Filoginaa Naranara o Tonaa Fagianaa
13
Aꞌa fei au fei, na paꞌi hefiꞌa yei rona uꞌufanaa Jesus ba Pilate na foꞌafamaꞌeaa ei Galilee ei roꞌei moroꞌaa huaa ei manulelele wagii fei losuu roꞌou. 2 Jesus na ware, “Ei naraa hamuꞌou ba ei Galilee ei, ronapaꞌaa hafelo laraa hefiꞌadiai Galilee uaa rona tonaa hafeloꞌaa roꞌodu aleꞌei? 3 A warefanaa hamuꞌodu ba paꞌaa lomi! Maꞌuaa nabaa lomi hamona filoginaa naranaraa hamuꞌou, minaa hamuꞌou anaa, hamoꞌaa fagiana. 4 O, ei naraa hamuꞌou ba ei hefua ma fainaroa ramaꞌa, ei rona maꞌe ei i pasiꞌonaa roꞌou fei paꞌaa tarea humu yei Siloam, ba ronapaꞌaa tata laraa ei hefiꞌadiai yei Jerusalem? 5 A warefanaa hamuꞌodu ba paꞌaa lomi! Maꞌuaa nabaa lomi hamona filoginaa naranaraa hamuꞌou, minaa hamuꞌou anaa, hamoꞌaa fagiana.” 6 Siꞌei, na uꞌufanaa roꞌou feni warea hanunu: “Hemea ramaꞌa na faroaa hepalo hapena haihai figi i peꞌihapena. Ma na aunu ba i hufu fuana, maꞌuaa lomi na paꞌi. 7 Siꞌei, na warenaa aꞌa mei omaꞌaa fei peꞌihapena, ‘Laloo oduai igisimasi unaꞌaida nomai ba a hufuꞌaa fuaa feni figi ma lomi na paꞌi. Rerefapasia! Lomi hanuna ba i udemai!’
8 “Mei omaꞌamaꞌaa na ware, ‘Mena bauana, fidoꞌo augalao heaidiai igisimasi ma awe agifaweloinaa fasuna ma penuia. 9 Nabaa na fuaa fena igisimasi i nomai, te, na rawani! Nabaa lomi, te, rereia.’”
Mei Pifine na Hawi Uguna nawe Rawanidiai laloo Sabbath
10 Heai Sabbath Jesus fi feroi laloo hepalo synagogue, 11 hemea pifine yei na fabauwiaa uguna hepalo spiriti laloo hefua ma fainaroa igisimasi. Namina bauwi ma paꞌaa lomi i fawanewanepaꞌi. 12 I fanunupaꞌia Jesus, na harofamai ma warenaa aꞌana, “Mena pifine, onawe maꞌala aꞌa fei funuamu.” 13 Ma na augaa guapaloei panina pafona ma ana ei ua na haꞌuifawanewane ma na uduginaa mei Haidaa.
14 Siꞌei ba Jesus na fawanewaneia laloo Sabbath, mei bauaniaa fei synagogue na siba ma warenaa aꞌa ei ramaꞌa, “Na paꞌi oloroa arewaa bigiꞌa. Siꞌei, hamonei nomai ma fapedugaa ei funuaa hamuꞌou aꞌa ei arewaa ei, abaa laloo fei Sabbath.”
15 Mei Fasu na warenaa aꞌana, “Hamuꞌou paꞌaa wareꞌoni! Haa, laloo fei Sabbath lomi ba hememea hamuꞌou na alaraa fei hapena manulelele aꞌa fei palena, foranaa ano ma fani numana ranu? 16 Ma meni pifine meni, meni naꞌuu Abraham, meni na panarofia laloo hefua ma fainaroa igisimasi Satan, lomi ba laloo fei Sabbath i maꞌala aꞌa ei na panarofia?”
17 I wareaa fei, minaa ei na bidibidi unuu roꞌou aꞌana, ronamina mafafafelo, maꞌuaa, ei ramaꞌa, ronamina niꞌeniꞌe aꞌa minaa ei rawaniꞌa bigiꞌana.
Fei Warea Hanunuu fei Lau Mustard
18 Jesus na iꞌigai, “Batanai maumau fei haparaiaa mei Haidaa? A fihawawaginia aꞌa tamanu? 19 Ina aleꞌei fei lau mustard hemea na faroia i peꞌihapena. Na habenaa haihai ma ei manufidufidu, rona guta aꞌa ei rarana.”
Fei Warea Hanunuu fei Fafuafua
20 Ina iꞌigidiai, “A fihawawaginaa fei haparaiaa mei Haidaa aꞌa tamanu? 21 Ina aleꞌei fei fafuafuaa hemea pifine na tonia ma fihafuinia aꞌa watauda palaua,a bigiꞌalao nopaꞌaloo fei ba namina fafuapedugaa minaa ei palaua.”
Fei Migigii Gigei
22 Jesus na aunupedunaa ei pusuꞌo ma baua gufu nofeferoilao dinaa Jerusalem. 23 Hemea na iꞌiginia, “Mena Fasu, paꞌaa hefiꞌa ua ramaꞌa roꞌaa tela?”
Ina warenaa aꞌa roꞌou, 24 “Hamoneimina nigofaweꞌi wagii fei migigia gigei, uaa a warefanaa hamuꞌou ba watauda roꞌaa waduꞌai, maꞌuaa lomi roꞌaa waduꞌaipaꞌi. 25 Ma ena na fareꞌidigaa fei gigei mei amaa fei humu, hamowe ufabaꞌabaꞌa ua ano ma wareꞌaiꞌai ba, ‘Mena bauana, gigifanaa haiꞌodu fei gigei.’
“Maꞌuaa i ware, ‘Lomi na apaꞌaa hamuꞌou ma ana lomi na aida ba noramiaa hamuꞌodu hitani.’
26 “Ma hamopowe ware, ‘Haiꞌouna hanana ma hunufipui aꞌamu ma ona feferoi i malalaa gufuu haiꞌou.’
27 “Maꞌuaa i ware ua, ‘Lomi una apaꞌaa hamuꞌou ma ana lomi una aida ba noramiaa hamuꞌodu hitani. Faraua aꞌau, hamuꞌou ena ramaꞌa hafelo!’
28 “Ma yei, iwe paꞌi aiꞌaiga ma roiroiaa difo ena hamona fanunupaꞌaa Abraham, Isaac, Jacob mawe ei mamamaꞌa yei aꞌa fei haparaiaa mei Haidaa, maꞌuaa roꞌaa poronafaꞌainaa hamuꞌou ano. 29 Ei ramaꞌa rowe norai yei rai ma hafaa ma oala ma haraꞌuu ma tonaa ei gutanaa roꞌou aꞌa fei baua hananaa wagii fei haparaiaa mei Haidaa. 30 Hiꞌi, paꞌaa faꞌua ba na paꞌi ramaꞌa, ei mugi, roꞌaa oanaa maꞌa ma ei maꞌa, roꞌaa oanaa mugi.”
Jesus na Faloloaꞌinaa Jerusalem
31 Aꞌa fei au fei, hefiꞌa Pharisee, rona nomai aꞌa Jesus ma warenaa aꞌana, “Diꞌininaa feni gufu feni ma aununaa hefawala. Ba i foꞌafamaꞌeio Herod.”
32 Ina ware, “Wi warefanaa fena ponoto fena, ‘A fawalaꞌanaa ei pigea ma farawaninaa ei funua wagieni ma narani ma aꞌa fei faꞌoduaiaa arewaa, awe fapedugaa fei bigiꞌau’— 33 uaa paꞌaa lomi ba hemea mamamaꞌa i maꞌe auguu Jerusalem!
34 “Oo Jerusalem, Jerusalem, yoi mena, ona foꞌafamaꞌeaa ei mamamaꞌa ma nafanaa mugoo ena aloamiana aꞌamu. Paꞌaa nunumiau ba a gumiꞌifigupuinaa ena naꞌumu aleꞌei fei inaa aꞌaroo na hawainaa ei naꞌuna haroo pauna, maꞌuaa lomi ona nunumiai! 35 Maꞌaia, fei humumu na halohaloa. A warefanaa hamuꞌou, lomi o fanunudinaa pudau nopaꞌaloo fei ba opowe ware, ‘Na paꞌi hawegiana mei na nomai wagii fei haraa mei Fasu.’”