4 Laguna aunu ma laguna paꞌaa fei baubara donkey yei ano, i maꞌaa tala, rona habeꞌia aꞌa fei talaa wawaduꞌi. Laguꞌaa alagia, 5 hefiꞌa rona ufalarai yei, rona iꞌigai, “Tani hamuꞌaa alaraa fena baubara donkey?” 6 Laguna ware ana aleꞌei ei wareaa Jesus aꞌa lagua. Ma lomi rona papaꞌaa lagua. 7 Ma laguꞌaa foraialoo fei baubara donkey aꞌa Jesus ma suminaa ei hawaa lagua pafona, ina guta pafona. 8 Watauda, rona hafeninaa ei hawaa roꞌodu i tala ma hefiꞌa, rona hafeninaa ei raraa haihai, ei balaiaa roꞌou podu. 9 Ei rona aimaꞌa ma ei rona nenegia, rona haroharo,

“Hosanna!”^a

“Haweginaa mei i nomai aꞌa fei haraa Mei Fasu!”

10 “Haweginaa fei haparaiaa mei amaa oꞌou David, fei fi nomai!”

“Hosanna i pafea!”

11 Jesus na waduꞌainaa Jerusalem, dinaa aꞌa fei humuu mei Haidaa ma didiarainaa minaa ei manumanu. Ma siꞌei ba namina fafidii, na asiꞌaa ma aunufipui aꞌa ei hefua ma helagui, dinaa Bethany.

12 Fei arewaa augu ei roi diꞌininaa Bethany, na bao Jesus. 13 Ina fanunupaꞌaa hepalo haihai figi, na raua maꞌida, namina habe mamaugi. Siꞌei, na aunu ba i maꞌa ba na paꞌi fuana, o lomi. I nopaꞌalao, na maꞌapaꞌia ba lomi fuana, uaa abaa au fuaiaa ei figi. 14 Siꞌei, ina warenaa aꞌa fei haihai, “Lomi nemea ba i hananadinaa fuamu.” Ma ei otalai nenerana, rona guainia ei fi ware.

15 Roꞌaa paꞌaa Jerusalem, Jesus na waduꞌainaa malalaa fei humuu mei Haidaa. Ma na unaꞌateteaa ei ponoponoꞌa ma ei aloꞌaloa yei. Ina hadupoponainaa ei tawaa ei filogia mugoo poꞌi ma ei gutanaa ei roi alo pune, 16 ma na apunainia ba nemeadiai neiꞌaa talaiꞌailao i malalaa fei humuu mei Haidaa ma notonaa ei manumanuu aloa. 17 Ma ei fi feroinaa roꞌou, ina ware, “Haa, lomi rona neꞌinia ba:

18 Ei famamoaa humuu mei Haidaa ma ei feroiaa law, rona guainaa fei ma unaꞌaa ma labaginaa hepalo tala ba roꞌaa foꞌafamaꞌeia, uaa rona mamaꞌau aꞌana, hamatee minaa fei gupuu ramaꞌa, ronamina malefa aꞌa ei feroiana.

19 I nofafilao, rona^b asiꞌaa aꞌa fei baua gufu.

20 Mafufuo, ei roi talailao, rona fanunupaꞌaa fei haihai figi namina maꞌepaꞌai, ei warana amaꞌanaa noꞌuna. 21 Na nonominia Peter ma na warenaa aꞌa Jesus, “Rabbi, maꞌaia! Fei haihai figi, fei ona umuia, na maꞌe!”

22 Jesus na ware, “Narafaweꞌi^c aꞌa mei Haidaa. 23 A warefaꞌuai aꞌa hamuꞌou, nabaa nemea i warenaa aꞌa fei maugeni aleꞌei ba, ‘Aunu, wi siminaa ana yoi agi,’ ma lomi na hamamagua fei naranarana maꞌuaa napaꞌaa weꞌi naranarana ba fei wareana i bigipaꞌi, iwe bigipaꞌi aꞌana. 24 Siꞌei, a warefanaa hamuꞌou ba tamanu iꞌigiaa hamuꞌou wagii fei lafulafua, narafaweꞌi ua ba hamona todigia ma iwe oanaa manumanuu hamuꞌou. 25 Ena hamona ulafulafu ma naꞌaa hamona paꞌi pidawaiaa hamuꞌou aꞌa nemeadiai, futoaa hafeloꞌana ba mei Amaa hamuꞌou pafea ana i futoaa ei hafeloꞌaa hamuꞌou.” 26\f + \fr 11:26 \ft Hefiꞌa neꞌia ba ei hafeloꞌaa hamuꞌou. 26 Maꞌuaa naba lomi hamona futoaa hafeloꞌaa nemeadiai, ana lomi ba mei Amaa hamuꞌou pafea i futoaa ei hafeloꞌaa hamuꞌou.\f*

27 Rona hadiweꞌidimai Jerusalem ma ei fi tatalai Jesus i malalaa fei humuu mei Haidaa, ei famamoaa humuu mei Haidaa, ei feroiaa law ma ei bauaniaa gufu, rona nomai aꞌana. 28 Rona iꞌigai, “Aꞌa tamanu forafora ba o bigiꞌaa eni manumanu eni? Ma fanaa hini yoi feni forafora ba oꞌaa bigiꞌia?”

29 Jesus na ware, “Ana a iꞌigainaa hamuꞌou hepalo iꞌigaia. Doꞌo warefanau ma awe warefanaa hamuꞌou ba aꞌa tamanu forafora ba a bigiꞌaa eni manumanu. 30 Fei pudugufaiaa John—norai pafea, o nomai aꞌa ramaꞌa? Ware fanau!”

31 Rona fiwareinia dupuaa roꞌodu aleꞌei ba, “Nabaa o ware ba, ‘Norai pafea,’ iwe iꞌigai, ‘Ma tani lomi hamona nara ba faꞌua ei wareana?’ 32 Maꞌuaa nabaa o ware ba, ‘Nomai aꞌa ramaꞌa’....” (Rona maꞌauaa ei ramaꞌa, uaa minaa ei ramaꞌa, rona nara ba John, paꞌaa mamamaꞌa.)

33 Siꞌei, rona warefanaa Jesus, “Lomi haiꞌouna aida.”

Na ware Jesus, “Ana lomi a warefanaa hamuꞌou ba foraforaa hini fei a biginaa eni manumanu eni.”