Fei Warea Hanunuu fei Paꞌaiaa Sipsipi
15
Ei otonaa mugoo poꞌii gavaman mawe ei “hafeloꞌa ramaꞌa”, ronamina hoaninia ba roꞌaa guai wareana. 2 Maꞌuaa ei Pharisee ma ei feroiaa law, rona bababauꞌu, “Meni ramaꞌa meni, na taufaꞌugaa ei hafeloꞌa ma hananafipui aꞌa roꞌou.” 3 Siꞌei, Jesus na uꞌufanaa roꞌou feni warea hanunu: 4 “Nabaa hemea hamuꞌou, na paꞌi hapena sipsipi, puduu roꞌou aleꞌena hefa puꞌu ma na paꞌai hepalo, haa lomi i diꞌininaa ei faimfua paꞌania ma faimpalo fawelei na mamaꞌa ma re labaginaa fei paꞌaiaa sipsipi hawina na paꞌia? 5 Ma i nopaꞌalao, na niꞌefuharenia 6 ma baguanaa gufu. Ma nawe harofamai ei tafina mawe ei gufuna ma ware, ‘Hamonei niꞌeniꞌefipui aꞌau, uaa na paꞌidigia fei paꞌaiaa hapeu sipsipi.’ 7 A warefanaa hamuꞌou ba ana aleꞌei, i paꞌi baua niꞌeniꞌea yei gufu pafea aꞌa hemea hafeloꞌa na filoginaa naranarana laraa ei faimfua paꞌania ma faimpalo, ei ba rona wanewane ma ba lomi roꞌaa filoginaa naranaraa roꞌou.
Fei Warea Hanunuu fei Paꞌaiaa Mugoo Poꞌi
8 “O, nabaa hemea pifine na paꞌi hefua mugoo poꞌia ma ina fapaꞌainaa hepalo, haa lomi idoꞌo haꞌinaa fei weꞌai, rofaa fei humu ma lalabagifarawaninia hawina na paꞌia? 9 Ma ena na paꞌia, i harofamai ei tafina mawe ei gufuna ma ware, ‘Meꞌo, niꞌeniꞌefipui aꞌau. Uaa, na paꞌidigia fei paꞌaiaa mugoo poꞌiu.’ 10 Ana aleꞌei, a warefanaa hamuꞌou, i paꞌi baua niꞌeniꞌea inamoaa ei aloꞌaloo mei Haidaa aꞌa hemea hafeloꞌa na filoginaa naranarana.”
Fei Warea Hanunuu mei Paꞌaiaa Naꞌu Wawane
11 Jesus na waredilao: “Hemea ramaꞌa na paꞌi helagui naꞌuna baduu wawane. 12 Mei umugi na warenaa aꞌa mei amana, ‘Oꞌama, fanau ei manumanu ba a tonia aꞌamu.’ Siꞌei, mei ama na alaginaa ei manumanuna aꞌa laguei naꞌuna.
13 “Ataa madii ma mei umugi, na paiaa minaa ei manumanuna ma aununaa gufu raua ma yei ina neneneinaa ei manumanuna aꞌa ei maumau hafeloꞌa. 14 Iꞌa neneneipedugaa ei manumanuna na moubiabia aꞌa fei tadiweꞌaiaa fei gufu fei ma nawe nanamuinia. 15 Siꞌei, na aunulabarai bigiꞌana aꞌa hemea ramaꞌaa fei gufu fei, mei ina alonaa hia peꞌihapena ba nei faguaa ei hapena moimoi. 16 Ina naranara ba i famagunaa iana ei hudii bean, ei roi hanaia ei moimoi maꞌuaa, lomi hemea na fani manumanu aꞌana.
17 “Ipowe gutanarapaꞌia, ina ware, ‘Figa tameloi mei amau rona paꞌi dufu duꞌua ma yau yeni, namina baofafelo! 18 Unei hadiweꞌai ma dinaa aꞌa mei amau ma ware aꞌana: Oꞌama, unamina hafelo i pudaa fei gufu pafea ma i pudamu. 19 Lomi una rawani ba o ware ba yau naꞌumu; augau aleꞌei hemea tameloimu.’ 20 Siꞌei, na asiꞌaa ma aununaa aꞌa mei amana.
“Maꞌuaa ei fi nomai rauaa, mei amana na fanunupaꞌia ma namina faloloaꞌinia. Ina ponilao aꞌa mei naꞌuna, hapiroroꞌia ma hatofaa pudana.
21 “Ma mei naꞌu na warenaa aꞌana, ‘Oꞌama, namina hafelo i pudaa fei gufu pafea ma i pudamu. Lomi na rawani ba o ware ba yau naꞌumu.’b
22 “Maꞌuaa mei ama na warenaa aꞌa ei nafina, ‘Batafa! Tonamai fei paꞌaa rawaniꞌa lawalawa ma falawainia. Augaa hepalo alatai anaꞌanana ma farafefani supinena. 23 Foraiamii fei baua naꞌuu budumaꞌao ma foꞌafamaꞌeia. Oꞌaa bigiꞌaa hefaa baua duꞌua ma hanana wiwiwidi. 24 Uaa meni naꞌuu na maꞌedii ma na mamaꞌadiai; ina paꞌaidii ma ona paꞌidinia.’ Siꞌei, ronawe hanana wiwiwidi.
25 “Ma ei, mei umaꞌua, hia laloo peꞌihape. Iꞌa nofarafiꞌimai aꞌa fei humu, ina guainaa ei lauga ma ei roi palapala. 26 Siꞌei, ina harofaa hemea nafi ma iꞌiginia ba roi fetanai ei. 27 Ina ware, ‘Mei lofumu na nodigimai ma mei amamu na foꞌafamaꞌeaa fei naꞌuu budumaꞌao, uaa na hadiweꞌimai ma lomi manumanu na fafeloia.’
28 “Mei umaꞌua namina sibafafelo ma lomi na waduꞌai. Siꞌei, mei amana na asiꞌalao ma wareꞌaiꞌai aꞌana. 29 Maꞌuaa na warefanaa mei amana, ‘Maꞌaia! Minaa ei igisimasi yau na bigi aleꞌei nafimu ma lomi na barafeaa wareamu. Maꞌuaa ana paꞌaa lomi hepalo fanamu naꞌuu memee ba a hanana wiwiwidifipui aꞌa ei tafiu. 30 Iꞌa nomai meni naꞌumu, meni na neneneinaa ei manumanumu aꞌa ei pifinee tala, ona foꞌafamaꞌeaa fei baua naꞌuu budumaꞌao aꞌana!’