Fei Warea Hanunuu mei Poahafeloi Omaꞌamaꞌaa
16
Jesus na warenaa aꞌa ei otalai nenerana, “Na paꞌi hemea ramaꞌa na watauda mugoo poꞌina ma na paꞌi hemea omaꞌamaꞌaa ei manumanuna ma hefiꞌa, rona ware ba mei omaꞌamaꞌaa na babibiyeinaa ei manumanuu mei fasuna. 2 Siꞌei, na harofamai ma iꞌiginia, ‘Tamanu eni guguaiau wagii fei omaꞌamaꞌamu? Onei warefarawaninaa fei bigiꞌamu, uaa lomi ba o bigidiai.’ 3 “Mei omaꞌamaꞌaa na naranara, ‘A bigiꞌaa tamanu eni? Mei fasuu ba i fapedugaa bigiꞌau. Lomi na paꞌi faufau ba a agi ma una mamafa noinoia. 4 Haa, una aida ba a bigiꞌaa tamanu, uaa nabaa i pedu bigiꞌau yeni, ei ramaꞌa roꞌaa taufagutanau humuu roꞌou.’
5 “Siꞌei, na harofahememeanaa ei rona to mugoo poꞌi mina aꞌa mei fasuna ma rotawe hodiꞌia. Na iꞌiginaa mei rawarawa, ‘Hefiga puduu ei ba onei hodiꞌia aꞌa mei fasuu?’
6 “Ina ware, ‘Odufua pufabaꞌa litrea pao olive.’
“Mei omaꞌamaꞌaa na warenaa aꞌana, ‘Tonaa fei neꞌia, gutabatafa ma filoginaa fei puduna, aleꞌei hefa pufabaꞌa ma haipani puꞌu.’
7 “Ma na iꞌiginaa mei fahelaguiana, ‘Ma yoi nei hodiꞌaa hefiga?’
“Ina ware, ‘Hefa pufabaꞌa baꞌaleb wheat.’
“Ina warenaa aꞌana, ‘Tonaa fei neꞌia ma filoginaa puduna aleꞌei fainaroa puꞌu.’
8 “Siꞌei ba mei omaꞌamaꞌaa na bigiꞌia aleꞌei, na wareaa fei sifisifina mei fasuna. Hamatee ei ramaꞌa feni ano, rona paꞌi baua apaꞌaa roꞌou ba roꞌaa bigiꞌaa tamanu aꞌa ei na fiminaꞌei maumau roꞌou laraa ei ramaꞌa aꞌa fei weꞌai. 9 A warefanaa hamuꞌou, talainaa eni watauda manumanu feni ano ba hamonei paꞌi tafii hamuꞌou ma ena na pedu i paꞌi ramaꞌa taufagutanaa hamuꞌou aꞌa fei gufu lomi i pedutoo.
10 “Mei i omaꞌafarawaninaa maꞌida ua, ana i omaꞌafarawaninaa watauda manumanu ma mei loꞌe i omaꞌapaꞌaa maꞌida ua, ana lomi i omaꞌapaꞌaa watauda manumanu. 11 Siꞌei, nabaa lomi hamona omaꞌafarawaninaa ei mugoo poꞌi wagii feni ano, hini ba i fifaninaa panii hamuꞌou omaꞌaa tamanu napaꞌaa paꞌi rarabana? 12 Ma nabaa lomi hamona omaꞌafarawaninaa manumanuu hemea, hini ba i fani manumanu aꞌa hamuꞌou?
13 “Lomi hemea nafi i bigi aꞌa helagui fasu. Uaa i bidi ununa aꞌa mei ma i haguaa mei. O, imina oafagugu aꞌa mei ma narafafelo aꞌa mei. Lomi na hawia ba hamuꞌou nafii aꞌa mei Haidaa ma aꞌa fei mugoo poꞌi anaa.”
Hefiꞌa ei Wareaa Jesus
14 Ei Pharisee, ei rona haguaa mugoo poꞌi, roꞌaa guainaa fei, rona falalasiaa Jesus. 15 Ina warenaa aꞌa roꞌou, “Hamona faꞌupeꞌupei ba hamona rawani i pudaa ramaꞌa, maꞌuaa mei Haidaa na apaꞌidigaa ei naranaraa hamuꞌou. Tamanu fei ei ramaꞌa rona nara ba na rawani, na hafelo i pudaa mei Haidaa.
Fahononoo ei Feroia
16 “Ei neꞌia wagii fei Law ma ei mamamaꞌa, ronamina uꞌugamai nopaꞌamii fei au John. Nenee fei au fei, fei rawaniꞌa wareaa fei haparaiaa mei Haidaa, rona uꞌugamai. Ma minaa ei ramaꞌa ronamina nigo ba roꞌaa waduꞌai wagina. 17 Na maduta ua paꞌaiaa fei pumanugawe ma feni malagufu laraa fei ba maꞌida neꞌia wagii fei Law i paꞌai.
18 “Hini wawane i fiꞌalagii aꞌa mei harona ma lalainaa hemeadiai pifine, ina bigiꞌaa fei fiharoharoipaꞌaia. Ma mei wawane i lalainaa mei pifine na fiꞌalagii aꞌa harona ana na bigiꞌaa fei fiharoharoipaꞌaia.
Mei Watauda Mugoo Poꞌina ma Lazarus
19 “Na paꞌi hemea na watauda mugoo poꞌina, mei na hawegi aꞌa ei manumanu namina rata ponoꞌana ma naꞌaida guta hanana maꞌigufarawani ua. 20 Yei poaa fei gigeina, rona fahainopaa hemea noinoi, harana Lazarus. Ei ununa, namina loralorai 21 ma napaꞌaa nunumiai ba i hana tamanu na pasimai aꞌa fei tawaa mei watauda mugoo poꞌina. Ma ei ponoto, ana rona nomai mi raweꞌaa ei loralorana.
22 “Nawe nomai fei arewaa ba na maꞌe mei noinoi ma ei aloꞌalo, rona noporonaa hia aꞌa Abraham. Mei watauda mugoo poꞌi, ana na maꞌe ma rona iꞌifinia. 23 Hia na tonaa fiꞌina i aꞌa ei maꞌea,c maꞌuaa na fanunupaꞌaa Abraham rauaa ma i papana, Lazarus. 24 Siꞌei, na haroharonaa aꞌana, ‘Oꞌama Abraham, faloloaꞌinau ma aloamii Lazarus ba nei pudinaa ranu umuu anaꞌanana ma mi falolomaa raweraweu uaa yau eni na tonaa fiꞌiu aꞌa feni hafi.
25 “Ma na ware Abraham, ‘Onaꞌuu, nonominia ba ei odoꞌo guta ona tonaa ei rawaniꞌa manumanu, maꞌuaa Lazarus namina hafelo gutana. Ma eꞌeni, ina gutafarawani yeni ma yoi na tonaa fiꞌimu. 26 Ma hepalodiai, na mina walalo waraꞌafalaa watolaa haigua ma yoi ma hini i diꞌininaa yeni ma dinaa aꞌamu, paꞌaa lomi talana ma ana lomi ba hemea aꞌamu i nopaꞌimai aꞌa haigua.’
27 “Ina ware, ‘Na aleꞌena oꞌama, aloaa Lazarus ba nei dinaa humuu amau 28 uaa na paꞌi hapaini lofuu. Ware aꞌana ba neidii warefaꞌaiaa roꞌou ba roneiꞌaa nomai aꞌa feni gufuu fiꞌia.’
29 “Abraham na ware, ‘Moses ma ei mamamaꞌa, roꞌou yei aꞌa roꞌou ma ei lofumu ronei guainaa roꞌou.’
30 “Ina ware, ‘Lomi, oꞌama Abraham, maꞌuaa, nabaa hemea aꞌa ei maꞌea i dinaa aꞌa roꞌou, rowe filoginaa naranaraa roꞌou.’
31 “Ina warenaa aꞌana, ‘Nabaa lomi rona guainaa Moses ma ei mamamaꞌa, ana lomi ba roꞌaa nara ba paꞌaa faꞌua nabaa hemea i asiꞌaa aꞌa ei maꞌea.’”