5 Ma na iꞌiginaa roꞌodu, “Nabaa hemea hamuꞌou na paꞌi naꞌuna,^a o hapena manulelele ma aꞌa fei Sabbath na pasi laloo fei ranu agiꞌagi, fei namina walalo, lomi ba o batafa rafefaꞌasiꞌanana?” 6 Ma lomi rona paꞌi warewareaa roꞌou.

7 I fanunuaa ei ramaꞌa, ei rona nomai aꞌa fei hananaa ba batanai rona tonaa ei gutaa ei baua ramaꞌa aꞌa fei tawa, ina uꞌufanaa roꞌou feni warea hanunu: 8 “Nabaa hemea i lalaꞌio ba onei nomai aꞌa fei hananaa lalaia, oneiꞌaa tonaa ei gutaa ei baua ramaꞌa, uaa woro i nomai hemea na bauanaidiai aꞌamu. 9 Nabaa aleꞌei, mei i lalaꞌaa hamugua i nomai ma ware aꞌamu, ‘Fanaa meni feni gutanamu.’ Yoi opowe mamafa ma oree guta aꞌa ei lomi haraa roꞌou. 10 Maꞌuaa ena rona lalaꞌio, tonaa fei gutaa ei lomi na paꞌi haraa roꞌou, uaa na nomai mei i lalaꞌio i ware aꞌamu, ‘Otafi, guta aꞌa ei baua ramaꞌa.’ Ma nabaa aleꞌei, omina raraba i pudaa minaa ei rona nomai aꞌa fei hananaa. 11 Uaa hini i poronaa hia pafea, i oanaa pu ma hini i fafafaunaa pu, i oanaa pafea.”

12 Ma nawe warenaa aꞌa mei i lalaꞌia, “Nabaa o bigiꞌaa hepalo hananaa, oneiꞌaa lalaꞌaa ena tafimu, lofumu, gufumu o ena na paꞌi watauda mugoo poꞌi. Nabaa o bigiꞌia aleꞌei, ana roꞌaa lalaꞌio ma owe tohadiweꞌidinaa ei fanamu. 13 Maꞌuaa nabaa o panarofaa hefaa baua hananaa, onei lalaꞌaa ei lomi mugoo poꞌii roꞌou, ei hawii ugu, ei afetoo ma ei pudawerai 14 ma o to hawegiamu. Faꞌua ba lomi roꞌaa fanihadiweꞌinaa ei fanamu, maꞌuaa owe tohadiweꞌinaa ei fanamu aꞌa fei au asiꞌanaa ei wanewanea.”

15 I guainaa fei hemea papana aꞌa fei tawa, na warenaa aꞌa Jesus, “Baua niꞌeniꞌea aꞌa mei i hanana aꞌa fei baua hananaa wagii fei haparaiaa mei Haidaa.”

16 Jesus na ware, “Hemea na bigiꞌaa hepalo baua hananaa ma lalaꞌaa watauda. 17 I nopaꞌaloo fei baua hananaa, na aloaa mei nafina ba nei warefaꞌaiaa ei na lalaꞌaa roꞌou, ‘Nomai, uaa minaa ei manumanu na udedii.’

18 “Maꞌuaa minaa roꞌou, rona ware ba lomi roꞌaa nomai uaa na paꞌi bigiꞌaa roꞌou. Mei rawarawa na ware, ‘Ana eni ua na ponoꞌaa fei peꞌihape ma aree maꞌaia. Paꞌaa haguꞌu.’

19 “Hemeadiai na ware, ‘Ana eni ua na ponoꞌaa reia budumaꞌao ma adoꞌoree maniaa roꞌou. Paꞌaa haguꞌu.’

20 “Hemeadiai na ware, ‘We lalaiꞌuau eni ma lomi ba a nomai.’

21 “Na hadiweꞌimai mei nafi ma na warefanaa mei fasuna. Siꞌei, na siba mei amaa fei humu ma na warefaweꞌi aꞌa mei nafina, ‘Aunubatafanaa ei tala ma ei iaraa fei baua gufu ma dugamii eꞌei lomi rona paꞌi, ei hawii ugu, ei pudawerai mawe ei afetoo.’

22 “Na ware mei nafi aꞌana, ‘Mena bauana, tamanu wareamu na bigidigia, maꞌuaa atawe pepesu fei humu.’

23 “Siꞌei, mei fasu na warenaa aꞌa mei nafina, ‘Aununaa aꞌa minaa ena tala ma ena gufu tadiweꞌai ma ware aꞌa roꞌou ba ronei nomai ba nei paꞌaa pepesu feni humuu. 24 Apaꞌaa warefanio ba lomi hemea ena una lalaꞌaa roꞌou iwe hanana aꞌa feni bigiꞌau baua hananaa.’”

25 Hefiꞌa baua gupuu ramaꞌa, na aunuhugiaa Jesus ma i momoꞌinaa aꞌa roꞌou na ware, 26 “Nabaa hemea hamuꞌou i nomai aꞌau ma lomi na fabidinaa ununa amana ma inana, mei harona ma ei naꞌuna, ei lofuna ma agina o ana fei fawewenina, lomi iwe oanaa otalai nenerau. 27 Ma hini lomi i harenaa fei hawafolona ma nenerau, hia ana abaa otalai nenerau.

28 “Nabaa hemea hamuꞌou i faduaa hepalo humu tare, haa lomi idoꞌo gutawareinaa puduu ponoꞌaa ei finefine ma fanunuia ba na paꞌaa hawiaa ei mugoo poꞌina fapedugana? 29 Uaa, nabaa i faꞌuꞌuaiaa ei u ma lomi na fapedupaꞌia, roꞌamina fafadinia ei ramaꞌa. 30 Ma roꞌaa ware, ‘Meni ramaꞌa meni ba i fadu; na faꞌugaa ei u ma lomi na fapedupaꞌia.’

31 “O, nabaa hemea hapara, ba i fifoꞌai aꞌa hemeadiai hapara, haa loꞌe idoꞌo gutanaramaꞌaia ba hia ma ei maroana puduu roꞌou hefua paꞌania pufabaꞌa, rona hawia ba roꞌaa muainaa mei hapara mei na paꞌi maroana puduu roꞌou enu paꞌania pufabaꞌa? 32 Ma nabaa loꞌe na hawia, te i aloaa hefiꞌa maroana ba ronei nolao ma iꞌiginaa roꞌou ba roꞌaa fafiwanewanei, ei ana roi fi nomai rauaa. 33 Ana aleꞌei hamuꞌou, hini lomi i fanaa minaa ei hia na paꞌi, lomi i oanaa otalai nenerau.

34 “Ina rawani fei agi, maꞌuaa nabaa na paꞌai fei agiꞌagiana, batanai ba i faꞌagiꞌagidinia? 35 Ana lomi na rawaninaa fei malagufu, o fei dupudupuu meme, roꞌaa simiꞌuaia.

“Hini na paꞌi adiana nei guai.”