2 Roꞌaa nomai hefiꞌa Pharisee ba roꞌaa mania, rona iꞌigai, “Na rawani aꞌa fei law ba nemea wawane i disuminaa mei harona?”

3 Ina ware, “Tamanu ei di warefaweꞌiaa Moses aꞌa hamuꞌodu?”

4 Rona ware, “Moses na ugainia ba nemea i neꞌinaa hepalo neꞌia ma alofatatalainaa mei harona.”

5 Jesus na ware, “Siꞌei ba na waiwai tabaa hamuꞌou, Moses na neꞌifanaa hamuꞌou feni law feni. 6 Maꞌuaa eni i mamara feni malagufu, mei Haidaa ‘na bigiꞌaa lagua—wawane ma pifine.’ 7 Siꞌeni paꞌafina ba hemea wawane, i diꞌininaa amana ma inana ma fihupuꞌai aꞌa harona^a 8 ma laguꞌawe pigioinaa hepalo. Siꞌei, fai lomi ba lagua helagui maꞌuaa hemea. 9 Hee, tamanu mei Haidaa na fihupuꞌinia, nemea neiꞌaa alagia.”

10 Ma roꞌaa gutadiai laloo humu, ei otalai nenerana, rona iꞌigainaa Jesus aꞌa fei. 11 Ina ware, “Naꞌaa hemea wawane i suminaa harona ma lalainaa nemeadiai pifine, ina fiharoharoipaꞌai aꞌana. 12 Ma nabaa mei pifine i disuminaa mei harona ma lalaidinaa nemea wawane, ina fiharoharoipaꞌai.”

13 Ei ramaꞌa, roi dugalao ei baduu aꞌa Jesus ba nei idoaa roꞌodu, maꞌuaa ei otalai nenerana, rona pauninaa roꞌodu. 14 I fanunuia aleꞌei Jesus, lomi napoꞌo niꞌeniꞌe. Na warenaa aꞌa roꞌodu, “Fanoramii roꞌodu aꞌau ma apuna pauninaa roꞌodu, uaa fei haparaiaa mei Haidaa, gufuu ena mau ramaꞌa aleꞌeni eni baduu. 15 A warefaꞌuainia aꞌa hamuꞌodu ba hini lomi i tonaa fei haparaiaa mei Haidaa aleꞌei hemea pusuꞌo baduu, lomi ba iwe waduꞌai.” 16 Ma ina poroꞌaa ei baduu, augaa panina pafoo roꞌodu ma haweginaa roꞌodu.

17 Ma ba i aunu Jesus, na ponimai aꞌana hemea, na fapasiꞌunaa duꞌuna i maꞌana ma iꞌigai, “Mena rawaniꞌa feroia, apaꞌaa bigiꞌaa tamanu ba a tonaa fei harenua lomi i pedutoo?”

18 Na ware Jesus, “Tani o ware ba yau rawaniꞌa? Lomi hemea rawaniꞌa, uniaa mei Haidaa. 19 Ona aida fei Law: Apuna foꞌafamaꞌe, apuna fiharoharoipaꞌai, apuna fafanao, apuna uꞌusifi, apuna susuani ma onei guainaa wareaa amamu ma inamu.”

20 Ina ware, “Mena feroia, minaa ena, namina fanimaꞌaia ena ui badui nopaꞌamii wagieni.”

21 Jesus na fanununaa aꞌana ma na haguia. Ina ware, “Hepalo manumanu otaa paꞌi. Nowau, aloaa minaa ena manumanu ona paꞌi ma fanaa ena lomi rona paꞌi ma owe paꞌi fananamaiaa manumanu i gufu pafea. Ma ona bigidigia, nomai ma nenerau.”

22 Aꞌa ei, na nafaꞌaa paruna. Na aunutonaa faloloaꞌiana uaa na paꞌi watauda manumanuna.

23 Jesus na diarai ma warenaa aꞌa ei otalai nenerana, “Na paꞌaa waiwai aꞌa ei rona paꞌi watauda manumanu ba roꞌaa waduꞌai aꞌa fei haparaiaa mei Haidaa!”

24 Ei otalai nenerana, rona baꞌarofo aꞌa ei wareana. Maꞌuaa Jesus na warediai, “Ena naꞌuu, a warefanaa hamuꞌodu ba napaꞌaa waiwai waduꞌaiaa fei haparaiaa mei Haidaa!^b 25 Na maduta aꞌa fei camel ba i waduꞌaipaꞌi laloo fei maꞌahiꞌu laraa mei i paꞌi watauda manumanu ba i waduꞌainaa fei haparaiaa mei Haidaa.”

26 Ei otalai nenerana, rona baꞌarofoꞌapoidiai ma fiwarewarei, “Naꞌaa aleꞌei, hini i tela?”

27 Jesus na fanununaa aꞌa roꞌou ma ware, “Aꞌa ramaꞌa, lomi na maꞌatalaa maꞌuaa, abaa aleꞌei aꞌa mei Haidaa, uaa minaa ena manumanu, rona maꞌatalaa aꞌana.”

28 Peter na warenaa aꞌana, “Haiꞌounamina rawaꞌaꞌafinaa minaa ei manumanu ba haiꞌou nenegio.”

29 Jesus na ware, “A warefaꞌuai aꞌa hamuꞌodu, hini i diꞌininaa humuna, o lofuna, o agina, o inana, o amana, o naꞌuna, o ei poduna, uaa ba i nenerau ma fei rawaniꞌa warea, 30 i tonaa aleꞌena hefa puꞌudiai aꞌa feni au feni (ei humu, lofu, agi, ina, naꞌu ma podu-maꞌuaa ei haperararaia ro nofinimai aꞌa eꞌei) ma wagii fei au i nomai roꞌaa tonaa fei harenua lomi i pedutoo. 31 Maꞌuaa watauda, ena roꞌou rawarawa, roꞌawe dinaa nene ma ena mugi, roꞌawe oanaa maꞌa.”

32 Roꞌei talainaa Jerusalem, Jesus na aimaꞌa ma ei otalai nenerana, rona maduofo maꞌuaa ei ramaꞌa, ei roꞌaa nenegia, rona maꞌau. Na dugiꞌuꞌuginaa ei hefua ma helagui ma na warefanaa roꞌodu tamanu rowe bigiꞌia aꞌana. 33 Ina ware, “Oꞌaa dinaa Jerusalem ma mei Naꞌuu Ramaꞌa, rowe fifaninia panii ei famamoaa humuu mei Haidaa ma ei feroiaa law. Rowe dududuia ba nei maꞌe ma fifaninia aꞌa ei Gentile 34 ma rowe hararasinia, huwia, hafugia ma foꞌafamaꞌeia. Nenee oduꞌai arewaa iwe asiꞌaa.”

35 Siꞌei James ma John, laguei naꞌuu Zebedee, laguna dinamii aꞌana. Laguna ware, “Mena feroia, haiguna nunuminio ba onei bigiꞌia aꞌa haigua fei iꞌigaiaa haigua yoi.”

36 Ina iꞌigai, “Tamanu fei ba a bigiꞌia aꞌa hamugua?”

37 Laguna ware, “Onei fagutanaa hemea haigua i pepei maꞌaumu ma hemea, i pepei mauwimu aꞌa fei haweramu.”

38 Na ware Jesus, “Lomi hamuna apaꞌaa tamanu ena hamuꞌei iꞌigainia. Haa, hamuꞌaa hunupaꞌia fei bara, fei una hunumia ma hamuꞌaa pudugufaipaꞌi aꞌa fei pudugufaiaa fiꞌia, fei una pudugufai wagina?”

39 Laguna ware, “Haiguna hawia.”

Na ware Jesus, “Hamuꞌaa hunupaꞌia fei bara, fei ba a hunumia ma pudugufaipaꞌi wagii fei pudugufaia yau na pudugufai wagina, 40 maꞌuaa fei ba hamuꞌaa guta pepei maꞌau o mauwiu, abaa manumanuu ba a ugainia. Ei gutana ei, na udediginaa gutaa ei ramaꞌa ei rowe tonia.”

41 Roꞌaa guainia ei hefua, rona siba aꞌa James ma John. 42 Na harofipuinaa roꞌou Jesus ma ware, “Hamona aida ba ei paꞌaa famamoaa ei Gentile, rona fasuinaa ei maroaa roꞌou ma ei paniaa panii roꞌou, ana rona fasuinaa roꞌou. 43 Abaa aleꞌei aꞌa hamuꞌodu maꞌuaa, hini ba i bauanai aꞌa hamuꞌou, inei nafii aꞌa hamuꞌou 44 ma hini ba i rawarawai, inei humuwai minaa ei ramaꞌa. 45 Uaa ena i nomai mei Naꞌuu Ramaꞌa, ana abaa ronei nafii aꞌana maꞌuaa ba hia, nafi ma ba i fanaa fei harenuana aleꞌena ponoponoo watauda.”

46 Rona dinamii Jericho ma ba roꞌaa diꞌininaa fei gufu Jesus ma ei otalai nenerana fipuinaa fei baua gupuu ramaꞌa, hemea pudawerai, harana Bartimaeus (mei naꞌuu Timaeus, baduu wawane) na gutanoinoi papaa fei tala. 47 Ma i guainia ba fi nomai Jesus, mei Nazareth, na unaꞌaa ma haroharo, “Jesus, mena Naꞌuu David, faloloaꞌinau!”

48 Watauda na hotaꞌia ma ware ba nei babanini maꞌuaa na haroharoꞌa-poidiai, “Mena Naꞌuu David, faloloaꞌinau!”

49 Jesus na u ma ware, “Harofia.”

Siꞌei, rona haronaa aꞌa mei pudawerai ba, “Onei niꞌeniꞌe! Ufalarai! Ifi harofio!” 50 Na suminaa fei hawana, na palaꞌarofonaa pinena ma dinamii aꞌa Jesus.

51 Na iꞌiginia Jesus, “Tamanu nunumiamu ba a bigiꞌia aꞌamu?”

Mei pudawerai na ware, “Rabbi, nunumiau ba a fanunupaꞌi.”

52 Na ware Jesus, “Nowau. Fena weꞌiaa naranaramu na farawaninio.” Ana ei ua, na fafanunupaꞌi ma na talaineneraa Jesus wagii fei tala.