaa humuna, hemea mamamaꞌa lomi i honua.”
58 Ma lomi ina bigiꞌaa watauda foigia yei, uaa lomi na weꞌi naranaraa roꞌou.